Ala Alɛdi 1 28 - Katɔti Ɔku Kedee

Dawid Úti Kakpakɔ Kammɔ Bɔtu Bɔta Úte Salomo

¹ Dawid ɔ́lɔ kelisa kadi na Yerusalem. Na Israel benengu ku adua benengu ku aban bagadine benengu ku bekpone batɔnkune ku benengu bani mɔɔnu lɛga kadikɔ ala ammɔ ƒui lɛlɔ ku bani mɔɔnu bebuo lidu ƒui lɛlɔ ku lɛga kadikɔ kammɔ lɛku batine ku bekpone bani na bebo ogya geen na bébo.

² Amu Dawid ɔ́ta únye na ɔ́su ɔnini, “Mina kadi bekyuli, bise atu na binu, lɛ́wia ka lɛtu kesii kani na bɔdubuti Bunyimi Adaka ɔmmɔ buse na buteesie mmɔ lɛnɔ taatákpa Unwoti bula Katɔti. Na lɛ́ɛklibi ala ani na nka ndubuti lɛtu kakpakɔ kammɔ líse.

³ Nsu Unwoti úni na útete-mi kuƒi ka ami lɛtu ɔtɔ ɔmmɔ lite-nwu, ɔsika ɔ́su ɔnii lɛ́ɛdu bekyuli pii na kekpokɔ lɛ́gya.

⁴ “Unwoti Katɔti ɔ́ƒuna Yuda ka nwuna kɔdua kɔbla lili na Israel ƒui. Na ɔ́si Yuda ɔmmɔ kemmo na ɔ́ƒuna mina ɔti kaduli. Na mmɔ na ɔ́ƒuna-mi ka linwini Israel ɔga. Na úse kenye lɛnɔ ka mina kaba kemmo bebi badubo lɛlɔ butaadi aani baga kalɛ.

⁵ Unwoti kusɛ kusɛ ɔ́siaku-mi na lɛ́wɔ bebi pii. Nsu Salomo na ɔ́ƒuna ka ɔdi lɛga na Israel na mina kama.

⁶ Mmɔ na Unwoti ɔ́su-mi ɔnini, ‘Ƒula ubi Salomo ndubo mina kakpakɔ bɔtu buti bute-mi ɔbu. Na Salomo ɔdubɔbla mina ubi na ami lɛbla nwuna ɔti.

⁷ Na si útenwini kama útakya-mi na ɔsiaku-mi kama siin ɔɔdi mina litemi lɛlɔ ni, nwuna lɛga kadikɔ kaaadubo bɔsa bɔyii udu kudii.’

⁸ “Mina banwa, amii ndi Unwoti bekyuli. Na uwi ɔni na Katɔti ulie-bu akɔ aani bina ɔmanyene kalɛ ni, mɔɔwia ka bise kenye ka bɛdubɔsia ulu biala lɛlɔ na bɛsiaku-nwu kama siin na bɛdi nwuna litemi lɛlɔ. Na biti kalɔ kamɛni binwini amii ku bina kaba kemmo bebi kadi na bilie mmɔ uwi ƒui.

⁹ “Mina ubi Salomo, mɔɔsu-ɔ kpakplaa ka kya Unwoti lili kalɔ uwi biala na asiaku-nwu kama siin na adi nwuna litemi lɛlɔ ku ƒula kayi ku kasusu ƒui aani kalɛ na lɛ́bla. Ɔgyi ƒula lili kemmo kasusu ku kakali biala na ada aabla ala. Anwuɔsu si énwini ésie-nwu kudɔ ku kayi ƒui ni, ɔdubunu ƒula buvele. Nsu si énwini kama ákya-nwu ni, anwu lɛnɔ ɔdubuni-ɔ uwi ƒui.

¹⁰ Awɔ na Unwoti ɔ́ƒuna ka atu kakpakɔ na bekyuli bataakpa-nwu. Nye kpakplaa na abla kabla kani na bákya-a kɔnu.”

¹¹ Amu ka Dawid ɔ́tɛmi ɔ́wɔlɔ ni, úti kakpakɔ bɔtaa bɔmmɔ úte Salomo. Na ɔdanku kakpakɔ lɛtɔ geen lɛmmɔ ku kakpakɔ lɛgbanya ku ala kesekɔ ku kalɔ lɛtɔ ku katu taasia lɛtɔ ku katɔma kedee kammɔ ku likpidi kɔtu bɔni budie akpala kablakɔ.

¹² Na Dawid úti kakpakɔ kaduli kammɔ bɔtaa lɛnɔ úte Salomo na kadanku kalɔ ƒia kani na kewi kámana kakpakɔ kammɔ ku lɛtɔ lɛni kemmo na badubuse kakpakɔ egulabi ku ala ani náƒɔ kuye mmɔ ku etela ani bédie bése sɛsɛɛ béte Katɔti.

¹³ Ɔmmɔ kama ni, Dawidi úti ulu ɔni na ɔdubuti ule bakpane ku Lewiƒuɔ ɔkya kasala esu esu kemmo ku kabla kani lɛnɔ na ɔdi ka babla na kakpakɔ kammɔ kemmo ku kalɛ na bada ala ani na beeti taabla lɛkpa lɛlɔ kabla mmɔ kaduɛ.

¹⁴ Na ɔ́su Salomo sika ugyiedi ku ɔƒualadi bumomo bɔni na badubuti babla akpala lɛlɔ ala kedee ammɔ.

¹⁵ Na adanku lɛsogya ku lɛsogya lɛmmɔ kasiakɔ ƒui lɛnɔ.

¹⁶ Na abambadi ndi sika ugyiedi ala kasiakɔ ɔni lɛlɔ na baasia bodobodo kedee ɔmmɔ ku sika ɔƒualadi ala kasiakɔ

¹⁷ ku kɔvili kɔni na baatu lɛna ku akyami ku lɛɛƒɛɛ

¹⁸ ku sika ugyiedi lɛbi lɛni lɛlɔ na baasia oloƒui taakyula ku sika ugyiedi kɛɛkɛ ɔni bávɔ na bebweyi bani na bebo avwi na baalɔ-ma Kerub mmɔ benye-nwu lɛlɔ na anwu ndi kebila kani mbi Bunyimi Adaka kedee ɔmmɔ lɛlɔ.

¹⁹ Amu na Dawid ɔ́su Salomo ɔnini, “Unwoti údie ɔ́tina-mi kalɛ na ɔɔwia ka batu nwuna kakpakɔ kammɔ.

²⁰ Anwuɔsu sia anu na akya kayi na abla lɛla biala aani kalɛ na bɔtaa bɔmɛni bɔɔtina. Na tayia na enu lɛnɔ ataƒɛ-ɔ, ɔsika Unwoti mina Katɔti ɔdubo-ɔ bubunku na abla lɛla biala lɛni na ɔdi ka abla na eti awɔlɔ kakpakɔ kammɔ bɔtu kalɛ na bekyuli beteesie mmɔ taatákpa-nwu.

²¹ Bakpane ku Lewiƒuɔ bammɔ ƒui béete-ma bana kabla na kabla bablane bani na bagyi bana kabla lɛlɔ ala kaduɛ mmɔ ƒui benye kagyumana bete bana kabla na bekyuli bammɔ ku bana batɔnkune ƒui badubɔbla lɛla biala na básu-ma.”