Agba 23 - Katɔti Ɔku Kedee

– 6 –

¹ Si awɔ ku lɛlɔ ɔdine bɛ́sala bɛɛdi ni, taanu kaduɛ na lɛla lɛni na uusé-ɔ anumi lɛlɔ.

² Na si aayɔ́ bɔdi pii ni, na akɔsi bɔdi!

³ Na ala mini mini ani na ɔɔla teebese-ɔ anumi akɔsi-ɔ ɔkwɛ bɔda. Ɔsika ɔƒɛni kalɛ katɔlɔ lɛkwɛ lɛdi lɛkya-nwu kemmo.

– 7 –

⁴ Tetu lɛlɔ anii eenwíni ɔlakɛne. Bi ɔsu na ɔlɛka eteebile lɛlɔ uwi?

⁵ Ɔsika lɛlakɛ lɛɛyii na ukyuli anumi, na lɛɛtɔlɔ aani kalɛ na aasɛ uuveyi taatɔlɔ!

– 8 –

⁶ Bekyuli bani na bebo lɛnumi ni, awɔ ku-ma bitelie bitadi. Na bana adila mini mini atada-a ɔkwɛ.

⁷ Badubɔsu-ɔ banini, “Di na ani,” nsu ɔɔɔdi ku bana kaƒɔ ƒaa. Benye baabu ala ani na aadi akunta kalɛ na édu.

⁸ Na adubo ala abuni ani na béte-ɔ mmɔ ƒui bɔdala budie. Na adubɔyɔ ka nka átagya-ma enu na lɛƒɔndia lɛni na banii bábla-a mmɔ ɔsu.

– 9 –

⁹ Tebile ƒula uwi na badɔlɔdi lɛlɔ anii aalɛ-ma, ɔsika lɛnunda litemi lɛdi biala lɛɛɛdubo-ma anu bɔƒɔ.

– 10 –

¹⁰ Tagyu bati ɔmii ugyii ɔdi na eƒie bekpinebi kalɔ aƒɔ anii beeebo ubunkune ɔdi ɔsu.

¹¹ Ɔsika bana Ɔƒɔne ubo ɔyikun geen. Na anwu ɔmmɔ ɔlati ndubɔwia-a litemi.

– 11 –

¹² Nu ka ábla ásiaku ala ani na bátina-a lɛlɔ. Na aklibi atu ese na enu lɛlati ala.

– 12 –

¹³ Tada ƒula bebi bɔtɛmiku kalɛ na badia taya. Baaadubo bukpi si ébo-ma kugyiimi.

¹⁴ Si áni-ma kɔtu ɔlɔna lɛlɔ ni, ɔkana udie-ma na kukpi kemmo.

– 13 –

¹⁵ Mina ubi, lɛlɔ lɛdubɔyɔ-mi geen si nka ebenwini ɔnundane.

¹⁶ Sɔsɔ ni, mina kayi kadubɔma si línu ka aatɛmi etemila geen ani nkɛ ulu lɛlɔ.

– 14 –

¹⁷ Alaekpidi bablane lɛlɔ litegyie-ɔ anumi. Mmomu taayia Unwoti uwi ndi uwi.

¹⁸ Ɔsika ƒula ngba emeyi ani ndubo adubɔyɔku-ɔ, na alasia lɛla lɛdi anu alanɔ.

– 15 –

¹⁹ Ubi, se kɔtu na enu litemi na ada anu. Na aya ƒula kayi kasia ulu ɔbuni lɛlɔ.

²⁰ Tasiaku ntɛ bekpine ku adikpi badine ɔbladu kama!

²¹ Ɔsika kɔwaba ulu lɛlɔ na bakɛ bésela. Lɛlɛɛ bɔlɛɛ pii mɔɔyá na beenyimi adikpi.

– 16 –

²² Ƒ'ɔti ɔni néte-ɔ ngba na ébo kayawi kamɛni kemmo ni, nu-nwu litemi. Na si ƒ'ini ɔ́bi lɛlɔ na uli ɔtɔ ni, teni lɛla lɛni na wasu wasiku lɛla lɛni na ɔ́nu dii lɛlɔ.

²³ Ƒɔ litemi geen bɛla se lɛlɔ, na teti-ni teye. Na ada anu na aya batumini-ɔ kalɛ na anu ala ati kaduɛ.

²⁴ Ubi ɔti ɔni mbo bebi babuni ni, ɔɔnu lɛla lɛni ɔsu na ɔlɛka ebiti ataada-nwu. Bi nsɔ ntulo bɔdia si ebo bebi bani na báda anu.

²⁵ Anwuɔsu ni, bebi, bɛya lɛlɔ lɛyɔ bina bawɔne. Na bɛya na ebiti ada uleku ɔni náwɔ-ɔ.

– 17 –

²⁶ O mina ubi, ti ƒula kayi te-mi. Na ƒula anu asia lɛnunda ulu ɔni mɔɔtina-a lɛlɔ.

²⁷ Uleku ɔyalɛ ni, ubu voo na ɔdi. Na uleku ɔsɔnɔdine ni, ɔgbankpi na ɔdanku.

²⁸ Bɔbɛ na ɔɔbɛ́ teenye taagya bekyuli aani uyune. Na ɔɔnu ulu teete ɔnana ɔni malɛ ulekudi kama.

– 18 –

²⁹ Ukyuli ɔmani udu na kayi kaakpulu? Na ɔmani muukpóku lɛlɔ na ɔkɛ ɔɔdɔ anwu lɛti uwi biala? Na ɔma mɔɔƒɔ́ lɛlɛ lidu lidu na anumi égyie-nwu kɔɔ?

³⁰ Ukyuli ɔmmɔ ulata ntɛ bɔdi kalɔ kudii, ɔsika bɔdi biala bɔdia-nwu.

³¹ Taya na kalɛ na ntɛ avlɔvɔ eeƒuƒuo na aadia bɔnu na bɔɔyu emini lɛnɔ atɔlɔ-ɔ.

³² Ɔsika kawɔlɔkɔ ni, bɔdubo-ɔ lɛlɔ bɔdu aani si kɔlakpi nádu-ɔ, na utulo kɔlakpi kɔni ugyulo kenye mbo ɔkplu geen!

³³ Adubo ana buteegye taanu liƒu ala, na ataatɛmi aani ubuokpine.

³⁴ Na adubo butaagbanta aani ukyuli ɔni nnye ɔkɔlɔ kemmo na ɛpu anumi, na úƒie ɔkɔlɔ kemmo lɛbuli lɛmmɔ ɔda.

³⁵ Na adubo bɔsu anini, “Báƒiɛmi-mi ugyii, nsu útabla-mi lɛla lɛdi. Na uwi ɔni beebó-mi muedi ńtati. Uwi ɔmani na ndubɔta na lɛsɔ ntáni bɔdi?”