Məco 8 - Lyélé

Yezu wárh nɔ cə́bal mə̀dù

¹ Rə̀myɛ́ kwã nɛ́, Yezu zhǐr n só pyɔ̀ wá. Lyì nánzhəzhɔ̌ zɛ̃̀ bə tó mo.

² Nɔ cə́bal mə̀dù zɛ̃̀ n yí ń nyí ni, n jòm ń nə̀dwə́nə́ yó, n wùlì ń yé né, n wɔ̀ mɔ̀: “Yó-cə́bal, kɔn gə wɔ́ ǹ bùlə̀, ǹ wɔ̌ ǹ wárh nɛ a jǐrh wárhgáá.”

³ Yezu zɛ̃̀ n cèlè ń jɛ̃̀ n dwə̀rh mò, n wɔ̀: “Kɔn wɔ́ à bùlə̀. Wárh ń jǐrh wárhgáá.” Bal mɔ́ já n wárh rə̀myɛ́ yó cìcì n jǐrh wárhgáá.

⁴ Yezu zɛ̃̀ n wɔ̀ mɔ̀: “Dɛ̃̌ ǹ cìnə̀. Bə̀ká shɛ̀nɛ́ ń wɔ̀ lò lò nè yé. Zhəl ń byili ǹ cìn Yi jì y vwĩ̀-zwə́lnə mó ne, sə́ pə vwĩ̀-kɔn ǹdə Muyiisi gə́ pɔ nyí ní. Rə̀myɛ́ mʼa yə̀ zhə̀n kɔna, rə̀ nʼê byili lyì bí gakó ne bə̀ ǹ wárh.”

Yezu wárh shə̀dɛ́ɛ́sɛ yó-cə́bal kɛ̀lɛ́ tùntùnnə̀

⁵ Rə̀myɛ́ kwã nɛ́, Yezu zhǐr n vò Kapɛrnaɔm. Ń gə́ tú ń nə́ ń zwì cɔ w wu w wẽ́ yi ní, shə̀dɛ́ɛ́sɛ zɔ̌m yó-cə́bal mə̀dù yí ń nyí ni, n lwə̀l mò n wɔ̀:

⁶ “Yó-cə́bal, à kɛ̀lɛ́ tùntùnnə̀ bə jɛ̀, ń pyě tɛ̃´ kɛ̀lɛ́ w ń wàr ń nə́ ń zɛ̃̀ yé. Ń nə́ ń nwɛ̀nɛ̀ dɛ̃´dɛ̃´.”

⁷ Yezu wɔ̀ mɔ̀: “À mʼa bʼa wárh mɔ.”

⁸ Shə̀dɛ́ɛ́sɛ́ yó-cə́bal mɔ́ zɛ̃̀ n wɔ̀: “Yó-cə́bal, à yə̀ yírh swí sə́ zù à sõ kɛ̀lɛ́ w yé. Ǹmyɛ́ wírí ń púr ǹ nyí, bʼà tùntùnnə̀ mó mà n wárh.

⁹ Nyǐ à zhe yó-cìnə́ bə̀ cǐ ni, àmyɛ zɛ̃̀ à cǐ shə̀dɛ́ɛ́sɛ, à nʼâ pɛ sɛ nyə́. À gə wò mə̀dù nì bə̀ ń zhəl nyɔ̀nɔ̀, n vò. À gə wò ń dõ ne bə̀ ń bə̀ nyə̀má, n bà. À gə wò à tùntùnnə̀ nè bə̀ ń wɛ̀rhɛ́ èta, n wɛ̀rhɛ́.”

¹⁰ Yezu gə́ nyɛ̀ɛ̀ rə̀myɛ́, rə jàr mɔ̀. N zɛ̃̀ n wɔ̀ lyì bí byɛ̀bɛ́ bə̀ yʼà tó mo mó ne: “Zhə̀nà, à nʼâ wə̀l ába: à gwẽ̌ yə̀ lò mə̀dù ga nɛ, bá Esərayɛl nɛ́, ń zhí Yi ni èta yé.

¹¹ Sə à nʼâ wə̀l ába: lyì nánzhəzhɔ̌ mʼa shí yi-pwírhí wə, ǹdə́ yi-zùr wə̀, bə bʼe tó Abəraham ǹdə́ Yəzakɛ ǹdə́ Zhakɔɔbɛ nɛ bə jòm Arəzana tənà y wẽ́ bə jí.

¹² Sə bə̀ mʼa ce byɛ̀bɛ́ bə̀ yʼà mə̂ sə bə yə̀ Arəzana tənà y lyì bí mú pwẽ̀ nè cə-byṹ wə. Bə̀ mʼa nʼê kúrh ǹdə́ bə̀ nʼê dɔ̀m bə̀ yə́lə́ dwã nɛ gàà.”

¹³ N zɛ̃̀ n zhízhílí n wɔ̀ shə̀dɛ́ɛ́sɛ́ yó-cə́bal mɔ́ nɛ: “Ká vò jè. Kɔn yál èta, ǹ gə́ zhí ni mú yilə.” Ń tùntùnnə̀ mó já n wárh rə̀myɛ́ yi ní cìcì.

Yezu wárh nə̀bwànà nánzhəzhɔ̌

¹⁴ Rə̀myɛ́ kwã nɛ́, Yezu zhǐr n vò Pyɛɛrɛ sõ kɛ̀lɛ́ wa. N yí n pwírí Pyɛɛrɛ cə̃́-kɛ̃ yala shɛ̃̀ ń pyě tɛ̃´.

¹⁵ N zə ń jɛ̃̀ nɛ̀, ń yala nɛ́ kʼa só, n já n zɛ̃̀ ń nə́ ń tɛnɛ mɔ.

¹⁶ Də̀dɛ̀nɛ́ y yi gə́ tú e yí, bə zə lyì nánzhəzhɔ̌ nə̀cílsi námməlwâlsɛ yʼà zhe, bə mʼe bə̀ Yezu sõ. N zə ń nyì-zɔ̀mɛ̀ dúdú n jì sì. N já n súlí n wárh nə̀bwànà bɛ́ dwã bɛ́ gakó.

¹⁷ Ń wɛ̀rhɛ́ èta, mùnì ga Yi nyì-zwennə Ezəyi zɔ̀mɛ̀ rɛ́ pyìrh. Ezəyi yà ń wòwə̀: “Ń zwẽ nə́ bə-jàn-zhəəré ǹdə́ nə́ címsí ga n zhĩ.”

Lyì byɛ̀bɛ́ bə̀ nʼê yâl bə tó Yezu ni

¹⁸ Yezu gə́ nɔ lyì-zhâ bɛ́ bə̀ kə́kɛ́lɛ́ mɔ, n zɛ̃̀ n pə nyí ń kwã-lyì bí ni bə̀ bə̀ zhəl mwə̃́ y èpákɛ̀.

¹⁹ Muyiisi nyə́ né byilnə mə̀dù zɛ̃̀ n yí ń nyí ni n wɔ̀ mɔ̀: “Yó-cə́bal, à mʼa tó mó a vò ǹ gə́ la mə̀gã̌ mɔ́ gakó.”

²⁰ Yezu zɛ̃̀ n wɔ̀ mɔ̀: “Zúlə́ zhe pwə́lə́ nə̀ nʼê pyẽ̀ né. Kúmsi myɛ zhe jàlá. Sə Numbyíní Byǐ bə jàà zhe ń la ń yó né co n shǐrh myɛ cìcì yé.”

²¹ Ń kwã-lyì bí mə̀dù myɛ wɔ̀ mɔ̀: “Cinu, à nʼâ lwə̀l mó, sə́ yẽ̌ a jɛ̀rɛ̀ a vò a kwè à da a ce.”

²² Yezu wɔ̀ mɔ̀: “Tó à kùrə̀, sə́ yẽ̌ cùùrí ni rə ce rə̀ cùùrí.”

Yezu ce zho ǹdə́ mwə̃́ nɛ̃̌ zhì shɛ́ɛ́

²³ Yezu gə́ zɔ̀m rə̀myɛ́ n zhɛ̀, n zù bǔ-bwəl rə̀dù wə̀. Ń kwã-lyì bí zɛ̃̀ bə tó mo bə zù.

²⁴ Zho nánfɔ̀lɔ̀ jʼa zɛ̃̀, ò nʼô wùl nɛ̃̌ mɔ́ yó, mə zɛ̃̀ mə̀ nʼê zwì bǔ-bwəl lé wə, rə̀ nʼê yâl rə mɔ́lɛ́. Yezu jà ń yà ń dɛ̌.

²⁵ Ń kwã-lyì bí zɛ̃̀ bə yí ń nyí ni, bə zhàrh mɔ̀, bə wɔ̀: “Cinu, zɛ̃̀ ń zwẽ nə́ba. Nyǐ nə́ mʼâ cì.”

²⁶ N zɛ̃̀ n wɔ̀ bɛ: “Byè yil á nʼá dùr ywẽ? Á yə̀ nɛ zhí ǹdʼá wun gakó nà?” N zɛ̃̀ n bya zho w ǹdə́ mwə̃́ y nɛ̃̌ mɔ́. Rə̀myɛ́ ga jʼa zhì shɛ́ɛ́.

²⁷ Kɔn jàr bɛ̀ dɛ̃´dɛ̃´, bə zɛ̃̀ bə̀ nʼê wə̀lə̀: “Bal mɔ́ mɔ̀bɔ́ wɔ́ tər lò, zho ǹdə́ mwə̃́ nɛ̃̌ myɛ mʼê shɛ̀nɛ́ ń nyí ni?”

Yezu wárh lyì bə̀lyè nə̀cílsi námməlwâlsɛ yʼà zhe

²⁸ Yezu yú mwə̃́ y èpákɛ̀ Gadara lyì bí tənà y wa. Rə̀myɛ́ yó, lyì bə̀lyè nə̀cílsi námməlwâlsɛ yʼà zhe shí lú-bɔ̀là w bə du bə jəl mo. Bə̀ yò w yʼà zum dɛ̃´dɛ̃´. Lò lò wàr ń nə́ ń tó sɔ́má y gàà mɔ́ ń lyɛ̃ yé.

²⁹ Bə zɛ̃̀ bə̀ nʼê wǔrh bə̀ mʼê wə̀lə̀: “Etər ǹ nə́ ǹ yâl ń wɛ̀rhɛ́ nə́ba nɛ́ Yi Byǐ? Ǹ tú ǹ la nə́ba còrhò-tum pɔ, e jà rə̀ dɛ̃ rɛ́ gwẽ̌ yə̀ yí?”

³⁰ Kùkúr nánzhəzhɔ̌ yʼà zhǐ gàà səta rə̀ nʼê dɔ̀m gɔ.

³¹ Nə̀cílsí zɛ̃̀ sə̀ nʼê lwə̀l Yezu ni bə̀ ń gə la sə jǔ, sə n ce sə vò e zù kùkúúrí wẽ́.

³² N zɛ̃̀ n wɔ̀ sɛ̀: “Zhəlnə.” Sə du sə vò e zù kùkúúrí wẽ́. Rə̀myɛ́ yó, rə̀ gakó jʼa dùr rə cə́cèlé pyɔ̀ w rə ló mwə̃́ y wə, rə mɛ̃ gàà rə cì.

³³ Lyì bí byɛ̀bɛ́ bə̀ yʼà nʼê yìlì rì mú dùr bə vò cɔ w wa, bə byili byɛ̀bɛ́ nə̀cílsí yʼà zhe mó gə́ tó né bə wárh, ǹdə́ kɔn dɛ̀bɛ́ gakó rə̀ wɛ̀rhɛ́ mɔ́.

³⁴ Cɔ w lyì bí gakó du bə̀ la Yezu sono. Bə̀ gə́ yú bə nə mɔ, bə lwə̀l mò bə̀ ń du bə̀ tənà y wa.