Tesalonikaƒuɔ 1 5 - Katɔti Ɔku Kedee

Bilie Kagyumana Bite Blɔti Bubo

¹ Banwa, útalɛka linweni-mii lɛla lɛdi ɔ́si uwi iye emeyi ani na ala amɛni adubɔlɛ lɛlɔ.

² Ɔsika amii alati bɛgyi geen ka Blɔti limeyi lɛmmɔ lɛdububo aani kalɛ na uyune uuyú ukyuli taatu usien.

³ Na uwi ɔni kemmo na bekyuli baasu banii lɛla biala lɛ́ɛtɛ ni, uwi ɔmmɔ geen na ɔgbankpi adubɔlɛku-ma ɔni na baaagyi beeese. Ɔdububo aani kalɛ na kawɔƒɔ kaadu ɔƒɔndane. Na kekelikɔ kadi keeebo.

⁴ Nsu ni, banwa, amii bɛɛɛkya lɛdisa kemmo. Anwuɔsu limeyi libendi lɛmmɔ liléyu-mii lilatu aani uyune kalɛ.

⁵ Ɔsika bina ƒui bɛkya bukeye kemmo. Na bɔɔɔdi aani bekyuli bani náƒɔ lɛlɔ bákya likpidi kemmo na baabla ala taabɛ.

⁶ Anwuɔsu bitaya na bɔlɛɛ na budie lɛlɔ atu aani ama bani naaagyi Blɔti. Mmomu bɛya bunye kagyumana na bɔda lɛlɔ kaduɛ.

⁷ Ɔsika ama bani mɔɔlɛɛ ni, usien na baalɛɛ. Na ama bani muukpi ntɛ ni, usien na beekpi-mu.

⁸ Nsu abu bani nkya bukeye kemmo ni, bɛya na bɔda lɛlɔ kaduɛ. Na buti bula bɔƒɔtaadi ku bula bɔyɔ butaagyumana lɛlɔ aani kalɛ na kekpo adala aagyumana ukpone. Na butaasia anu ka Blɔti ɔdubɔƒɔ-bu, aani kalɛ na kekpo kabwa kaagyumana ukpone lili.

⁹ Ɔsika Katɔti útedie-bu ɔnii nwuna kɔnyi kubo-bu lɛlɔ. Mmomu ɔnii bɔsia Blɔti Yesu Kristo lɛlɔ na bɔkɛ bɔƒɔ.

¹⁰ Yesu ɔmɛni nékpi na bula lili ɔni na si bulie o-o, si bukpi o-o ni, bɔdubulieku Blɔti na nwuna bɔsɔ bubo kemmo.

¹¹ Ɔmɛni ɔsu ni, bitaakya lɛlɔ ogya na biteebunku lɛlɔ aani kalɛ na biwi-nwu lɛlɔ ɔƒaani.

Bɛda Lɛlɔ Bidie Likpidi Ulu Biala Lɛlɔ

¹² Banwa, buuvele-mii bɔnii biti ɔbu geen bite bina batɔnkune bani mɔɔtina-mii Kristo ngba bulie ala lɛlɔ.

¹³ Bɛyɔ-ma na bɛbu-ma kaduɛ na bana ulu ɔbuni ɔni na béti-mii baasiaku ɔsu. Na bilieku lɛlɔ ku keyi buɛɛ.

¹⁴ Lɛnɔ ni, banwa, bɔɔwia kpakplaa ka bɛkɛ litemi bɛsu bakɔsɔne. Na bɛkya bani na liƒu lɛɛda ɔkplu. Na bibunku bani mɔɔwia kebunku. Na bɛkɛ kayi buɛɛ bite ukyuli biala.

¹⁵ Bɛnu kaduɛ na ɔdi uteti likpidi utaƒɔ likpidi kayu. Mmomu uwi biala kemmo ni, bitaabla lɛbuni teete lɛlɔ ku bekyuli ƒui.

¹⁶ Bɛya na lɛlɔ litaayɔ-mii uwi biala.

¹⁷ Bitaya na enu aƒɛ-mii na katɔ bɔkpali kemmo.

¹⁸ Na biti enugya bite Blɔti na lɛla biala kemmo. Ɔsika amɛni ndi ala ani na Katɔti ɔɔwia taasiku amii bani ƒui nsiaku Yesu Kristo kama.

¹⁹ Bitetile Katɔti Kɔyu ɔyikun ulu na bina akɔ.

²⁰ Biteni Katɔti kenye bediene ala kalɔ budie aani lɛla keeke.

²¹ Mmomu bɛwia lɛla biala kalɔ binu na bɛsiaku lɛbuni kama.

²² Bɛda lɛlɔ bidie likpidi ulu biala lɛlɔ.

²³ Na buuvele Katɔti ɔni muute-bu keyi buɛɛ bɔnii ɔbla-mii kedee na ulu biala lɛlɔ. Na ɔgyumana bina kɔyu ku kasusu ku ɔlɔna ƒui kalɛ na bɛlɛ kɔtɔ bɔdu kemmo uwi ɔni na Blɔti Yesu Kristo wasɔ webo.

²⁴ Na Katɔti ɔni nálɔ-mii ɔnii binwini nwuna bekyuli ni, ɔdububunku-mii utédu kawɔlɔkɔ. Ɔsika lɛla lɛni na ɔ́nya ɔ́su ka wabla ni, ani kani na ɔdubɔbla.

²⁵ Banwa, bitaakpali katɔ na bula lili.

²⁶ Bɛkya lɛlɔ kɔgbu na bigyele lɛlɔ ku kaƒɔ ƒaa.

²⁷ Mɔɔsu-mii kpakplaa aani Blɔti Yesu Kristo kenye unyene nnii bɛka ɔku ɔmɛni bite baƒɔtaadine bammɔ ƒui.

²⁸ Muuvele Blɔti Yesu Kristo nnii ɔda-mii kɔkɔɔkɔ na nwuna lɛƒɔndia kemmo.