Agba 18 - Katɔti Ɔku Kedee

¹ Ukyuli ɔni muudie lɛlɔ lɛti ni, nwuna lɛla biala lɛ́ƒɔ-nwu anu. Na ngba ulu buni bamba biala kasusu na baakya-nwu ni, ulátunaku-mu munu munu!

² Ala kalɔ bunu ogya ɔdi ulákya badɔlɔdi kudi kudii! Ama bana kasusu kani na beebó kudu.

³ Kesii kani na bekyuli bekpidi báda bálɛ ni, ukyuli tabu ku kɔƒa ala ku anumi kalɔ buwi ala kani mɔɔsia-ma kama.

⁴ Ukyuli etemila akana na enwini ntu bɔnidi bɔni nete ukyuli ngba. Na lɛnunda etemila aayu kayi buɛɛ aani libiɔ ntu bamamba bɔni mɔɔyu.

⁵ Ɔɔɔdia ka litemi ɔtɛne unye ukyuli ɔni na nwuna litemi liiibo ubo kama iye ɔdu ukyuli ɔbuni kɔtɔ.

⁶ Badɔlɔdi beeebo kadɔ bɔdɔ, na bana kama ku ugyii.

⁷ Badɔlɔdi kenye muubó-ma kalɔ, na bana enyekpi mɔɔkya-ma lɛbibo kemmo.

⁸ Ɔkɔ etemila ani nse aani lɛna wɛlɛ wɛlɛ ebo emini na anya mɔɔyu teduo ukyuli kayi kemmo.

⁹ Ɔkɔsɔne ɔdi ukyuli ukpidi aani ukyuli ɔni muubile bekyuli ala.

¹⁰ Unwoti lɛnyi lɛdi lɛtakpɛ bonwu lɛni na ukyuli ukpo kama. Na nwuna kudɔ na bekyuli babuni beekeli teesie na baakɛ́ bɔƒɔ.

¹¹ Balakɛne baanu bana lɛlakɛ aani kɔbi bonwu kɔni na ukyuli ɔdi ulakana bɔƒuaala. Baanu-ni aani kowodu kangyaa kɔni na kɔ́da ama ku bekyuli ntɛ na balakana-ma.

¹² Lɛlɔ bɔtina ku ukyuli tabu mɔɔgyú taatɔ asa na ukyuli ɔɔyii udu. Na lɛlɔ kalɔ buboku mɔɔtɔ asa na ɔbu ɔɔsia.

¹³ Baláka ukyuli bɔlɛ asa na enu lɛla lɛni nébo, amu kɔƒa kɔdubo-ɔ bukpo na abla lɛlɔ ɔdɔlɔdi.

¹⁴ Ukyuli kɔyu kɔɔkya ɔlɔna ɔni muuƒi kemmo. Nsu ni, ɔma na si nwuna kɔyu kɔ́yii udu na nwuna ɔlɔna ɔdubɔkana bunye?

¹⁵ Banundane baawia kpakplaa ka baƒɔ bekyuli bamba kasusu. Na sɔsɔ na ɔdi ka baawia ka bekyuli bete-ma kasusu.

¹⁶ Ukyuli ala bute bɔdanku ala enengudi. Ɔkana na uti-ɔ usienku benengu bani mbo kenyekɔ geen anumi.

¹⁷ Kenye biala na ukyuli ɔsu ni, bekyuli beenú-ka aani litemi geen, wetédu uwi ɔni na lɛla lɛni geen nálɛ ni, básɔku-ni básu kaduɛ.

¹⁸ Baakana na baatu egulabi taanu na bayikune inyɔ bani mɔɔkya unyeƒi ɔdi lɛlɔ na unyeƒi ɔsa.

¹⁹ Si bɔƒiɔ búduo awɔ ku ƒula ɔkpana ntɛ ni, ubo ɔkplu ka abla lɛla lɛdi ete-nwu na bɛsɔ bɛbla unwi utulo kalɛ na ekpo adi ɔma unengudi ɔni na bátu bámana lɛlɔ. Unyeƒi kpakplaa uule bakpana inyɔ ntɛ aani kalɛ na baakalɛ ɔban kenye na babala.

²⁰ Etemila aayá na kɔyu kuumó aani kalɛ na adila aayá na kaƒɔ keemó. Lɛni na etemila ani mɔɔlɛ́ ukyuli kenye na uwi ɔni na ɔ́manku lɛlɔ eemó ukyuli.

²¹ Bekyuli bani na atɛ aayu emini ku lɛla lɛni mɔɔsiáku akpanabi, ɔsika unyemi ɔɔkana na ɔdu ukyuli iye ubunku ukyuli ulu ɔbuni lɛlɔ.

²² Ukyuli ɔni nákɛ uleku ɔ́kɛ lɛlakɛ, na lɛƒɔndia lɛmmɔ lɛ́si Unwoti kudɔ.

²³ Ɔwabane muuvele ka banu-nwu kɔnyana, na ɔlakɛne uudie kenye ku edumi.

²⁴ Bakpana badi bakya bani ɔbladu mɔɔyila lɛlɔ udu. Nsu badi beebó taada lɛlɔ geen utulo banwa muedi.