Tesalonikaƒuɔ 2 2 - Katɔti Ɔku Kedee

Bitaya Na Ukyuli Ɔdi Ɔtɔlɔ-mii

¹ Banwa, bɔɔyɔ́ ka bɔsu-mii lɛla kpakplaa lɛdi na Blɔti Yesu Kristo bɔsɔ bubo ku bula bɔsala na nwuna kudɔ lɛlɔ.

² Si bínu bɛnii Blɔti bubo limeyi lɛmmɔ líbo líbavi ni, buláwia ka bina kasusu keƒu iye ɔtɔtɔ ɔgyu-mii. Ɔƒɛni kalɛ ɔdubɔbla-mii aani ka abu násu ɔmɛni uwi ɔni na buudie Katɔti kenye iye bɔɔkɔ́ litemi lɛmmɔ lɛsa iye búnweni ɔku ɔdi búmene-mii.

³ Bitaya na ukyuli ɔdi ɔtɔlɔ-mii na ulu biala lɛlɔ. Ɔsika Blɔti limeyi lɛmmɔ lilebo tɔ utédu uwi ɔni na bekyuli pii badubuni Katɔti asa na ukyuli ukpidi ɔmmɔ ɔni na Katɔti údie úse ka ɔkyula ɔda ɔlɛ.

⁴ Na ɔdubɔta unye utile kɔyu ɔyikun biala ulu na ɔtina ka anwu lɛti ndi ayu ƒui utulone. Na ɔdubo bɔta muedi butélie Katɔti kakpakɔ na ɔbla lɛlɔ aani anwu ndi Katɔti ɔmmɔ.

⁵ Binyimo ka uwi ɔni na lɛ́kya-mii kudɔ ni, lɛ́su-mii ala amɛni ƒui.

⁶ Nsu ni, ɔyikun ɔdi uutile ala ammɔ kuƒi ka alɛ ɔƒɛni. Na amii alati bɛ́gyi lɛla lɛni na lɛdi. Na ukyuli ukpidi ɔmmɔ ɔdubudie lɛlɔ keyi si nwuna uwi údu.

⁷ Na likyulikpi ala ani baabla taabɛ éese kalɔ aalɛ́. Na ala ani ndubɔlɛ ni, aaadubo bɔlɛ tɔ wetédu ka Katɔti ɔ́da ukyuli ɔni muutile ukyuli ukpidi ɔmmɔ ulu údie.

⁸ Na ɔmɛni kama ni, Katɔti ɔdubudie ukyuli ukpidi ɔmmɔ keyi ɔtina. Na si uwi ɔni na Blɔti Yesu Kristo úbo ni, ɔdubuti nwuna kenye ɔƒɛƒɛɛ ku bukeye ɔkyula-nwu na ɔyila-nwu udu ƒui.

⁹ Na ukyuli ukpidi ɔmmɔ ɔdububo ku Satan ɔyikun, na ɔdubudie ɔkɔ akɔla budie taatina lidu lidu ɔtina.

¹⁰ Na bekyuli bani ƒui ndubo bɔyii ku udu ni, ɔdubɔsia likyulikpi katɔlɔ ulu biala lɛlɔ na ɔtɔlɔ-ma. Badubo bɔyii ɔsika bátaƒɔ litemi buni lɛmmɔ bátadi na Katɔti ɔƒɔ-ma ngba.

¹¹ Ɔmɛni ɔsu na Katɔti ɔdubɔnyonu-ma kalɛ na baƒɔ ɔkɔ badi.

¹² Kawɔlɔkɔ ƒui ni, Katɔti ɔdubɔdu-ma kɔtɔ, ɔsika bátaƒɔ litemi buni bátadi. Mmomu bátaakɛ ebiti na ekpidi bɔbla kemmo.

Binye Kpakplaa

¹³ Nsu ni, banwa, bɔda Katɔti enugya kayu uwi ƒui na amii ɔsu. Bɔgyi ka ɔɔyɔ́-mii sɔsɔ. Ɔsika ɔ́ƒuna-mii ɔnii bɛkɛ bɔƒɔ. Na ɔ́bla-mii nwuna badi ɔ́si kalɔ kesekɔ uwi ɔni na Katɔti Kɔyu kúveli bina ekpidi údie-mii lɛlɔ ɔsika bɛ́ƒɔ litemi buni lɛmmɔ bɛ́di ɔsu.

¹⁴ Na ɔkɛnku bula litemi buni lɛmɛni bɔsu kemmo ni, Katɔti ɔ́lɔ-mii ɔnii bibo na bɛƒɔ lɛnyi aani kalɛ na Blɔti Yesu Kristo ubo lɛnyi.

¹⁵ Ɔmɛni ɔsu ni, banwa, binye kpakplaa na biƒie etemila ani na bɔ́tina-mii na bula lɛku bunweni ku bɔtɛmi kemmo bɛda.

¹⁶ Na buuvele kebunku taasiku Blɔti Yesu Kristo ku bula Unwoti Katɔti kudɔ ɔni mɔɔyɔ́-bu, na úti kayi buse ku lɛnunsia úte-bu ɔ́si nwuna lɛƒɔndia ɔsu.

¹⁷ Buuvele-nwu bɔnii, ute-mii ɔyikun na ɔkya-mii kayi ogya kalɛ na bɛsu na bɛbla ala abuni ƒui lɛnɔ.