Markɛ 10 - Lyélé

Farɛzhɛ̃ɛ̃bá bwə̀rh Yezu ǹdə́ sɔ́má gə ŋwɛ́nɛ́ bə̀ bal ǹdə́ ń kɛ̃ zhɛ̃´ dwã

¹ Yezu zhǐr gàà, n vò Zhide tənà y wa, n lyɛ̃ n vò Zhɔrdɛ̃ bwǐ y èpákɛ̀. Lyì nánzhəzhɔ̌ kʼe bə̀ ń sono, n zɛ̃̀ n kə́ ń nə́ ń cèrhè bè kàrmɔ̀ ǹdə ń gə́ ya n cèrhè bè né gaga mɔ́.

² Farɛzhɛ̃ɛ̃bá jàlà yʼà nʼê yâl bə zhẽ̀ mò. Bə zɛ̃̀ bə yí ń nyí ni, bə bwə̀rh mò bə wɔ̀: “Sɔ́má ŋwɛ́nɛ́ bə̀ bal zhɛ̃´ ń kɛ̃ n vùr mò?”

³ N zɛ̃̀ n bwə̀rh bè n wɔ̀: “Muyiisi pɔ ába nyí bə̀ byè?”

⁴ Bə wɔ̀ mɔ̀: “Muyiisi pɔ sɔ́má bə̀ bal wɔ̌ ń kɛ̃ zhɔ̃́ sɛ́bɛ́, n zɛ̃̀ n zhɛ̃̀ ń kɛ̃ n vùr mò.”

⁵ N zɛ̃̀ n wɔ̀ bɛ: “Wɔ́ á yó-kùùlí rə̀ ce Muyiisi kɛ̃ nyí rí rə̀myɛ́ sɛ́bɛ́ rɛ́ wẽ́ n pə ába.

⁶ Sə lũ w kùr-ju yi ní, ‘Yi wɛ̀rhɛ́ numbyínsí, bal ǹdə́ kɛ̃.’

⁷ ‘Rə̀myɛ́ yilə, bal mɔ́ mà n yẽ̌ ń da ǹdə́ ń ná nɛ, n jòm ǹdə́ ń kɛ̃ mɔ́,

⁸ sə bə̀myɛ́ bə̀lyè y ga bʼa mù dwã nɛ bə jǐrh kɔn rə̀dù.’ ” Yezu zɛ̃̀ n súlí n wɔ̀ bɛ: “Èta, bə̀ kʼê tʼâ la lyì bə̀lyè yál yé. Bə̀ mù dwã nɛ bə jǐrh kɔn rə̀dù.

⁹ Kɔn dɛ̀bɛ́ Yi co dwã nɛ, sə numbyíní bə̀ká pɔr rɛ yé.”

¹⁰ Bə̀ gə́ yú kɛ̀lɛ́ wa, ń kwã-lyì bí kʼe bwə̀rh mò zɔ̀mɛ̀ rɛ́ rə̀myɛ́ mɔ́ shò-kwã nɛ́.

¹¹ N zɛ̃̀ n wɔ̀ bɛ: “Bal gə zhɔ̃̀ ǹ kɛ̃ ń vùr mò, ń zɛ̃̀ ń jí ń dõ, wɔ́ fwə́l ǹ nə́ ǹ fwə̂l ǹdə́ mɔ̀bɔ́ ǹ tà-kwã ń jí mú.

¹² Wɔ́ èta ǹdə́ kɛ̃ myɛ. Ǹ gə shə́r ǹ yẽ̌ ǹ byal nɛ, ń vò ń jí bal dõ, wɔ́ fwə́l ǹ nə́ ǹ fwə̂l ǹdə́ bal mɔ́ ńmyɛ̌ mɔ́.”

Yezu cĩ́ bwəl bə̀sɔ́ná bɛ́ yó

¹³ Lyì yʼà nʼê zə bə̀sɔ́ná námpɔ́lsɛ bə̀ twí Yezu sono, mùnì ga n dwə̀rh bè. Ń kwã-lyì bí zɛ̃̀ bə̀ nʼê ji bi búlə́.

¹⁴ Yezu gə́ nɔ rə̀myɛ́, ń wu zhìlì, n zɛ̃̀ n wɔ̀ ń kwã-lyì bí ni: “Yẽ̌nə bə̀sɔ́ná bɛ́ nɛ bə bə̀ à sono, sʼá bə̀kʼá cə̀r bè yé, bə̀ Yi tənà y wɔ́ lyì byɛ̀bɛ́ bə̀ nyɛ̌ ǹdə bə̀myɛ́ ta mɔ́ nyâ.

¹⁵ Zhə̀nà, à nʼâ wə̀l ába: lò mɔ̀bɔ́ ǹ gə yə̀ Yi pyɛ̀lɛ̀ rɛ́ yò shɛ̀nɛ́ ǹdə bə̀sɔ́bwɛ̀lɛ́ ta, ǹ tá ǹ la rə̀ tənà y wẽ́ zú gaga yé.”

¹⁶ N zɛ̃̀ n kwə̀ə̀lè bè, n cĩ́ jɛ̃̀ mə̀dù mə̀dù gakó yó, n cĩ́ bwəl bə̀ yó.

Nə̀cɛ̀nà Yi tənà y wẽ́ zú mʼa yə̀ zwini

¹⁷ Yezu gə́ du n kwè sɔ́má yá, lò mə̀dù dùr n jòm ń nə̀dwə́nə́ yó ń yé né, n bwə̀rh mò n wɔ̀: “Yó-cə́bal nántwə̂, byè à mə̂ sʼa wɛ̀rhɛ́ mùnì a nə nyǔ mə̀ tʼâ la zhɔ̌?”

¹⁸ Yezu zɛ̃̀ n wɔ̀ mɔ̀: “Byè yil ǹ nə́ ǹ byẽ̀ nè bə̀ lyì-twə̂? Lò tɛ̀nɛ́ ń wɔ́ lyì-twə̂ ǹdə́ è gə də̀ Yi dúdú yé.

¹⁹ Ǹ yě nyə́ né gə́ nʼê byili ní. Nə̀ nʼê byili èta: ‘Bə̀ká gu lò yé; bə̀ká fwə̂l yé; bə̀ká ŋwɔ̀ yé; bə̀ká gõ kɔma ń ce ǹ dõ nyí ni bùrsì jàà w yé; bə̀ká myìnì ǹ dõ yé; nyám ǹ da ǹdə́ ǹ ná.’ ”

²⁰ Bal mɔ́ wɔ̀ mɔ̀: “Yó-cə́bal, à zwẽ nyə́ né nə̀myɛ́ gakó à bə̀swɛ́nɛ́ ga kɔn mʼe yí zà.”

²¹ Yezu zɛ̃̀ n nyǐ mu, n swéné mo. N zɛ̃̀ n wɔ̀ mɔ̀: “Kɔn rə̀dù rə̀ mwìrì mú: zhəl ń kwè kɔn dɛ̀bɛ́ ǹ zhe mó gakó ń yè, ń pə rə̀ wársɛ́ nə̀mwà nɛ̀, sə́ ká kwɛ̃̀ ń bə̀ ń tó ne, sə́ yẽ̌ bə̀ ǹ mʼâ nə nə̀cɛ̀ndɛ̀ dɛ̃̌ Arəzana wa.”

²² Bal mɔ́ gə́ nyɛ̀ɛ̀ zɔ̀mɛ̀ rɛ́ rə̀myɛ́, ń wu kwẽ ń wẽ́, n zhǐr ń la jè ǹdə́ wu-zhìlù, bə̀ ń yà ń wɔ́ nə̀cɛ̀m-bal nánfɔ̀lɔ̀.

²³ Yezu zɛ̃̀ n pyìrhí n wɔ̀ ń kwã-lyì bí ni: “Nə̀cɛ̀nà bɛ́ Yi tənà y wẽ́ zú mʼa yə̀ zwini tã̀!”

²⁴ Ń gə́ zɔ̀m èta, ń kwã-lyì bí wun zɛ̃̀. N kə́ n wɔ̀: “À bə̀sɔ́ná, lwarna bə̀ Yi tənà y wẽ́ zú mʼa yə̀ zwini tã̀!

²⁵ Yómó gə la gã̀-məshǐm bɔ̀l wẽ́ tó o lyɛ̃ kʼâ wɔ́ nàná du nə̀cɛ̀m-bal gə la Yi tənà y wẽ́ zú.”

²⁶ Bə̀ wun kʼe kwɛrhɛ nə zɛ̃̀. Bə zɛ̃̀ bə̀ nʼê bwə̀rh dwã bə̀ zhe: “È gə wɔ́ èta, wɔ́ mɔ̌ lò ń nə wɔ̌ ń mà n nə ń cìn vwârh?”

²⁷ Yezu zɛ̃̀ n nyǐ bi n wɔ̀: “Rə̀myɛ́ du numbyínə́ bé jàn, sə rə̀ bə Yi jàn du yé, bə̀ Yi wɔ̌ kɔn gakó.”

²⁸ Pyɛɛrɛ zɛ̃̀ n wɔ̀ mɔ̀: “Nyǐ nə́myɛ̌, nə́ yẽ̌ kɔn gakó ne nə́ tó mó.”

²⁹ Yezu wɔ̀ mɔ̀: “Zhə̀nà, à nʼâ wə̀l ába: lò mɔ̀bɔ́ ǹ yẽ̌ ǹ kɛ̀lɛ́ y ǹdə́ ǹ da-byâ, ǹdə́ ǹ nəkwá, ǹdə́ ǹ da ǹdə́ ǹ ná, ǹdə́ ǹ bə̀sɔ́ná ǹdə́ ǹ kálsɛ nɛ àmyɛ́ ǹdə́ yò-ècɔ̀nɔ̀ nyí rí yilə,

³⁰ ǹ mʼâ kʼá nə rə̀myɛ́ gakó twər zɔ̌m èlâsɛ̃´, lũ w kɔ̀bɔ́ wẽ́. Ǹ mʼâ nə kâlsɛ ǹdə́ da-byâ ǹdə́ nəkwá ǹdə́ ná ǹdə́ bə̀sɔ́ná ǹdə́ kálsɛ. Ń jà ǹ mʼâ nə nɔ̀nɔ̀ myɛ. Sə ǹ mʼâ nə nyǔ mə̀ tʼâ la zhɔ̌ lũ w kɔ̀bɔ́ ò bàn mɔ́ wa.

³¹ Byɛ̀bɛ́ bə̀ wɔ́ nã́yə́ə́ bé mó nánzhəzhɔ̌ mʼa jǐrh nánkwaá, sə byɛ̀bɛ́ bə̀ wɔ́ nánkwaá bɛ́ mɔ́ nánzhəzhɔ̌ mʼa jǐrh nã́yə́ə́.”

Yezu zɔ̀m ń cu mú ǹdə́ ń bùrhù mú yò twər rə̀tɔ̀ nyân dɛ́

³² Yezu ǹdə́ ń kwã-lyì bí yʼà kwè sɔ́má y bə̀ la Zhərəzalɛm. Sə ń yà ń ŋwɛ́nɛ́ bə̀ yé né, sə bə̀ wun yʼà nʼê zɛ̃̀ bə̀ mʼê ŋwɛ́nɛ́ ń kwã nɛ́. Ywẽ yʼà zhe byɛ̀bɛ́ bə̀ yʼà nʼê tó be mó. N zɛ̃̀ n kə́ n zə ń kwã-lyì bí shí ǹdə́ bə̀lyè y n vò kwã, ń nə́ ń byili bi kɔn dɛ̀bɛ́ rə̀ la mɔ wɔ̀rhɔ́. Ń yà ń zhe:

³³ “Nyǐnə nə́ la Zhərəzalɛm, sə bə̀ mʼa zə Numbyíní Byǐ bə pə Yi jì y vwĩ̀-zwə́lnə bé yé né cìnə́ bé ǹdə́ Muyiisi nyə́ né byilnə bé ne, bə kə́ ń bùrsì ǹdə́ cu. Bə mʼa pɔ̃ lyì byɛ̀bɛ́ bə̀ də̀ Zhwifubá ne,

³⁴ bə fulsi mu, bə pùrh tə̀tàr ń yó, bə zə dànə̀shàárɛ bə mà mɔ̀, bə zɛ̃̀ bə gu mu. Sə ń mà n bwìrhì ń dwã nə̀tɔ̀ yùwə̀.”

Lò mɔ̀bɔ́ ń nə́ ń yâl n yə̀ lyì-fɔ̀lɔ̀ á wẽ́, sə n twĩ̀ n pə ába

³⁵ Zebede byâ bɛ́ Zhakɛ ǹdə́ Zhã zɛ̃̀ bə yí Yezu nyí ní, bə wɔ̀ mɔ̀: “Yó-cə́bal, kɔn dɛ̀bɛ́ nə́ lá mɔ́ lwə̂l mó, nə́ rʼé yâl bə̀ ǹ wɛ̀rhɛ́ rɛ ń pə nə́ba.”

³⁶ N bwə̀rh bè n wɔ̀: “Bə̀kɔ́n á nʼá yâl bʼà wɛ̀rhɛ́ a pə ába?”

³⁷ Bə wɔ̀ mɔ̀: “Nə́ rʼé lwə̀l mó bə̀ ǹ ce nə́ mə̀dù jòm ǹ jə̀jĩ́ ni, mə̀dù jòm ǹ jə̀gwã̀ nɛ̀ ǹ pyɛ̀lɛ̀ rɛ́ jàà wà.”

³⁸ N wɔ̀ bɛ: “Á yə̀l kɔn dɛ̌ ná-dwí yil á nʼá lwə̀l yé. Á mʼâ shɛ̀nɛ́ á nwɛ̀nɛ̀ nɔ̀nɔ̀ w kɔ̀bɔ́ àmyɛ́ la nɔ̀nɔ̀ mɔ́? Á mʼâ shɛ̀nɛ́ á zwẽ nɔ̀nɔ̀ nɛ̃̌-shɔ mɔ́ à la zõ mó?”

³⁹ Bə wɔ̀ mɔ̀: “Nə́ mʼâ shɛ̀nɛ́.” N wɔ̀ bɛ: “Zhə̀nà, á mʼâ nwɛ̀nɛ̀ nɔ̀nɔ̀ w kɔ̀bɔ́ àmyɛ́ la nɔ̀nɔ̀ mɔ́. Á mʼâ zwẽ nɔ̀nɔ̀ nɛ̃̌-shɔ mɔ́ à la zõ mó.

⁴⁰ Sə è gə wɔ́ à jə̀jĩ́ ni ǹdə́ à jə̀gwã̀ nɛ̀ jǒm mó, è də̀ àmyɛ́ à la rə̀myɛ́ nyí pɔ yé. Jààsɛ́ sə̀myɛ́ ŋwɛ́nɛ́ byɛ̀bɛ́ à Da tɛnɛ sɛ bə̀ yil mó yilə.”

⁴¹ Ń kwã-lyì bí shí y dwã bɛ́ gə́ nyɛ̀ɛ̀ rə̀myɛ́, bə̀ lyimə zɛ̃̀ nə̀ nʼê yì ǹdə́ Zhakɛ ǹdə́ Zhã.

⁴² Yezu zɛ̃̀ n byẽ̀ bə̀ gakó n wɔ̀ bɛ: “Á yě bə̀ byɛ̀bɛ́ lyì bí nʼê nyǐ ǹdə tənə̀rh pyâ ta mɔ́ nʼê jí pyɛ̀lɛ̀ bə̀ lyì bí yó. E jà lyì-fwààlɛ́ myɛ ŋwɛ́nɛ́ bə̀ nʼê wɛ̀rhɛ́ jàn lyì bí ni.

⁴³ Sə ámyɛ̌ bə̀kʼá wɛ̀rhɛ́ èta yé. Lò mɔ̀bɔ́ ń ŋwɛ́nɛ́ á wẽ́ ń nə́ ń yâl n yə̀ á gakó lyì-fɔ̀lɔ̀, sə n yə̀ á tùntùnnə̀ n twĩ̀ n pə ába.

⁴⁴ Lò mɔ̀bɔ́ ń nə́ ń yâl n yə̀ á yé né cə́bal, sə n yə̀ á gakó yə-bal.

⁴⁵ Wɔ́ èta ǹdə́ Numbyíní Byǐ myɛ. Ń yə̀ twí mùnì ga lò twĩ̀ n pɔ̃ yé. Ń túwə́, ń la tũ̌ n pə lyì bí ni, sə n pə ń myə̂l lé lyì nánzhəzhɔ̌ zõ yilə.”

Yezu púr lyìlyǒ yírhə́

⁴⁶ Yezu ǹdə́ ń kwã-lyì bí zɛ̃̀ bə yí Zheriko. Bə̀ gə́ tú bə̀ nʼê dwi cɔ w wa, lyì nánzhəzhɔ̌ yʼà tó be. E jà lyìlyǒ òdù yʼà jě sɔ́má y vɔ̃̀ nɛ̀ ò nʼô lwə̀lə̀. È yʼà wɔ́ Time byǐ, ń yíl Bərtime.

⁴⁷ N nyɛ̀ɛ̀ bə̀ wɔ́ Nazarɛtɛ lyì bal Yezu ń bànà, n zɛ̃̀ n ji kùr ń nə́ ń búbwéé ń zhe: “Dəvyidi Byǐ Yezu, dǔr à nɔ̀nɔ̀.”

⁴⁸ Lyì-zhâ bɛ́ zɛ̃̀ bə̀ nʼê ji mu búlə́ bə̀ ń yẽ̌ ń sɔ̀ w nɛ. N kwɛrhɛ n búbwéé dwini shãã ga n wɔ̀: “Dəvyidi Byǐ, dǔr à nɔ̀nɔ̀.”

⁴⁹ Yezu swə́rh n zhì, n wɔ̀: “Byẽ̌nə mo n bà.” Bə zɛ̃̀ bə byẽ̀ lyìlyǒ w bə wɔ̀: “Kám ǹ wu ń zɛ̃̀. Nyǐ ń nə́ ń byẽ̀ mó.”

⁵⁰ O dul ò gɔ̀nɔ̀ w tɛ̃´, o zɛ̃̀ o dùr o bə̀ Yezu sono.

⁵¹ Yezu bwə̀rh mò n wɔ̀: “Bə̀kɔ́n ǹ nə́ ǹ yâl bʼà wɛ̀rhɛ́ ǹ yilə?” Lyìlyǒ w wɔ̀ mɔ̀: “Yó-cə́bal, à nʼâ lwə̀l mó bə̀ ǹ púr à yírhə́ né.”

⁵² Yezu zɛ̃̀ n wɔ̀: “Zhəl, ǹ gə́ zhí ni mú ce ǹ nɔ ǹ cìnə̀.” Ò yírhə́ né jʼa púr, o zhǐr o tó Yezu ni ò la.