Agba 14 - Katɔti Ɔku Kedee

¹ Uleku ɔnundane ɔgyi kalɛ na baada ɔtɔ na uunye. Nsu uleku ɔdɔlɔdi anwu ɔlati mɔɔbwɛ nwuna ɔtɔ.

² Bekyuli bani mɔɔsia ulu ɔbuni lɛlɔ ni, baayia Unwoti. Na bani mɔɔsia ulu ukpidi lɛlɔ beení Unwoti.

³ Badɔlɔdi enyekpi muunwíni kugyiimi kɔni mɔɔsia-ma kama. Nsu banundane ala ani na baasu ni, eedie-ma na ɔgbankpi kemmo.

⁴ Bebuo lɛyu lɛni kemmo na ebuo ɔdi uuubo ni, liisé sɛɛn. Nsu kɔsia kɔdi kulasi lɛyu likpludi lɛmmɔ kemmo.

⁵ Ukyuli ɔni nánu lɛla lɛdi na uudie litemi geen lɛmmɔ kenye ni, ulanyi ɔkɔ. Nsu ukyuli ɔni na útanu lɛla lɛmmɔ ɔɔnyi ɔkɔ.

⁶ Ukyuli ɔni na uuti lɛla biala taakya bɔƒia ni, si ina ɔɔwia lɛnunda muedi ulákɛ-ni. Nsu bekyuli bani muunú ala kalɔ ni, baatí lɛla.

⁷ Da lɛlɔ mami badɔlɔdi lɛlɔ, ɔsika aaadubo lɛla lɛdi bɔti bana kudɔ.

⁸ Banundane ni, baanu uwi ɔni ntɔ anumi ɔdubo ƒui taati lɛla lɛni ndubo libalɛ. Nsu badɔlɔdi ama bana lɛlɔ kani na baatɔ́lɔ.

⁹ Badɔlɔdi beeti bana bɔƒiɔ taabla lɛmala. Nsu bekyuli babuni baanu bana bɔƒiɔ taati na beevele ka basɔ babla unwi ku ukyuli ɔni na báƒiɔ.

¹⁰ Ukyuli biala ku kalɛ na lɛla lɛdi liikpóku-nwu kayi. Na ukyuli uláti kalɛ geen na lɛlɔ lɛɛyɔ́ ukyuli bamba na nwuna kayi kemmo.

¹¹ Balalane kaduli kadubo bɔbwɛ. Nsu ukyuli ɔbuni kevo kadubɔlɛ lili na bemomo.

¹² Ukyuli biala ɔɔnu kasiakɔ kadi na nwuna ngba kemmo ka nka kadia, nsu nwuna kawɔlɔkɔ ni, kekpine kani na ɔɔdá taalɛ.

¹³ Lɛma lɛɛyá na ɔɔbla aani si lɛla lɛni muukpóku ukyuli lɛ́sa. Nsu si lɛma lɛmmɔ lɛ́vi ni, lɛla lɛni muukpóku ukyuli ɔmmɔ lɛ́sɔ línwini keku.

¹⁴ Bekyuli bani muunwíni ulu ɔbuni ɔmmɔ lɛlɔ ni, baakɛ́ bana lɛyuƒɔla. Na bekyuli babuni baakɛ bana lɛbuni kɔsia.

¹⁵ Bekyuli bani kasusu násɔ ni, ama mɔɔƒɔ́ lɛla biala taadi. Nsu bani mɔɔsia lɛlɔ anu kaduɛ ni, baabu lɛla biala lɛlɔ taanu asa na beedie ɔgba.

¹⁶ Banundane baatí lɛlɔ kalɛ na beekeli ɔgbankpi. Badɔlɔdi ama baatu lili taakya lɛla biala kemmo ku kayi kekpidi.

¹⁷ Bekyuli bani muuti kɔnyi pla pla ni, baabla adɔlɔla. Na bekyuli bani mɔɔbɛ́ taabla ala kalɔ kalɔ ni, bekyuli beekisi-ma.

¹⁸ Bekyuli bani kasusu násɔ ni, utulo ka kɔdɔlɔ awu bakya. Na banundane ni, lɛlati línwini aani kagabwa kebi-ma lili.

¹⁹ Bekyuli bekpidi badubɔkya lili kalɔ bete bekyuli bani mɔɔbla ala ulu lɛlɔ. Na balalane badubɔkya lili kalɔ bete bekyuli babuni na bana ɔba kenye.

²⁰ Bawabane ni, ama alati bana bekyuli muedi balánu-ma taakya lɛla lɛdi akɔ. Nsu balakɛne ama ni, balakana-ma bakpana bɔka.

²¹ Si eekisi ƒula ɔkpana ni, likpidi lɛdi-ɔ. Kusɛ kusɛ ɔdubɔsiaku bekyuli bani muubunku bawabane.

²² Si aawia ukyuli likpidi ni, adubo bɔyii. Nsu si lɛbuni na aawia ukyuli ni, Unwoti ɔdubɔyɔ-ɔ uwi ndi uwi na ɔdi nwuna litemi lɛlɔ ute-ɔ.

²³ Kabla keeboku kɔsia. Nsu atɛ keeke adanku kɔwaba.

²⁴ Lɛlakɛ lɛdi kagabwa kete banundane. Na badɔlɔdi kogyoklo ƒui ni, adɔlɔla ebi na aanwu.

²⁵ Ukyuli ɔni mɔɔnu litemi geen teedie-ni kenye ɔɔƒɔ́ bekyuli ngba. Nsu ukyuli ɔni mɔɔnyi ɔkɔ teedie litemi kenye ni, uudie bekyuli teete.

²⁶ Lɛla lɛdi lilekpoku bekyuli bani mɔɔyia Unwoti. Ɔsika Unwoti ɔdi katamikukɔ ute bana bebi.

²⁷ Si aayia Unwoti ni, ɔdi libiɔ lɛni mɔɔyu ntu baaní teelie ngba ute-ɔ. Na ɔɔyá na ekeli liƒu lɛni na kukpi kɔɔkya-bu.

²⁸ Si kadi kadi bekyuli beemomo ni, lɛlɔ lɛɛyɔ́ ɔga ɔmmɔ. Nsu si baasá ni, baayii udu.

²⁹ Bekyuli bani mɔɔkana bana kɔnyi bɔbala ni, bebo lɛlati. Na bani muuti kɔnyi pla pla ni, badubo bɔƒiɔ.

³⁰ Si áda kayi áva kalɔ buɛɛ ni, ngba buune-ɔ. Nsu kogyulo lɛnungyie lɛɛdú ukyuli.

³¹ Bekyuli bani muukpóku bawabane ni, beedumi Unwoti. Nsu bani muubunku-ma ni, baabu Unwoti.

³² Bekyuli bekpidi ni, bana alaekpidi mɔɔyila-ma udu. Nsu bekyuli babuni bebo katamikukɔ si békpi.

³³ Ukyuli ɔni muunú ala kalɔ ni, ubo lɛnunda na lɛ́ƒɔ-nwu kuye geen na nwuna kayi kemmo. Nsu badɔlɔdi balánu lɛnunda kɔsia.

³⁴ Kadi bani mɔɔyia Unwoti ni, baalɛ́ lili ku ɔyikun. Nsu likpidi lɛdi kɔƒa ala ute kadi biala.

³⁵ Lɛlɔ lɛɛyɔ́ ɔga na kabla bablane bani ngyi bana kabla na baabla-ka ulu lɛlɔ lɛlɔ. Na bani na lɛsɛ kani na baakya na balásia kabla anu ni, ɔɔkɛ́ku-ma kɔnyi.