Agba 25 - Katɔti Ɔku Kedee

Salomo Ɔ́sɔ Úbo Agba Bamba Adi

¹ Salomo ɔ́sɔ úbo agba bamba, na Ɔga Hesekia kasusu bakyane bani nkya Yuda kalɔ lɛlɔ bénweni-nya bése.

² Unwoti ala ani na ɔ́bɛla bekyuli ni, anya mɔɔtina kalɛ na úbomo na uukeye. Na ɔga ɔni mɔɔwia-nya kalɔ taati ni, ɔɔƒɔ́ lɛnyi na baabu-nwu.

³ Ukyuli ɔdi ɔɔɔgyi kalɛ na katɔ kákuku kétédu, iye kesii kani na kalɔ lɛnɔ kágyu kétédu, iye ɔti lɛla lɛni nkya ɔga ɔdi kasusu kemmo.

⁴ Si ákya sika ɔƒualadi ogya na kɔtakɛ kɔni nányi kɔ́kpi mmɔ kɔ́lɛ-nwu lɛlɔ ni, ugyii ɔni na ukyuli biala ɔɔnu ka ɔ́ƒɔ kuye mmɔ únwini kabla lɛblala teete ɔkywɛne ɔmmɔ.

⁵ Lɛni kani na si bekyuli bekpidi bálɛ ɔga ɔdi lɛga kadikɔ ni, nwuna lɛga kadikɔ kadubuse kaduɛ na bataabla ala siin na ulu lɛlɔ.

⁶ Takpali ɔga tasu anii uteenu lɛla lɛni na adubo bɔsu iye anwanɛ lɛlɔ anii aakɔ́ esie kesii kani na benengu bani ntulo-ɔ beli.

⁷ Nye na bakpali-ɔ bene banii, “Ni de kenengudikɔ mɛni,” utulo ka babɔku-ɔ batɔlɔku keliekɔ kenengudi kani na aanwanɛ ka elie ku kɔƒa. Tanu lɛla biala,

⁸ na eti litemi lɛmmɔ esienku litemi katɛkɔ, ɔsika kɔƒa kɔdubo-ɔ bukpo si útádi-ɔ ubo.

⁹ Si ƒula ɔkpana ɔ́ƒiɔ-ɔ ni, awɔ ku-nwu bɛsu-ni kani na ɔwɔ mmɔ. Tatásu ukyuli bamba na edie lɛbɛla lɛmmɔ keyi.

¹⁰ Si ɔɔɔdi lɛni ni, awɔ ɔmmɔ ɔlati adubo ebenwini lɛmala na bekyuli anumi, na adubɔnu ka bada atɛ ammɔ baatɛmi uwi ndi uwi.

¹¹ Kasusu kani beete ukyuli na uwi ɔbuni lɛlɔ use aani adingyii ebi ani négyie kaduɛ na bátɛ-nya bákya sika ɔƒualadi lɛkyami kemmo.

¹² Si édie ukyuli bɔƒiɔ na éti-nwu ásia ulu ɔbuni lɛlɔ ni, ɔdi lɛla lɛbuni geen ute ukyuli ɔni muunú bɔlɛ bɔmmɔ aani asɛɛ abuni ani na béti sika ugyiedi bábla.

¹³ Ukyuli ɔni muusié bɔtala taatábla kalɛ kani na básu-nwu ni, nwuna ala aayu kayi buɛɛ aani kalɛ na etubankɛ aabla kadi kani na káƒɔ ogya buɛɛ. Bekyuli bammɔ udu baayá na bekyuli bani bɔtala na beesié mmɔ ayu aakɛ́ lɛlɔyɔ.

¹⁴ Ukyuli ɔni muusé kenye kekpludi na ulábla taasia lɛni ni, use aani ulɔyɔ ku ɔƒɛƒɛɛ ɔni naaakana ɔnantu bɔna.

¹⁵ Kayi buɛɛ kadubɔkana na kenwini ɔgabi ɔdi kasusu. Na lɛdi buɛɛ butemi bɔdubɔkana na bɔdi ukyuli ɔni mɔɔkyaku-ɔ unyeƒi lɛlɔ.

¹⁶ Si ákɛ uwɔ ni, tadi-nwu taavili amu ɔdububo-ɔ ɔlɛ.

¹⁷ Si eesié ƒula ɔkpana kudɔ busie busie ni, ɔsɔ ɔɔɔdubo bɔdia na bete-ɔ éduo.

¹⁸ Ɔkɔ bɔnyi taasia bekyuli uuduo teetulo ka eti kadadi iye kewii iye lɛtula atu ukyuli.

¹⁹ Si éti ƒula kayi ásia ukyuli ɔni na balaƒɔ taadi lɛlɔ ni, use aani si lɛnyi lɛɛkunku-ɔ na ada-ni aanwánta iye akɛ eesié ɔgba ɔni násɔ-ɔ lɛlɔ.

²⁰ Si ukyuli ɔkya kɔnyana kemmo na eedie ebiti lɛnu taakya-nwu atu ni, ɔɔdu lɛlɔ teetulo si éƒie kɔyɔ awu áƒɔ ukyuli kudɔ na kɔyɔ uwi iye akɔ mma akya-nwu ɔlɛ kemmo.

²¹ Si kɔka kɔɔda ƒula ukisine ni, te-nwu adila na ɔdi. Si utukwɛ mɔɔda-nwu ni, te-nwu ntu na ɔni.

²² Ɔsika si ábla lɛni ni, édie ogya ku agyabi éwi-nwu lili. Na Unwoti ɔdubɔƒɔ-ɔ kayu.

²³ Kalɛ na ɔƒɛƒɛɛ ɔni muukpó taasi katɔ taayu uuboku ɔnantu ni, lɛni kani na katɛ ɔtɛne keeke ɔɔkya ukyuli kɔnyi.

²⁴ Si awɔ lɛti elie ƒula lɛyu lɛdi kemmo kpoo ni, ɔdia-a utulo ka awɔ ku uleku ɔni mɔɔyɔ́ ɔgyani kenye ɔdi bɛkya lɛgbanya lɛdi kemmo.

²⁵ Kenye buni kani mɔɔsí ɔgyu teebo ukyuli kese aani ntu bamamba bɔni mɔɔdú utukwɛ.

²⁶ Si bekyuli babuni ku bekpidi básala lɛlɔ na ɔbladu buɛ ɔdi lɛlɔ ni, use aani kalɛ na beebwiiile ntu bɔdi iye beti aba taakya libiɔ lɛdi kemmo.

²⁷ Si uwɔ ɔɔɔdia bɔdi bɔvili ina ka ubo emini ni, lɛni kani na ɔɔɔdia ka ukyuli elie ataakali lɛla lɛni na ɔlɛka bete-ɔ na ƒula kenyekɔ kenye.

²⁸ Ukyuli ɔni na ulakana lɛlɔ lɛlɔ bɔdi ni, use aani ɔma ɔni na awodu ani mɔɔgyumana-nwu ábwɛ.