Məco 3 - Lyélé

Zhã-Bətiisi bwə̀l Yi zɔ̀mɛ̀ rɛ́

¹ Dwã nɛ́ nə̀myɛ́ wẽ́, Zhã-Bətiisi zhə̀l Zhide gɔ-elũ èpòlò w wə, ń nə́ ń bwə̀l ń zhe:

² “Pyìrhínə á wun. Arəzana pyɛ̀lɛ̀ rɛ́ bwəlse.”

³ Wɔ́ ńmyɛ̌ yò Yi nyì-zwennə Ezəyi yà ń zɔ̀m n wɔ̀: “Cəl nʼê bwə̀l gɔ-elũ èpòlò wə̀, rə̀ zhe: ‘Kwɛrhɛna Cinu sɔ́má yá, sʼá wɛ̀rhɛ́ sə-byǐsí sə yə̀ cángá á pɔ̃.’ ”

⁴ Zhã kàmə̀-zwǐ y ń yà ń zù mú wɔ́ yómó kur bə̀ yʼà mʼe sɔ̃̀ yà, n zə cã̌-tɔ̀nɔ̀ n mə n lyẽ yə. Səsɔ̀mɛ̀ ǹdə́ gɔ tùr rə̀ yʼà wɔ́ ń kùjú.

⁵ Zhərəzalɛm lyì bí ǹdə́ Zhide tənà y lyì bí gakó, e súlí cɛmɛ nɛ́ nyɛ̀bɛ́ nə̀ jě Zhɔrdɛ̃ bwǐ y yala nɛ mɔ́ gakó lyì bí yʼà nʼê zhə̀l ń sono,

⁶ sə lò gakó yà ń nə́ ń byili ń dwə́ə́ré. Zhã zɛ̃̀ n pɔ̃ nɛ̃̌-shɔ Zhɔrdɛ̃ bwǐ y wə.

⁷ Farɛzhɛ̃ɛ̃bá ǹdə́ Sadəsənyɛbá nánzhəzhɔ̌ yʼà nʼê zhə̀l Zhã gə́ yà ń nə́ ń pɛ nɛ̃̌-shɔ lyì bí ni mə̀gã̌. Sə ń gə nɔ bɛ bə̀ bànà, ń ya n wɔ̀ bɛ: “Kùrh dwí, mɔ̌ lò ń byili ába bə̀ dǔrnə á lú Yi lyim dí rə̀ bàn mɔ́ yé né?

⁸ Wɛ̀rhɛ́na kɔn dɛ̀bɛ́ rə̀ mʼa byili bʼâ pyìrhí á wun,

⁹ sʼá bə̀kʼá bù á wẽ́ bə̀, Abəraham gə́ wɔ́ ámyɛ̌ nàmbal mɔ́ dúdú yú yé. À nʼâ wə̀l ába: Yi wɔ̌ rə̀ bʼa ce nə́kuulí tɛ̀bɛ́ jǐrh Abəraham byâ.

¹⁰ Nyǐnə, dòló pyě cèmé kùr wə̀. Kɔ̀bɔ́ ò tʼâ ce byâ byɛ̀bɛ́ bə̀ càn, bə̀ mʼa kà w bə ji myǐn.

¹¹ “Àmyɛ́ nʼâ zə nɛ̃̌ à pɛ ába nɛ̃̌-shɔ. Rə̀myɛ́ nʼê byili bʼâ pyìrhí á wun. Sə mɔ̀bɔ́ ń la tà-kwã n bə̀ mɔ́ du àmyɛ́. À yə̀ yírh swí sʼa vùr ń nə̀cìlə̀ né myɛ cìcì yé. Ńmyɛ̌ mà n zə Eshirhə náàcɛ̀nɛ́ ǹdə́ myǐn n pə ába nɛ̃̌-shɔ.

¹² Ń zhe zwã̌ ń jɔ̃̀ wà, ń la n mə n cèlè jíjí rí, n pɔr rə̀ byâ bɛ́ ǹdə́ rə̀ púúlí dwã wa, n ló jíjí-byâ bɛ́ ń bɔ̀bwã̀ y wa, n zɛ̃̀ n ló púúlí myǐn mɔ̀bɔ́ mə̀ tʼâ la cú gaga wẽ́.”

Yezu zwẽ nɛ̃̌-shɔ

¹³ Rə̀myɛ́ yi ní, Yezu shí Gəlile n bə̀ Zhã sono Zhɔrdɛ̃ bwǐ y yó, mùnì Zhã pɔ̃ nɛ̃̌-shɔ.

¹⁴ Sə Zhã yà ń bə shɛ̀ yé. Ń yà ń nə́ ń wə̀lə̀: “Àmyɛ́ à mə̂ dwã sʼa bə̀ ǹmyɛ́ sono, ń pɛ̃ nɛ̃̌-shɔ, ǹmyɛ́ zɛ̃̀ ń ká ǹ bàn àmyɛ́ sono?”

¹⁵ Yezu wɔ̀ mɔ̀: “Ǹmyɛ́ wírí ń yẽ̌ kɔn yə̀ èta, bə̀ wɔ́ èta nə́ mə̂ sə nə́ wɛ̀rhɛ́ nɛ́, mùnì ga nə́ pyìrh Yi pùbùlə̀ né.” Rə̀myɛ́ yó, Zhã zɛ̃̀ n shɛ̀nɛ́.

¹⁶ Yezu gə́ zwẽ nɛ̃̌-shɔ mɔ́ n zhɛ̀, n já n zhízhílí n du bwǐ y wə. Rə̀myɛ́ yi ní cìcì, dɛ̃̌ yi rí pul, n nə Yi Eshirhə y è nyɛ̌ ǹdə épwèné ta, è nʼê swé ń yó wə.

¹⁷ Bə nyɛ̀ɛ̀ cəl rə̀ shí dɛ̃̌, rə wɔ̀: “Mɔ̀bɔ́ wɔ́ à ywə́lə́ byǐ. À só mo dɛ̃´dɛ̃´.”