Shəlamɔ 1 - Lyélé

Pwəə nə́ ń ce Shəlamɔ

¹ Àmyɛ́ Pwəə, bə̀ co ne byə̀nə́-jù w à gə́ nʼâ twĩ̀ Yezu Kristə tum dí mú yilə. Shəlamɔ, wɔ́ àmyɛ́ ǹdə́ nə́ da-byǐ Timote nə́ kɛ̃ sɛ́bɛ́ rɛ́ tɛ̀bɛ́ nə́ rʼé pɛ ǹmyɛ́ mɔ̀bɔ́ nə́ só dɛ̃´dɛ̃´ ǹ nə́ ǹ tó nə́ba ǹ twĩ̀ mú,

² ǹdə́ nə́ nəkɔ́ Apya, ǹdə́ Arəcipi mú ń nə́ ń tó nə́ba ń nwɛ̀nɛ̀ mɔ́, ǹdə́ Kristə gùlú w lyì bí bə̀ nʼê twí bə̀ gùlí dwã ǹ sõ kɛ̀lɛ́ w mɔ́ nɛ.

³ Nə́ Da Yi ǹdə́ nə́ Cinu Yezu Kristə bʼa cĩ́ bwəl á yó, sə bə pə ába yə̀-zùlə́!

Pwəə nə́ ń ce Yi nə̀bán Shəlamɔ yilə

⁴ Shəlamɔ, à gə nʼâ lwə̀l à Yi rí gakó, à tʼâ swě ǹ yò yé. À nʼâ ce rə̀ nə̀bán ǹ yilə.

⁵ Ǹ gə́ zhí Cinu Yezu ni ní mú, ǹdə́ ǹ gə́ só byɛ̀bɛ́ gakó bə̀ wɔ́ Yi lyì bí ní mú, lyì bí nʼê zɔ̀m rə̀myɛ́ gakó yò à nyɛ̀ɛ̀.

⁶ À nʼâ lwə̀l Yi ni, mùnì ga àmyɛ́ ǹdə́ ǹmyɛ́ ga gə́ zhí Kristə ne nyì-dwìì wẽ́ mó sɛ̃ mɔ́ ń lwar cɛ̀nɛ̀ tɛ̀bɛ́ gakó nə́ nɔ Kristə jàn yil mó.

⁷ Da-byǐ, ǹ gə́ só byɛ̀bɛ́ bə̀ wɔ́ Yi lyì bí mú swẽ́ à wu ni, e ce à wu nyɛ̀ dɛ̃´dɛ̃´, bə̀ ǹ pɔ bɛ wu-jɔ̀.

Pwəə nə́ ń lwə̀l Shəlamɔ nɛ bə̀ ń ká n zwẽ Oneshim ǹdə́ sónó

⁸ Rə̀myɛ́ ce, à yě bʼà zhe sɔ́má Kristə wẽ́ à mʼa byili mú tɛ̀bɛ́ ǹ mə̂ sə́ wɛ̀rhɛ́ mɔ́,

⁹ sə à só sʼe yə̀ lwə́l à nʼâ lwə̀l mó ǹdə́ sónó. Zhə̀nà, àmyɛ́ Pwəə, à wɔ́ náncɛ, e jà kɔn súlí myɛ, à ŋwɛ́nɛ́ byə̀nə́-jù w èlâsɛ̃´ Yezu Kristə tum dí à nʼâ twĩ̀ mú yilə.

¹⁰ Wɔ́ Oneshim yil à nʼâ lwə̀l mó, bə̀ ń jǐrh à byǐ Yezu Kristə wẽ́ byə̀nə́-jù w nyɔ̀nɔ̀.

¹¹ Ń yà ń tá ń sɛ̃ mɔ́ shãã ga yé, sə èlâsɛ̃´, ń mà n sɛ̃ mɔ́ ǹdə ń gə́ sɛ̃ àmyɛ nɛ nɛ́.

¹² Ń wɔ́ à wu byǐ, sə à ce ń ká ń bàn ǹ sõ.

¹³ À gə́ ŋwɛ́nɛ́ byə̀nə́-jù w yò-ècɔ̀nɔ̀ nyí rí à nʼâ bwə̀l mó yil mó, à yʼà nʼâ yâl a cə̀r mò n sɛ̃ nɛ ǹ yilə,

¹⁴ sə à bə só sʼa wɛ̀rhɛ́ èta ǹdə́ à yə̀ ǹmyɛ́ nyí nɛ yé. À tʼâ yâl a nyɛ́ɛ́ mɔ́ ń bə́ wɛ̀rhɛ́ cɛ̀nɛ̀ rɛ́ rə̀myɛ́ mɔ́ yé. À nʼâ yâl bə̀ ǹ wɛ̀rhɛ́ rɛ ǹdə́ ǹ sə̀pwà pùbùlə̀.

¹⁵ Dɛ̀ga Oneshim gə́ zhǐr ǹ sõ mó wɔ́ dwã màngɛlɛ́ yilə, mùnì ga n ká n bə̀ n já ń ŋwɛ́nɛ́ ǹ sõ.

¹⁶ Ń kə́ ń də̀ yóm dúdú yé. Ń wɔ́ da-byǐ nántwə̂ èlâsɛ̃´. À só mo dɛ̃´dɛ̃´, sə ǹmyɛ́ mə̂ sə́ swéné mo dɛ̃´dɛ̃´ du, bə̀ ń wɔ́ numbyíní, n jà ń wɔ́ Kristə-lò.

¹⁷ Rə̀myɛ́ ce, ǹ gə nə́ ǹ nyǐ ni ǹdə ǹ dɔwa ta, sə́ zwẽ mo ǹdə wɔ́ àmyɛ́ cìcì ǹ nə́ ǹ zwẽ ta.

¹⁸ Ń gə dó mó, ráá ń gə zhe ǹ jim, sə́ cĩ́ rə̀myɛ́ gakó àmyɛ́ yó wə.

¹⁹ Wɔ́ àmyɛ́ Pwəə cìcì jɛ̃̀ è kɛ̃ zɔ̀mà nɛ́ nyɛ̀bɛ́ à mʼâ byili mú bə̀ nyǐ à bʼa kwɛ̃̌ dɛ. Sə à tʼâ yâl a lyǐrh mó bə̀ nyǐ ǹmyɛ zhe àmyɛ́ jim yé, sə jim dí rə̀myɛ́ mɔ́, wɔ́ ǹ cìcì nándâ yá.

²⁰ Zhə̀nà, da-byǐ, à nʼâ lwə̀l mó, sə́ wɛ̀rhɛ́ nɛ cɛ̀nɛ̀ rɛ́ rə̀myɛ́ Cinu yilə: zə à wu ni Kristə wẽ́.

²¹ À yě pamparɛ̃ɛ̃ bə̀ ǹ bʼâ wɛ̀rhɛ́ kɔn dɛ́ dɛ̀bɛ́ à nʼâ lwə̀l mó mó, sə à yě bə̀ ǹ bʼâ wɛ̀rhɛ́ rɛ kɔn dwini. Wɔ́ rə̀myɛ́ è ce, à kɛ̃ sɛ́bɛ́ rɛ́ tɛ̀bɛ́ à la mɔ́ pɔ.

²² Kɔn súlí myɛ, sə́ pyà jàà ń cĩ́ ni, bʼà nʼâ bùl bə̀ Yi gə zwẽ á lwə̂l, à mʼa kʼa bə̀ á sõ.

Pwəə nə́ ń ce Shəlamɔ ń mə́ ń gwi ń sɛ́bɛ́ rɛ́ yó

²³ Epafəraasɛ mɔ́ ń tó ne ń ŋwɛ́nɛ́ byə̀nə́-jù w Yezu Kristə tum dí yil mó nə́ ń ce mó.

²⁴ Markɛ ǹdə́ Arəsətarkɛ, ǹdə́ Dɛmaasɛ ǹdə́ Lwiki mú bə̀ nʼê tó ne bə̀ twĩ̀ mú myɛ nʼê ce mó.

²⁵ Cinu Yezu Kristə mà n cĩ́ bwəl á yó!