Agba 22 - Katɔti Ɔku Kedee

¹ Si élie ngba buni na bekyuli baalɔ-ɔ lɛnyi buni ni, ɔdia utulo lɛlakɛ linengudi. Ɔsika si bekyuli bényene-ɔ keliekɔ kenengudi na ƒula lɛnyi ɔsu ni, ɔdia utulo ka akɛ sika ɔƒualadi ku ugyiedi ƒui.

² Balakɛne ku bawabane ƒui badi likeke na ulu unwi lɛlɔ, na anwu ndi ka Unwoti nédie bana inyɔ.

³ Ukyuli ɔbuni ɔni mɔɔsia nwuna lɛlɔ anu ni, ɔɔnu ɔgbankpi ɔni mebo taatualaku anumi na uunye lɛlɔ kagyumana. Na bani na bana kasusu kásɔ ni, bɔkɛ kani na baakɛ gyoli gyoli teetéduo ɔgbankpi ku lɛbibo kemmo.

⁴ Lɛlɔ kalɔ buboku ku Unwoti bɔyia ulu geen lɛlɔ ɔɔyá na lɛlakɛ ku ɔbu ku ngba buumomo ukyuli.

⁵ Ɔkɔ banyine ni, liyu ku ɔgbankpi mɔɔkya-ma ulu lɛlɔ. Na ukyuli ɔni na ngba bɔ́ƒɔ-nwu kuye ni, uláda udu ɔmmɔ.

⁶ Tina ƒula bebi kasiakɔ kabuni na si bábi lɛlɔ ni, na balasia kesii bamba.

⁷ Kalɛ na balakɛne baadi bawabane lɛlɔ ni, lɛni na bekyuli bani muuvó ala bekyuli kudɔ beenwíni kabla bablane teete-ma.

⁸ Bekyuli bani na litemi lɛlɔ tadi ulu lɛlɔ ebi na baavá na bekyuli akɔ ni, ɔgbankpi ebi na badubo bɔƒɛ. Na bana liƒu lɛni baakya bekyuli na baadi-ma lɛlɔ kenye kadubo buklo.

⁹ Bekyuli bani mbo lɛƒɔndia na beete bawabane ala ni, kusɛ kusɛ ɔdubɔsiaku-ma.

¹⁰ Bɛbɔku bekyuli bani muudumi bekyuli taama bɛlɛku bina akɔ, na kekpo ku kadɔ ku bekyuli budumi bɔdubɔyii ƒui.

¹¹ Ukyuli ɔni mɔɔwia ka nwuna kayi kemmo kese sɛɛn na ɔɔtɛmi lɛƒɔndia etemila ni, ɔdi ɔga ɔkpana.

¹² Unwoti ɔɔgyumana ukyuli ɔni mbo lɛlati, na uubile ɔkɔ ɔnyine kɔkwɛ kɔni na ɔɔkya.

¹³ Ɔkɔsɔne ubo kɔkɔsɔ kɔkwɛ pii na uuti teete lɛlɔ kuƒi na ɔɔsu ɔnini, “Ɔƒɛni kalɛ si lɛ́lɛ lísie ntábla lɛla lɛdi ni, ndubo gyata bɔsiaku na ulu lɛlɔ na ɔdu-mi!”

¹⁴ Uleku ɔyalɛ kenye kemmo kágyu voo aani ubu bonwu ɔdi. Na bekyuli bani naaabla Unwoti lɛyɔla ni, ama ndubo bɔnu buduo ubu ɔmmɔ kemmo.

¹⁵ Ɔnamu ɔni na ɔƒɛni na ɔ́si ɔɔkɔ́ ni, adɔlɔla éyi-nwu lɛlɔ kemmo tɛɛ. Nsu si átumini-nwu kaduɛ ni, ɔmmɔ ƒui ɔɔlɛ́-nwu lɛlɔ.

¹⁶ Ukyuli ɔni na bawabane na ɔɔnya taakya asa na ɔɔkɛ́ taadi iye balakɛne na uute ala kalɛ na ɔkɛ lɛla lɛdi bana kudɔ ni, kɔwaba ndubo-ma buƒie.

Banundane Básu Ala Avlaatɛ Adi

¹⁷ Se atu na enu banundane butemi. Ya na ƒula kayi kasia mina ala ani mɔɔtina-a lɛlɔ.

¹⁸ Ɔsika ɔdia geen ka aya na etemila amɛni eduo-ɔ kayi kemmo ƒui na asia-a unyemi lɛlɔ.

¹⁹ Mɔɔtina-a ala ɔmwi. Geen ni, awɔ mɔɔtina lɛla lɛdi kalɛ na ƒula anu ƒui asia Unwoti lɛlɔ.

²⁰ Línweni ala avlaatɛ adi líte-ɔ, na bɔlɛ ku lɛlati ala sɔɔn na adi.

²¹ Na ulu ɔmɛni lɛlɔ na adubɔsia na ati litemi geen lɛmmɔ. Na adubɔkana na edie lɛla biala kenye ulu lɛlɔ atɔ asia ete bekyuli bani nákya-a kabla kadi kɔnu.

– 1 –

²² Tasia ulu ɔdi lɛlɔ na eyu bawabane anii kɔwaba kɔda-ma ɔsu. Na tasia ulu ukpidi ɔdi lɛlɔ na akɛ bekyuli bani mɔɔyaki lɛla lɛdi lɛlɔ kɔsia na litemi katɛkɔ.

²³ Ɔsika Unwoti uukpó teete-ma. Na ukyuli ɔni makya-ma ɔlɛ ni, Unwoti lɛnɔ ɔdubɔkya-nwu ɔlɛ.

– 2 –

²⁴ Da lɛlɔ mami na bekyuli bani muuti kɔnyi pla pla lɛlɔ.

²⁵ Na si ɔɔɔdi lɛni ni, awɔ lɛnɔ adubɔtɛya-ma na eti ƒula kɔyu akya ɔgbankpi kemmo.

– 3 –

²⁶ Tatákyaku ukyuli ɔdi ɔku kɔnu anii eenye-nwu kama na kayu kadi ɔsu.

²⁷ Si átakana kayu kammɔ bɔƒɔ ni, ƒula atɛla muedi badubɔni-nya bedie-ɔ kalɔ.

– 4 –

²⁸ Teyu ƒula ɔdɔsane ɔdi lɛlakɛ anii aavumana ɔmii ugyii ɔnii na ati bene bálɛ kenyekɔ.

– 5 –

²⁹ Bekyuli bani na ánu ka bebo kogyoklo geen ni, baga kabla na baabla na ɔɔɔdi bekyuli keeke.