Məco 20 - Lyélé

Nánkwaá bɛ́ mʼa jǐrh nã́yə́ə́

¹ Yezu zɛ̃̀ n ji səswalá n pə bɛ n wɔ̀: “À mʼa byili ába kɔn dɛ̀bɛ́ rə̀ nʼê myɛrhɛ Arəzana tənà yá. Kɛ̀lɛ́ cə́bal mə̀dù ń ya n du nəkɔkɔ́lɛ́ shãã shãã ń la tùntùnnə̀ pwâ n ce ń kɛ́lɛ́ wa.

² N nə tùntùnnə̀, n wɔ̀ bɛ bə̀ ń mà n pə dɛ̃ rə̀dù tum wársɛ lò gakó ne dɛ̃ wẽ́. Bə shɛ̀nɛ́. N zɛ̃̀ n ce bə vò ń kɛ́lɛ́ y wa.

³ N kə́ n du ǹdə́ yi rí tú dɛ̃̌, n nə bə̀ dwã bə̀ zhǐ cɔ w wẽ́ nánfò, bə̀ tʼâ wɛ̀rhɛ́ kaka yé.

⁴ N wɔ̀ bɛ: ‘Ámyɛ zhəlnə à kɛ́lɛ́ y wa, bʼà mʼa kwɛ̃̌ ába ǹdə kɔn gə́ mə̂ nɛ́.’

⁵ Bə zhǐr bə vò. “N kə́ n du kə́dò, ǹdə́ yi rí yú yə́-pɛ̀lɛ́ ecəl wə, n nə bə̀ dwã. N ce bə̀myɛ vò ń kɛ́lɛ́ y wa. N kə́ n du yi-kár nɛ, n nə bə̀ dwã. N ce bə̀myɛ vò ń kɛ́lɛ́ y wa.

⁶ Rə̀myɛ́ kwã nɛ́, n kə́ n du ǹdə́ yi rí la tɛ̃´, n nə bə̀ dwã bə̀ zhǐ nánfò. N bwə̀rh bè n wɔ̀: ‘Byè yil á zhǐ nyɔ̀nɔ̀ nəkɔkɔ́lɛ́ ga kɔn mʼe yí èlâsɛ̃´, á tʼá wɛ̀rhɛ́ kaka?’

⁷ Bə wɔ̀ mɔ̀: ‘Lò lò yə̀ nə́ba tum w ce yé.’ N zɛ̃̀ n wɔ̀ bɛ: ‘Ámyɛ zhəlnə à kɛ́lɛ́ y wa.’

⁸ “Də̀dɛ̀nɛ́ yi gə́ yúwə́, kɛ́lɛ́ y cə́bal mɔ́ wɔ̀ ń nə̀cɛ̀ndɛ́ yìlnə̀ mó ne: ‘Byẽ̌ tùntùnnə̀ bé, ń pə lò gakó ń kwândɛ́. Sə ǹ gə la bɛ pɔ, sə́ ji kùr ǹdə́ byɛ̀bɛ́ bə̀ tà-kwã bə bə̀ mɔ́, ń bə́ vò byɛ̀bɛ́ bə̀ tó yé bə bə̀ mɔ́ nɛ.’

⁹ Nə̀cɛ̀ndɛ́ yìlnə̀ mó byẽ̀ byɛ̀bɛ́ bə̀ tú ǹdə́ yi rí la tɛ̃´ mɔ́, n pə dɛ̃ námpúm tum wársɛ lò gakó ne.

¹⁰ Kɔn gə́ tú e yí byɛ̀bɛ́ bə̀ tó yé mó, bə̀ yʼà nʼê bùl bə̀ ń mà n pə bə̀myɛ́ nɛ dɛ̃´dɛ̃´, sə ń pɔ dɛ̃ rə̀dù tum wársɛ bə̀myɛ mə̀dù gakó ne.

¹¹ “Bə̀ gə́ zwẽ bə zhɛ̀, bə̀ zɛ̃̀ bə̀ nʼê ŋwɔ́ŋwɔ̌ ǹdə́ kɛ̀lɛ́ y cə́bal mɔ́, bə̀ zhe:

¹² ‘Byɛ̀bɛ́ bə̀ tà-kwã bə bə̀ də̀dɛ̀nɛ́ y wẽ́ bə twĩ̀ námpɔ́lɛ́, ń zɛ̃̀ ń kwɛ̃̌ bə̀myɛ́ ǹdə nə́myɛ̌ byɛ̀bɛ́ nə́ tú nəkɔkɔ́lɛ́ ga nə́ twĩ̀ dɛ̃ rɛ́ námpúm, nə̀nyɔ́nɔ́ w gakó mɛ̃ nə́ yó w mó ta?’

¹³ “Kɛ̀lɛ́ y cə́bal mɔ́ zɛ̃̀ n wɔ̀ tùntùnnə̀ bé mə̀dù nì: ‘À yə̀ dwé yé dɔwa. À wò mó bʼà mʼa pɔ̃ dɛ̃ rə̀dù tum wársɛ, ń shɛ̀nɛ́.

¹⁴ Zwẽ ǹ wársɛ́, ń vò kwã nɛ́. À mʼa pə mɔ̀bɔ́ ń tà-kwã mɔ́ nɛ ǹdə à gə́ pɔ ǹmyɛ nɛ nɛ́.

¹⁵ À bə sɔ́má zhe à mʼa wɛ̀rhɛ́ à nə̀cɛ̀ndɛ́ ǹdə à gə́ nʼâ yâl nɛ́ náá etəra? Nà wɔ́ à gə́ zhe wu mú è ce ǹ bə só, ǹ nə́ ǹ dùr bwɛ̃̌?’ ”

¹⁶ Yezu súlí n wɔ̀: “Èta myɛ, nánkwaá bɛ́ mʼa jǐrh nã́yə́ə́, sə nã́yə́ə́ bé mʼa jǐrh nánkwaá.”

Yezu zɔ̀m ń cu mú ǹdə́ ń bùrhù mú yò twər rə̀tɔ̀ nyân dɛ́

¹⁷ Rə̀myɛ́ kwã nɛ́, Yezu ǹdə́ ń kwã-lyì bí zhǐr bə̀ la Zhərəzalɛm. Bə̀ gə́ yú sɔ́má y yó, n zɛ̃̀ n zə ń kwã-lyì bí shí ǹdə́ bə̀lyè y n vò kwã nɛ́ bə̀ dúdú, n wɔ̀ bɛ:

¹⁸ “Nyǐnə nə́ la Zhərəzalɛm, sə bə̀ mʼa zə Numbyíní Byǐ bə pə Yi jì y vwĩ̀-zwə́lnə bé yé né cìnə́ bé, ǹdə́ Muyiisi nyə́ né byilnə bé ne, sə bə̀ mʼa kə́ ń bùrsì bə wɔ̀ bə̀ ń mə̂ ǹdə́ gu.

¹⁹ Bə mʼa pɔ̃ lyì byɛ̀bɛ́ bə̀ də̀ Zhwifubá ne, bə fulsi mu, bə zə dànə̀shàárɛ bə mà mɔ̀, bə zɛ̃̀ bə pəpa mɔ də̀-jɔrhɔ́ yó n cì, sə ń mà n bwìrhì ń dwã nə̀tɔ̀ yùwə̀.”

Lò mɔ̀bɔ́ ń nə́ ń yâl n yə̀ lyì-fɔ̀lɔ̀ á wẽ́, sə n twĩ̀ n pə ába

²⁰ Rə̀myɛ́ yó, Zebede byâ bɛ́ bə̀lyè y ná zə bɛ n yí Yezu nyí ni, n wùlì ń yé né, ń nə́ ń yâl n lwə̀l mò kɔna.

²¹ Yezu zɛ̃̀ n bwə̀rh mò n wɔ̀: “Bə̀kɔ́n ǹ nə́ ǹ yàlá?” N wɔ̀ mɔ̀: “À nʼâ lwə̀l mó bə̀ ǹ bwəl nyí bʼà byâ bɛ́ byɛ̀bɛ́ bə̀lyè y mə̀dù mà n jòm ǹ jə̀jĩ́ ni, mə̀dù jòm ǹ jə̀gwã̀ nɛ̀, ǹ pyɛ̀lɛ̀ rɛ́ jàà y wa.”

²² Yezu zɛ̃̀ n wɔ̀: “Á yə̀l kɔn dɛ̌ ná-yil á nʼá lwə̀l yé. Á mʼâ shɛ̀nɛ́ á nwɛ̀nɛ̀ nɔ̀nɔ̀ w kɔ̀bɔ́ àmyɛ́ la nɔ̀nɔ̀ mɔ́?” Bə wɔ̀: “Nə́ mʼâ shɛ̀nɛ́.”

²³ N zɛ̃̀ n wɔ̀: “Zhə̀nà, á mʼâ shɛ̀nɛ́ á nwɛ̀nɛ̀ nɔ̀nɔ̀ w kɔ̀bɔ́ àmyɛ́ la nɔ̀nɔ̀ mɔ́. Sə è gə wɔ́ à jə̀jĩ́ ni ǹdə́ à jə̀gwã̀ nɛ̀ jǒm mó, è də̀ àmyɛ́ à la rə̀myɛ́ nyí pɔ yé. Jààsɛ́ sə̀myɛ́ ŋwɛ́nɛ́ byɛ̀bɛ́ à Da tɛnɛ sɛ bə̀ yil mó yilə.”

²⁴ Ń kwã-lyì bí dwã bɛ́ shí y gə́ nyɛ̀ɛ̀ rə̀myɛ́, bə̀ lyimə zɛ̃̀ nə̀ nʼê yì byɛ̀bɛ́ bə̀lyè yə́.

²⁵ Yezu zɛ̃̀ n byẽ̀ bə̀ gakó n wɔ̀ bɛ: “Á yě bə̀ tənèsé pyâ bɛ́ nʼê jí pyɛ̀lɛ̀ bə̀ lyì bí yó, e jà lyì-fwààlɛ̀ myɛ ŋwɛ́nɛ́ bə̀ nʼê wɛ̀rhɛ́ jàn lyì bí ni.

²⁶ Sə ámyɛ̌ bə̀kʼá wɛ̀rhɛ́ èta yé. Lò mɔ̀bɔ́ ń ŋwɛ́nɛ́ á wẽ́ ń nə́ ń yâl n yə̀ á gakó lyì-fɔ̀lɔ̀, sə n yə̀ á tùntùnnə̀ n twĩ̀ n pə ába.

²⁷ Lò mɔ̀bɔ́ ń nə́ ń yâl n yə̀ á yé né cə́bal, sə n yə̀ á gakó yə-bal.

²⁸ Wɔ́ èta ǹdə́ Numbyíní Byǐ myɛ. Ń yə̀ twí mùnì ga lò twĩ̀ n pɔ̃ yé. Ń túwə́, ń la tũ̌ n pə lyì bí ni, sə n pə ń myə̂l lé lyì nánzhəzhɔ̌ zõ yilə.”

Yezu púr lyìlyə̂r rə̀lyè yírhə́

²⁹ Dɛ̃ rə̀dù, Yezu ǹdə́ ń kwã-lyì bí yʼà ŋwɛ́nɛ́ Zheriko né. Bə̀ gə́ tú bə̀ nʼê dwi cɔ w wa, lyì nánzhəzhɔ̌ yʼà tó be.

³⁰ Lyìlyə̂r rə̀lyè yʼà jě sɔ́má y vɔ̃̀ nɛ̀. Rə nyɛ̀ɛ̀ bə̀ Yezu tó gàà ń nə́ ń lyɛ̃, rə zɛ̃̀ rə̀ nʼê búbwéé rə̀ zhe: “Cinu, Dəvyidi Byǐ, dǔr nə́ nɔ̀nɔ̀.”

³¹ Lyì-zhâ bɛ́ zɛ̃̀ bə̀ nʼê ji ri búlə́ bə̀ rə̀ yẽ̌ rə̀ sɔ̀ w nɛ. Rə kwɛrhɛ rə búbwéé dwini shãã ga, rə wɔ̀: “Cinu, Dəvyidi Byǐ, dǔr nə́ nɔ̀nɔ̀.”

³² Yezu swə́rh n zhì, n byẽ̀ bè, n bwə̀rh bè n wɔ̀: “Bə̀kɔ́n á nʼá yâl bʼà wɛ̀rhɛ́ á yilə?”

³³ Rə wɔ̀ mɔ̀: “Cinu, nə́ rʼé lwə̀l mó bə̀ ǹ púr nə́ yírhə́ né.”

³⁴ Rə̀ nɔ̀nɔ̀ zə Yezu, n zɛ̃̀ n dwə̀rh rə̀ yírhə́ né ne, nə jʼa púr. Rə zhǐr rə tó mo.