Agba 15 - Katɔti Ɔku Kedee

¹ Kɔnyi kulakɔ ukyuli si éboku lɛlɔ kalɔ na édie litemi kenye buɛɛ. Nsu etemila bɔtu taalɛ ukyuli ɔɔyá kɔnyi kuubo.

² Ɔnundane ni, ala bɔtɛya bɔdi-nwu ebiti. Na badɔlɔdi ni, bágyu kenye beti beedie kɔdɔlɔ keyi.

³ Unwoti ɔɔnu kesi kesii, na nwuna lɛnumi lɛsia bekyuli bekpidi ku babuni lɛlɔ.

⁴ Etemila ani mɔɔyu buɛɛ aayá na ukyuli uulie ngba na ɔɔkɛ́ ɔyikun. Na unyemi ɔni mɔɔnyi ɔkɔ ɔɔdú ukyuli kɔyu.

⁵ Ɔdɔlɔdi kani muuní ka nwuna bawɔne batumini-nwu. Ukyuli biala ɔni matɛya lɛla lɛdi wasiku bɔƒiɔ bɔni bédie-nwu lɛlɔ ni, ɔ́da anu.

⁶ Lɛlakɛ lɛbuni liisé bekyuli babuni kesii. Nsu bekyuli bekpidi ala ani na baakɛ́ adanku ɔgbankpi.

⁷ Banundane kani mɔɔkana na baakya ukyuli kasusu buni. Na badɔlɔdi balakana ɔmɛni bɔbla.

⁸ Bekyuli bekpidi akpala ni, Unwoti ukisi-nya. Nsu lɛlɔ lɛɛyɔ́-nwu si bekyuli bani nse siin baakpali-nwu.

⁹ Bekyuli bekpidi kɔsiakɔ ƒui kulayɔ Unwoti kaƒɔ. Nsu bekyuli bani mɔɔwia kpakplaa ka belie ngba bɔbuni ni, Unwoti ɔɔyɔ́-ma.

¹⁰ Ukyuli biala na únwini kama ɔ́kya ulu geen ɔmmɔ ni, Unwoti ɔdubɔni-nwu kɔtu kpakplaa. Na ukyuli ɔni nkisi ka bedie-nwu bɔƒiɔ ni, ɔdubo bukpi.

¹¹ Unwoti ɔgyi kukpi kalɔ ku kalɛ na ukyuli ɔɔkywí taayii udu. Anwuɔsu ukyuli kayi kemmo lɛla lɛdi lilábɛ-nwu!

¹² Bekyuli bani muuti lɛla biala taabla lɛmala ni, balayɔ bekyuli bani mɔɔdɔnku-ma. Anwuɔsu na balani teede banundane.

¹³ Kayi kani kemmo na lɛlɔyɔ lɛkya ni, kana anumi muukeye ku lɛma. Nsu ukyuli ɔni náyila lɛnunsia ni, enu aaƒɛ-nwu.

¹⁴ Ɔnundane ni, litemi geen kama bɔsia kɔka mɔɔda-nwu. Na ɔdɔlɔdi ni, ala ani neeebo kɔsia lɛlɔ na ɔɔkɛ́ ebiti.

¹⁵ Ɔwabane ni, limeyi biala ala eekpóku-nwu. Nsu bani na lɛlɔ lɛɛyɔ́ ni, ngba bumodi bɔdi limeyi bɔdi bute-ma.

¹⁶ Ɔdia si aayia Unwoti ina eeebo ala pii utulo si ebo lɛlakɛ na bɔnwuna buuubo-ɔ kaduli.

¹⁷ Si awɔ ku ƒula ɔkpana ɔdi bɛ́sa na kutukplu lɛkyami kalɔ ni, ɔdia utulo si awɔ ku ƒula ukisine bɛ́sa na ɔkyimu kalɔ.

¹⁸ Ukyuli ɔni na uuubo kayi buɛɛ ɔɔkya kekpo. Nsu ukyuli ɔni na ɔ́da kayi ɔ́va kalɔ buɛɛ ni, ɔɔyala kekpo kammɔ.

¹⁹ Ɔkɔsɔne ni, ala aláda-nwu bukpoku taaya nwuna ngba kemmo ƒui. Nsu ukyuli ɔni mɔɔsia nwuna kabla anu ni, nwuna keyi kaabla kpɛtɛ kpɛtɛ.

²⁰ Bebi bani kasusu nse nwaa baayá lɛlɔ lɛɛyɔ́ bana ɔti. Na bebi badɔlɔdi muuní bana uni.

²¹ Badɔlɔdi ni, ama na kubiti kɔɔda si baanu adɔlɔla. Na ɔnundane ɔɔsia ulu ɔbuni lɛlɔ uwi ndi uwi.

²² Ukyuli kabla kɔkwɛ kɔni na ɔɔkya kuubie-nwu si ulaƒɔ kasusu na bekyuli kudɔ. Nsu si eeye bekyuli pii kasusu ni, ƒula ala aatɛ.

²³ Lɛlɔ lɛɛyɔ́ ukyuli ɔni muudie lɛla lɛdi kenye teete ɔnwani ulu lɛlɔ nwaa. Ɔdi lɛla lɛni mɔɔyu kayi si ásu lɛla lɛdi na uwi ɔni na basu-ni lɛlɔ.

²⁴ Ɔnundane kasiakɔ kási mɛni késela ngba ƒui kemmo na katɔ, ɔsika kaƒiɔtɔ kelénwini-ma keliekɔ uwi ƒui.

²⁵ Bekyuli bani mɔɔkɔli lɛlɔ katɔ ni, Unwoti ɔɔbwɛ-ma kɔduli na baayii udu. Nsu ɔɔgyumana bekpinele ala ani na bebo.

²⁶ Unwoti ulayɔ bekyuli bekpidi kasusu kani beeti. Nsu lɛlɔ lɛɛyɔ́-nwu si bekyuli baatɛmi etemila ani mɔɔdia bunu.

²⁷ Lɛlakɛ lɛni naaakɛ ulu ɔbuni lɛlɔ líduo lɛkɔkɔ ni, Unwoti ɔɔyá na lɛbibo liiduo ɔtɔ ɔmmɔ ƒui kemmo. Nsu ama bani naaabɛ taaƒɔ ala bekyuli kudɔ taadi ni, ama ndubulie ku keyi buɛɛ.

²⁸ Bekyuli babuni baaka kasusu buti asa na baasu lɛla lɛdi. Nsu bekyuli bekpidi ama bɔtu kani na baatu etemila teebewi.

²⁹ Unwoti ɔ́gyunku bekyuli bekpidi kudɔ ƒui. Nsu uunú bekyuli babuni kenye si baakpali-nwu.

³⁰ Si áƒɛnimi anumi ákya ukyuli ni, kayi kaayɔ́-nwu. Na si énu kenye buni ni, ɔɔkya ɔlɔna ɔkplu.

³¹ Si ukyuli údie-ɔ bɔƒiɔ na ɔ́tina-a kasiakɔ ni, adubɔkɛ kelie na banundane akɔ.

³² Si éni anii ukyuli utedie-ɔ bɔƒiɔ ni, awɔ ɔlati lɛlɔ na aabla kalala. Nsu si áda lɛlɔ na bédie ƒula bɔƒiɔ bátina-a ni, adubɔkɛ lɛlati na eteenu ala kalɔ.

³³ Si aayia Unwoti ni, ɔɔtina kalɛ na áda anu. Na lɛlɔ kalɔ buboku mɔɔtɔ asa na ɔbu ɔɔsia.