Məco 25 - Lyélé

Kana-byâ shí səswalá

¹ Yezu kə́ n ji səswalá n pə ń kwã-lyì bí ni n wɔ̀: “Nyǐnə kɔn dɛ̀bɛ́ rə̀ bʼa myɛrhɛ Arəzana pyɛ̀lɛ̀ rɛ́ Numbyíní Byǐ twírí y dɛ̃ rɛ́. Dɛ̃ rə̀dù, kɛ̃-jú yʼà ŋwɛ́nɛ́. Kana-byâ shí zɛ̃̀ ǹdə́ bə̀ pàntámsɛ bə̀ la vò e jəl kɛ̃ mɔ́ byal mɔ́.

² Bə̀nu y yʼà lɔ́wá, sə bə̀nu y yʼà wɔ́ námməyuuri.

³ Byɛ̀bɛ́ námməyuurí kwè bə̀ pàntámsɛ́, bə jʼà yə̀ nwə̃̌ dõ zal bə mʼe súlí kɛ̀bɛ́ è ŋwɛ́nɛ́ sə̀ wẽ́ mó ne yé,

⁴ sə byɛ̀bɛ́ bə̀ lɔ́ mɔ́ yʼà co nwə̃̌ dõ nũ̌-kwə̀lsè wẽ́ bə mʼe súlí kɛ̀bɛ́ è ŋwɛ́nɛ́ bə̀ pàntámsɛ́ wẽ́ mó ne.

⁵ Sə kɛ̃ mɔ́ byal mɔ́ yà ń nə́ ń dɛnɛ ǹdə́ tú. Rə̀myɛ́ ce, jan zə bə̀ gakó bə dɛ̀ɛ̀.

⁶ “Cɛ y gə́ tú e swəl kókó, bə nyɛ̀ɛ̀ cəl rə̀ wòwə̀: ‘Nyǐnə kɛ̃ mɔ́ byal mɔ́ bànà. Dunə á vò á jəl mo.’

⁷ “Bə̀ gakó zɛ̃̀ bə̀ nʼê kwɛrhɛ bə̀ pàntámsɛ́.

⁸ Námməyuurí zɛ̃̀ rə wɔ̀ byɛ̀bɛ́ bə̀ lɔ́ mɔ́ nɛ: ‘Twərhnə á nwə̃̌ y námpɔ́lɛ́ námpɔ́lɛ́ á pə nə́ba. Nyǐnə nə́ pàntámsɛ́ nʼê yâl sə cì’.

⁹ “Byɛ̀bɛ́ bə̀ lɔ́ mɔ́ zɛ̃̀ bə wɔ̀ bɛ: ‘Ɔ̃́ʼɔ̃, nwə̃̌ y kɛ̀bɛ́ yír nə́myɛ̌ ǹdʼámyɛ̌ ga yé. Zhəlnə dɔ̌lna bɛ́ sono á yè á ce á pàntámsɛ́ wa.’

¹⁰ “Sə bə̀ gə́ zhǐr bə̀ la vò e yè nwə̃̌ y yi ní, kɛ̃ mɔ́ byal mɔ́ já n bà. Byɛ̀bɛ́ bə̀nu y bə̀ yʼà tɛnɛ bə̀ zhǐ mú tó mo bə zù kɛ̃-jú címsí kùjú jì y wə. Bə pyi bòlò wə́.

¹¹ Kana-byâ bɛ́ námməyuurí zɛ̃̀ bə tà-kwã bə bà, bə̀ zhe: ‘Yó-cə́bal, yó-cə́bal, pùl bòlò w ń pə nə́ba nə́ zù.’

¹² Kɛ̃ mɔ́ byal mɔ́ zɛ̃̀ n wɔ̀ bɛ: ‘Zhə̀nà, à nʼâ wə̀l ába: à yə̀l á pár yé.’ ”

¹³ Yezu zɛ̃̀ n zhízhílí n wɔ̀: “Zəna á yírhə́, bʼâ yə̀l dɛ̃ rɛ́ ráá yi rí tɛ̀bɛ́ Numbyíní Byǐ mà n bə̀ mɔ́ yé.”

Yó-cə́bal mɔ́ ǹdə́ ń kɛ̀lɛ́ tùntùnnə̀ bé bə̀tɔ̀ y səswalá

¹⁴ Yezu kə́ n ji səswalá n pə ń kwã-lyì bí ni n wɔ̀: “Nyǐnə kɔn dɛ̀bɛ́ rə̀ nʼê myɛrhɛ Arəzana pyɛ̀lɛ̀ rɛ́. Bal mə̀dù ń yà ń la sɔ́má. N zɛ̃̀ n byẽ̀ ń kɛ̀lɛ́ tùntùnnə̀ bé, n kwè ń jɛ̃̀-kɔn dɛ́ n pə bɛ, bə̀ bə̀ zwẽ bə mʼe twĩ̀.

¹⁵ N pə lò gakó ne ǹdə́ ǹ gə́ wɔ̌ ǹ mʼâ twĩ̀ ní. N pə byinə shí-ènu tum wársɛ mə̀dù y ni, n pə byinə shí-èlyè tum wársɛ ń dõ mó ne, n zɛ̃̀ n pə byinə shí tum wársɛ bə̀tɔ̀ nyân mɔ́ nɛ, n zɛ̃̀ n zhǐr n vò ń sɔ́má yá.

¹⁶ “Mɔ̀bɔ́ bə̀ pɔ mɔ byinə shí-ènu tum wársɛ́ mɔ́ zɛ̃̀ làlà n vò n zə sɛ n dɔ̌l, n nə byinə shí-ènu tum wársɛ́ dwã n mə n súlí.

¹⁷ Mɔ̀bɔ́ bə̀ pɔ mɔ byinə shí-èlyè tum wársɛ́ mɔ́ myɛ wɛ̀rhɛ́ èta, n nə byinə shí-èlyè tum wársɛ dwã n mə n súlí.

¹⁸ Sə mɔ̀bɔ́ bə̀ pɔ mɔ byinə shí tum wársɛ́ mɔ́ zhǐr n vò n kù gɔ́rɔ́ n ce ń yó-cə́bal mɔ́ wársɛ́ nɛ́.

¹⁹ “Kɔn dɛnɛ dɛ̃´dɛ̃´, bə̀ yó-cə́bal mɔ́ ká n bà, n zɛ̃̀ n wɔ̀ bə̀ lò gakó sə́ zə ǹ wársɛ́ ń mə́ bə̀ n nyìwé.

²⁰ Mɔ̀bɔ́ bə̀ pɔ mɔ byinə shí-ènu tum wársɛ́ mɔ́ twẽ̌ n yí ǹdə́ byinə shí-ènu tum wársɛ́ dwã ń dɔ̌l n nə mɔ́, n wɔ̀: ‘Yó-cə́bal, àmyɛ́ wɔ́ byinə shí-ènu tum wársɛ ǹ yà ǹ pɔ nɛ. Nyǐ à zə sɛ a nə byinə shí-ènu tum wársɛ dwã a mʼa súlí.’

²¹ Yó-cə́bal mɔ́ wɔ̀ mɔ̀: ‘Kɔn càn tùntùnnə̀ nántwə̂. Ǹ zə kɔn námpɔ́lɛ́ ń mə́ twĩ̀ à pùbùlə̀. À mʼa pɔ̃́ kɔn nánfɔ̀lɔ̀ ń nyǐ rə̀ yò. Bə̀ ń tó ne ń fùù.’

²² “Mɔ̀bɔ́ bə̀ pɔ mɔ byinə shí-èlyè tum wársɛ́ mɔ́ myɛ twẽ̌ n yí ǹdə́ byinə shí-èlyè tum wársɛ́ dwã ń dɔ̌l n nə mɔ́, n wɔ̀ ń yó-cə́bal mɔ́ nɛ: ‘Yó-cə́bal, àmyɛ́ wɔ́ byinə shí-èlyè tum wársɛ ǹ yà ǹ pɔ nɛ. Nyǐ à zə sɛ a nə byinə shí-èlyè tum wársɛ dwã a mʼa súlí.’

²³ Yó-cə́bal mɔ́ wɔ̀ mɔ̀: ‘Kɔn càn tùntùnnə̀ nántwə̂, ǹ zə kɔn námpɔ́lɛ́ ń mə́ twĩ̀ à pùbùlə̀. À mʼa pɔ̃́ kɔn nánfɔ̀lɔ̀ ń nyǐ rə̀ yò. Bə̀ ń tó ne ń fùù.’

²⁴ “Rə̀myɛ́ kwã nɛ́, mɔ̀bɔ́ bə̀ pɔ mɔ byinə shí tum wársɛ́ mɔ́ myɛ twẽ̌ n yí, n wɔ̀ ń yó-cə́bal mɔ́ nɛ: ‘Yó-cə́bal, à yě bə̀ ǹ zum dɛ̃´dɛ̃´. Ǹ yʼâ jə̀r ǹ gə́ yə̀ mə̀gã̌ dwì, ń kwar ǹ gə́ yə̀ mə̀gã̌ lɛ.

²⁵ À dùr ywẽ, a vò a kù gɔ́rɔ́ a ce ǹ wársɛ́ nɛ́. Nyǐ ǹ kɔn dɛ́.’

²⁶ “Yó-cə́bal mɔ́ wɔ̀ mɔ̀: ‘Ǹ wɔ́ tùntùnnə̀ námməlwɛ̀lɛ́, ń jà ǹ wɔ́ nə̀wàcã̀nyɛlɛ́. Ǹ gə́ yě bʼà nʼâ jə̀r à gə́ yə̀ mə̀gã̌ dwì, à nʼâ kwar à gə́ yə̀ mə̀gã̌ lɛ mɔ́.

²⁷ Ǹ yà ǹ mə̂ sə́ zə à wársɛ́ ń vò ń cĩ́ sə̀byâ jì y wẽ́, mùnì ga à gə kʼâ túwə́, sʼa vò a zwẽ à kɔn dɛ́ ǹdə́ rə̀ twirí yə́.’

²⁸ N zɛ̃̀ n súlí n wɔ̀: ‘Zwẽnə byinə shí tum wársɛ́ ń sõ mó á pə mɔ̀bɔ́ ń zhe byinə shí-ènu tum wársɛ́ mɔ́ nɛ.

²⁹ Zhə̀nà, lò mɔ̀bɔ́ ń zhe, bə̀ mʼa pɔ̃ dɛ̃´dɛ̃´ n mə n súlí, sə mɔ̀bɔ́ ń bə zhe, bə̀ mʼa zwẽ tɛ̀bɛ́ námpɔ́lɛ́ y ń zhe mó myɛ cìcì.

³⁰ Zəna tùntùnnə̀ mó ń bə kùr zhe èta mɔ́ á ce pwẽ̀ nè cə-byṹ w wə. Ń mà ń nə́ ń kúrh ǹdə́ ń nə́ ń dɔ̀m ń yə́lə́ dwã nɛ gàà.’ ”

Bùrsí dɛ̃ rɛ́

³¹ Yezu súlí n wɔ̀: “Numbyíní Byǐ gə tú ń zùwə́ y wẽ́, ǹdə́ ń màlɛ́kabá gakó yi ní, ń mà n jòm ń pyɛ̀lɛ̀ də̀gwã́ y yó ǹdə́ zùwə́.

³² Nunə dwí gakó mʼa bə̀ bə gùlí dwã ń yé né, sə ń mà n pɔr bɛ dwã nɛ ǹdə vwã̌-ènɔ̀n gə́ ya n pɔr ń pyììsí ǹdə́ ń bɔ̀n nɛ́ dwã nɛ nɛ́,

³³ n ya n ce pyììsí ń jə̀jĩ́ ni, n ce bɔ̀n nɛ́ ń jə̀gwã̀ nɛ̀.

³⁴ Sə rə̀myɛ́ yó, pyɔ̌ mɔ́ mà n wɔ̀ byɛ̀bɛ́ bə̀ ŋwɛ́nɛ́ ń jə̀jĩ́ sõ mó ne: ‘Ámyɛ̌ byɛ̀bɛ́ à Da cĩ́ bwəl á yó mó, bànà á cìní tənà y bə̀ tɛnɛ bə cĩ́ ába lũ w kùr-ju yi ní ga mɔ́.

³⁵ Nɔrh yʼà zhe ne, á pɛ̃ kùjú a jí; nə̀nyɛ̀lsɛ̀ yʼà zhe ne, á pɛ̃ nɛ̃̌ a nyɔ̀; à yʼà tú zhəəle á sõ, á zwẽ à zhəəlé;

³⁶ à yʼà wɔ́ nánlwè, á pɛ̃ gàndɛ̀ a zù; à yʼà bə jàn zhe yé, á bʼâ gwɛ̃ à jàà wà; bə̀ yʼà co ne byə̀nə́-jù wə̀, á bʼâ gwɛ̃ nɛ.’

³⁷ “Sə rə̀myɛ́ yó, wu-cángá cìnə́ bé mʼa zɛ̃̀ bə bwə̀rh mò bə wɔ̀: ‘Cinu, dǒ nə́ nɔ mɔ́ ǹdə́ nɔrh zhe mó, nə́ pɔ̃́ kùjú ń jí? Dǒ nə́ nɔ mɔ́ ǹdə́ nə̀nyɛ̀lsɛ̀ zhe mó, nə́ pɔ̃́ nɛ̃̌ ń nyɔ̀?

³⁸ Dǒ ǹ yà ǹ tú zhəəle nə́ sõ, nə́ zwẽ ǹ zhəəlé? Dǒ nə́ nɔ mɔ́ ǹdə́ ǹ wɔ́ nánlwè, nə́ pɔ̃́ gàndɛ̀ ń zù?

³⁹ Dǒ nə́ nɔ mɔ́ ǹdə́ ǹ bə jàn zhe, ráá bə̀ yʼà co mó byə̀nə́-jù wə̀, nə́ bʼě gwɛ̃ ǹ jàà wà?’

⁴⁰ “Sə pyɔ̌ mɔ́ mà n wɔ̀ bɛ: ‘Zhə̀nà, à nʼâ wə̀l ába: kɔn dɛ̀bɛ́ gakó á wɛ̀rhɛ́ à nyáná bɛ́ námpɔ́lsɛ́ byɛ̀bɛ́ mə̀dù nì, wɔ́ àmyɛ́ nɛ à wɛ̀rhɛ́ rɛ.’

⁴¹ “Rə̀myɛ́ kwã nɛ́, ń mà n zɛ̃̀ n wɔ̀ byɛ̀bɛ́ bə̀ ŋwɛ́nɛ́ ń jə̀gwã̀ sõ mó ne: ‘Ámyɛ̌ byɛ̀bɛ́ á yə̀ à Da bwəl lé nɛ mɔ́, lyɛ̃na à yala nɛ á vò myǐn mɔ̀bɔ́ mə̀ tʼâ cì gaga bə̀ tɛnɛ Shətana ǹdə́ è màlɛ́kabá yil mó wẽ́.

⁴² Nɔrh yʼà zhe ne, sʼá yə̀ nɛ̀ kùjú pɛ a jí yé; nə̀nyɛ̀lsɛ̀ yʼà zhe ne, sʼá yə̀ nɛ̀ nɛ̃̌ pɛ a nyɔ̀ yé;

⁴³ à yʼà tú zhəəle á sono, sʼá yə̀ à zhəəlé zwẽ yé; à yʼà wɔ́ nánlwè, sʼá yə̀ nɛ̀ gàndɛ̀ pɛ a zù yé; à yʼà bə jàn zhe, bə̀ yʼà co ne byə̀nə́-jù w myɛ, sʼá yə̀ twí á gwɛ̃ à jàà w yé.’

⁴⁴ “Rə̀myɛ́ yó, bə̀myɛ mʼa zɛ̃̀ bə bwə̀rh mò bə wɔ̀: ‘Cinu, dǒ nə́ nɔ mɔ́ ǹdə́ nɔrh zhe, ráá nə̀nyɛ̀lsɛ̀ zhe mó, nə́ zɛ̃̀ nə́ yə̀ mɔ́ sɛ̃? Dǒ ǹ yà ǹ tú zhəəle nə́ sõ, nə́ zɛ̃̀ nə́ yə̀ ǹ zhəəlé zwẽ? Dǒ nə́ nɔ mɔ́ ǹdə́ ǹ wɔ́ nánlwè, ráá ǹdə́ ǹ bə jàn zhe, ráá bə̀ co mó byə̀nə́-jù wə̀, nə́ zɛ̃̀ nə́ yə̀ mɔ́ sɛ̃?’

⁴⁵ “Sə rə̀myɛ́ yó, pyɔ̌ mɔ́ mà n wɔ̀ bɛ: ‘Zhə̀nà, à nʼâ wə̀l ába: kɔn dɛ̀bɛ́ gakó á yə̀ wɛ̀rhɛ́ à nyáná bɛ́ námpɔ́lsɛ́ byɛ̀bɛ́ mə̀dù nì, wɔ́ àmyɛ́ nɛ á yə̀ rɛ̀ wɛ̀rhɛ́ yé.’

⁴⁶ Sə bə̀myɛ́ mʼa vò bə nə còrhò-tum rə̀ tʼâ la zhɔ̌, sə wu-cángá cìnə́ bé mʼa vò bə nə nyǔ mə̀ tʼâ la zhɔ̌.”