Korintoƒuɔ 1 6 - Katɔti Ɔku Kedee

Ɔlɛka Baƒɔtaadine Baklibi Lɛlɔ Ntɛ

¹ Si bina akɔ ɔdi ɔ́kɛku ɔƒɔtaadine ɔkpana litemi ni, útalɛka uti litemi lɛmmɔ usienku bekyuli bani naaadi baƒɔtaadine kudɔ ka basu-ni bete-nwu. Mmomu bina akɔ ɔdi ɔlɛka ɔsu-ni.

² Bɛgyi ka Katɔti bekyuli ndubɔtɛku kayawi bekyuli litemi. Na si bɛgyi ka amii ndubɔtɛku kayawi bekyuli litemi ni, ɔdi ka bɛkana na bɛtɛ etemila wɛlɛ wɛlɛ.

³ Bɛgyi nwaa ka abu baƒɔtaadine ndubɔtɛku katɔ batu litemi. Ɔmɛni ɔsu na útalɛka kayawi etemila wɛlɛ wɛlɛ amɛni étulo-bu.

⁴ Anwuɔsu si etemila amɛni udu akya bina akɔ ni, ina bekyuli bani na bilábu na bina akɔ muedi na bɛƒuna ka basu-ni muedi ni, nka ɔdia utulo ka bisie ɔgbami.

⁵ Mɔɔsu-mii ɔmɛni na kɔƒa kukpo-mii. Ukyuli unwi pɛ ɔdi anwu ɔkya bina akɔ ɔni ndubɔkana na ɔklibi etemila amɛni na baƒɔtaadine ntɛ.

⁶ Nsu ɔnwa ɔƒɔtaadine uuti ɔkpanadi teesienku bekyuli bani naaadi baƒɔtaadine kudɔ banii batɛ bana etemila.

⁷ Kasusu kani na bɛdanku asa na biiti lɛlɔ teesienku litemi katɛkɔ lɛti pɛ ɔɔtina ka bina bɔƒɔtaadi bɔ́sɔ ƒui. Aani ɔƒɔtaadine kalɛ ni, si ukyuli ɔdi ɔɔƒiɔ́-ɔ na ákya ɔkplu na átakya-nwu kenye ni, ɔdia utulo. Lɛni kani si ukyuli ɔdi úti-ɔ lɛla lɛdi ni, takpete ukyuli ɔmmɔ.

⁸ Nsu amii alati mmomu mɔɔƒiɔ́ lɛlɔ. Na biiyú bina banwa baƒɔtaadine ala muedi.

^9-10 Na bɛgyi geen ka bekyuli bani mbo likyulikpi balákɛ Katɔti lɛga kadikɔ. Bitabu bina lɛlɔ kɔdɔlɔ! Ɔsika bekyuli bani mbo lɛyalɛ iye bani mɔɔkpá baƒiɔ iye baadi kɔsɔnɔ iye bani néti lɛlɔ kudɔ bɔtɛ bénwini liyedi iye banana bani mɔɔtɛnku lɛlɔ aani beleku kalɛ iye bani muuyú iye bani mbo lɛnungyie iye bani mɔɔní ntɛ teekpi iye beebile bekyuli anyi iye bani muuti bekyuli egulabi taadi ni, bana akɔ ɔdi biala uléduo Katɔti lɛga kadikɔ.

¹¹ Lɛni na nka amii badi bíse. Nsu Blɔti ɔ́ƒɔ-mii ekpidi údie-mii lɛlɔ kemmo na ɔ́bla-mii kedee úte Katɔti. Na amii ku Katɔti ntɛ bɔ́sɔ bɔ́dia ɔkɛ Blɔti Yesu Kristo ku Katɔti Kɔyu ɔsu.

Bɛda Bina Ɔlɔna Kedee Na Bite Katɔti Ɔbu

¹² Bina akɔ ɔdi ɔdubɔsu ɔnii, “Mbo kuƒi ka lɛbla lɛla biala.” Sɔsɔ na ɔdi. Nsu lɛla biala lɛɛɛdia liiite-ɔ. Lɛkana na lɛsu nnii, “Mbo kuƒi na lɛbla lɛla biala.” Nsu útalɛka lɛla biala lɛdi-mi lɛlɔ.

¹³ Ukyuli bamba lɛnɔ ɔdubɔkana na ɔsu ɔnii, “Kaƒɔ ɔsu na bédie adila, na kaƒɔ na adila ese ete.” Sɔsɔ na ɔdi, nsu Katɔti ɔdubɔya na ana ƒui uwi ubavi. Na ɔɔɔdi ka buti bula ɔlɔna butaabla kɔsɔnɔ bɔdi ala. Mmomu ɔdi ka buti butaabla Blɔti kabla. Na anwu ɔdubute ɔlɔna ɔmmɔ lɛla lɛni námanku-nwu.

¹⁴ Katɔti ɔ́gyila Blɔti ɔ́lɛku bekpine akɔ, na ɔdubɔgyila abu lɛnɔ ku nwuna ɔyikun.

¹⁵ Bɛgyi ka bina ɔlɔna ɔdi Kristo ɔlɔna kakɛ kadi. Na útamanku ka eti Kristo ɔlɔna kakɛ kadi atámanaku ukyuli ɔni ndi lɛyalɛ ala ɔblane lɛlɔ.

¹⁶ Bɛgyi lɛnɔ ka si ukyuli úti nwuna ɔlɔna útámanaku ɔyalɛ ɔdi lɛlɔ ni, ɔ́blaku-nwu unwi na ɔlɔna kemmo. Bunweni Kedee Ɔku ɔ́su nwaa ɔnii, “Bana inyɔ badubɔbla ɔlɔna unwi.”

¹⁷ Nsu ukyuli ɔni na úti lɛlɔ ɔ́mana Blɔti lɛlɔ ni, ɔ́blaku-nwu unwi na kɔyu kemmo.

¹⁸ Bɛsɔ bitabla kɔsɔnɔ ala. Likpidi bamba udu biala na ukyuli ɔ́bla ni, lɛɛɛdanku nwuna ɔlɔna. Nsu ukyuli ɔni mɔɔdi kɔsɔnɔ ni, ɔɔbla nwuna ɔlɔna ɔlati likpidi.

¹⁹ Bɛgyi nwaa ka ni, bina ɔlɔna ɔdi kakpakɔ ute Katɔti Kɔyu kɔni na Katɔti úti úte-mii na kulie-mii lɛlɔ kemmo. Ɔɔɔdi amii alati mbo bina lɛlɔ.

²⁰ Ɔsika Katɔti ɔ́ƒɔ kayu bonwu na bina lili. Anwuɔsu biti bina ɔlɔna bɛbla ala ani muute Katɔti ɔbu.