Agba 16 - Katɔti Ɔku Kedee

¹ Bɔɔkana bɔɔsála kasusu lidu lidu, nsu Unwoti mɔɔtina lɛla lɛni geen ndi litemi geen lɛmmɔ.

² Bekyuli baanu ka bana ablala akɛ ulu ɔbuni lɛlɔ. Nsu Unwoti mɔɔkɔ́ku lɛla biala taanu kalɛ na lɛdia.

³ Ti ƒula kabla biala kya Unwoti kɔnu na kadubɔtɛ-ɔ.

⁴ Unwoti nábla lɛla biala ɔkɛnku nwuna kasusu kani kenye na ɔɔwia lɛla lɛmmɔ. Na bekyuli bekpidi muedi benye bete ka bani-ma kɔtu.

⁵ Unwoti ukisi ka ukyuli ɔtalaku lɛlɔ katɔ. Anwuɔsu ɔbla ukyuli biala nwaa ka bani mɔɔtalaku lɛlɔ katɔ ni, Unwoti ɔdubɔni-ma kɔtu.

⁶ Bɔyɔ bɔni neeebo kawɔkɔ ku litemi lɛlɔ bɔdi uwi ndi uwi uuti ala teebi likpidi. Na si aayia Unwoti ni, eekeli likpidi.

⁷ Si bekyuli ablala aayɔ́ Unwoti kaƒɔ ni, ɔɔyá na ama ku bana bekisine muedi beelie na atu bɔyɔ kemmo.

⁸ Si adi ɔwabane na aabu Unwoti ni, ɔdia utulo si ebo lɛlakɛ na aládi litemi geen lɛmmɔ lɛlɔ.

⁹ Bɔɔkana na bɔɔbla kasusu ku kɔkwɛ na lɛla lɛdi lɛlɔ, nsu Unwoti mɔɔtina bula kasiakɔ.

¹⁰ Ɔga ɔɔtɛmi lɛnunda etemila ku Unwoti ɔyikun, na utalɛka ɔnu anumi ɔtɛ litemi.

¹¹ Unwoti ɔɔwia ka bɔbla lɛla biala siin na liyedi kemmo, na ɔ́tina ulu ɔni lɛlɔ na ɔlɛka bɔsia lɛnɔ úse.

¹² Ɔga ɔdi ulayɔ likyulikpi ala bɔbla, ɔsika litemi geen lɛlɔ bɔdi lɛlɔ na ɔɔsia taadi bekyuli lɛlɔ.

¹³ Bekyuli bani enyekuli mɔɔtɛmi ala ani nse siin mɔɔyɔ́ ɔga kaƒɔ. Na ɔɔyɔ́ bani mɔɔsu litemi geen lɛni nkɛ ulu lɛlɔ mmɔ.

¹⁴ Ɔga kɔnyi kenye kelenu bunye kuubile ala. Na banundane baasia ulu biala lɛlɔ ka bayala-nwu kaƒɔ.

¹⁵ Si ɔga ɔɔmɔsi ni, agyi anii bibo ngba, na nwuna lɛƒɔndia lise aani ɔnantu ɔni mɔɔna na lɛla biala lɛɛsɔ taabla ɔwɔdi.

¹⁶ Ɔdia geen si ukyuli ebo lɛnunda utulo ka akɛ sika ugyiedi. Na si ebo lɛlati lɛni mɔɔyá na ukyuli uunú ala kalɔ ni, ɔdia utulo sika ɔƒualadi.

¹⁷ Ukyuli ɔni mɔɔsia nwuna ablala anu kaduɛ ni, nwuna ulu ulásia likpidi kavinkɔ. Na ukyuli biala nda nwuna ngba lɛni ni, ubo bɔƒɔ.

¹⁸ Lɛlɔ katɔ bɔtalaku mɔɔgyú taatɔ asa na ukyuli ɔɔyii udu. Na kayi kekpidi buse taabla ala mɔɔyá na ukyuli uubuli.

¹⁹ Ɔdia si awɔ ku bawabane bilie na bɛɛdi lɛla lɛni na bɛ́kɛ utulo si awɔ ku belikplune bilie na bɛɛdi ala ani na béƒie báƒɔ bekyuli kudɔ.

²⁰ Bekyuli bani muunú bɔlɛ ni, ala adubɔtɛku-ma. Na bekyuli bani na bana anu asia Unwoti lɛlɔ ni, lɛlɔ lɛdubɔyɔ-ma.

²¹ Banundane ni, baanu-ma taati ɔkɛnku kalɛ na beenú ala kalɔ kenye. Si ásia ulu ɔbuni lɛlɔ átina ukyuli ala ni, anwu mɔɔyá na ɔɔƒɔ́-ɔ litemi ku ebiti.

²² Lɛla bɔti bɔbla ulu ɔbuni lɛlɔ ni, ɔdi libiɔ ute bekyuli bani mɔɔbla lɛni na baaní ntu bɔmmɔ teelie ngba. Nsu si átina badɔlɔdi ulu ɔmmɔ ni, keeke na eebó abi, ɔsika balakpete-ɔ.

²³ Ɔnundane ni, lɛnunda etemila na ɔɔtɛmi. Na nwuna etemila aatu ukyuli teenwini.

²⁴ Etemila ani mɔɔyu kayi ni, ese aani uwɔ. Aayu kɔyu emini na ɔlɔna ɔɔkɛ́ ɔlɔkplu.

²⁵ Ukyuli biala ɔɔnu kasiakɔ kadi na nwuna ngba kemmo ka nka kadia. Nsu ulu ɔmmɔ kawɔlɔkɔ ni, kekpine kani na ɔɔdá taalɛ.

²⁶ Útebie si adila adi ɔkwɛ ɔɔda kabla ɔblane. Kaƒɔkplu kaayá na ukyuli ɔɔbla kabla kpakplaa na ɔkɛ ɔdi.

²⁷ Balalane beenye taawia kuƒi kɔni na babla likyulikpi, na bana etemila adi ogya bonwu ɔni mɔɔkywí teebile ala.

²⁸ Ukyuli ɔni mɔɔwia ka bekyuli beteekpoku lɛlɔ ni, lɛsɛ ogya na ɔɔkya bekyuli akɔ. Na bekyuli anyikpi bɔlɔ ni, uugyingya bakpana babuni muedi ntɛ.

²⁹ Likyulikpi ala bablane baatɔ́lɔ bana bakpana na baasia ulu ukpidi lɛlɔ teetéduo ɔgbankpi kemmo.

³⁰ Bébile anumi, nsu baanu taavi ukyuli kalɔ. Belébimi kenye taatɛmi, nsu baabla bana likyulikpi kɔkwɛ.

³¹ Liliƒuala lɛdi kagabwa kani muukeye. Na Unwoti uuti-ka teete bekyuli bani muulie ngba buni.

³² Kayi buɛɛ kadia ketulo kenyekɔ ɔyikun. Si aakana ƒula lɛlɔ lɛlɔ bɔdi ni, ɔdia utulo si ékpo ádi ɔma unengudi ɔdi lɛlɔ.

³³ Adubɔkana na ebo egulabi akɔliku katɔ, nsu Unwoti mɔɔtina ɔƒɛnyi ɔni lɛlɔ na ɔdubo bɔyu.