Markɛ 8 - Lyélé

Yezu ce búúri tàlpyɛ̀ pù rə jǐrh nánzhəzhɔ̌

¹ Dwã nɛ́ nə̀myɛ́ wẽ́, lyì nánzhəzhɔ̌ kʼe bə̀ dwã yó Yezu sono. Bə̀ yʼà bə kaka zhe bə̀ la jú yé. N zɛ̃̀ n byẽ̀ ń kwã-lyì bí n wɔ̀ bɛ:

² “Lyì-zhâ bɛ́ byɛ̀bɛ́ gə́ ŋwɛ́nɛ́ ǹdə́ nɛ mɔ́ zhe dwã nə̀tɔ̀ zà, e jà bə̀ bə kaka zhe bə̀ la jú yé. Bə̀ nɔ̀nɔ̀ zhe ne.

³ Bə̀ jàlà jààsɛ́ jʼà nyɛ. À gə ce bə̀ kʼâ kwɛ̃̀ ǹdə́ nɔrh, bə̀ tʼâ la ŋwɔ̀nɔ́ bə yí jè yé.”

⁴ Ń kwã-lyì bí wɔ̀ mɔ̀: “Yẽ̀ nə́ nə mʼâ nə kùjú ní gɔ-elũ èpòlò w kɔ̀bɔ́ wẽ́, nə́ pə byɛ̀bɛ́ gakó ne bə jí bə sú?”

⁵ N zɛ̃̀ n bwə̀rh bè n wɔ̀: “Búúri màngal rə̀ ŋwɛ́nɛ́ á byẽ́?” Bə wɔ̀ mɔ̀: “Búúri tàlpyɛ̀ rə̀ ŋwɛ́nɛ́ nə́ sõ.”

⁶ N ce lyì bí gakó jòm tɛ̃´, n zwẽ búúrí tàlpyɛ̀ y n ce Yi nə̀báná, n kə́ kə́ rɛ dwã wa, n pə ń kwã-lyì bí ni bə̀ bə̀ zwẽ bə mʼe tə̀ lyì bí. Ń kwã-lyì bí zɛ̃̀ bə zwẽ búúrí bə mʼe tə̀ bɛ̀.

⁷ Yezu kwã-lyì bí yʼà zhe émɔ̀-bwâlsɛ màngɛlɛ́ myɛ. Yezu ce Yi nə̀bán sə̀myɛ yilə, n zɛ̃̀ n wɔ̀ ń kwã-lyì bí ni bə̀ bə̀ zwẽ sə̀myɛ bə bʼe tə̀ lyì bí.

⁸ Bə jí bə sú. Ń kwã-lyì bí pwà yəywaalɛ́ rə̀ dàl mɔ́ rə sú cǐrhni nyàlpyɛ̀.

⁹ E jà lyì bí yʼà yú ǹdə lyì mɔ̀ɔ̀rhɛ̀ rə̀na ta. Rə̀myɛ́ kwã nɛ́, n zɛ̃̀ n ce bə kʼa kwɛ̃̀.

¹⁰ Rə̀myɛ́ yó cìcì, ńmyɛ̌ ǹdə́ ń kwã-lyì bí jʼa zhízhílí bə zù bǔ-bwəl lé wə bə̀ kʼâ la Dəlmənutə tənà y wa.

Farɛzhɛ̃ɛ̃bá lwə̀l Yezu ni bə̀ ń wɛ̀rhɛ́ màmyɔ

¹¹ Farɛzhɛ̃ɛ̃bá tú bə ji kùr bə̀ nʼê mà nyə̀-pâr ǹdə́ Yezu. Bə̀ yʼà nʼê yâl bə zhẽ̀ mò. Bə zɛ̃̀ bə̀ nʼê lwə̀l mò bə̀ ń wɛ̀rhɛ́ màmyɔ, ò nʼô byili bə̀ wɔ́ Yi rə̀ twĩ̀ mù.

¹² Yezu shǐrh fwàà, n zɛ̃̀ n wɔ̀: “Byè yil lũ w kɔ̀bɔ́ lyì bí nʼê yâl bʼà wɛ̀rhɛ́ màmyɔ? Zhə̀nà, à nʼâ wə̀l ába: lũ w kɔ̀bɔ́ lyì bí tʼâ la màmyɔ ga nɔ kə́dò yé.”

¹³ N zhǐr n yẽ̌ Farɛzhɛ̃ɛ̃bá nɛ, n ká n zù bǔ-bwəl lé wə ń la mwə̃́ y èpákɛ̀.

Á gwẽ̌ bə à zɔ̀mà nɛ́ kùr nyɛ̌?

¹⁴ Yezu kwã-lyì bí yʼà swě bə̀ yə̀ kùjú zal bə mʼe zù bǔ-bwəl lé wẽ́ yé. Wɔ́ búrú òdù sásá bə̀ yʼà zɔwa.

¹⁵ Yezu pə bɛ nyí n wɔ̀: “Dɛ̃̌na á cìn ǹdə́ Farɛzhɛ̃ɛ̃bá sã̀-nə̀byẽ̌ dé ǹdə́ Erɔɔdɛ sã̀-nə̀byẽ̌ dé.”

¹⁶ Ń kwã-lyì bí zɛ̃̀ bə̀ nʼê zɔ̀m ǹdə́ dwã bə̀ zhe: “E zɛ̃̀ wɔ́ nə́myɛ̌ gə́ yə̀ búrú zal mɔ́ yil ń nə́ ń zɔ̀m èta?”

¹⁷ Yezu lwar bə̀ gə́ nʼê zɔ̀m nɛ́, n zɛ̃̀ n bwə̀rh bè n wɔ̀: “Byè yil á nʼá wə̀l bə̀ wɔ́ á gə́ yə̀ búrú zal mɔ́ yil à nʼâ zɔ̀m èta? Á gwẽ̌ bə nə̀ kùrə̀ nyɛ̌? Á yə̀l nə̀ kùrə̀? Á surhə né pyi?

¹⁸ Á zhe yírhə́ á jʼâ bə nɛ? Á zhe zhã̌ á jʼâ bə nyɛ̌? Á kʼá tʼá lyǐrh,

¹⁹ à gə́ yʼà kɔ́ kɔ́ búúrí rə̀nu y a pə lyì bí mɔ̀ɔ̀rhɛ̀ rə̀nu y ni bə dɔ̃̀ mɔ́? Á yʼâ pwà yəywaalɛ́ rə̀ dàl mɔ́ rə sú cǐrhni màngala?” Bə wɔ̀ mɔ̀: “Cǐrhni shí ǹdə́ nə̀lyè.”

²⁰ N kə́ n bwə̀rh bè n wɔ̀: “Sə à gə́ kɔ́ kɔ́ búúrí tàlpyɛ̀ y dwã w a pə lyì bí mɔ̀ɔ̀rhɛ̀ rə̀na y nɛ bə dɔ̃̀ mɔ́, á yʼâ pwà yəywaalɛ́ rə̀ dàl mɔ́ rə sú cǐrhni màngala?” Bə wɔ̀: “Cǐrhni nyàlpyɛ̀.”

²¹ N zɛ̃̀ n wɔ̀ bɛ: “Á nə zɛ̃̀ á gwẽ̌ bə à zɔ̀mà nɛ́ kùr nyɛ̌?”

Yezu púr lyìlyǒ òdù yírhə́ Betəsəyiidi ní

²² Yezu ǹdə́ ń kwã-lyì bí zhǐr bə vò Betəsəyiidi. Bə̀ gə́ yú gàà, lyì zə lyìlyǒ òdù bə bə̀ ń sono, bə lwə̀l mò bə̀ ń dwə̂rh wə.

²³ N zə lyìlyǒ w jɛ̃̀ nɛ̀, n mə n du cɔ w wa, n vò kwã nɛ́, n pùrh ń tə̀tàr ò yírhə́ né wə, n cĩ́ jɛ̃̀ ò yó, n zɛ̃̀ n bwə̀rh wə̀, n wɔ̀: “Ǹ yírhə́ nə kɔna?”

²⁴ Lyìlyǒ w púr ò yírhə́ né, o wɔ̀ mɔ̀: “À nə lyì, sə bə̀ nyɛ̌ dwã ǹdə cèmé ta, bə jʼà nʼê zhə̀lə̀.”

²⁵ Yezu kə́ n zə ń jɛ̃̀ n dwə̀rh bal mɔ́ yírhə́ né ne. Bal mɔ́ zɛ̃̀ n nyǐ shɛ́shɛ́, n já n wárh, n nə kɔn gakó pamparɛ̃ɛ̃.

²⁶ Yezu zɛ̃̀ n wɔ̀ mɔ̀ bə̀ ń ká n vò jè, sə ń bə̀ká n zù cɔ w wẽ́ yé.

Pyɛɛrɛ byili bə̀ wɔ́ Yezu ń wɔ́ Kristə mó

²⁷ Yezu ǹdə́ ń kwã-lyì bí zhǐr bə̀ la cɛmɛ nɛ́ nə̀ ŋwɛ́nɛ́ Shilipu Səzarɛ cɔ w səta mɔ́ wẽ́. Bə̀ gə́ yú sɔ́má yó, n zɛ̃̀ n bwə̀rh bè n wɔ̀: “Lyì bí nʼê wə̀l bʼàmyɛ́ wɔ́ mɔ̌?”

²⁸ Bə wɔ̀ mɔ̀: “Lyì bí jàlà nʼê wə̀l bə̀ ǹ wɔ́ Zhã-Bətiisi; jàlà zhe bə̀ wɔ́ Elyi; jàlà myɛ zhe bə̀ wɔ́ Yi nyì-zwennə mə̀dù.”

²⁹ N zɛ̃̀ n bwə̀rh bè n wɔ̀: “Sə ámyɛ̌, á nʼá wə̀l bʼà wɔ́ mɔ̌ lò?” Pyɛɛrɛ zɛ̃̀ n wɔ̀ mɔ̀: “Wɔ́ ǹmyɛ́ ǹ wɔ́ Kristə mó.”

³⁰ Yezu zɛ̃̀ n gwirhi ń yé n pə bɛ nyí n wɔ̀: “Á bə̀kʼá shɛ̀nɛ́ á byili rə̀myɛ́ lò lò nè yé.”

³¹ Rə̀myɛ́ kwã nɛ́, Yezu zɛ̃̀ n ji kùr ń nə́ ń cèrhè kàrmɔ̀ ń kwã-lyì bí ni. Ń yà ń nə́ ń wə̀l bè bə̀ kɔn wɔ́ nyɔ́ɔ́ bə̀ Numbyíní Byǐ nwɛ̀nɛ̀ dɛ̃´dɛ̃´, cɔ w náncɛsɛ́ ǹdə́ Yi jì y vwĩ̀-zwə́lnə bé yé né cìnə́ bé, ǹdə́ Muyiisi nyə́ né byilnə bé mʼa zhɛ̃̀ mɔ̀, bə gu mu, sə ń mà n ká n bwìrhì ń dwã nə̀tɔ̀ yùwə̀.

³² Ń yà ń nə́ ń byili bi rə̀myɛ́ pamparɛ̃ɛ̃. Pyɛɛrɛ zɛ̃̀ n byẽ̀ mò n mə n vò kwã nɛ́, ń nə́ ń ji mu búlə́.

³³ Yezu zɛ̃̀ n pyìrhí ń yé n zâ ń kwã-lyì bí, n gwirhi ń yé, n wɔ̀ Pyɛɛrɛ nɛ: “Zhəl kwã nɛ́ à nyí ni Shətana, bə̀ ǹ tá ǹ bùl Yi nyə̀ná nɛ́ yé. Wɔ́ numbyínsí nyə̀ná ǹ nə́ ǹ bùlə̀.”

³⁴ N zɛ̃̀ n byẽ̀ lyì-zhâ bɛ́ ǹdə́ ń kwã-lyì bí n wɔ̀ bɛ̀: “Lò mɔ̀bɔ́ ǹ nə́ ǹ yâl ń tó àmyɛ́ nɛ, sə́ zhɛ̃̀ ǹ cìnə̀, ń kwè ǹ də̀-jɔrhɔ́ w ń zhĩ ń mə́ tó ne.

³⁵ Lò mɔ̀bɔ́ ǹ nə́ ǹ shili ǹ myə̂l lé, rə̀ mʼa sá, sə lò mɔ̀bɔ́ ǹ shɛ̀nɛ́ ǹ myə̂l lé sɔ́ àmyɛ́ ǹdə́ yò-ècɔ̀nɔ̀ nyí rí yilə, ǹ mʼâ ká nə rɛ.

³⁶ Lò gə zhe lũ w kɔn gakó, ń jʼâ dwĩ̀ ǹ cìnə̀, ǹ nɛrɛ́ y zhe kùrə̀?

³⁷ Kɔn ŋwɛ́nɛ́ lò wɔ̌ ǹ pɛ ń mə́ lyə́r ǹ myə̂l lé?

³⁸ Lò mɔ̀bɔ́ ǹ dùr cìzhìl ǹdə́ àmyɛ́ ǹdə́ à zɔ̀mà nɛ́, lũ w kɔ̀bɔ́ lyì bí bə̀ wɔ́ nə̀fwə̀ə́le, ǹdə́ lwɛlɛ cìnə́ mó cəcəl wə, Numbyíní Byǐ gə tú ń Da zùwə́ y wə, ǹdə́ Yi màlɛ́kabá, ń mà n dùr cìzhìl ǹdə́ mɔ́ myɛ.”