Amos 1 - Katɔti Ɔku Kedee

Katɔti Ɔdubɔni Kadi Bekyuli Kɔtu

¹ Unwoti ɔ́su Amos kenye kadi uwi ɔni na útaanu baƒonu lɛlɔ na Tekoa. Na kenye kammɔ kadanku Israel na uwi ɔni na Usia ɔɔdi lɛga na Yuda kalɔ lɛlɔ, na Yeroboam Yoas ubidi ɔɔdi lɛga na Israel kalɔ lɛlɔ akwa anyɔ kama asa na kalɔ kadubɔkunku.

² Nwuna kenye kammɔ ndi ɔnini, “Unwoti ɔɔkwanyi taasiku Sion na kudu kɔni mɔɔsí Yerusalem mmɔ kɔ́ya na bebuo kadikɔ livo lɛmmɔ ƒui lɛ́yɛyɛ. Na livo lɛni na liwi Karmel Kɔbi lɛlɔ ƒui líkpi.”

Katɔti Ɔ́tɛku Siria Litemi

³ Unwoti ɔnini, “Ndubo Siriaƒuɔ kɔtu bɔni na bana ekpidi pii ɔsu na lɛɛɛdubo mina kasusu bɔvumana. Ɔsika béminime ligyigba lɛni lɛlɔ na bébo kɔbwɛlɛ bálɛ bávinku Gileadƒuɔ lɛlɔ.

⁴ Anwuɔsu ndubɔya na ogya ubakyula Ɔga Hasael kesii ku kagyumanakɔ kani na Ɔga Ben-Hadad ɔ́tu.

⁵ Na ndubɔƒɛ Damasko ɔma ɔban kayakun lɛbuala lɛni baabala-ka. Na lɛyila Awen Kɔwɛ bekyuli udu ku Bet-Eden ɔga. Na ndubɔya na bekpo na beƒie Siriaƒuɔ ƒui batɔlɔku besienku Kir kalɔ lɛlɔ. Ami Unwoti násu.”

⁶ Unwoti ɔ́sɔ ɔ́su ɔnini, “Ndubo Gasaƒuɔ kɔtu bɔni na bana ekpidi pii ɔsu na lɛɛɛdubo mina kasusu bɔvumana. Bétiku mina bekyuli ɔ́si ɔma útédu ɔma na béti-ma béye béte Edomƒuɔ aani bana kabla bablane.

⁷ Na ɔmmɔ ɔsu ndubo bɔya na ogya ubakyula Gasa awodu na ubile bana ɔma kɔgyumanakɔ kɔni na bátu ƒui.

⁸ Na lɛyila Asdod ɔma udu ku Askelon ɔga na lɛdu Ekronƒuɔ na Ƒilistiƒuɔ ɔdi ɔ́sa. Ami Unwoti násu!”

⁹ Unwoti ɔnini, “Ndubo Tiroƒuɔ kɔtu bɔni na bana ekpidi pii ɔsu, na lɛɛɛdubo mina kasusu bɔvumana. Bétiku mina bekyuli ɔ́si ɔma útédu ɔma na béti-ma béye béte Edomƒuɔ aani bana kabla bablane na bátadi bana unwi bɔbla bunyimi lɛlɔ.

¹⁰ Anwuɔsu ndubɔya na ogya ubakyula Tiro ɔma na ubile bana ɔma kɔgyumanakɔ kɔni na bátu.”

¹¹ Unwoti ɔnini, “Ndubo Edomƒuɔ kɔtu bɔni na bana ekpidi pii ani na ɔ́bla ɔsu, na lɛɛɛdubo mina kasusu bɔvumana. Bádu ama alati bana lɛlɔ bekyuli ku lɛnungyie lɛni ɔsu na bátakana na banu-ma kɔnyana ina blii suɛ.

¹² Anwuɔsu ndubɔya na ogya ubakyula Teman ɔma na ubile nwuna kɔgyumanakɔ kɔni na ɔ́tu na Bosra.”

¹³ Unwoti ɔnini, “Ndubo Amonƒuɔ kɔtu bɔni na bana ekpidi pii ɔsu na lɛɛɛdubo mina kasusu bɔvumana. Ɔ́wawa baƒɔndane ɔ́du na Gilead kalɛ na uti kalɔ kammɔ ɔsu.

¹⁴ Anwuɔsu ndubɔya na ogya ubakyula Raba ɔma na ubile nwuna kɔgyumanakɔ kɔni na ɔ́tu. Na bekisine badubo kudu butaabla na bebekpo-ma aani ɔƒɛƒɛɛ ɔni mɔɔkya ligede.

¹⁵ Na bani Amon ɔga ku nwuna benengu batɔlɔku. Ami Unwoti násu!”