Ala Alɛdi 1 22 - Katɔti Ɔku Kedee

¹ Na uwi ɔmmɔ ni, Dawid ɔ́su ɔnini, “Kesii kani na kakpa kamɛni kakya na ɔlɛka batu Unwoti Katɔti kakpakɔ kammɔ. Na mɛni kani na badubɔtu nwuna lɛkpabi lɛmmɔ.”

Dawid Ɔ́klibi Lɛlɔ Ka Ɔtu Kakpakɔ

² Amu na Dawid úbo ɔda ɔnii baƒɔ bani ƒui na bakya Yerusalem bebo. Na úte-ma kabla ka bekulo atabi atimbɔ ani a badubuti batu kakpakɔ kammɔ.

³ Na ɔ́kɛ abuala pii ani na badubɔkywɛɛ babla kɔbwalɛ kɔni na badubuti baka ligyii ku ala bamba ku ɔni na bakya lɛkpunu lɛmmɔ. Na úte bekyuli bammɔ abuala egyiedi ani unu na balakana bɔkɔku muedi.

⁴ Na ɔ́wia egyii kpakplaa ani ndi sida na békulo-nya eku eku básiku Sidon ku Tiro béboku.

⁵ Na ɔ́su ɔnini, “Ɔlɛka batu Unwoti kakpakɔ kamɛni na kebomo na kataadia bɔnu na kaƒɔ lɛnyi na kesii biala na bekyuli ƒui anumi. Nsu ka mina ubi Salomo ɔdi ɔnamu na nwuna kasusu kétebimi tɔ na ala amɛni lɛlɔ ɔsu ni, ɔlɛka lɛnu ka atula ammɔ ƒui ása ese kalɛ na beti batu ɔtɔ ɔmmɔ.” Ɔmmɔ ɔsu na Dawid ɔ́bla ala amɛni asa na úkpi.

Dawid Ɔ́tina Salomo Kalɛ Na Ɔtu Kakpakɔ Kammɔ

⁶ Dawid ɔ́ya na bátálɔ ubidi Salomo béboku na ɔ́su-nwu ɔnii ɔtu kakpakɔ ute Unwoti Israel Katɔti.

⁷ Ɔ́su-nwu ɔnini, “Mina ubi, lɛ́yɔ ka nka lɛtu kakpakɔ lite Unwoti mina Katɔti kesii kani na badubutaakpa-nwu.

⁸ Nsu na uwi ɔdi návi kemmo ni, ɔ́su-mi ɔnini, ‘Dawid, áadu bekyuli ágya na éekpo kekpo lɛnɔ ágya. Anwuɔsu ɔɔɔdi awɔ na ɔdi ka atu mina kakpakɔ.

⁹ Nsu si uwi ɔni na ƒ'ubidi úbenwini ɔga ni, ndubo bɔya na ɔkɛ keyi buɛɛ na nwuna lɛga kadikɔ ƒui kemmo. Na ƒ'ubidi ɔni ndubo lɛga lɛmmɔ bɔdi ndi Salomo. Ɔsika na nwuna lɛga bɔdi uwi ni, ndubɔya na keyi buɛɛ kakya nwuna lɛga kadikɔ kammɔ kemmo na Israel ƒui.

¹⁰ Salomo ndubo mina kakpakɔ kammɔ bɔtu. Na ɔdubɔbla aani ubi ute-mi na ami lɛbla aani ɔti lite-nwu. Na geen ni, nwuna kaba kemmo ubi ndubo Israel lɛga butaadi uwi biala.’

¹¹ “Mina ubi Salomo, muuvele nnii Unwoti, ƒula Katɔti, ɔsiaku-ɔ na ɔdi nwuna linyese lɛlɔ na ubunku-ɔ na atu kakpakɔ kammɔ ete-nwu.

¹² Ute-ɔ lɛnunda ku lɛlati kalɛ na adi Israelƒuɔ lɛlɔ asiaku nwuna ɔda bubo lɛlɔ.

¹³ Si ádi ɔda bubo bɔni na Unwoti úte Mose lɛlɔ ni, ala adubɔtɛ ete-ɔ. Nye kpakplaa na akya kayi na taya na enu áƒɛ-ɔ uwi ɔdi iye ayia lɛla lɛdi lɛnɔ.

¹⁴ “Lɛ́ɛwia atula ani ƒui na adubuti abla kabla kammɔ líse. Na ɔƒaani ni, ebo sika ugyiedi antabi aƒo bonwu leevu akpa mpim ine unu na use ute-ɔ ku sika ɔƒualadi lɛnɔ antabi aƒo bonwu leevu akpa mpim aavlene unu na use ute-ɔ. Na ligyii lɛni ƒui kabla na adubɔbla lɛnɔ lɛ́wia-ni líse. Na atabi ese ku abuala kpakplaa ku abuala egyiedi ani unu na balakana bɔkɔku lɛnɔ ese. Na si lɛla bamba lɛdi lɛnɔ lɛkya na asɔ aawia ni, awɔ ye-mi.

¹⁵ Na líiti atabi bɔnwi ku bɔtu kabla kammɔ lɛ́kya bekyuli badi kɔnu. Na banwine ku bekyuli bani na bagyi

¹⁶ sika ugyiedi ku ɔƒualadi ku abuala egyiedi ku abuala kpakplaa lɛlɔ kabla kaduɛɛ ƒui ni, bemomo na benye kagyumana ka babla kabla kammɔ. Anwuɔsu ɔkya-a kudɔ bo lɛlɔ na ese kabla kalɔ. Muuvele Unwoti nnii ɔsiaku-ɔ na ƒula kabla kammɔ bɔbla kemmo.”

¹⁷ Ɔmmɔ kama ni, Dawid úbo Israel batɔnkune bammɔ ɔda ka bebunku Salomo.

¹⁸ Na Dawid ɔ́su ɔnini, “Unwoti bula Katɔti úbunku-mi na lɛ́di bekyuli bani ƒui na nka belie mɛni asa búbo ƒui lɛlɔ. Na ɔƒaani ni, úte-ɔ keyi buɛɛ ku atu bɔyɔ ɔ́siku ƒula bekisine ƒui kudɔ. Na kalɔ kamɛni ku bénwini Unwoti ku nwuna bekyuli kadi.

¹⁹ Nu Unwoti ƒula Katɔti litemi na adi-ni lɛlɔ ku ƒula kayi ƒui ku kɔyu ƒui lɛnɔ. Na ese kabla kalɔ na kakpakɔ kammɔ lɛlɔ na eti abu nwuna lɛnyi kalɛ na Bunyimi Adaka ɔmmɔ ku ala ani lɛlɔ kabla na baabla na kakpakɔ mmɔ ƒui ni, akɛ-nya kesekɔ.”