Korintoƒuɔ 1 14 - Katɔti Ɔku Kedee

¹ Anwuɔsu ni, bɔyɔ na ɔdi ka bina ƒui bɛwia kpakplaa na bɛkɛ. Na biti bina anu ƒui bɛsia Kɔyu kemmo etela lɛlɔ. Na litela lɛni ntulo ƒui ndi ka bidie Katɔti litemi kenye.

² Ukyuli ɔni muutemi adi lidu ni, ulátɛmiku bekyuli, mmomu Katɔti na ɔɔtɛmiku. Ɔsika ukyuli ɔdi ulenu-ni kalɔ, na bɔsu na ɔɔsu ala abɛdi ɔkɛnku Katɔti Kɔyu ɔyikun lɛlɔ.

³ Nsu ukyuli ɔni muudie Katɔti litemi kenye teete bekyuli ni, uubunku-ma na ɔɔkya-ma ogya na ɔɔsia-ma kɔnu.

⁴ Ukyuli ɔni mɔɔtɛmi adi ani kalɔ na bekyuli belenu ni, anwu lɛti pɛ lɛlɔ kani na uubunku. Nsu ukyuli ɔni muudie Katɔti litemi kenye ni, uubunku baƒɔtaadine lɛkpa lɛmmɔ ƒui.

⁵ Mɔɔyɔ́ si bina ƒui bɛɛkana na bɛɛtɛmi adi lidu. Nsu si bɛ́kana na biidie Katɔti litemi kenye teete bekyuli ni, ɔdia-mi utulo. Ɔsika ukyuli ɔni muudie Katɔti litemi kenye teete bekyuli ni, ubo kɔsia utulo ukyuli ɔni mɔɔtɛmi adi lidu lidu, amu ntu ukyuli ɔni makana nwuna ala ani na ɔɔsu kalɔ budie ɔkya-ma akɔ mmɔ, kalɛ na baƒɔtaadine lɛkpa lɛmmɔ lɛkɛ kebunku.

⁶ Ɔmɛni ɔsu, banwa, si líbo-mii kudɔ na mɔɔtɛmi adi lidu lɛni na ɔdi ulenu kalɔ ni, bi kɔsia na bɛdubɔkɛ na ɔmmɔ kemmo? Bilákɛ kɔsia kɔdi munu munu, amu ntu lídie lɛla lɛdi kalɔ líte-mii ɔ́si Katɔti kudɔ, iye lɛ́ya na bɛ́ti lɛla lɛdi, iye lídie Katɔti litemi lɛdi kenye, iye lɛ́tina-mii ala adi.

⁷ Bɛkali bɛnu ala ani na bɔɔgyá ani na ngba bɔdi buuubo-nya kemmo aani kakpɛɛ iye ɔsankuo ani na anya alati alakana lɛnu budie. Dɛ na ukyuli ɔdi ɔdubunu na ɔti ɔnu ɔni na beedie si ukyuli ɔni mɔɔvwi kakpɛɛ iye ɔɔgyá ɔsankuo ɔmmɔ ulagya-nwu kaduɛ kalɛ na akana na enu ɔnu ɔmmɔ lɛdi ati nwaa?

⁸ Na si ukyuli ɔni mɔɔvwi kakpɛɛ ulávwi-ka taalɔ ala ammɔ kaduɛ ni, dɛ na wabla asa na bekyuli baklibi lɛlɔ bete kekpo?

⁹ Lɛni kani na use ka ukyuli ɔni muudie lɛla lɛdi kenye na adi lidu lidu kemmo ni, bekyuli belénu lɛla lɛni na ɔɔsu mmɔ kalɔ. Mmomu ɔdubo bunwini ɔƒɛƒɛɛ na ɔyii ɔkya kayaa.

¹⁰ Adi pii akya kayawi, na lɛdi lɛdi liiibo lɛni neeebo kalɔ budie.

¹¹ Nsu si ɔdi ulénu lɛdi lɛni na mɔɔtɛmi kalɔ ni, na línwini ɔƒɔ na nwuna kudɔ, na anwu lɛnɔ únwini ɔƒɔ na mina kudɔ.

¹² Ka bina ƒui anumi égyie ka bɛkɛ Kɔyu kemmo etela ni, bɛya na anumi egyie-mii na bɛkɛ etela ani mebunku baƒɔtaadine lɛkpa lɛmmɔ lɛtɔtɔ busie mmomu utulo.

¹³ Na ukyuli ɔni mɔɔtɛmi na adi lidu lidu kemmo ni, uvele Katɔti na ute-nwu litela lɛni na uti udie ala ani na ɔɔsu mmɔ kalɔ.

¹⁴ Ɔsika si lɛ́sia ulu ɔmɛni lɛlɔ lɛ́kpali katɔ ni, mina kɔyu aku kɔɔkpali katɔ bɔdi, nsu ɔɔɔdi ku mina kasusu.

¹⁵ Anwuɔsu bi na ɔdi ka lɛbla? Ndubɔkpali katɔ ku mina kɔyu bɔdi, nsu ndubɔkpali katɔ ku mina kasusu lɛnɔ. Na ndubudie lɛnu ku mina kɔyu, nsu ndubudie lɛnu ku mina kasusu lɛnɔ.

¹⁶ Na si enye aagyá Katɔti enu na ƒula kɔyu kemmo kani ni, dɛ na wabla asa na ukyuli ɔni nkya-a kudɔ unu lɛla lɛni na aasu asa na wasu ɔnii ƒula katɔ bɔkpali bɔsia lɛni aani kalɛ na aagyá Katɔti enu ka ulenu lɛla lɛni geen na aasu mmɔ kalɔ?

¹⁷ Na si ina ƒula enu ani na aagyá Katɔti adia muedi ni, bekyuli bamba balákɛ kɔsia kɔdi munu munu.

¹⁸ Mɔɔgyá Katɔti enu ka mɔɔtɛmiku-nwu na adi lidu lidu kemmo teetulo bina akɔ ɔdi biala.

¹⁹ Nsu na bula kasalakɔ ni, ndubɔyɔ ka lɛsu etemila alɔ ani kalɔ na bekyuli badubunu na liti lɛtina bekyuli bamba ala litulo ka ntaasu etemila pii na adi lidu lidu kemmo.

²⁰ Banwa, bitabla lɛlɔ aani banamu na bina kasusu kemmo. Mmomu bɛbla lɛlɔ aani benengu si biiti kasusu. Nsu na likpidi lilu lɛlɔ ni, bɛbla lɛlɔ aani banamu.

²¹ Na Bunweni Kedee Ɔku kemmo ni, Blɔti ɔ́su ɔnini, “Ndubɔtɛmiku mina kadi bekyuli ɔkɛnku bekyuli bani mɔɔtɛmi na adi lidu lidu kemmo. Na ndubɔtɛmi lɛsiaku baƒɔ kenye kemmo, nsu belénu-mi lɛdi.”

²² Anwuɔsu ni, adi lidu bɔtɛmi ɔdi lɛla lɛni nse nte bani nátaƒɔ bátadi. Nsu Katɔti litemi kenye budie ni, ɔdi lɛla lɛni nse nte baƒɔtaadine na ɔɔɔdi bani nátaƒɔ bátadi.

²³ Ɔmɛni ɔsu si baƒɔtaadine bammɔ ƒui bása na ɔdi biala úse kalɔ ɔɔtɛmi na adi lidu lidu kemmo na banii ukyuli bamba ɔdi ɔkya-mii akɔ iye bekyuli bani naaadi baƒɔtaadine badi bébo-mii akɔ ni, bilánu ka badubɔsu banii biikpi libuo yoo?

²⁴ Nsu si bina akɔ ɔdi biala uudie Katɔti litemi kenye na ukyuli keeke iye ukyuli ɔni nátaƒɔ útadi ɔdi úbo-mii akɔ ni, ɔdubɔnu nwuna likpidi ɔti ɔkɛnku lɛla lɛni na uunú ɔsu. Ala ani na uunú adubɔtina-nwu ka Katɔti ɔɔtɛku-nwu litemi.

²⁵ Na anwu ɔlati ndubudie nwuna ala abɛdi keyi na ɔdubɔyu ɔtɛ kalɔ na umwi Katɔti na udie kenye ɔnini, “Sɔsɔ ni, Katɔti ɔkya-mii akɔ!”

²⁶ Banwa, mɔɔwia ka liti lɛla lɛdi libunku ɔmɛni na bina bɔsa kemmo. Si uwi ɔni na bɛ́sa bɛnii bɛɛkpali katɔ ni, ɔdi ubo ɔnu ɔni na ɔɔyɔ́ ka udie, na ɔdi lɛnɔ ubo lɛla lɛdi na ɔɔyɔ́-ka ɔtina. Na ɔdi lɛnɔ ɔɔyɔ́ ka udie Katɔti lɛla lɛdi ɔtina. Na ɔdi lɛnɔ ɔdanku kenye kadi na adi lidu lidu kemmo, na ɔdi lɛnɔ kalɛ na udie ala ammɔ kalɔ. Nsu ɔlɛka bɛbla ala amɛni ƒui kalɛ na ute baƒɔtaadine lɛkpa lɛmmɔ kebunku.

²⁷ Si ɔdi ubo kenye kadi na ɔɔyɔ́ ka ɔsu na adi lidu lidu kemmo ni, nkyuli aani inyɔ iye ɛtɛ si bémomo bágya basu bana kenye kani badanku atɔ asia. Na bakɛ ukyuli bamba ɔni lɛnɔ medie ala ani básu mmɔ kalɔ.

²⁸ Na si ɔdi uuubo na wedie ala ammɔ kalɔ bɔdi ni, ukyuli ɔni mɔɔtɛmi na adi lidu lidu kemmo mmɔ ɔda ɔya na anwu ku Katɔti kani batɛmiku lɛlɔ.

²⁹ Nkyuli inyɔ iye ɛtɛ bani ndanku kenye kadi ɔ́si Katɔti kudɔ basu bana kenye na bakladi bawia etemila ammɔ kemmo banu kaduɛ.

³⁰ Na si bani nlie kasalakɔ mmɔ ɔdi ɔ́ƒɔ linyesia lɛdi ɔ́siku Katɔti kudɔ ni, ɔdi ka ukyuli ɔni mɔɔtɛmi na adi lidu lidu kemmo mmɔ ɔda nwuna kenye bɔsu ɔya na ute ukyuli ɔmmɔ kuƒi.

³¹ Bina ƒui bɛkana na bɛsu bina kenye kani bɛda unwi unwi kalɛ na ɔdi biala ɔtɛya lɛla lɛdi na ɔkɛ ɔyikun bɔkya.

³² Bekyuli bani muudie Katɔti kenye baakana bana lɛlɔ bɔda na kenye kani na baasu kemmo.

³³ Ɔsika Katɔti ɔɔwia ka bɔbla ala ulu lɛlɔ. Na ɔɔyɔ́ ka amanku keyi buɛɛ. Na lɛni na ɔlɛka use na Katɔti baƒɔtaadine akpa ƒui akɔ.

³⁴ Ɔdi ka beleku baba lɛsɛ na ɔɔɔdi ka beteetemi na kasalakɔ. Mmomu ɔdi ka beboku lɛlɔ kalɔ aani kalɛ na Katɔti ɔda bubo bɔɔtina. Na beeebo kuƒi ka batɛmi.

³⁵ Na si baawia ka beye lɛla lɛdi kalɔ benu ni, bana bagya na ɔlɛka beye na kaduli. Ɔsika ɔdi kɔƒa ka uleku unye utaatɛmi na baƒɔtaadine lɛkpa lɛmmɔ anumi.

³⁶ Munuu ni, bɔsu bɛda bɛnii bina kudɔ na Katɔti litemi lɛmmɔ lɛ́kwɛ lɛ́si? Munuu bina kudɔ kani na litemi lɛmmɔ líbedu?

³⁷ Si bina akɔ ɔdi ɔɔkali ɔnii Katɔti kenye udiene na ɔdi iye ubo Kɔyu kemmo litela lɛdi ni, ɔdi ka ɔnu ɔti ka lɛla lɛni na muunweni-mii lɛdi ɔda ɔni na Katɔti úbo.

³⁸ Na si ukyuli ɔmmɔ uuní litemi lɛmɛni ni, ɔdi ka amii lɛnɔ bini-nwu.

³⁹ Anwuɔsu ni, banwa, biti bina anu ƒui bɛsia Katɔti litemi kenye budie lɛlɔ. Nsu bitetile adi lidu bɔtɛmi ulu.

⁴⁰ Na ɔdi ka bɛbla lɛla biala na ulu ɔbuni lɛlɔ.