Agba 1 - Katɔti Ɔku Kedee

Agba Adanku Kasusu Kadi

¹ Agba amɛni na Dawid ubidi Salomo ɔni ndi Israelƒuɔ Ɔga úbo.

² Na lɛla lɛni na agba amɛni adanku ndi ka atina bekyuli na bakana badi lɛlɔ lɛlɔ na benu asugba kalɔ.

³ Na bekyuli batɛya kalɛ na bada lɛlɔ kaduɛ na belie ngba buni, na babla ala na ulu lɛlɔ siin na adia lɛnɔ.

⁴ Agba amɛni ndubɔya na bani na bana kasusu kásɔ bati lɛla. Na begblebi ku bakloƒu bati lɛla na babla kasusu na bana keliela lɛlɔ.

⁵ Na bani na báda anu ni, bana lɛnunda lɛɛkɔ́ katɔ teebu. Na bani mɔɔnu ala kemmo taati lɛnɔ bati bana kasiakɔ.

⁶ Na benu agba ku kenwini etemila kalɔ na benu banundane agyolo ku kekuma atɛ kalɔ.

⁷ Unwoti bɔyia ndi ukyuli lɛlati kalɔ kesekɔ. Nsu badɔlɔdi beení lɛnunda etemila ku kalɛ na badi lɛlɔ lɛlɔ kaduɛ.

Da Anu Ɔkɛnku Kalɛ Na Ƒ'ɔti Ɔɔlɛ-ɔ Kpakplaa Lɛlɔ

⁸ Ubi, se atu na enu ƒ'ɔti ɔda bubo. Na teni ƒ'ini lɛla lɛni na ɔɔtina-a.

⁹ Lɛla lɛni na átɛya bana kudɔ ɔdubunwini kagabwa kebi-ɔ lili. Na unwini asɛɛ abuni akya-a limɔ.

¹⁰ Mina ubi, si bekyuli bekpidi baadɔ́dɔ-ɔ ni, nwini kama kya-ma!

¹¹ Badubɔkana na basu-ɔ banini, “Bo, basiaku-bu. Na aya na bɔbɛ na bɔdu ukyuli ɔdi! Na bubi kesii kadi butaatu bekyuli bani nátabla-bu lɛla lɛdi.

¹² Ya na bubweli-ma ngba ngba aani kaƒiɔtɔ, na bɔyila-ma udu ƒui aani bekyuli bani nánu béduo ubu kemmo.

¹³ Na bana ala abuni ani na búƒie bɔ́ƒɔ ni, bɔdubuyile bula lɛtɔ ku-nya!

¹⁴ Bo na ebenyeku-bu kpakplaa, na abu ku-ɔ bɔdubule ala ani na búƒie bɔ́ƒɔ mmɔ.”

¹⁵ Ubi, tesie ku bekyuli bammɔ udu! Tani tede bana kɔvinkɔ munu munu!

¹⁶ Baababla ku usi taatábla ekpidi. Na baababla teewi ubugya kalɔ.

¹⁷ Keeke na aakywɛɛ kakpagyuɛ si baasɛ benye baanu!

¹⁸ Nsu uuuse lɛni ku bekyuli bammɔ udu. Ama alati lɛlɔ na bebi baatú, na kubu na baasia ama alati lɛlɔ.

¹⁹ Bekyuli bani ƒui na anumi eegyie-ma na lɛkɛ likpidi lɛlɔ ni, lɛni na bana kawɔlɔkɔ kaabla.

Bɔlɛ Ute Bekyuli Bani Muuní Lɛnunda

²⁰ Lɛnunda lise aani ukyuli ɔni muubó kudu na lilu lɛlɔ. Na uute kenye na kɔsalakɔ ƒui.

²¹ Na ɔɔkpali bani ƒui nkɛ ulu unengudi ɔni lɛlɔ baaní lɛsɛ, na uubó kudu taasiku awodu eli. Na ɔɔsu nwuna kenye na ɔma unengudi ɔmmɔ awoduku kɔyakun kenye.

²² Lɛnunda ɔ́kpali ɔnini, “Amii bani na bina kasusu kásɔ ni, uwi ɛlɛ na bɛdubusie anumi ku bina ngba bɔni násɔ bulie bitédu? Uwi ɛlɛ na amii bani mɔɔmá litemi geen lɛmmɔ bɛdubɔbla lɛni bitédu? Na amii badɔlɔdi bikisi lɛlati?

²³ Si bunu na bínu-mi bɔdɔnku ni, nka ala ani ƒui nkya-mi kayi kemmo na ndubudie lɛsu-mii, na lɛya na bɛti mina lili kemmo kakali ƒui.

²⁴ “Nsu bítakpete-mi uwi ɔni na lɛ́kpali-mii. Na uwi ɔni na lídie enu nnii mɔɔƒɔ́-mii ni, ɔdi útenwini útanu-mi.

²⁵ Na ka bíni mina bɔlɛ na bilátuna bɛnii ndɔnku-mii ɔsu ni,

²⁶ Ami lɛnɔ ndubo-mii bɔma si uwi ɔni na ɔgbankpi úbo-mii lɛlɔ. Na lɛpii-mii si uwi ɔni na lilikpi ala eekpóku-mii,

²⁷ na ese aani ɔƒɛƒɛɛ kpakplaa uwi ɔni na ɔgbankpi ɔda-mii ɔɔvínku aani ɔƒɛƒɛɛ ɔni mɔɔkya ligede na ala ani nétulo-mii áya na kayi kaakpulu-mii.

²⁸ “Uwi ɔmmɔ ni, bɛdubɔkpali ami Lɛnunda, nsu naaakpete-mii. Na bɛdubɔwia-mi na bilanu-mi.

²⁹ Ɔsika bíkisi lɛlati na bítaƒuna ka bitaayia Unwoti ku ɔbu.

³⁰ Bíni mina bɔlɛ na bíveli atu na mina bɔdɔnku ɔsu

³¹ na ngba bɔni udu na bilie ni, nwuna ebi na bɛdubo bɔdi. Na ulu ɔni na bɛ́ƒuna ka bɛsia ni, nwuna ala emo-mii.

³² Ɔsika bekyuli bani na bana kasusu kásɔ ni, ngba bukpidi bɔni na belie ndubo-ma bɔdu. Na ala ani na badɔlɔdi baakali ka átɛ áwɔlɔ ƒui ndubo bɔya na bayii ku udu.

³³ Nsu bani ƒui muunú-mi litemi ni, badubulie ngba na atu bɔyɔ kemmo, na lɛla lɛdi lilékpoku-ma na balayia ka ukpidi ɔdi walɛku-ma lɛnɔ.”