Korintoƒuɔ 1 13 - Katɔti Ɔku Kedee

¹ Si lɛ́kana na mɔɔtɛmi adi lidu lidu ani na bekyuli ku Katɔti batu ƒui bebo na naaayɔ bekyuli ni, mina kenye kani mɔɔsu ƒui kadi lɛsɛ likpludi aani kalɛ na lebomo iye kabontobi kaaku.

² Na si muudie Katɔti kenye na muunú abɛla ku lɛlati ƒui kalɔ, na mbo bɔƒɔtaadi bɔni na lɛkana na lɛ́gyu abi muedi na ana kenyekɔ nsu naaayɔ bekyuli ni, lɛɛɛdi lɛla lɛdi.

³ Na si ina líti mina ala ani nse-mi ƒui líte bawabane na lɛ́ya na bekyuli muedi bakyula-mi nsu naaayɔ bekyuli ni, lɛɛɛdi lɛla lɛdi.

⁴ Bɔyɔ bɔɔkɛ́ kayi na bɔɔbla kaƒɔ buni. Buuubo lɛnungyie na bulákun lɛmɛnɛ iye bɔtalaku lɛlɔ katɔ.

⁵ Bɔyɔ bulábla atu ɔkplu na bulánwanɛ ala teete lɛlɔ iye buléti kɔnyi. Na bɔyɔ buléti likpidi taakya kasusu kemmo.

⁶ Na lɛlɔ lilayɔ-nwu na likpidi lɛlɔ. Mmomu ɔɔkɛ́ lɛlɔyɔ na lɛbuni lɛlɔ.

⁷ Enu aláƒɛ bɔyɔ, na nwuna bɔƒɔtaadi ku lɛnunsia ku nwuna bunye kpakplaa buláyuɛ.

⁸ Bɔyɔ buuubo kawɔkɔ. Katɔti ala kenye budie bɔkya, nsu bɔdubo bɔwɔ ulu. Adi lidu lidu bɔtɛmi lɛnɔ bɔkya, nsu anwu lɛnɔ ɔdubo ulu bɔwɔ. Lɛlati lɛkya bɔdi, nsu nwuna uwi ɔdubo bɔvi.

⁹ Ɔsika lɛlati ku kenye budie litela lɛni na Katɔti úte-bu ni, útedu útawɔlɔ.

¹⁰ Nsu si lɛla lɛni nédu lɛ́wɔlɔ lɛ́da lɛ́lɛ ni, lɛni nétedu mmɔ lɛyii taakya.

¹¹ Uwi ɔni na ndi ɔnamu ni, kalɛ na mɔɔtɛmi ku kalɛ na muunú ala kɔku na mina ɔlɔna kemmo ku kalɛ na mɔɔbla kasusu ni, adi anamula bɔbla. Ɔƒɛni ka línwini ɔnana ni, anamula ammɔ asɔ eeebo-mi kɔsia kɔdi.

¹² Ala ani na bɔɔnu ɔƒɛni ni, ese aani kalɛ na baanu lɛla lɛdi ƒlu ƒlu na asogya kemmo. Na kama asa na bɔdubɔnu-ni nwaa anumi ku anumi. Na lɛla lɛni na ngyi ɔƒɛni ni, lítedu lítawɔlɔ. Nsu kama ni, lɛdubo libedu lɛwɔlɔ na ɔbla nwaa aani kalɛ kani na Katɔti ɔgyi-mi ƒui.

¹³ Geen ni, alakpa atɛ amɛni kani ndubɔkya. Na anya ndi bɔƒɔtaadi ku lɛnunsia ku bɔyɔ. Nsu nwuna unengudi ƒui ndi bɔyɔ.