Markɛ 1 - Lyélé

Zhã-Bətiisi bwə̀l Yi zɔ̀mɛ̀ rɛ́

¹ Yò-ècɔ̀nɔ̀ nyí rí rə̀ nʼê zɔ̀m Yi Byǐ Yezu Kristə yò mó kùr-ju.

² Bə̀ yʼà kɛ̃ Yi nyì-zwennə Ezəyi sɛ́bɛ́ rɛ́ wẽ́ bə̀ Yi wòwə̀: “Nyǐ à nʼâ twĩ̀ à tùntúm ń la yə̀ ǹ yé né, n kwɛrhɛ ǹ sɔ́má yá.

³ Cəl nʼê bwə̀l gɔ-elũ èpòlò wə̀, rə̀ zhe: ‘Kwɛrhɛna Cinu sɔ́má yá, sʼá wɛ̀rhɛ́ sə-byǐsí sə yə̀ cángá á pɔ̃.’ ”

⁴ Lò mə̀dù yà ń tú gɔ-elũ èpòlò w wə, ń yíl Zhã. Ń yà ń nə́ ń bwə̀l ń byili lyì bí ni, bə̀ bə̀ pyìrhí bə̀ wun, bə zwẽ nɛ̃̌-shɔ, mùnì ga Yi pə bɛ bə̀ yə̀-bəlwàálɛ́ sǔbri. Sə ń yà ń nə́ ń pɛ bɛ nɛ̃̌-shɔ mɔ́.

⁵ Zhide tənà y lyì bí ǹdə́ Zhərəzalɛm lyì bí púlə́púlə́ yʼà nʼê twí ń sono, bə̀ yʼà nʼê byili bə̀ dwə́ə́ré. Zhã zɛ̃̀ n pə bɛ nɛ̃̌-shɔ Zhɔrdɛ̃ bwǐ y wə.

⁶ Zhã kàmə̀-zwǐ y ń yà ń zù mú wɔ́ yómó kur bə̀ yʼà mʼe sɔ̃̀ yà, n zə cã̌-tɔ̀nɔ̀ n mə n lyẽ yə. Səsɔ̀mɛ̀ ǹdə́ gɔ tùr rə̀ yʼà wɔ́ ń kùjú.

⁷ Ń yà ń nə́ ń bwə̀l ń byili lyì-zhâ bɛ́ nɛ ń zhe: “Nyǐnə lò ŋwɛ́nɛ́ kwã nɛ́ ń bànà, ń du àmyɛ́. À yə̀ yírh swí sʼa kó tɛ̃´ a lwə̂r ń nə̀cìlə̀ né nyínsí myɛ cìcì yé.

⁸ Àmyɛ́ zə nɛ̃̌ a pə ába nɛ̃̌-shɔ, sə ńmyɛ̌ mà n zə Eshirhə náàcɛ̀nɛ́ n pə ába nɛ̃̌-shɔ.”

Yezu zwẽ nɛ̃̌-shɔ

⁹ Dwã nɛ́ nə̀myɛ́ wẽ́, Yezu shí Gəlile tənà y cɔ w bə̀ nʼê byẽ̀ bə̀ Nazarɛtɛ mɔ́ n bə̀ Zhɔrdɛ̃ bwǐ y yó. Zhã pɔ̃ nɛ̃̌-shɔ.

¹⁰ Yezu gə́ tú n shí nɛ̃̌ mɔ́ wẽ́ ń nə́ ń shə́r yi ní, n nə dɛ̃̌ yi rí rə̀ pul, n nə Eshirhə náàcɛ̀nɛ́ è nyɛ̌ ǹdə épwèné ta, è nʼê swé ń yó wə,

¹¹ n zɛ̃̀ n nyɛ̀ɛ̀ cəl rə̀ shí dɛ̃̌ rə wɔ̀: “Ǹ wɔ́ à ywə́lə́ byǐ. À só mó dɛ̃´dɛ̃´.”

Shətana swèlè Yezu

¹² Yezu gə́ zwẽ nɛ̃̌-shɔ mɔ́ n zhɛ̀, Eshirhə y ce n zhǐr n vò gɔ-elũ èpòlò w wə.

¹³ N jòm gàà dwã shə́-èna, Shətana zɛ̃̀ e ji kùr è nʼê swèlè mò. Ńmyɛ̌ ǹdə́ gɔ vwàmá nɛ́ yʼà ŋwɛ́nɛ́ ǹdə́ dwã, sə màlɛ́kabá yʼà nʼê nyǐ ń yò.

Yezu byẽ̀ gwànnà bə̀na bə jǐrh ń kwã-lyì

¹⁴ Rə̀myɛ́ kwã nɛ́, bə̀ zɔ Zhã bə ce byə̀nə́-jù wə̀. Yezu zɛ̃̀ n vò Gəlile ń nə́ ń bwə̀l yò-ècɔ̀nɔ̀ nyí rí rə̀ shí Yi sõ mó.

¹⁵ Ń yà ń nə́ ń wə̀lə̀: “Yi rí tɛ̀bɛ́ bə̀ yʼà byili mú yúwə́. Yi pyɛ̀lɛ̀ rɛ́ bwəlse. Pyìrhínə á wun, á zwẽ yò-ècɔ̀nɔ̀ nyí rí.”

¹⁶ Ń yà ń ŋwɛ́nɛ́ Gəlile mwə̃́ y vɔ̃̀ nɛ̀ ń nə́ ń zhə̀lə̀, n nə gwànnà bə̀lyè bə̀ yʼà nʼê gwɛ̃̀ mwə̃́ y wə. È yʼà wɔ́ Shəmɔ ǹdə́ ń da-byǐ Andərɛ.

¹⁷ N zɛ̃̀ n wɔ̀ bɛ: “Bànà á tó ne. À mʼa ce á gwɛ̃̀ numbyínsi.”

¹⁸ Bə jʼa zhǐr rə̀myɛ́ yó cìcì, bə yẽ̌ bə̀ gùndwə̂ né ne gàà, bə tó mo.

¹⁹ N kə́ n twẽ̌ n yí yé né námpɔ́lɛ́, n nə Zebede byâ bɛ́, Zhakɛ ǹdə́ Zhã. Bə̀ yʼà ŋwɛ́nɛ́ bə̀ bǔ-bwəl lé wẽ́, bə̀ nʼê kwɛrhɛ bə̀ gùndwə̂ né.

²⁰ N já n zhízhílí n byẽ̀ bə̀myɛ. Bə zhǐr bə yẽ̌ bə̀ da Zebede ǹdə́ ń tùntùnnə̀ bé ne bǔ-bwəl lé wẽ́ bə tó Yezu ni.

Yezu wárh bal mə̀dù nə̀cílí námməlwɛ̀lɛ́ yʼà zhe

²¹ Rə̀myɛ́ kwã nɛ́, Yezu ǹdə́ ń kwã-lyì bí zhǐr bə vò cɔ òdù ò yíl Kapɛrnaɔm. Shìrhə́ dɛ̃ rɛ́ gə́ yúwə́, n zɛ̃̀ n vò dwã-gùlú jì y wə, ń nə́ ń cèrhè kàrmɔ̀ lyì bí ni.

²² Ń gə́ yà ń nə́ ń cèrhè ǹdə́ ń sə̀pwà ŋwɔ̀nɔ́ mɔ́ ce, ń kàrmɔ́ èta mɔ́ yʼà nʼê jàr bɛ̀ dɛ̃´dɛ̃´. Ń kàrmɔ́ yʼà də̀ ǹdə Muyiisi nyə́ né byilnə bé nyân mɔ́ ta yé.

²³ Rə̀myɛ́ yó, bal mə̀dù yà ń ŋwɛ́nɛ́ dwã-gùlú jì y wə, nə̀cílí námməlwɛ̀lɛ́ yʼà zhe mo. N zɛ̃̀ ń nə́ ń bya ń zhe:

²⁴ “Bə̀kɔ́n ǹ tú pyâ nə́ sõ Nazarɛtɛ lyì bal Yezu? E zɛ̃̀ wɔ́ nə́ yò zhìlù yil ǹ túwə́? À yě lò mɔ̀bɔ́ ná-dwí yil ǹ wɔ́: Yi lò ǹdə́ mɔ́. Wɔ́ rə̀myɛ́ rə̀ twĩ̀ mú ń bà.”

²⁵ Yezu zɛ̃̀ n bú nə̀cílí y n wɔ̀: “Gu ǹ nyí, sə́ du bal mɔ́ wẽ́.”

²⁶ E zɛ̃̀ e vúvǔ bal mɔ́, e mà wìrhí nánfwɛ̀lɛ̀, e du ń wẽ́.

²⁷ Kɔn jàr lyì bí gakó dɛ̃´dɛ̃´, bə zɛ̃̀ bə̀ nʼê bwə̀rh dwã bə̀ zhe: “Bə̀kɔ́n yò ǹdə́ kɔ̀bɔ́ èta mɔ́? Ń nə́ ń cèrhè kàrmɔ̀ nándùl ǹdə lò mɔ̀bɔ́ ń zhe ŋwɔ̀nɔ́ ta. Ń nə́ ń pɛ nyí nə̀cílsi námməlwâlsɛ myɛ nɛ, sə shɛ̀nɛ́ sə zwẽ ń nyí ni.”

²⁸ Yezu yil lé pú e du rə yí Gəlile tənà y gakó wẽ́ làlà.

Yezu wárh nə̀bwànà nánzhəzhɔ̌

²⁹ Yezu zɛ̃̀ n shə́r dwã-gùlú jì y wẽ́, ńmyɛ̌ ǹdə́ Zhakɛ ǹdə́ Zhã vò Shəmɔ ǹdə́ Andərɛ sõ kɛ̀lɛ́ wa.

³⁰ Sə Shəmɔ cə̃́-kɛ̃ mɔ́ yala yʼà shɛ̃̀ ń pyě tɛ̃´. Yezu gə́ yúwə́, bə jʼa zɔ̀m nə̀bwɛ̃̀ mɔ́ yò ǹdə́ mɔ.

³¹ N yí ń nyí ni, n zə ń jɛ̃̀ nɛ̀ n zhẽ̌ mo dɛ̃̌. Ń yala nɛ́ kʼa só, n zɛ̃̀ ń nə́ ń tɛnɛ bɛ.

³² Yi rí gə́ tú rə zù, cɛ y nʼê byíbyílí, lyì bí zə bə̀ nə̀bwànà bɛ́ gakó ǹdə́ byɛ̀bɛ́ nə̀cílsi námməlwâlsɛ yʼà zhe be mó gakó, bə mʼe bə̀ Yezu sõ.

³³ Cɔ w lyì bí gakó yʼà tú dwã yó bwə̀rə̀ y nyí ni.

³⁴ Sə ń wárh bə̀ nə̀bwànà bɛ́ dwí gakó, n jì nə̀cílsí námməlwâlsɛ́. Sə sə̀ gə́ yʼà yě ń gə́ wɔ́ lò ná-dwí yil mó ce, ń yà ń tá ń yẽ̌ sə̀ zɔ̀m yé.

Yezu bwə̀l yò-ècɔ̀nɔ̀ nyí rí Gəlile tənà y wa

³⁵ Yezu dùlí nəkɔkɔ́lɛ́ shãã shãã n zɛ̃̀ n du ǹdə́ cɛ y gwẽ̌ yə̀ wárh yé, n vò èpòlò wə̀, lò gə́ tɛ̀nɛ́ mə̀gã̌, ń nə́ ń ce Yi.

³⁶ Shəmɔ ǹdə́ ń tó-dwã bɛ́ zɛ̃̀ bə̀ nʼê pyà mɔ̀.

³⁷ Bə̀ gə́ tú bə nə mɔ, bə wɔ̀ mɔ̀: “Lyì bí gakó nʼê pyà mɔ́.”

³⁸ N zɛ̃̀ n wɔ̀ bɛ: “Bànà nə́ vò jàà dõ wə, cə-bwâlsɛ́ sə̀ ŋwɛ́nɛ́ bwə́lbwə́l mó wẽ́, mùnì ga a bwə̀l yò-ècɔ̀nɔ̀ nyí rí gàà myɛ, bə̀ wɔ́ rə̀myɛ́ yil à túwə́.”

³⁹ N zhǐr n byɛ́lɛ́ Gəlile tənà y púlə́púlə́, ń mə́ ń bwə̀l yò-ècɔ̀nɔ̀ nyí rí bə̀ dwã-gùúlí jìsí wẽ́, sə ń yà ń nə́ ń jì nə̀cílsi námməlwâlsɛ.

Yezu wárh nɔ cə́bal mə̀dù

⁴⁰ Dɛ̃ rə̀dù, nɔ cə́bal mə̀dù tú Yezu sono, n jòm ń nə̀dwə́nə́ yó, n wùlì ń yé né, n lwə̀l mò n wɔ̀: “Kɔn gə wɔ́ ǹ bùlə̀, ǹ wɔ̌ ǹ wárh nɛ a jǐrh wárhgáá.”

⁴¹ Ń nɔ̀nɔ̀ zə Yezu, n cèlè ń jɛ̃̀ n dwə̀rh mò, n wɔ̀: “Kɔn wɔ́ à bùlə̀. Wárh ń jǐrh wárhgáá.”

⁴² Rə̀myɛ́ yó cìcì, nɔ w zhɛ̀, n jǐrh wárhgáá.

⁴³ Yezu zɛ̃̀ n gwirhi ń yé, n zɔ̀m ǹdə́ mɔ n wɔ̀:

⁴⁴ “Zhəl, sə́ dɛ̃̀ ǹ cìnə̀. Bə̀ká shɛ̀nɛ́ ń wɔ̀ lò lò nè yé, sə́ vò ń byili ǹ cìn Yi jì y vwĩ̀-zwə́lnə mó ne, sə́ pə kɔn ǹ gə́ wárh ń jǐrh wárhgáá mɔ́ yilə, ǹdə Muyiisi gə́ kɛ̃ nyə́ né sɛ́bɛ́ rɛ́ wẽ́ n byili ní. Rə̀myɛ́ mʼa yə̀ zhə̀n kɔna, rə̀ nʼê byili lyì bí gakó ne bə̀ ǹ wárh.”

⁴⁵ Sə bal mɔ́ gə́ zhǐr, ń bwə̀l yò w n ce dɛ̃̌ n byili. Rə̀myɛ́ ce Yezu yà ń kə́ ń wàr ń nə́ ń zwì cɔ w wa, ǹdə́ è gə də̀ shéé ń shèè yé. Ń yà ń ŋwɛ́nɛ́ gɔ sono, lò gə́ tɛ̀nɛ́ mə̀gã̌, sə lyì bí yʼà nʼê shí jààsɛ́ gakó w bə̀ twí ń sono.