Agba 20 - Katɔti Ɔku Kedee

¹ Ntɛ muuboku budumi taama. Na muna bɔda lɛnɔ muuboku kekpo. Anwuɔsu si ukyuli ɔ́ya na ntɛ bɔ́di-nwu lɛlɔ ni, ɔɔɔdubo anu bɔda.

² Ɔga kɔnyi kuse aani gyata bɔkwanyi. Si ákya-nwu kɔnyi ni, ƒula ngba na ákya ɔgbankpi kemmo.

³ Ukyuli ɔni mɔɔda kekpo ni, ɔbu likpose lɛdi nsia-nwu lɛlɔ. Badɔlɔdi kani mɔɔkya ka ogya.

⁴ Si kɔkɔsɔ kɔ́da-a kɔ́gya na átakana na aƒɔ ɔƒɔwi ni, aaadubo edula adi bɔkɛ na edula ɔƒɛwi.

⁵ Etemila buni ani beeti taalɛ ukyuli ni, kayi ɔkwalɛ kemmo na ábɛ akya, nsu banundane baaní-nya taalɛku mmɔ.

⁶ Bakpana pii baasu ka badi bakpana buni bani naaalɛ bana bakpana kama, nsu ɛlɛɛ na badubɔnu na bana akɔ ka baadi bana litemi lɛlɔ sɔsɔ.

⁷ Bekyuli babuni beedie lɛgba lɛni mɔɔtina ka baadi bana litemi lɛlɔ geen. Na bana bebi bani nsia-ma kama ni, bekyuli badubute-ma kusɛ kusɛ.

⁸ Si ɔga ɔdi ɔ́tɛ litemi na uukulo-ni ni, ɔɔkali kenye kani ƒui na bekyuli bédie na litemi lɛmmɔ lɛlɔ taanu, na ɔƒuna ala ƒui kemmo ɔnu asa na ukulo litemi lɛmmɔ.

⁹ Ɔma ndubɔkana bɔsu ɔnini, “Ɔƒɛni amu lɛ́bla mina kayi sɛɛn, na nse kedee ɔsu likpidi lɛdi lɛsɔ lɛɛɛma-mi lɛlɔ?”

¹⁰ Unwoti ukisi beyedine bani mɔɔkɔ́ku ala ulu biala lɛlɔ taanya bekyuli taakya.

¹¹ Lɛnamu uwi ƒui na baanu bebi taati si udu ɔbuni iye ukpidi ndubo-ma bɔkya na bana udu ɔni na béti baakɔ́ kenye.

¹² Atu ani na beenú ku anumi ani na baanu ni, etela na adi na ási Unwoti kudɔ.

¹³ Ukyuli ɔni na aayɔ́ lɛlɛɛ ni, kɔwaba ndubo-ɔ bɔda. Nu nwaa na abla lɛla lɛdi na adubɔkɛ adila pii na adi emo.

¹⁴ Ukyuli ɔni mɔɔwia lɛla lɛdi uye ni, ɔɔní kuye kɔmmɔ kpakplaa, na ɔɔsu ɔnini, “Lɛla lɛmmɔ kuye kútedu mmɔ.” Na anwu mɔɔtina kalɛ na basɔku kuye badi. Na uunwini taakun lɛmɛnɛ ɔɔtina lɛlɔ.

¹⁵ Lɛnunda etemila aaabɔ na áƒɔ kuye lɛnɔ etulo sika ugyiedi ku asɛɛ ani náƒɔ kuye geen.

¹⁶ Nu ka áƒɔ lɛla lɛdi ényene kama ásiku ukyuli ɔni muunye ɔƒɔ kama na nwuna kayu ɔsu. Ya na baka kayu kadi bɔƒɔ bute-ɔ na ɔƒɔ ɔni kayu kenye na ɔdi uunye lɛlɔ.

¹⁷ Bodobodo uyudi ɔɔyu emini geen si étu-nwu kenye, nsu uunwíni atabi si uwi ɔni na adaku bɔnwanta.

¹⁸ Ukyuli kɔkwɛ kɔni na ɔɔkya kabla kadi lɛlɔ kaatɛ si úye kasusu. Tata kekpo si bátaka-a kasusu bute.

¹⁹ Kɔtɛ keeke ɔtɛmine uugyingya kɔbɛtɛ. Anwuɔsu tadiku ukyuli ɔmmɔ udu kɔkpana.

²⁰ Ukyuli ɔni muuwida ɔti iye uni ni, nwuna ngba ogya uuni.

²¹ Si ɔnamu úyile nwuna kadikɔ kani na ɔti úse-nwu bɔƒɔ ni, kusɛ kusɛ ulásiaku-nwu taatáwɔlɔ.

²² Tasu ukyuli ɔdi anini, “Ndubɔƒɔ-ɔ likpidi lɛni na ábla-mi kayu.” Ya na Unwoti ɔtɛ-ni ute-ɔ.

²³ Ukyuli ɔni na ulakɔku lɛla liyedi ulu lɛlɔ ni, Unwoti ulayɔ-nwu litemi. Na lɛkɔkula lɛni beeti taanya ukyuli taakya ni, liiƒí Unwoti livo.

²⁴ Unwoti mɔɔtɔnku bekyuli na bana ngba ulu busie kemmo. Na ukyuli ulakana nwuna ngba ulu ɔni na uusié kalɔ bunu bɔwɔlɔ.

²⁵ Si átaka lɛla lɛdi lɛlɔ bɔbu bɔnu ni, tababla tese Unwoti kenye kadi. Ɔsika si átakana-ni bɔbla ni, ɔgbankpi ɔkya-nwu kemmo.

²⁶ Si ɔga ɔnundane ɔdi kɔnu kútuku belikplune ni, uuti-ma teewi kukɔ lɛlɔ aani antabi na uuti lɛklɔyi taakɔ-ma kpɛtɛ kpɛtɛ.

²⁷ Bukeye bɔni na Unwoti uuti taanu ukyuli kalɛ na use ni, uukeye teeduo-nwu kɔyu kemmo na uudie abɛla ƒui na kagyudikɔ keyi.

²⁸ Kalɛ na ɔga ɔɔyɔ́ bekyuli uwi ndi uwi na ɔɔdi nwuna etemila lɛlɔ lɛnɔ ɔɔgyumana-nwu na ɔɔyá na nwuna lɛga kadikɔ keenye kpakplaa na bɔyɔ bɔmmɔ ɔsu.

²⁹ Bakloƒu ɔyikun ndi bana bukeye. Na benengu liliƒuala mɔɔtina bana lɛnunda bukeye na ala ani bánu dii ɔsu.

³⁰ Ɔlɔna kɔtu bɔni buudie likpidi na ukyuli lɛlɔ. Na kɔtu bɔni bɔmmɔ bɔɔyá na ukyuli kayi kaabla sɛɛn.