Korintoƒuɔ 1 11 - Katɔti Ɔku Kedee

¹ Bɛnu mina ɔbladu bɛtɛya aani kalɛ na ami lɛnɔ mɔɔnu Kristo ɔdi taatɛya.

Kristo Ɔdi Ukyuli Biala Lili

² Muumwi-mii ɔsika bina anu asia-mi lɛlɔ uwi biala na biinyimo ala ani na lɛ́tina-mii na bɛɛbla taasiaku-nya lɛlɔ uwi biala.

³ Nsu mɔɔwia ka binu kalɔ nwaa ka ni, Kristo ɔdi ukyuli biala lili. Na ɔgya lɛnɔ ɔdi uleku lili. Na Katɔti ndi Kristo lili.

⁴ Anwuɔsu ɔnana ɔni mɔɔkpali katɔ iye ɔɔkɔ́ Katɔti litemi buni lɛsa na Katɔti kakpakɔ na úti lɛla lɛdi úbi lili ni, ɔɔkya Kristo kɔƒa.

⁵ Na uleku ɔni mɔɔkpali katɔ iye ɔɔkɔ́ Katɔti litemi buni lɛsa na kakpakɔ na útamana lɛdiku lili ni, ɔɔkya ɔgyani kɔƒa. Na kavumana kadi keeebo anwu ku uleku ɔni nékpeyi lili na ɔɔɔda lɛlɔ ntɛ.

⁶ Si uleku ɔmmɔ útamana lɛdiku lili ni, na ɔlɛka ɔkpɛ lili linwini. Na ka ɔdi lɛla lɛni muuwi uleku anumi kalɔ si úkpeyi lili iye ɔ́kpɛ lili ɔsu ni, ɔdi ka ɔmana lɛdiku lili.

⁷ Útalɛka ɔnana ubi lɛla lɛdi lili, ɔsika Katɔti údie ɔnana na nwuna udu kenye. Na uudie Katɔti ɔbu keyi. Nsu ulekudi anwu uudie ɔnana ɔbu keyi.

⁸ Ɔsika Katɔti útaka ɔnana budie bɔlɛku uleku kemmo. Mmomu uleku na údie ɔ́lɛku ɔnana kemmo.

⁹ Na ɔɔɔdi uleku ɔsu na Katɔti údie ɔnana. Mmomu ɔnana ɔsu na Katɔti údie uleku.

¹⁰ Na kayaa batu ɔsu ni, ɔlɛka uleku ɔmana lɛdiku lili uti ɔtina ka ɔkya ɔnana kalɔ.

¹¹ Na bula baƒɔtaadine ngba bulie kemmo ni, uleku ulesie taaya ɔnana, na ɔnana lɛnɔ ulesie taaya uleku.

¹² Ɔsika kalɛ na bábla uleku bálɛku ɔnana kemmo ni, lɛni kani na uleku lɛnɔ ɔ́wɔ ɔnana. Nsu lɛla biala ni, Katɔti kudɔ kani na lɛɛsí.

¹³ Amii alati bɛbu bɛnu si ɔ́manku uleku ka unye utaakpali katɔ ɔni na útamana lɛla lɛdi lili?

¹⁴ Kalɛ na Katɔti údie kayawi ala ni, ɔmmɔ lɛti ɔɔtina-bu lɛla lɛdi. Na útamanku ka ɔnana ɔda nwuna lili linwini use na liyi line gyɔlɔɔ. Ɔdi kɔƒa lɛla.

¹⁵ Nsu si uleku linwini ani líne-nwu lɛni ni, ɔdi-nwu ɔbu. Ɔsika Katɔti úte-nwu linwini gyɔlɔɔ lɛmmɔ aani lɛla lɛni nébi-nwu lili.

¹⁶ Nsu si ukyuli ɔdi ɔɔkya unyeƒi na ɔmɛni lɛlɔ ni, lɛla lɛni kani na ami masu-nwu ndi ka abu ku Katɔti baƒɔtaadine akpa ƒui bɔsɔ buuubo ulu ɔbambadi ɔdi na bula bɔsala bɔmmɔ kemmo.

¹⁷ Nsu na ala ani ndubo bɔtina mɛni kemmo ni, ɔɔɔdi bumwi na nda-mii. Ɔsika si uwi ɔni na bíbasala ni, ɔɔɔdi lɛbuni mɔɔlɛ́ taasiku bina bɔsa bɔmmɔ kemmo. Mmomu ala muubie teebu.

¹⁸ Ɔsika kudeedi ni, línu ka si bɛ́sala aani baƒɔtaadine ni, biile lɛlɔ kemmo akpa akpa. Na use-mi ka sɔsɔ na ɔdi.

¹⁹ Unyeƒi ɔdi uuubo ka ɔdi ka kavumana kadi kakya-mii akɔ uti ɔtina bani ndi baƒɔtaadine geen kalɛ na bekyuli banu-ma bati.

²⁰ Na si bɛ́sala aani lɛkpa ni, ɔɔɔdi Blɔti adila kedee na bíbo bibadi.

²¹ Ɔsika si bɛɛdi ni, bilénye taagya lɛlɔ asa na ɔdi biala uti nwuna adila ɔdi. Ɔmɛni ɔɔyá na kɔka kɔɔda badi na badi ama baaní ntɛ teekpi.

²² Bubo na biiibo kɔduli kɔni kemmo na bilie bɛdi na bɛni? Munuu bɔyɔ na bɛɛyɔ́ ka biwi lɛkpa lɛmmɔ anumi kalɔ na bɛkya baƒɔtaadine bani mɔɔyaki ala kɔƒa. Bi na ɔlɛka lɛsu-mii? Bumwi na ɔlɛka limwi-mii na ɔmɛni ɔsu? Oowo!

²³ Ɔsika lɛla lɛni na lɛ́ƒɔ lɛ́siku Blɔti kudɔ ni, ani kani na lɛ́tina-mii. Na usien ɔmmɔ asa na badubɔkya-nwu kakya ni, úti bodobodo,

²⁴ na ka ɔ́gya Katɔti enu ni, ɔ́ƒɛ-nwu kemmo na ɔ́su ɔnini, “Ɔmɛni ndi mina ɔlɔna ɔni na ndubuti lɛkpa lite Katɔti na bina lili. Bɛƒɔ bɛdi na biti biteenyimo-mi.”

²⁵ Lɛni kani na adila ammɔ kama ni, úti ɔɔƒɛɛ na ɔ́su ɔnini, “Ɔɔƒɛɛ ɔmɛni ndi Katɔti bunyimi bɔwɔdi bɔni na úti mina ubugya úse likpo. Na uwi biala na bɛdubɔni-nwu ni, bɛni na biti biteenyimo-mi.”

²⁶ Ɔmɛni ɔɔtina ka uwi biala na bɛɛdi iye bɛɛní na ɔɔƒɛɛ ɔmɛni kemmo ni, biibó Blɔti kukpi kudu wetédu uwi ɔni na wasɔ webo.

²⁷ Anwuɔsu ukyuli biala madi Blɔti adila amɛni iye wani na ɔɔƒɛɛ ɔmɛni kemmo na ulu ɔni nátamanku lɛlɔ ni, ɔdubɔtina ka ɔ́bla likpidi ka útabu Blɔti ɔlɔna ku ubugya ɔmmɔ ɔsu.

²⁸ Ɔmɛni ɔsu ni, ɔdi biala ɔka nwuna lɛlɔ kemmo buduo asa na ɔdi bodobodo na ɔni na Blɔti ɔɔƒɛɛ ɔmmɔ kemmo.

²⁹ Ɔsika si útanu lɛla lɛni na Blɔti ɔlɔna ɔmɛni ɔdanku útati uwi ɔni na ɔɔdi bodobodo ɔmmɔ iye ɔɔní na ɔɔƒɛɛ ɔmmɔ kemmo ni, ɔɔdi na ɔɔní na uuti litemi bɔtɛ teewi lɛlɔ.

³⁰ Ɔmmɔ náya na bina akɔ pii biiƒi na lɛlɔ liiibo-mii ɔkplu. Na pii lɛnɔ békpi.

³¹ Na si bɔdubɔsia anu na bɔka lɛlɔ kemmo buduo bɔnu ni, nka Katɔti ulatɛku-bu litemi.

³² Nsu Blɔti ɔɔtɛku abu litemi na ɔɔní-bu kɔtu kalɛ na Katɔti ulayila-bu udu ku bekyuli bani nátaƒɔ bátadi.

³³ Ɔmɛni ɔsu ni, banwa, si bɛ́sala bɛnii bɛɛdi Blɔti adila ni, binye bɛgya lɛlɔ.

³⁴ Na si kɔka mɔɔda ɔdi ni, ɔlɛka ɔdi na nwuna kaduli kalɛ na Katɔti ulatɛku-mii litemi si bɛ́sala aani lɛkpa linwi kalɛ. Na etemila akladi anya ni, si líbo mmɔ ni, bɔdubɔda-nya bɔnu.