Məco 4 - Lyélé

Shətana swèlè Yezu

¹ Rə̀myɛ́ yó, Eshirhə náàcɛ̀nɛ́ zə Yezu e vò gɔ-elũ èpòlò w wə, mùnì Shətana swèlè mò.

² N lyẽ ń nyí cəcɛ̃ ǹdə́ nə̀nyɔ́nɔ́ ga dwã shə́-èna. Nɔrh zɛ̃̀ mə̀ zhe mo.

³ Shətana y zɛ̃̀ e yí ń nyí ni è la mɔ sòlò, e wɔ̀ mɔ̀: “Ǹ gə wɔ́ Yi Byǐ, sə́ pə nyí nə́kulə né nyɛ̀bɛ́ nɛ nə jǐrh búúri.”

⁴ Yezu wɔ̀ yà: “Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: ‘È də̀ búrú dúdú ò wɔ̌ ò bʼa ce numbyíní zə myə̂l yé. Wɔ́ zɔ̀mɛ̀ tɛ̀bɛ́ gakó rə̀ nʼê shí Yi nyú wə.’ ”

⁵ Shətana y zɛ̃̀ e zə mɔ e zhǐr e vò Zhərəzalɛm, e ce n zhì Yi jì y yə́-pɛ̀lɛ́ wa, e zɛ̃̀ e wɔ̀ mɔ̀:

⁶ “Ǹ gə wɔ́ Yi Byǐ, sə́ zɛ̃̀ ń fwɛ̃´ tɛ̃´, bə̀ bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: ‘Yi mʼa pə nyí rə̀ màlɛ́kabá nɛ bə nyǐ ǹ yò. Bə̀ mʼa kwɛ̃´ mɔ́ ǹdə́ bə̀ jɛ̀rh, mùnì ǹ nà bə̀kʼa mà nə́kulu ni yé.’ ”

⁷ Yezu wɔ̀ yà: “Bə̀ kɛ̃ rə̀ wẽ́ myɛ bə wɔ̀: ‘Bə̀ká zhẽ̀ Cinu ǹ Yi yé.’ ”

⁸ Shətana y kʼe zə mɔ e zhǐr, e vò e jì pyɔ̀ kɔ̀bɔ́ ò nyɛ̌ dɛ̃̌ dɛ̃̌ yó, e byili mu lũ w tənèsé ǹdə́ sə̀ nə̀cɛ̀ndɛ́ gakó,

⁹ e zɛ̃̀ e wɔ̀ mɔ̀: “Ǹ gə tu ǹ nə̀dwə́nə́ yó ń wùlì à yé né, à bʼa pɔ̃́ tɛ̀bɛ́ èta mɔ́ gakó.”

¹⁰ Yezu zɛ̃̀ n wɔ̀ yà: “Zhəl kwã nɛ́ Shətana! Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: ‘Wɔ́ Cinu ǹ Yi yé né ǹ mə̂ sə́ wùlì ní, ń cèrhé ń dúdú sá.’ ”

¹¹ Rə̀myɛ́ yó, Shətana y zhǐr e yẽ̌ mo. Màlɛ́kabá zɛ̃̀ bə bʼe nyǐ ń yò.

Yezu ju ń tum dí kùr Gəlile né

¹² Rə̀myɛ́ kwã nɛ́, bə̀ zɔ Zhã bə ce byə̀nə́-jù wə̀. Yezu gə́ nyɛ̀ɛ̀ rə̀myɛ́, n ká n vò Gəlile tənà y wa,

¹³ sə ń yə̀ Nazarɛtɛ nɛ́ jòm yé. Ń lyɛ̃ n vò cɔ òdù ò ŋwɛ́nɛ́ Gəlile mwə̃́ y səta, bə̀ nʼê byẽ̀ bə̀ Kapɛrnaɔm. Cɔ w òmyɛ́ ŋwɛ́nɛ́ Zabyəlɔnɛ ǹdə́ Nəfətəlyi kwálsɛ́ tənà y wa.

¹⁴ Rə̀myɛ́ wɛ̀rhɛ́ mùnì ga Yi nyì-zwennə Ezəyi zɔ̀mɛ̀ rɛ́ pyìrh. Ń yà ń wòwə̀:

¹⁵ “Zabyəlɔnɛ ǹdə́ Nəfətəlyi lyì, byɛ̀bɛ́ bə̀ jě Gəlile né, Zhɔrdɛ̃ bwǐ y èpákɛ̀, mwə̃́ y səta, lyì byɛ̀bɛ́ bə̀ də̀ Zhwifubá mó myɛ gə́ ŋwɛ́nɛ́ mə̀gã̌ mɔ́,

¹⁶ lyì bí byɛ̀bɛ́ bə̀ yʼà jě cə-byín wẽ́ mó nɔ pwẽ̀ nánfɔ̀lɔ̀. Pwẽ̀ yə̂r byɛ̀bɛ́ bə̀ yʼà jě cu jàà námbyĩ́ y wẽ́ mó.”

¹⁷ Kɔn zhí rə̀myɛ́ yi ní, Yezu já n ji kùr ń nə́ ń bwə̀l ń zhe: “Pyìrhínə á wun. Arəzana pyɛ̀lɛ̀ rɛ́ bwəlse.”

Yezu byẽ̀ gwànnà bə̀na bə jǐrh ń kwã-lyì

¹⁸ Yezu yà ń nə́ ń zhə̀l Gəlile mwə̃́ y vɔ̃̀ nɛ̀. N nə gwànnà bə̀lyè bə̀ yʼà nʼê gwɛ̃̀ mwə̃́ y wə. È yʼà wɔ́ Shəmɔ mɔ́ mɔ̀bɔ́ bə̀ nʼê byẽ̀ bə̀ Pyɛɛrɛ mɔ́, ǹdə́ ń da-byǐ Andərɛ.

¹⁹ N zɛ̃̀ n wɔ̀ bɛ: “Bànà á tó ne. À mʼa ce á gwɛ̃̀ numbyínsi.”

²⁰ Bə jʼa zhǐr rə̀myɛ́ yó cìcì, bə yẽ̌ bə̀ gùndwə̂ né ne gàà bə tó Yezu ni.

²¹ N zhǐr gàà ń la yé né, n kə́ n nə lyì dwã bə̀lyè. È yʼà wɔ́ Zebede byâ bɛ́, Zhakɛ ǹdə́ Zhã, bə̀ tó bə̀ da nɛ bə̀ ŋwɛ́nɛ́ bə̀ bǔ-bwəl lé wẽ́, bə̀ nʼê kwɛrhɛ bə̀ gùndwə̂. N byẽ̀ bə̀myɛ.

²² Bə jʼa zhǐr bə yẽ̌ bə̀ da ǹdə́ bə̀ bǔ-bwəl lé ne bə tó mo.

Yezu byɛ́lɛ́ Gəlile tənà y púlə́púlə́

²³ Yezu yà ń nə́ ń byɛ́lɛ́ Gəlile tənà y púlə́púlə́ ń mə́ ń cèrhè bè kàrmɔ̀ bə̀ dwã-gùúlí jìsí wẽ́, ń nə́ ń bwə̀l Yi pyɛ̀lɛ̀ rɛ́ yò-ècɔ̀nɔ̀ nyí rí, ń nə́ ń wárh lyì byɛ̀bɛ́ gakó címsi dwí gakó yʼà zhe mó.

²⁴ Ń yil lé du rə yí Siri tənà y púlə́púlə́. Bə̀ yʼà nʼê zal nə̀bwànà dwí gakó ǹdə́ byɛ̀bɛ́ címsi yʼà nʼê nwɛ̀nɛ̀ mɔ́, bə̀ twí ń sono. È yʼà wɔ́ lyì byɛ̀bɛ́ gakó nə̀cílsi námməlwâlsɛ yʼà ŋwɛ́nɛ́ bə̀ wẽ́, ǹdə́ byɛ̀bɛ́ kùnkùmbolo yʼà zhe, e súlí gwànsɛ̀, sə ń yà ń nə́ ń wárh bə̀ gakó.

²⁵ Lyì nánzhəzhɔ̌ shí Gəlile ǹdə́ Cɛmɛ-shí tənà y wa, ǹdə́ Zhərəzalɛm, ǹdə́ Zhide, ǹdə́ Zhɔrdɛ̃ bwǐ y èpákɛ̀ bə bə̀ bə tó mo.