Amos 3 - Katɔti Ɔku Kedee

¹ “Israelƒuɔ, ami nékpo na lɛ́ƒɔ-mii lɛ́siku Egyipteƒuɔ enu kemmo. Nsu bise atu na binu bɔdɔnku bɔni na mɔɔdɔnku-mii.

² Amii kani na lɛ́ƒuna na kayawi kadi bekyuli ƒui akɔ, anwuɔsu na ndubo-mii kɔtu bɔni na bina alaekpidi ɔsu.”

Kakɛ Na Katɔti Kenye Udiene Ɔɔbla Kabla

³ Nkyuli inyɔ belesie taasala na bana kasusu kalábla kenwi.

⁴ Gyata ulakwanyi na lɛku kemmo si úteƒie tɔ ebuo. Lɛni kani gyata ɔkɔdi ulebo lɛdi na nwuna lɛtakpɛ ubu kemmo si útakɛ lɛla lɛdi ulákun.

⁵ Aasɛ ulenu buƒie si átakywɛ-nwu kamia. Na lɛni kani na kakpagyuɛ kaláta keeke si lɛla lɛdi lítanu-ka kemmo.

⁶ Lɛlɔ lɛɛtɔ́ ukyuli biala na ɔma kemmo si bávwi kekpo lise. Na ɔgbankpi ulalɛ na ɔma ɔdi kemmo si Unwoti útatuna.

⁷ Na Katɔti ulábla lɛla lɛdi ntu ɔ́ka nwuna kenye udiene bɔsu.

⁸ Liƒu lɛɛda ukyuli biala si gyata ɔɔkwanyi. Na si Katɔti ɔ́su lɛla lɛdi ni, usi na ukyuli biala ɔkɛ na ɔdubo-ni lɛsa bɔkɔ.

Katɔti Ɔdubo Samaria Udu Bɔyila

⁹ Bɛkɔ litemi lɛmɛni lɛsa bite batɔnkune bani na beli kɔgyumanakɔ kɔni na bátu na Asiria ku Egyipte kɔlɔ lɛlɔ bɛnii, “Bɛsala lɛlɔ na Samaria abi eli na bɛnu ɔda bubo lɛlɔ tadi ku ekpidi lidu bamba lɛni udu na bekyuli baabla na mmɔ.”

¹⁰ Unwoti ɔnini, “Bekyuli bamɛni baaagyi kalɛ na baabla lɛbuni. Béyu bekyuli, na béƒie ani báƒɔ ɔkplu kemmo bénwini bana lɛlakɛ.”

¹¹ Ɔmɛni ɔsu na Unwoti úse kenye ka badubɔka-ma bakya na bekisine babwɛ bavi bana kɔgyumanakɔ na beduo beyu bana akɛla ani na bebo mmɔ ƒui.

¹² Kalɛ na si gyata úƒie koƒonu na kakɛ blii kani na baƒonu ɔdane ɔɔnu taaƒɔ́ ni, lɛni geen na ɔdubo bɔlɛku Samariaƒuɔ, na bana ɛlɛɛ kani ndubo bukeli na bakɛ ngba ku bana ala ekuku ani na badububile bebu.

¹³ Unwoti Katɔti Ɔyikune Ƒui néte-mi kenye kamɛni ɔnii nkɔ-ka lɛsa na liti libo-mii ɔda, amii Yakob kaba kemmo bebi ɔnini,

¹⁴ “Na limeyi lɛni lɛlɔ na ndubo Israelƒuɔ kɔtu bɔni na bana ekpidi ɔsu ni, ndubo Betel akpabi ammɔ ƒui bɔbwɛ na lɛƒɛ ese ani na bálɛ akpabi ammɔ lɛlɔ ƒui lɛva kalɔ na ɔtumu akɔ.

¹⁵ Ndubo bina kɔyɔ ku kaƒɛndi uwi lɛtɔ ƒui bɔbwɛ buwi kalɔ. Na bina lɛtɔ lɛni na bíti ɔtunkpɛ bɛ́kya-ni bɔdia ku lɛgbanya libendi lɛmmɔ ƒui ndubo-ni bɔbwɛ ƒui. Ami Unwoti násu!”