Korintoƒuɔ 1 2 - Katɔti Ɔku Kedee

Paulo Ɔ́tɛmi Ɔ́siku Kristo Lɛlɔ

¹ Banwa, uwi ɔni na líbo-mii kudɔ na ḿbakɔ Katɔti etemila geen abɛdi lɛsa líte-mii ni, ɔɔɔdi kenyemini iye kayawi lɛlati lɛdi kemmo na líti lɛ́tɛmiku-mii.

² Na uwi ɔni na ḿbakya-mii kudɔ ni, lɛ́tɛmiku-mii na Yesu Kristo ɔmmɔ lɛti pɛ lɛlɔ. Na ɔni ntulo ƒui ndi nwuna kukpi na ugyii lɛlɔ.

³ Na ka líbo-mii kudɔ ni, lɛlɔ lɛ́bla-mi kpɛtɛ kpɛtɛ. Na liƒu lɛ́da-mi. Na lɛlɔ lɛnɔ lɛ́tɔ-mi.

⁴ Na bɛdubɔnu ka mina ala ani na lɛ́tina ƒui ni, eeese aani ukyuli ɔni na kenye káda-nwu na úbo lɛnunda. Mmomu mina etemila bɔsu búdie bɔ́tina geen kalɛ na Katɔti Kɔyu ɔyikun use.

⁵ Ɔmɛni ɔsu ni, ɔɔɔdi ɔyawine lɛnunda lɛlɔ na bɛ́sia bɛ́ƒɔ Kristo bɛ́di, mmomu Katɔti ɔyikun lɛlɔ.

Katɔti Kɔyu Kɔgyi Lɛla Biala Na Katɔti Lɛlɔ

⁶ Nsu ni, mina kenye kani na mɔɔsu ni, kadanku bekyuli bani náda anu na béesie anumi na kɔyu kemmo ala kalɔ bunu kemmo. Na kaaadanku kayawi kamɛni kemmo lɛnunda iye bayikune bani mɔɔdi kayawi kamɛni lɛlɔ na baayii ku udu lɛlɔ.

⁷ Lɛnunda lɛni kenye na muudie mɛni ni, lɛdi Katɔti lɛnunda lɛni nábɛ bekyuli. Nsu Katɔti ɔ́ƒuna-ni úse kukuuku ka lɛƒɔ-bu asa na údie kayawi.

⁸ Kayawi kamɛni bayikune ɔdi biala útati lɛnunda lɛmɛni. Ɔsika si bɔti na báti-ni ni, nka bátakana Blɔti bátamana ugyii lɛlɔ.

⁹ Nsu Bunweni Kedee Ɔku ɔɔsu ɔnii, “Lɛla lɛni na ɔdi útanu iye útenu, na ɔdi útakali lɛnɔ ka lɛdubɔlɛ ni, ani geen ndi lɛla lɛni na Katɔti ɔ́klibi úse úte bekyuli bani mɔɔyɔ́-nwu.”

¹⁰ Nsu abu ɔsu na Katɔti údie nwuna abɛla amɛni keyi ɔkɛnku nwuna Kɔyu lɛlɔ. Katɔti Kɔyu kɔɔwia lɛla biala kemmo ɔti, na ɔgyi Katɔti abɛla muedi.

¹¹ Kalɛ na ukyuli kɔyu kɔni nkya-nwu lɛlɔ kemmo kɔgyi lɛla biala na nwuna lɛlɔ ni, lɛni kani na Katɔti Kɔyu kɔgyi lɛla biala na Katɔti lɛlɔ.

¹² Na abu ni, ɔɔɔdi kɔyu kɔni mɔɔdi alaekpidi bablane lɛlɔ nkya-bu lɛlɔ kemmo. Mmomu Katɔti Kɔyu kɔni ndubɔya na bɔti etela ani na bɔ́kɛ bɔ́siku-nwu kudɔ ku kaƒɔ ƒaa ni, aku nkya-bu lɛlɔ kemmo.

¹³ Ɔmɛni ɔsu ni, ɔɔɔdi kayawi kammɔ lɛnunda ala ani bekyuli baatina kemmo na búti bɔɔtɛmiku-mii. Mmomu buudie ala amɛni kalɔ teete-mii aani kalɛ na Katɔti Kɔyu kúdie ala ammɔ kalɔ kɔ́tina-bu.

¹⁴ Ukyuli biala ɔni na Katɔti Kɔyu kɔmɛni kútaƒɔ-nwu lɛlɔ kemmo ni, ulakana na waƒɔ etela ani na Katɔti Kɔyu kuute. Na ukyuli ɔmmɔ lɛnɔ ulénu ala ammɔ kalɔ, ɔsika ala ammɔ adi-nwu adɔlɔla sɔɔn. Na Katɔti Kɔyu lɛlɔ kani na ukyuli ɔdubɔsia na ɔnu etela ammɔ ɔti kalɛ na áƒɔ kuye.

¹⁵ Ukyuli ɔni na Katɔti Kɔyu kɔ́ƒɔ-nwu lɛlɔ kemmo ni, ɔɔkana na ɔɔnu lɛla biala taati. Nsu anwu ni, bekyuli balakana-nwu bɔnu bɔti.

¹⁶ Bunweni Kedee Ɔku ɔɔsu ɔnini, “Ukyuli ɔdi ɔɔɔgyi Katɔti lili kemmo. Na ɔdi lɛnɔ ulakana-nwu lɛla lɛdi bɔtina.” Nsu abu ni, Kristo kakali kakya-bu lɛlɔ kemmo.