Məco 7 - Lyélé

Á bə̀kʼá kə́ á dwã bɛ́ bùrsì yé

¹ Yezu zɛ̃̀ n súlí n wɔ̀ bɛ: “Á bə̀kʼá kə́ á dwã bɛ́ bùrsì á pə bɛ dóó yé, mùnì Yi bə̀kʼa kə́ ámyɛ bùrsì rə pə ába dóó yé.

² Zhə̀nà, Yi mʼa kə́ á bùrsí kɔn myɛrhɛ ǹdə á gə́ nʼá kɛ́ á dwã bɛ́ nyɛ̌sɛ́ nɛ́. Zwã̌ y á nʼá ce è wẽ́ á pɛ á dwã bɛ́ nɛ mɔ́, wɔ́ èmyɛ́ dwí rí cìcì wẽ́ Yi mʼa ce né rə pə ámyɛ nɛ.

³ “Byè yil ǹ nə màlá y è ŋwɛ́nɛ́ ǹ dõ mó yírh ré wə, ń zɛ̃̀ ǹ yə̀l bə̀ də̀-bṹ ŋwɛ́nɛ́ ǹmyɛ́ cìcì nyân dɛ́ wẽ́?

⁴ Etər ǹ mʼâ tó né ń wɔ̀ ǹ dõ mó ne: ‘Yẽ̌ a vùr màlá y è ŋwɛ́nɛ́ ǹ yírh ré wẽ́ mó’, də̀-bṹ w jʼà ŋwɛ́nɛ́ ǹmyɛ́ cìcì nyân dɛ́ wẽ́?

⁵ Myìnù cə́bal, jɛ̀rɛ̀ ń vùr də̀-bṹ w ò ŋwɛ́nɛ́ ǹ yírh ré wẽ́ mó. Rə̀myɛ́ yó, ǹ yírhə́ mʼa nə màlá y è ŋwɛ́nɛ́ ǹ dõ mó nyân dɛ́ wẽ́ mó cɛ̀nɛ̀, ń zɛ̃̀ ń ŋwɛ̀nɛ́ ń vùr yə̀.

⁶ “Á bə̀kʼá kwè kɔn dɛ̀bɛ́ rə̀ wɔ́ Yi nyân á pə kǔlsi ni, e jà sə̀ la pyìrhú, sə kʼa dɔ̃̀ á cìcì mú sə zhəzhɛrɛ yé. Á bə̀kʼá kwè á dɔ̀msɛ̀ shɛ̀bɛ́ sə̀ ye cɛ̀ á ló kùkúr yé né, e jà rə̀ la sɛ tɛ̃´ nɔ́m ǹdə́ rə̀ nə̀rh sə cɔ̀ yé.

Lwə̂lnə, bə̀ mʼa pə ába

⁷ “Lwə̂lnə, bə̀ mʼa pə ába. Pyâna, á mʼâ na. Kɔ́kwána, bə̀ mʼa pul bòlò w bə pə ába á zù.

⁸ Zhə̀nà, lò mɔ̀bɔ́ gakó ń nə́ ń lwə̀lə̀, bə̀ yʼa pɔ̃; lò mɔ̀bɔ́ ń nə́ ń pyà, ń ya n na; lò mɔ̀bɔ́ ń nə́ ń kɔ́kwá, bə̀ yʼa pul bòlò w bə pɔ̃ n zù.

⁹ “Ámyɛ̌ mə̀dù byǐ gə lwə̀l mò búrú, ń mà n ká n kwè nə́kulu n pɔ̃?

¹⁰ Ráá ń byǐ gə lwə̀l mò mɔ́mwâ, ń mà n ká n kwè kùwə̀ n pɔ̃?

¹¹ Ámyɛ̌ ǹdʼá wɔ́ lwɛlɛ cìnə́ ga, wɔ́ kɔn dɛ̀bɛ́ rə̀ càn á nʼá pɛ á byâ bɛ́ nɛ, sʼe mʼe zɔ̀m á Da mɔ́ ń ŋwɛ́nɛ́ Arəzana w mɔ́ zɔ̀mà, ń mà n pə kɔn dɛ̀bɛ́ rə̀ càn lyì bí byɛ̀bɛ́ bə̀ nʼê lwə̀l mò mó ne.

¹² “Kɔn dɛ̀bɛ́ gakó á nʼá yâl bʼâ dwã bɛ́ wɛ̀rhɛ́ á yilə, sʼámyɛ wɛ̀rhɛ́ rɛ bə̀myɛ yilə. Wɔ́ èta Muyiisi nyə́ né sɛ́bɛ́ rɛ́ ǹdə́ Yi nyì-zwennə bé sábá nɛ́ nʼê byili ní.

Tónə bwə̀rə̀ y nánshə́shɛ́nɛ́ y á zù

¹³ “Tónə bwə̀rə̀ y nánshə́shɛ́nɛ́ y á zù. Bwə̀rə̀ y kɛ̀bɛ́ è wà mɔ́, ǹdə́ sɔ́má y kɛ̀bɛ́ è wà mɔ́, wɔ́ jó jàà w sə̀ zâ nɛ́. Byɛ̀bɛ́ bə̀ nʼê tó se bə̀ zwì mú já.

¹⁴ Sə bwə̀rə̀ y nánshə́shɛ́nɛ́ y ǹdə́ sɔ́má y nánshə́shɛ́nɛ́ yá, wɔ́ nyǔ mə̀ tʼâ la zhɔ̌ jàà sə̀ zâ nɛ́, sə byɛ̀bɛ́ bə̀ nə sə̀myɛ́ mɔ́ bə já yé.

Cǒ byǐ nʼê byili ò ná y gə́ wɔ́ nɛ́

¹⁵ “Dɛ̃̌na á cìn ǹdə́ byɛ̀bɛ́ bə̀ nʼê myìnì ába bə̀ bə̀myɛ́ wɔ́ Yi nyì-zwennə mó. Bə̀ nʼê twí á wẽ́ ǹdə wɔ́ pyììsì sə̀ la sə̀ dwã pyììsì wẽ́ ta, e jà bə̀ wun ní wẽ́ mó, bə̀ wɔ́ gɔ kǔlsi sə̀ bàn pyììsí zal.

¹⁶ Wɔ́ bə̀ tùntwə̃̀ə̃̀ né dɛnnɛ á mʼâ tó né á lwar bə̀ párá. Bə̀ tʼâ kwẽ écin bàasɔ̀bɔ́ yó yé. Bə̀ kʼê tʼâ kwẽ épyìlə́ sə́sɔ́nɔ́ yó yé.

¹⁷ Èta, cǒ kɔ̀bɔ́ ò càn, wɔ́ byâ byɛ̀bɛ́ bə̀ càn ò nʼô ce. Cǒ kɔ̀bɔ́ ò bə càn, wɔ́ byâ byɛ̀bɛ́ bə̀ bə càn ò nʼô ce.

¹⁸ Cǒ kɔ̀bɔ́ ò càn wàr ò ce byâ byɛ̀bɛ́ bə̀ bə càn yé. Cǒ kɔ̀bɔ́ ò bə càn wàr ò ce byâ byɛ̀bɛ́ bə̀ càn yé.

¹⁹ Cǒ kɔ̀bɔ́ ò tʼâ ce byâ byɛ̀bɛ́ bə̀ càn, bə̀ yʼa kà w bə ji myǐn.

²⁰ Èta myɛ, byɛ̀bɛ́ bə̀ nʼê myìnì ába bə̀ bə̀myɛ́ wɔ́ Yi nyì-zwennə mó, wɔ́ bə̀ tùntwə̃̀ə̃̀ né dɛnnɛ á mʼâ tó né á lwar bə̀ párá.

Wɔ́ byɛ̀bɛ́ bə̀ nʼê wɛ̀rhɛ́ Yi pùbùlə̀ mó bə̀ mʼa zù Arəzana tənà y wa

²¹ “È də̀ lyì bí byɛ̀bɛ́ bə̀ nʼê byẽ̀ nè bə̀ ‘Cinu, Cinu’ mú, bə̀ la Arəzana tənà y wẽ́ zú yé. Wɔ́ byɛ̀bɛ́ bə̀ nʼê wɛ̀rhɛ́ à Da mɔ́ ń ŋwɛ́nɛ́ Arəzana w mɔ́ pùbùlə̀ mó, bə̀ mʼa zù è wẽ́.

²² Bùrsí dɛ̃ rɛ́ yùwə̀, lyì nánzhəzhɔ̌ mʼa zɛ̃̀ bə̀ nʼê wə̀l nè: ‘Cinu, Cinu, è də̀ ǹmyɛ́ yil lé yil nə́ yʼâ zɔ̀m zɔ̀mà nyɛ̀bɛ́ Yi byili nə́ba nà? È də̀ ǹmyɛ́ yil lé yil nə́ yʼâ jì nə̀cílsi námməlwâlsɛ nà? È də̀ ǹmyɛ́ yil lé yil nə́ yʼâ wɛ̀rhɛ́ màmyaarhɛ nánzhəzhɔ̌ nà?’

²³ Sə à mʼa wɔ̀ bɛ: ‘Tùm-bəjə́ə́le cìnə́, jénə tɛ̃´ à nyí ni, bʼà yə̀l á pár yé.’

Cilinə à zɔ̀mà nɛ́, sʼá wɛ̀rhɛ́ ǹdə nə̀ gə́ nʼê byili ní

²⁴ “Èta myɛ, lò mɔ̀bɔ́ gakó ń nə́ ń cili zɔ̀mà nɛ́ nyɛ̀bɛ́ à nʼâ byili mú, n zɛ̃̀ n wɛ̀rhɛ́ ǹdə nə̀ gə́ nʼê byili ní, rə̀-ná-cí nyɛ̌ ǹdə surhə cə́bal ta. Ń lù ń jì pàtá yó.

²⁵ Dwà nyɔ̀, nɛ̃̌ mɔ́ wùl dɛ̃´dɛ̃´, zho nánfɔ̀lɔ̀ zɛ̃̀, rə dom dom jì y rə ga. È gə́ lù pàtá yó mó ce, rə̀ yə̀ ŋwɛ̀nɛ́ rə wǔr y yé.

²⁶ “Sə lò mɔ̀bɔ́ gakó ń nə́ ń cili zɔ̀mà nɛ́ nyɛ̀bɛ́ à nʼâ byili mú, n zɛ̃̀ ń tá ń wɛ̀rhɛ́ ǹdə nə̀ gə́ nʼê byili ní, rə̀-ná-cí nyɛ̌ ǹdə lò mɔ̀bɔ́ ń bə surhə zhe ta. Ń lù ń jì y nyɔ̀rhɔ́ yó.

²⁷ Dwà nyɔ̀, nɛ̃̌ mɔ́ wùl dɛ̃´dɛ̃´, zho nánfɔ̀lɔ̀ zɛ̃̀, rə zhízhǐ jì yə́, è gakó wǔr e ló tɛ̃´.”

²⁸ Yezu gə́ byili zɔ̀mà nɛ́ nə̀myɛ́ n zhɛ̀, ń kàrmɔ́ èta mɔ́ jàr lyì-zhâ bɛ́ dɛ̃´dɛ̃´.

²⁹ Ń gə́ yà ń nə́ ń zɔ̀m ǹdə́ ń sə̀pwà ŋwɔ̀nɔ́ mɔ́ ce, ń kàrmɔ́ yʼà də̀ ǹdə Muyiisi nyə́ né byilnə bé nyân mɔ́ ta yé.