Agba 4 - Katɔti Ɔku Kedee

Lɛnunda Lɛ́ƒɔ Kuye Litulo Lɛla Biala

¹ Mina bebi, bise atu na binu ami bina ɔti ɔda bubo. Bise atu na bɛkɛ ala kalɔ bunu.

² Ala ani ndi etemila geen na áƒɔ kuye na mɔɔtina-mii. Anwuɔsu bitenwini kama bitakya-nya.

³ Uwi ɔni na ndi ɔnamu na lɛ́kya mina ɔti kaduli, na ami kani ndi mina uni ubi ɔnanabi ni,

⁴ Ɔ́tina-mi ala na ɔ́su-mi ɔnini, “Ƒie mina etemila da kpakplaa ku ƒula kayi ƒui. Di mina ɔda bubo lɛlɔ na adubulie ngba.

⁵ Nu ka ebo lɛnunda ku ala kalɔ bunu. Na tayiƒala mina etemila iye edeyi-nya kudɔ esie kesii bamba.

⁶ Tenwini kama takya lɛnunda, na lɛdubo-ɔ bɔgyumana. Yɔ lɛnunda na lɛdubo-ɔ lɛlɔ bɔnu.

⁷ Lɛla linengudi ƒui lɛni na ɔlɛka awia ndi lɛnunda. Ina ka ɔdanku ƒula lɛla biala ni, nu ka ebo ala kalɔ bunu na lɛla biala na aabla kemmo.

⁸ Ya lɛnunda lɛ́ƒɔ-ɔ kuye geen na lɛdubɔkɔliku-ɔ katɔ. Kya-nwu kɔgbu na ɔbu ɔdubɔkya-a lɛlɔ.

⁹ Ɔdubudi lɛka lɛni mɔɔdia bɔnu ɔsia-a lili na akɛ kagabwa kani muukeye.”

¹⁰ Ubi, nu-mi litemi na aƒɔ lɛla lɛni na mɔɔsu-ɔ. Ɔmmɔ ɔdubɔya na elie ngba na akwa emomo-ɔ.

¹¹ Lɛnunda lilu na mɔɔtina-a. Na lɛtɔnku-ɔ lɛsiaku lilu lɛbuni lɛlɔ.

¹² Na si akɛ eesié ni, elekpuulo. Na si usi lɛnɔ na akɛ eekeli ni, alatutu.

¹³ Da mina ala ani na lɛ́tina-a na tanyonu-mu Da-mu kaduɛ, ɔsika ala ammɔ ndi ƒula ngba.

¹⁴ Tasiaku balalane lɛgba kanyakɔ. Na tasia lilu lɛni na bekyuli bekpidi bakɛ.

¹⁵ Die-ma kasiakɔ ƒui atu na tasia mmɔ munu munu Sɔ bana lilu ƒui lɛlɔ na enwini asia ƒula kasiakɔ bamba.

¹⁶ Ɔsika bekyuli bekpidi balátuna bɔtɛ talɛɛ útédu ka bábla likpidi. Likyulikpi bɔbla liiyú-ma lɛlɛlɛ wetédu ka bebile ukyuli ɔdi ngba.

¹⁷ Ulikplu bɔbla búnwini-ma adila, na kalala bɔbla ndi bana ntu bɔni na baaní!

¹⁸ Ukyuli ɔni nse siin kavinkɔ keekeye aani ɔtanta kadi kani négye kadubo na keekeye teebu utédu ka ɔbla nwaa ƒui.

¹⁹ Nsu bekyuli bekpidi kavinkɔ aka kese aani ubu ɔni nse suu geen. Na balati lɛla lɛni mɔɔyá na beetulo taagbanta.

²⁰ Ubi, nu lɛla lɛni mɔɔsu-ɔ kaduɛ. Na ƒula kasusu kasia litemi biala lɛlɔ geen.

²¹ Taya na mina etemila avi-ɔ anu. Mmomu ya na eduo-ɔ kayi kemmo geen.

²² Ɔsika adi ngba ete ukyuli ɔni nákɛ-nya, na aayá na awɔ ukyuli umodi ɔmmɔ aakɛ́ ɔlɔkplu.

²³ Na lɛla lɛni ntulo ƒui ni, da ƒula kayi kemodi kammɔ kaduɛ, ɔsika ngba libiɔ lɛni mɔɔyu ntu kadi.

²⁴ Ya na kɔyalɛtɛ kusie kama ƒui na ƒula kudɔ Na etemila ani muusé lɛlɔ ƒui atalɛ-ɔ kenye.

²⁵ Taanu ƒula anumi ligeen uwi biala si akɛ, na ƒula anumi asia kesii kani na ésela kani.

²⁶ Sia ƒula kasiakɔ anu kaduɛ ka kese-ɔ siin asa na ánya ésela. Nu ka ɔdi ulu kpakplaa na ulegyiileku-ɔ.

²⁷ Tedeyi tesie kɔmii iye kɔdianu. Na edie ƒula ɔgba na likpidi bɔbla kemmo.