Korintoƒuɔ 1 10 - Katɔti Ɔku Kedee

Paulo Úbo-ma Ɔda Na Lɛƒiɔkpa Lɛlɔ

¹ Banwa, mɔɔwia ka binyimo lɛla lɛni nálɛku bula bati kuuku bani násiaku Mose. Ulɔyɔ ɔ́tɔnku-ma, na ɔ́gyumana-ma ƒui. Na bávi Ɛpugyie ntɛ.

² Katɔti úti ku Ɛpugyie ɔmmɔ ɔ́bla-ma ntu bɔkpila ɔdi aani bekyuli bani nsiaku Mose kama.

³ Bana ƒui bádi Kɔyu kemmo adila enwi pɛ ammɔ.

⁴ Na báni Kɔyu kemmo ntu bunwi pɛ bɔmmɔ. Báni ntu básiku Kɔyu kemmo lɛtakpɛ lɛni nkɛ nsiaku-ma mmɔ kemmo. Na lɛtakpɛ lɛmmɔ lɛdi Kristo ɔmmɔ ɔlati.

⁵ Uwi ɔmmɔ muedi kemmo ni, lɛlɔ lítayɔ Katɔti na bana ketulodikɔ ɔbladu lɛlɔ. Anwuɔsu ni, békpi ketele kemmo.

⁶ Ɔmɛni ɔdi ala ani na bɔnu bɔtɛya kalɛ na alaekpidi emini asɔ alátaada-bu ɔkwɛ aani bana kalɛ,

⁷ iye buti lɛlɔ bute lɛƒiɔkpa ala bɔbla aani bana kalɛ. Lɛni na Bunweni Kedee Ɔku ɔ́su ɔnini, “Bekyuli bammɔ bádu bebuo na báni ntɛ na badi adikpi limeyi, na bátɔ béte baƒiɔ.”

⁸ Útalɛka butaabla kɔsɔnɔ bɔdi ala aani kalɛ na bana badi bábla, na nkyuli mpim aavlanyɔ-ɛtɛ békpi limeyi linwi.

⁹ Na ɔɔɔdi ka bɔkɔku Blɔti bɔnu. Lɛni na bana badi bábla, na balakpi bádu-ma na békpi.

¹⁰ Na ɔɔɔdi ka butaata teenye Katɔti lɛlɔ aani kalɛ na bana badi bábla ɔsu, na Katɔti ɔtu ɔni nda kukpi ɔyikun ɔ́kyula-ma.

¹¹ Ala amɛni ƒui álɛku-ma kalɛ na abu bɔnu bɔtɛya. Na bénweni-nya bése kalɛ na buti-nya bɔlɛ lɛlɔ. Ɔsika bula uwi ɔni kemmo na bɔkya mɛni ni, úudu kawɔlɔkɔ.

¹² Ɔdi biala ɔni mɔɔkali ɔnii unye kpakplaa ni, ɔnu kaduɛ kalɛ na ulebuli.

¹³ Lɛla biala lɛni nékpoku-ɔ lɛ́nu ni, nina udu lɛɛkana na liibo ukyuli biala lɛlɔ. Nsu ni, Katɔti ɔɔdi nwuna linyese lɛlɔ. Na ɔdubute-ɔ ɔyikun ɔni na eti enye lɛla lɛni mekpoku-ɔ manu kenye, na liletulo ƒula ɔyikun kalɛ na enye kpakplaa ete-nwu. Uwi ɔni kemmo na lɛla lɛdi liikpóku-ɔ taanu ni, Katɔti ɔdubute-ɔ ɔyikun ɔni na eti enye ala ammɔ ƒui kenye, na ɔtina-a ulu ɔni lɛlɔ na asia na alɛ-nwu kemmo.

¹⁴ Anwuɔsu ni, banwa, bɛda lɛlɔ bidie lɛƒiɔkpa biala kemmo.

¹⁵ Mɔɔtɛmiku-mii aani bekyuli bani náda anu. Anwuɔsu bɛbu ala ani na mɔɔsu-mii mɛni kemmo bɛnu.

¹⁶ Ɔɔƒɛɛ ɔni na buuti taagya Katɔti enu ni, unye ute Blɔti ubugya. Na bodobodo ɔni na bɔɔbwɛ si bɔɔdi Blɔti adila kedee ni, ɔɔtina ka abu ku Kristo bɔɔbla unwi.

¹⁷ Na ina ka bumomo ni, bɔdi ɔlɔna unwi pɛ. Ɔsika bodobodo unwi kani na bula ƒui bɔɔdi.

¹⁸ Bɛbu bɛnu Israelƒuɔ ka ni, bekyuli bani mɔɔdi adila ani na béti bákpa béte Katɔti ni, báblaku Katɔti unwi. Ɔsika anwu na bákpa ala ammɔ béte na nwuna lɛkpabi lɛlɔ.

¹⁹ Na ɔƒɛni ni, bɛɛkali bɛnii bɔɔsu na nda nnii baƒiɔ bani bávɔ béte lɛlɔ ni, ama lɛnɔ badi Katɔti ɔdi geen? Munuu adila ani na béti bákpa béte ala bamba amɛni adi lɛla geen lɛdi?

²⁰ Oowo! Lɛla lɛni na mɔɔsu-mii ni, ani ndi ka ala ani na béti bákpa na akpabi amɛni lɛlɔ ni, béti-nya bákpa béte ayu ekpidi, na ɔɔɔdi Katɔti. Na naaawia-mii nnii bɛbla unwi ku ayu ekpidi amɛni.

²¹ Ɔɔɔdia ka ani asiku Blɔti ɔɔƒɛɛ kemmo na asɔ atáni asiku ayu ekpidi lɛnɔ ɔɔƒɛɛ kemmo. Útalɛka adi adila na Blɔti kakpakɔ na asɔ atádi adila na ayu ekpidi kakpakɔ lɛnɔ.

²² Munuu bɛɛyɔ́ ka Blɔti uti nwuna kɔnyi ɔkya-bu? Bitaya bɔkali bɔnii bubo ɔyikun butulo-nwu.

²³ Bubo lɛsugba banii, “Kuƒi kɔtɛ na bɔbla lɛla biala.” Sɔsɔ na ɔdi. Nsu ɔɔɔdi lɛla biala ndia. Kuƒi kɔtɛ na bɔbla lɛla biala, nsu ɔɔɔdi lɛla biala mbo kɔsia lite-bu.

²⁴ Ɔƒɔtaadine ɔdi utawia anwu lɛti bɔdia, mmomu ɔwia lɛla lɛni madia mete nwuna ɔkpana lɛnɔ.

²⁵ Ebo kuƒi na eye lɛna lɛdi biala na beeyé na kuye na akun. Na ɔɔɔdi ka eye lɛla lɛdi enu na ati si lɛna lɛmmɔ lise kedee iye liiise.

²⁶ Ɔsika Bunweni Kedee Ɔku ɔɔsu ɔnii, “Kalɔ ku kana ala ani nkya-nya kemmo ƒui ni, adi Blɔti adi.”

²⁷ Si ukyuli ɔni naaadi ɔƒɔtaadine ɔdi ɔ́lɔ-ɔ ɔnii baadiku-nwu na átuna na ésie ni, lɛla biala na úte-ɔ ɔnii di ni, di na teye lɛla lɛdi enu ati si adila ammɔ ese kedee iye eeese.

²⁸ Mmomu si ukyuli ɔdi ɔ́su-ɔ ɔnii béti adila ammɔ bákpa béte baƒiɔ badi ni, tadi-nya. Ɔmɛni ɔdubɔya na kayi kelékpoku ukyuli ɔmmɔ.

²⁹ Ɔsika ɔɔɔdi awɔ ɔni nádi adila ammɔ na kayi kadubo bukpoku. Mmomu ukyuli ɔni nánu ɔ́su-ɔ na kayi kadubo bukpoku. Ukyuli ɔdi ɔdubɔkana na uye ɔnii, “Bi ɔsu na si mbo kuƒi na lɛbla lɛla lɛdi na ukyuli bamba kayi kani mekpoku-nwu ɔsu na ɔdi ka lɛda lɛla lɛmmɔ bɔbla lɛya?

³⁰ Si lɛ́gya Katɔti enu na lɛdila lɛni na úte-mi ɔsu ni, bi ɔsu na ukyuli ɔdi ɔnu ɔnii lɛ́ƒiɔ na ɔmɛni lɛlɔ ka lɛ́ɛgya Katɔti enu?”

³¹ Nsu nyimo ka lɛla biala na ɔdi aabla iye aadi iye aaní ni, ɔlɛka abla ana ƒui kalɛ na eti ɔbu ete Katɔti.

³² Bitabla lɛla lɛni maya na Yudaƒuɔ iye bani naaadi Yudaƒuɔ iye baƒɔtaadine belebo Katɔti kudɔ.

³³ Bɛbla kalɛ kani na mɔɔbla lɛla biala. Mɔɔsia anu kalɛ na naaata neeenye ɔdi lɛlɔ. Naaakali taanu mina lɛkɛ, mmomu lɛla lɛni madia mete ɔdi biala kalɛ na bakɛ bɔƒɔ.