Agba 30 - Katɔti Ɔku Kedee

Agur Úbo Agba

¹ Yake ubidi Agur ɔ́su kenye kadi úse. Ɔ́su Itiel lɛla lɛdi. Na ɔ́su Itiel ku Ukal ɔnini, “Lɛlɔ lítu-mi, O Katɔti, na lɛ́bla kpɛtɛ kpɛtɛ.

² “Ami ndi bekyuli ƒui akɔ ukyuli ɔni na ɔɔɔgyi lɛla lɛdi. Na liiibo ala kalɔ bunu bɔni na bekyuli bebo.

³ Ńtatɛya lɛnunda lɛla lɛdi, iye lɛlati lɛdi na anwu ɔni nse kedee mmɔ lɛlɔ.

⁴ Ɔma nákɔ úsie katɔ na ɔ́sɔ únwini úbo? Na ɔma násala ɔƒɛƒɛɛ ɔ́kya nwuna lɛkɔkɔ kemmo? Ɔma násala ntu ƒui ɔ́kya nwuna awu bonwu ɔni mbi-nwu lɛlɔ kemmo? Na ɔma nátu kalɔ kammɔ lɛvi ƒui únyene kalɔ útédu kana kawɔlɔkɔ? Dɛ na baalɔ anwu ku ubidi? Su-mi si agyi!

⁵ “Lɛla biala na Unwoti ɔ́su ni, ɔkɔ uuubo-nwu kemmo. Ɔdi lɛgyumanala ute bani nátamiku-nwu.

⁶ Teti lɛla bamba lɛdi tebunku nwuna etemila lɛlɔ. Si ɔɔɔdi lɛni ni, ɔdubɔdɔnku-ɔ na enwini ɔkɔ ɔnyine.

⁷ “O Unwoti, alakpa anyɔ adi kani na muuvele-ɔ. Na teni-mi ala ammɔ bute asa likpi.

⁸ Die katuala ku ɔkɔ bɔnyi mina lɛlɔ ƒui. Tete-mi kɔwaba, na tete-mi lɛkɛ lɛnɔ. Mmomu te-mi mina limeyi adila kani.

⁹ Ɔsika ɔƒɛni kalɛ lɛ́kɛ lɛmmɔ lɛdubumo-mi lɛvili na lini-ɔ, na ndubuye nnini, ‘Ɔma ndi Unwoti?’ Na si kɔwaba lɛnɔ nda-mi kɔ́vili ni, ɔƒɛni kalɛ ndubo buyu na bekyuli balabu mina Katɔti lɛnyi kedee.

¹⁰ “Tebile kabla ɔblane ɔdi tete nwuna ɔtɔlati. Si ábla lɛni ni, ukyuli ɔmmɔ ɔdubo-ɔ buwida na adubɔƒɔ lɛla lɛmmɔ kayu.

¹¹ “Bekyuli badi beewida bana bati, na belete bana beni kusɛ kusɛ.

¹² Baanu lɛlɔ ka badia bagya nsu geen ni, beesé lɛlɔ geen na bátalɛ bɔkpi.

¹³ Baakɔliku lɛlɔ katɔ teetuloku lɛlɔ na baanu lɛla biala tapii.

¹⁴ Bana kenye anyi etulo kuwii, na lɛsika blii yayaaya nlɛ-ma linungla, kalɛ na baduli bawabane bebweli balɛku kalɔ kammɔ lɛlɔ. Na bayila bani ƒui mɔɔyaki ala balɛku bayawine akɔ.

¹⁵ “Ntu kebweyi kadi kakya na kebo bebi belekubi inyɔ. Ama bana keku kani ndi ‘Te-mi! Te-mi!’ “Alakpa atɛ adi akya na elemo kudii. Na ene adi aaagyi bɔsu anii, ‘Ɔ́bɔ!’

¹⁶ Kaƒiɔtɔ ku udinkɔ ku kalɔ kani na ntu bulaƒɔ-ka kudii ku ogya ɔni mɔɔkywí teebile ala na ulásu ɔnii, ‘Ɔ́bɔ!’

¹⁷ “Anumi ani mɔɔnu ɔti ɔnusɛ teedumi na ulánu ɔnii ɔ́manku ka unu uni litemi ni, baasɛ bekpidi bani nkya kɔwɛ kemmo ndubo bebedie-ma anumi na livuo kemmo na begbini baduli-ma bebweli ƒui.

¹⁸ “Na alakpa atɛ adi akya na ana lɛlɔ lɛɛbla-mi dɛye dɛye. Na ene adi anya neeenu-nya kalɔ.

¹⁹ Kalɛ na kɔdigbo aasɛ uuveyi taavi kayaa, ku kalɛ na kɔlakpi kuusié taavi lɛtakpɛ lɛlɔ, ku kalɛ na ɔkɔlɔ bonwu ɔɔkɛ́ kasiakɔ na ntu anumi, ku kalɛ na ɔnana kayi kaayɔ́ uleku.

²⁰ “Na ɔni nsɔ mɔɔbla-mi yaa ndi kalɛ na uleku ɔsɔnɔdine ɔɔbla ala. Kalɛ na ɔɔdi teeni kenye na ɔsu ɔnii, ‘Ńtabla lɛla likpidi lɛdi.’

²¹ “Alakpa atɛ adi aakya kalɔ liƒu kpakpaakpa, na ene kalɔ na ulakana lɛlɔ budie.

²² Ukyuli ɔdi kabla ɔblane ɔni nénwini kadi ɔga ku ɔdɔlɔdi ɔni mbo adila pii geen

²³ Kalɛ na uleku ɔni na bekyuli balayɔ ɔɔkɛ́ kɔgya. Kalɛ na ulekubi kabla ɔblane ɔɔƒɔ́ nwuna kɔduni ɔgya teelieku.

²⁴ “Alakpa ene adi akya kayawi na ese blii suɛ, nsu ana lɛnunda lísie ɔgyu geen.

²⁵ Balalɛ badi bebuo bani neeebo ɔlɔkplu, nsu baaklibi adila teese lɛlɔ na kaƒɛndi.

²⁶ Besi udu bebuo badi bakya na beeebo ɔyikun, nsu beedie libu na atakpɛ kemmo na baakɛ́ keliekɔ.

²⁷ Baalɔlɔ beeebo ɔga, nsu baakɛ otogyi buni kemmo atɔ asia.

²⁸ Basamuda belede buƒie, nsu adubɔnu-ma na baga lɛgbanya.

²⁹ “Na alakpa atɛ adi akya kayawi na bana bɔnya bɔɔtina lɛgadi. Na ene mɔɔkɛ na lɛgadi kemmo.

³⁰ Gyata, bebuo ƒui ɔga ɔni na lɛla biala lilagyila-nwu ɔtɔtɔ na usie kama.

³¹ Akɔkɔ ɔgyani ku ketukpa ku ɔga ɔni na nwuna bekpone báka bámana-nwu.

³² “Si ábla adɔlɔla na ákun lɛmɛnɛ iye eeti likpidi kasusu ni, tebo kɔnu kayi! Ti enu bi kenye ku kɔƒa.

³³ Kalɛ na si eebó akɔ lɛnyi ntu na uumi taayu ɔkplu, na si lɛla lɛdi lɛ́wɔ-ɔ enwu na ɔɔdá ni, lɛni kani na kɔnyi kuuboku kadɔ.”