Agba 7 - Katɔti Ɔku Kedee

Bɔlɛ Na Beleku Basɔnɔdine Lɛlɔ

¹ Ubi, ƒie mina ɔda bubo da kaduɛ, na aklibi-mu ese na bɔƒɔ-ɔ lɛlɔ kemmo.

² Da-mu kaduɛ na adubulie ngba. Gyumana-mu aani kalɛ na adubɔgyumana ƒula lɛnumi.

³ Nyimi-mu da ƒula animi lɛlɔ, Na enweni-mu akya ƒula kayi kemmo.

⁴ Su lɛnunda anini, “Awɔ ndi mina ɔnwani ulekubi.” Na alɔ ala kalɔ bunu anii ƒula lɛlɔ ukyuli.

⁵ Na ala amɛni adubudie-ɔ na uleku ɔsɔnɔdine enu kemmo. Na edie-ɔ na uleku ɔni mɔɔlɛ́ ɔgyani kama asɔnɔtɛ ani mɔɔní ukyuli taatákya likpidi kemmo kudɔ.

⁶ Nnye mina ƒansili kudɔ dii, na lɛ́nu lɛ́vinku kalɛmikɔ liƒi lɛdi.

⁷ Na lɛ́nu bani na bana kasusu kásɔ mmɔ. Badi bakloƒu bani nási baakɔ́ mɛni akɔ unwi. Na ɔɔɔgyi lɛbuni ku likpidi kavumana.

⁸ Okloƒu ɔmɛni ɔ́sia ɔblɔnu ɔdi lɛlɔ ɔɔyu úsela okodo ɔdi. Na ulu ɔmmɔ ɔkɛ ɔ́vi uleku ɔmɛni ɔtɔ kudɔ.

⁹ Na ɔ́ɔbla kadi buɛɛ na use susuusu uwi ɔni na keyi kadaku buti.

¹⁰ Uleku ɔdi ɔ́lɛ úbasiaku-nwu na ɔ́da lɛlɔ aani ɔyalɛ kalɛ na ɔda ɔnana ɔkwɛ.

¹¹ Ɔsika uleku ɔni mbo kudu na kɔƒa kulekpo na ɔdi. Na ulélie kaduli uwi ɔdi.

¹² Ɔgbami ku eyeya kani na adubɔnu-nwu Na ɔkɛ amadɔ amadɔ ɔɔƒulu taavi.

¹³ Uleku ɔmɛni ɔ́kya okloƒu ɔmmɔ kɔgbu na ɔ́ƒiɔ-nwu kenye. Na úƒi anumi ɔ́kun na ɔ́su-nwu ɔnini,

¹⁴ “Lɛ́bla mina unwi bɔbla akpala. Na ɔmwi lɛ́wɔlɔ lɛla biala ɔkɛnku kenye kani na líse lɛlɔ.

¹⁵ Anwuɔsu na lɛ́lɛ líbo mbasiaku-ɔ Lɛ́sia-a anu geen na ḿbanu-ɔ sɔsɔ!

¹⁶ Lɛ́ɛva mina atɛla líse. Adi kpɛtɛ kpɛtɛ abuni ani nási Egyipte kalɔ lɛlɔ ku kunweni lidu na adi.

¹⁷ Na lɛ́ya na ɔnyi ƒɛƒɛɛ ɔ́ƒɔ mina atɛla ammɔ. Nnɔmii bɔni baalɔ mira ku lidu bamba na lɛ́kuna líwi-nya lɛlɔ.

¹⁸ Bo, na butátɛ na bunu lɛlɔ emini usien umodi wetédu kadi bugye. Na bɔƒuƒuɛ lɛlɔ kaduɛ ku bɔyɔ!

¹⁹ Mina ɔgyani uuubo kaduli. Úsie ulugyuɔ ɔdi.

²⁰ Úyile nwuna egulabi kavumi ku egulabi na úti ɔda ulu. Na ɔɔɔdubo tɔ wetédu kɔbuli kumodi ƒui!”

²¹ Ɔmmɔ ɔsu uleku ɔmmɔ ɔ́tɔlɔ-nwu útásiaku ulu bamba lɛlɔ ku nwuna atɛ mini mini ammɔ. Na nwuna katɔlɔ ɔsu úƒie-nwu kayi.

²² Na únwini ɔ́siaku-nwu kɔnakunwi aani ebuo ɔni bésela batádu iye akwa ɔni nánu kakpagyuɛ,

²³ na unye ɔgya ka lɛtula lɛƒuala-nwu kayi. Na útavumanaku aasɛ ɔni muuveyi taatánu kamia na ɔɔɔgyi ɔnii ɔgbankpi kemmo na úsela.

²⁴ Mina bebi, binu ala ani mɔɔsu-mii Na bise atu na ala ani mɔɔsu eduo-nya kemmo kaduɛ.

²⁵ Bitaya na bina kayi katɔlɔ-mii na bɛsiaku-nwu kama. Na bitayii ulu na bɛsiaku ulu ukpidi ɔni lɛlɔ na úti-mii ɔɔsiaku lɛlɔ.

²⁶ Ɔsika anwuɔsu na banana pii báyii udu, na bani na ɔ́ɔdu lɛnɔ bemomo.

²⁷ Uleku ɔmɛni ɔtɔ ni, kaƒiɔtɔ ulu unengudi na ɔdi. Na ɔtɛ úsie kekpine ubu kalɔ kemmo lɛtɔ lɛmmɔ kemmo.