Agba 27 - Katɔti Ɔku Kedee

¹ Takun lɛmɛnɛ na kɔnaadi kadi kani mebo lɛlɔ, ɔsika aaagyi lɛla lɛni mebo kɔnaadi.

² Temwi lɛlɔ. Ya na bekyuli bemwi-ɔ mmomu.

³ Lɛtabi libo unu na kɔnwinimi kuse gbɛn, nsu kayi kemmo ɔlɛ ɔni na ɔdɔlɔdi ɔɔkya ukyuli kayi ni, ubo unu utulo alakpa anyɔ ammɔ ƒui.

⁴ Kɔnyi kɔdanku ulikplu na livoƒi lise aani ketu buyi. Nsu ala ani na kogyulo kuubile ni, ɔdi ulakana-ku kenye bunye.

⁵ Si édie lɛla lɛdi álɛ ukyuli kɔnakunwi ni, ɔdia utulo si anii aayɔ́ ukyuli na bɔbɛ kemmo.

⁶ Si ƒula ɔkpana ɔ́kya-a ɔlɛ lɛlɔ ni, ɔdia utulo ɔni na ƒula ukisine úbakya-a kɔgbu ɔnii bɔƒianku na ɔda-a.

⁷ Si ukyuli úmo ni, uwɔ muedi ɔsɔ ulati-nwu emini. Nsu ukyuli ɔni na kɔka kɔɔda momoomo ni, ina dɛ na lɛla lɛdi libo ɔdu muedi ni, lɛɛyu-nwu emini.

⁸ Ukyuli ɔni náyii ɔtɔ ulu ni, use aani aasɛ ɔni náyii nwuna lɛyu ulu.

⁹ Bɔlɛ bɔni na ƒula ɔkpana ɔ́lɛ-ɔ na bɔ́ƒɔ-ɔ anu ni, buse aani ugyulo ƒɛƒɛɛ ɔni baakyula iye nnɔmii ƒɛƒɛɛ bɔni baawɛɛ.

¹⁰ Tenwini kama takya ƒula bakpana ku ƒ'ɔti bakpana na adubɔkɛ bebunkune uwi ɔni na ala étulo-ɔ, na elésie ƒula ɔtɔ kemmo bekyuli kudɔ. Ɔsika ɔdia ka esie ƒula ɔkpana ɔni nde-ɔ kudɔ utulo ka esie ƒula ɔtɔ kemmo ukyuli ɔni nkya ɔgyu kudɔ.

¹¹ Ubi, ɔɔɔdi ebiti blii ndubo-mi bɔda si ákana na énwini ɔnundane. Ɔmmɔ ɔdubɔya na lɛkana linye lɛsiaku bekyuli bani mɔɔtu-mi kenye na beedie-mi bɔƒiɔ.

¹² Ukyuli ɔbuni ɔni mɔɔsia lɛlɔ anu ni, ɔɔkana na ɔɔnu ɔgbankpi ɔni ndubo ubalɛ teemene na ɔɔgyumana lɛlɔ. Nsu bekyuli bani na bana kasusu kásɔ ni, baakɛ gyoli gyoli teetéduo ɔgbankpi ɔmmɔ kemmo.

¹³ Sia anumi na aƒɔ lɛla lɛdi enyene kama asiku ukyuli ɔni muunye ɔƒɔ ɔdi kayu kenye kudɔ. Na si uleku ɔsɔnɔdine kayu kenye na ukyuli ɔdi ɔnii uunye ni, ya na ɔka kayu kadi bɔƒɔ buse.

¹⁴ Si áta ɔtanta tutuutu na aakpali ƒula ɔdukɛne na aava teegyele-nwu ni, ɔdubuti-nwu kɔnyi mmomu.

¹⁵ Uleku unyeyɔne lɛlɔ liiƒí livo teetulo ɔnantu wɛɛwɛɛ ɔni náƒɔ kadi limeyi limodi.

¹⁶ Na si anii aabala-nwu ni, ubo ɔkplu utulo ka abala ɔƒɛƒɛɛ na ɔda bukpo ɔya, iye eti kɔnu edu nnɔ ada.

¹⁷ Kalɛ na lɛbuala lɛɛdɔ́ lɛbuala ni, lɛni kani na ɔkpana ɔɔklibi ɔkpana.

¹⁸ Kabla bablane bani mɔɔnu kɔdingyii kɔdi lɛlɔ bebo kuƒi ka badi-ku ebi. Lɛni kani na kabla bablane bani mɔɔgyumana kabla ɔlati ɔdi kabla ka katɛ ni, badubo lɛyuƒɔla bɔƒɔ.

¹⁹ Kalɛ na ukyuli ɔkana na ɔnu nwuna anumi na ntu kemmo ni, lɛni kani na ukyuli kayi keedie ukyuli umodi ɔmmɔ udu taatina.

²⁰ Kukpi ku lɛla lɛni mɔɔyila lɛla lɛdi udu belemo. Lɛni kani na kayawi ala ani mɔɔda ukyuli ɔkwɛ elemo-nwu.

²¹ Ogya kemmo baakya sika ugyiedi ku ɔƒualadi taanu-nwu bɔdia. Lɛni kani na ukyuli bumwi buudie nwuna udu taatina.

²² Si éti badɔlɔdi éwi kaawɛ kemmo na égyuo-ma muedi ni, alakana bana kɔdɔlɔ bule bɔsiku bana kɔdɔlɔ kudɔ.

²³ Sia ƒula bebuo anumi kaduɛ na eti ƒula kayi ƒui anu-ma lɛlɔ.

²⁴ Ɔsika lɛlakɛ lilese uwi ƒui. Na kagabwa lɛnɔ kelébi ukyuli lili taasi kaba útédu kaba.

²⁵ Si ékulo bebuo livo aklibi ese kama ni, anwu asa adubɔkɛ adila ete-ma,

²⁶ na ƒula baƒonu badubɔbla linwini yuu na bedi adi. Na adubuye ƒula bese lɛnɔ na eti eye katumalɔ.

²⁷ Na bese bammɔ badubɔyu anyi ntu pii bete awɔ ku ƒula kaduli bekyuli ku kabla bablane.