Markɛ 7 - Lyélé

Yezu zɔ̀m Farɛzhɛ̃ɛ̃bá lùl-e-pwírí yò

¹ Farɛzhɛ̃ɛ̃bá ǹdə́ Muyiisi nyə́ né byilnə bé jàlà shí Zhərəzalɛm bə bə̀ dwã yó Yezu sono.

² Bə nə ń kwã-lyì bí jàlà bə̀ nʼê jí kùjú ǹdə́ bə̀ yə̀ bə̀ jɛ̀sɛ́ sàm yé. (È nʼê yâl e wɔ̀ bə̀ bə̀ yə̀ sɛ̀ sàm ǹdə bə̀ lùl-e-pwírí y gə́ nʼê byili ní yé.

³ Lwarna bə̀ Farɛzhɛ̃ɛ̃bá ǹdə́ Zhwifubá gakó yʼà nʼê zwẽ bə̀ nàmbala bɛ́ lùl-e-pwírí y nyə́ né: bə̀ yʼà tʼâ jí kùjú ǹdə́ bə̀ yə̀ jɛ̀rɛ̀ bə sã̀ bə̀ jɛ̀sɛ́ náàcɛ̀nɛ́ yé.

⁴ Bə̀ gə shí lyì-zhâ w bə̀ túwə́, bə̀ tʼâ jí kùjú ǹdə́ bə̀ yə̀ jɛ̀rɛ̀ bə zhɛ́rhɛ́ nɛ̃̌ bə̀ yó ǹdə bə̀ lùl-e-pwírí y gə́ nʼê byili ní. Bə̀ zhe lùl-e-pwírí tùntwə̃̀ə̃̀ dwã nánzhəzhɔ̌ bə̀ nʼê wɛ̀rhɛ́. Bə̀ nʼê zhə́zhɛ́lɛ́ bə̀ zɔ̌sɛ́ ǹdə́ bə̀ kwâlnɛ́, ǹdə́ bə̀ kùjú nə̀zhĩ̌sí, ǹdə bə̀ nyə́ né gə́ nʼê byili ní.)

⁵ Farɛzhɛ̃ɛ̃bá ǹdə́ Muyiisi nyə́ né byilnə bé gə́ nɔ Yezu kwã-lyì bí bə̀ nʼê jí kùjú w bə jʼà yə̀ bə̀ jɛ̀sɛ́ sàm, bə bwə̀rh mò bə wɔ̀: “Byè yil ǹ kwã-lyì bí tʼâ zwẽ lùl-e-pwírí y nyə́ né? Bə̀ tʼâ sàm bə̀ jɛ̀sɛ́ ǹdə lùl-e-pwírí y gə́ nʼê byili ní bə̀ mʼê jí kùjú.”

⁶ N wɔ̀ bɛ: “Á wɔ́ myìnù cìnə́. Kɔn dɛ̀bɛ́ Yi nyì-zwennə Ezəyi byili á shò-kwã nɛ́ mɔ́ wɔ́ zhə̀nà. Ń kɛ̃ bə̀ Yi wòwə̀: ‘Lyì bí byɛ̀bɛ́ wɔ́ bə̀ nyú w dúdú bə̀ nʼê cèrhé ne né, sə bə̀ wun ní nyɛ ǹdə́ nɛ.

⁷ Bə̀ nʼê cèrhé ne, sə bə̀ còrhó w bə kùr zhe yé, bə̀ kɔn dɛ̀bɛ́ bə̀ nʼê cèrhè lyì bí ni mú wɔ́ numbyínsi nyə́.’ ”

⁸ Yezu zɛ̃̀ n súlí n wɔ̀: “Ámyɛ̌ yẽ̌ Yi nyə́ né ne, á kʼá nʼá zwẽ numbyínsi lùl-e-pwírí nyə́.”

⁹ N kə́ n wɔ̀: “Á nʼá bùl bʼâ gə́ dwĩ̀ Yi nyə́ né tɛ̃´, á zɛ̃̀ á nʼá zwẽ á sə̀pwà lùl-e-pwírí y nyə́ né mó càn?

¹⁰ Muyiisi wòwə̀: ‘Nyám ǹ da ǹdə́ ǹ ná.’ N súlí n wɔ̀: ‘Lò mɔ̀bɔ́ ǹ bwəl lwɛlɛ ń pə ǹ da ráá ǹ ná nɛ, bə̀ mə̂ sə bə gu mú.’

¹¹ Sə ámyɛ̌ nʼá wə̀l lyì bí ni bə̀ lò wɔ̌ ń wə̀l ń da ráá ń ná nɛ: ‘À zhe kɔn à yʼà nʼâ yâl a pɔ̃́, sə wɔ́ Yi ni à mə̂ sʼa pə rɛ,’

¹² Á nʼá wə̀l bə̀ lò gə wò èta, kɔn kʼê də̀ nyɔ́ɔ́ bə̀ ń sɛ̃ bɛ yé.

¹³ Èta mɔ́, á lùl-e-pwírí y á nʼá cèrhè dwã nɛ mɔ́ ce Yi zɔ̀mɛ̀ rɛ́ jǐrh kɔn nánfò. Á jʼâ nʼá wɛ̀rhɛ́ wẽ̀ dwã nánzhəzhɔ̌ rə̀myɛ wɔ́ èta.”

Wɔ́ kɔn dɛ̀bɛ́ rə̀ nʼê shí numbyíní wẽ́ mó rə̀ nʼê pɛ y jìmdì

¹⁴ Yezu kə́ n byẽ̀ lyì-zhâ bɛ́ n wɔ̀ bɛ: “Á gakó cilinə kɔn dɛ̀bɛ́ à la ába byilu mú, sʼá nyɛ̀ɛ̀ rə̀ kùrə̀.

¹⁵ È də̀ kɔn dɛ̀bɛ́ rə̀ nʼê shí pwẽ̀ nè rə̀ zwì numbyíní wẽ́ mó, rə̀ nʼê pɛ y jìmdì yé. Wɔ́ dɛ̀bɛ́ rə̀ nʼê shí numbyíní wẽ́ mó rə̀ nʼê pɛ y jìmdì. [

¹⁶ Lò ǹ la cilu, sə́ cili.]”

¹⁷ Ń gə́ tú n zhǐr n yẽ̌ lyì-zhâ bɛ́ nɛ n zù kɛ̀lɛ́ wa, ń kwã-lyì bí zɛ̃̀ bə̀ nʼê bwə̀rh mò zɔ̀mɛ̀ rɛ́ rə̀myɛ́ kùrə̀.

¹⁸ N wɔ̀ bɛ: “Ámyɛ bə rə̀ kùr nyɛ̌ nà? Á yə̀l bə̀ kɔn dɛ̀bɛ́ rə̀ nʼê shí pwẽ̀ nè rə̀ zwì numbyíní wẽ́ mó wàr rə̀ nʼê pɛ y jìmdì?

¹⁹ Á bə nɛ bə̀ kɔn dɛ́ rə̀myɛ́ tʼâ zwì ń wu w wẽ́, wɔ́ ń sùlú w rə̀ nʼê zwì ní. Rə̀myɛ́ kwã nɛ́, ń gə la ń nà nɛ̀ jǒm, rə zɛ̃̀ rə kʼa du?” Yezu wò èta n mə n byili bə̀ lò wɔ̌ ń mà n jí kùjú dwí gakó.

²⁰ N kə́ n wɔ̀: “Wɔ́ kɔn dɛ̀bɛ́ rə̀ nʼê shí numbyíní wẽ́ rə̀ dwi pwẽ̀ nè mó rə̀ nʼê pɛ y jìmdì.

²¹ Lwarna bə̀ wɔ́ numbyíní wu w wẽ́ bùlə̀ námməlwâlsɛ nʼê shí ni: yààyàà tùntwə̃̀ə̃̀ ǹdə́ ŋwɔ̀lɛ̀ ǹdə́ lyì-guuri,

²² ǹdə́ fwə̂l tumə, ǹdə́ dõ kɔn yâl, ǹdə́ wu-kùlù ǹdə́ myìnù, ǹdə́ wàr ǹ cìn ǹ nə́ ń pyɛ̀nɛ́ tùntwə̃̀ə̃̀, ǹdə́ bwɛ̃̌-dǔr, ǹdə́ dõ yil zhìlù, ǹdə́ cìn-byilu, ǹdə́ lyì-bəyuru tùntwə̃̀ə̃̀.

²³ Tùntùm-bəlwâlsɛ́ sə̀myɛ́ gakó nʼê shí numbyíní wẽ́, sə̀ pɛ y jìmdì.”

Yezu wárh kɛ̃ mə̀dù bə̀kɔ́

²⁴ Yezu zhǐr gàà n vò Tiiri tənà y wa. N yí n zù kɛ̀lɛ́ èdù wẽ́, sə ń yà ń tá ń yâl bə̀ lò lwar ń nyí ni gàà yé, sə ń yə̀ ŋwɛ̀nɛ́ n shèè yé.

²⁵ Kɛ̃ mə̀dù nə̀cílí námməlwɛ̀lɛ́ yʼà zhe ń bə̀kɔ́, kɛ̃ mɔ́ ńmyɛ̌ mɔ́ nyɛ̀ɛ̀ bə̀ nʼê zɔ̀m Yezu yò, n bə̀ Yezu sono, n tu ń nə̀dwə́nə́ yó n wùlì ń yé né,

²⁶ n lwə̀l mò bə̀ ń jǐ nə̀cílí y námməlwɛ̀lɛ́ y e du ń bə̀kɔ́ mɔ́ wẽ́. Kɛ̃ mɔ́ jà ń yà ń də̀ Zhwifu yé. Ń yà ń wɔ́ Siri tənà y cɔ òdù bə̀ nʼê byẽ̀ bə̀ Fenishi lyì bə̀kɔ́.

²⁷ Yezu zɛ̃̀ n wɔ̀ mɔ̀: “Yẽ̌ bə̀sɔ́ná bɛ́ jɛ̀rɛ̀ bə jí bə sú. Kɔn bə mə̂ bə̀ bə̀ kwě bə̀sɔ́ná kùjú bə pə kùl-bwálsɛ nɛ yé.”

²⁸ Kɛ̃ mɔ́ wɔ̀ mɔ̀: “Rə̀myɛ́ wɔ́ zhə̀n yó-cə́bal, sə kùl-bwálsɛ́ myɛ yʼa jí kùjú w yəywaalɛ́ rə̀ nʼê lwé tɛ̃´ bə̀sɔ́ná bɛ́ kùr w mó.”

²⁹ Yezu zɛ̃̀ n wɔ̀ mɔ̀: “Ǹ gə́ lyár èta mɔ́ yilə, ká vò jè, bə̀ nə̀cílí y du ǹ bə̀kɔ́ mɔ́ wẽ́.”

³⁰ Kɛ̃ mɔ́ gə́ zhǐr n yí jè, n pwírí nə̀cílí y du ń bə̀kɔ́ mɔ́ wẽ́, ń pyě pyònò w wə.

Yezu wárh bal mə̀dù ń yà ń wɔ́ sə̀bɔ̀rhɔ̀, ń nyí rí myɛ jʼà yʼà dɛ̃

³¹ Yezu zhǐr Tiiri tənà y wa, n tó Sədɔ̃, n lyɛ̃ n tó Cɛmɛ-shí tənà y wa, n ká ń bàn Gəlile mwə̃́ y səta.

³² Bə zə bal mə̀dù bə bə̀ ń sono. Bal mɔ́ yà ń wɔ́ sə̀bɔ̀rhɔ̀, ń wàr ń nə́ ń zɔ̀m yé. Bə lwə̀l Yezu ni bə̀ ń cèlè ń jɛ̃̀ ń yó.

³³ Yezu zə bal mɔ́ n du lyì-zhâ bɛ́ wẽ́ n vò kwã nɛ́, n ce jə̀fɔ́lá bal mɔ́ zhã̌ nɛ́ wa, n pùrh tə̀tàr n mə n dwə̀rh ń mə̀jòlò w ne,

³⁴ n kwẽ̌ n nyǐ dɛ̃̌, n shǐrh fwàà, n zɛ̃̀ n wɔ̀ bal mɔ́ nɛ: “Efata.” (Rə̀myɛ́ nʼê yâl rə wɔ̀: “Púr”.)

³⁵ Rə̀myɛ́ yi ní cìcì, bal mɔ́ zhã̌ nɛ́ jʼa púr, ń mə̀jòlò w myɛ bwèlé. N zɛ̃̀ ń nə́ ń zɔ̀m wárhɛ́ wárhɛ́.

³⁶ Yezu zɛ̃̀ n pə nyí lyì bí gakó ne, bə̀ bə̀ bə̀kʼa wɔ̀ lò lò nè yé. Sə ń gə pɔ bɛ nyí gakó, bə̀ wàr bə̀ nʼê pyɛ́nɛ́ yé. Bə̀ yʼa kwɛrhɛ bə bwə̀l tɛ̀bɛ́ ń wɛ̀rhɛ́ mɔ́ bə byili.

³⁷ Sə ń gə́ wárh bal mɔ́ mɔ́ jàr lyì bí dɛ̃´dɛ̃´ kɔn lyɛ̃ cɛ nɛ. Bə̀ yʼà nʼê wə̀lə̀: “Ń tumə né gakó càn. Ń nə́ ń ce sə̀bwààrhɛ̀ myɛ cìcì zhã̌ nyɛ̀ɛ̀, n ce nyì-bədããrɛ ŋwɛ̀nɛ́ rə zɔ̀m.”