Korintoƒuɔ 2 4 - Katɔti Ɔku Kedee

Buse Aani Ebwi Avɔdi

¹ Katɔti ɔ́nu-bu kɔnyana na úti kabla kamɛni ɔ́kya-bu enu kemmo. Ɔmmɔ ɔsu na enu aláƒɛ-bu.

² Búdie abɛla ku kɔƒa ala bɔbla atu. Na bulányi ɔkɔ taabla kabla kadi na bulátu Katɔti litemi lɛmmɔ teenwini. Bɔɔsu litemi buni lɛmmɔ nwaa na Katɔti anumi kalɛ na ukyuli biala ɔdubɔnu bula ɔbladu buni ɔti.

³ Na si litemi buni lɛni lɛsa na bɔɔkɔ́ mɛni lɛmu lise bekyuli badi suu ni, bɛgyi bɛnii bekyuli bani ndaku bɔyii na use ute lɛni.

⁴ Na bekyuli bammɔ ni, ukisine ɔmmɔ ɔ́bwɛ ama bani naaaƒɔ taadi anumi. Na uutile-ma kuƒi kalɛ na balanu bukeye bɔmmɔ. Na bukeye bɔmɛni bɔɔsí litemi buni lɛni nkɛnku Kristo bukeye bɔni ndi Katɔti ɔmmɔ ɔlati udu geen kemmo.

⁵ Bulakɔ abu alati lɛlɔ lɛsa teete-mii, mmomu Yesu Kristo lɛlɔ lɛsa na bɔɔkɔ́ teete-mii ka ɔdi Blɔti. Na abu bɔdi kabla bablane bute-mii na Kristo ɔsu.

⁶ Katɔti násu na kalɔ kesekɔ ɔnii, “Bukeye bɔƒɔ kasuudikɔ.” Na anwu kani náya na bukeye bɔmmɔ búkeye na bula kɔyi kemmo. Na bukeye bɔmmɔ náya na bɔ́nu Katɔti bukeye bɔni muukeye na Kristo anumi bɔ́ti.

⁷ Na abu bani mbo Kɔyu kemmo akɛla enengudi amɛni ni, buse aani ebwi avɔdi ani nátamanku ala ammɔ bɔkya. Na ɔmmɔ mɔɔtina geen ka ɔɔɔdi bula kudɔ na ɔyikun ɔmmɔ ɔ́si, mmomu Katɔti kudɔ na ɔ́si.

⁸ Buubó abi uwi ndi uwi, nsu lɛbibo lɛmmɔ lítetulo-bu. Kasusu keekpóku-bu, nsu enu átaƒɛ-bu.

⁹ Bekisine pii basiaku-bu, nsu Katɔti útedie-bu atu. Ina ka bébo-bu banii baadú-bu muedi ni, bútekpi.

¹⁰ Bɔkya ɔgbankpi kemmo uwi biala ka badu-bu aani kalɛ na bádu Yesu. Nsu kalɛ na bɔmu buli ngba mɛni ni, lɛni kani na ɔɔtina ka Yesu lɛnɔ uli ngba.

¹¹ Sɔsɔ na bula ngba bulie kemmo ƒui ni, bɔkya kukpi ɔgbankpi kemmo na Yesu ɔsu. Nsu ɔyikun ɔni na úte-bu na bula ɔlɔna kemmo ɔsu ni, ɔdubɔya na bekyuli banu nwuna ngba bati.

¹² Ɔmɛni ɔsu bɔkya ɔgbankpi lɛbibo kemmo uwi biala, na amii bɛɛkɛ́ kɔyu kemmo ngba.

¹³ Bénweni na Bunweni Kedee Ɔku kemmo banii, “Lɛ́ƒɔ Katɔti lɛ́di, anwuɔsu na lɛ́kɔ-nwu lɛlɔ lɛsa.” Na lɛni kani na abu lɛnɔ bɔ́ƒɔ bɔ́di ɔsu na bɔɔkɔ́ litemi buni lɛmmɔ lɛsa.

¹⁴ Na bɔgyi ka Katɔti ɔni ńagyila Yesu ɔ́lɛku bekpine akɔ ni, lɛni kani na ɔdubɔgyila abu lɛnɔ na uti abu ku-mii ƒui usienku Katɔti anumi.

¹⁵ Bina kadia ɔsu na ala amɛni ƒui aalɛ́ lɛni. Na si bekyuli pii baakɛ́ bɔƒɔ teebu ɔkɛnku Katɔti lɛƒɔndia ɔsu ni, lɛni kani na badubo-nwu enu lɛnɔ butaagya teebu si beeti ɔbu teete Katɔti.

Bɔdubɔkɛ Ɔbu Ku Lɛlɔyɔ Bonwu

¹⁶ Kasusu kamɛni ɔsu na enu aláƒɛ-bu si ina bula ɔlɔna ugyii ɔmɛni ɔɔyii udu muedi ni, bɔgyi ka bula kɔyu kemmo ngba bulie bɔɔbla ɔwɔdi uwi biala.

¹⁷ Na abi blii suɛ ani na buubó na uwi klukui ɔmɛni kemmo na kayawi mɛni ni, adubɔya na bɔkɛ ɔbu ku lɛlɔyɔ bonwu lɛni nsɔ naaadubo bɔsa kudii na katɔ. Na lɛdubutulo abi ani na búbo ƒui.

¹⁸ Ɔsika búti bula anu bɔ́sia ala ani na bula anumi alakana bɔnu lɛlɔ, na ɔɔɔdi ala ani na bula anumi aakana bɔnu. Na ala ani na bula anumi aakana bɔnu ni, uwi klukui ɔdi kani na anya aakya. Na ani na bula anumi alakana bɔnu ni, ese ésela uwi ƒui.