Tesalonikaƒuɔ 1 2 - Katɔti Ɔku Kedee

Bɛ́ƒɔ Bula Litemi Aani Katɔti Litemi Kalɛ

¹ Banwa, amii alati bɛgyi ka kabla kani ɔsu na búbo-mii kudɔ ni, kánwu ebi geen.

² Na bɛgyi kalɛ na búbo abi na béwi-bu anumi kalɔ na Ƒilipi asa na búbedu bina kudɔ na Tesalonika mɛni. Nsu ina ka békpoku-bu mɛni lɛnɔ ni, Blɔti ɔ́kya-bu ɔkplu na bɔ́su-mii nwuna litemi buni.

³ Na bula bɔlɛ bɔni na bɔɔlɛ-mii ni, bútasi katɔlɔ iye kasusu kekpidi kemmo.

⁴ Mmomu litemi geen lɛmmɔ na bɔ́su-mii. Na bɔɔtɛmiku-mii uwi biala aani kalɛ na Katɔti ɔɔwia ka bɔbla. Ɔsika anwu ɔlati nákɔku-bu ɔ́nu ka bɔmanku ka bɔsu nwuna litemi buni. Na ɔɔɔdi aani kalɛ na bekyuli lɛƒɔyɔ lɛɛtina, mmomu aani kalɛ na Katɔti ɔni ngyi ukyuli biala kayi kemmo lɛyɔla lɛɛtina.

⁵ Bɛgyi kaduɛ ka ɔɔɔdi kenyemini etemila na búti búboku-mii. Na bútasu-mii litemi buni lɛmɛni kalɛ na bɔkɛ kɔsia kɔdi bɔsiku-mii kudɔ. Na Katɔti ɔlati ndubunye-bu litemi lɛmɛni kama.

⁶ Bútawia bumwi bútasiku amii iye bekyuli bamba kudɔ. Ina ka bubo kuƒi aani Kristo batalane kalɛ na bula lɛlɔ bɔnu bunwini etila bɔsia-mii lɛlɔ muedi ni,

⁷ bɔ́da lɛlɔ aani kalɛ na uwele ɔɔnu nwuna bebi lɛlɔ.

⁸ Ka bɔɔyɔ́-mii ku kaƒɔ nwaa ɔsu ni, bɔɔwia ka amii lɛnɔ binu litemi buni lɛmɛni. Na ɔɔɔdi Katɔti litemi buni lɛmmɔ lɛti. Mmomu búti bula ngba lɛnɔ bɔ́kpa na bina lili, ɔsika bɛ́ƒɔ-bu kuye geen.

⁹ Banwa binyimo ka uwi ɔni na bɔ́kya-mii kudɔ na bɔ́su-mii litemi buni lɛmɛni ni, búni ewulu usien ku ɔƒɛ na bɔ́bla kabla na bútenwini etila bútasia-mii lɛlɔ.

¹⁰ Amii alati ku Katɔti ndubunye-bu litemi lɛmɛni kama ka bɔ́da bula lɛlɔ kedee na bina akɔ. Bɔ́bla ala abuni. Na ukyuli ɔdi útanu bɔƒiɔ bɔdi na bula lɛlɔ.

¹¹ Bɛgyi lɛnɔ ka bɔ́da bina ɔdi biala aani kalɛ na ubi ɔti ɔɔda nwuna bebi.

¹² Bɔ́kya-mii ɔyikun ku ogya na bútaalɛ-mii bɔnii bilie ngba bɔni na kaƒɔ kayɔ Blɔti, ɔsika anwu ɔlati nálɔ-mii kalɛ na bɛkɛ bɔƒɔ na nwuna lɛga bɔdi ku bukeye kemmo.

¹³ Na lɛla lɛni ɔsu na bɔ́sɔ bɔɔgyá Katɔti enu lɛnɔ ndi ka ni, uwi ɔni na bɔ́su-mii litemi buni lɛmɛni ni, bíteti-ni aani litemi likpludi. Mmomu bɛ́ƒɔ-ni aani Katɔti litemi. Na ɔdi nwuna litemi sɔsɔ. Na líboku kavumana geen lɛnɔ na amii baƒɔtaadine bammɔ ngba bulie kemmo.

¹⁴ Banwa, ala ani mɔɔlɛ́ku-mii mɛni ni, anya kani nálɛku Katɔti bekyuli na Yudea kalɔ lɛlɔ. Na abi ani na amii biibó na bina bekyuli enu kemmo ni, anya kani na Yudea kalɔ bekyuli bani náƒɔ Yesu bádi bébo na Yudaƒuɔ lɛkɔkɔ.

¹⁵ Yudaƒuɔ bamɛni nádu Katɔti kenye bediene, na báya na bádu Blɔti Yesu lɛnɔ. Ama kani nsia beekpóku-bu na baawia-bu badu. Bana ablala áta énye Katɔti lɛlɔ na badi liƒula lɛni nétile bekyuli ƒui ulu.

¹⁶ Béti básia lɛlɔ banii butasu bani naaadi Yudaƒuɔ litemi buni lɛmɛni kalɛ na bakɛ ngba ƒui. Na baatɛ ekpidi etila taasia ekpidi kama teete lɛlɔ ani nédu kesii kani na Katɔti kɔtu bɔni bubo-ma lɛlɔ.

Bɛ́ƒɔ-bu Kuye Geen

¹⁷ Banwa uuduo-bu geen ka bɔ́di emeyi alɛɛ na bɔ́sɔ bútasa tɔ anumi ku anumi. Nsu bɛkya-bu kayi kemmo. Na bɔ́ɔkya kɔkwɛ kɔni ƒui bɔ́nɔ.

¹⁸ Anwuɔsu bɔ́yɔ ka bɔsɔ bubo bubanu-mii. Na ami Paulo geen ni, lɛ́wia ulu kɔlɛ kɔlɛ ka libo. Nsu ukisine ɔmmɔ únye útile ulu.

¹⁹ Mɔɔwia geen ka mbanu-mii, ɔsika amii ndi bula lɛnumi. Na bɛɛda-bu kubiti, ɔsika amii ku baƒɔtaadine bakladi ndi bula kɔsia kɔni ɔsu na bɔdubuƒu uwi ɔni na Blɔti Yesu wasɔ webo.

²⁰ Sɔsɔ ni, amii mɔɔyá lɛlɔ lɛɛyɔ́-bu, na buuƒú lɛnɔ na amii ɔsu.