Məco 17 - Lyélé

Yezu yé y lyə́r

¹ Dwã nyə̀ldù rə̀myɛ́ kwã nɛ́, Yezu zə Pyɛɛrɛ ǹdə́ Zhakɛ e súlí Zhakɛ nyɛ̃´ Zhã n mə n jì pyɔ̀ dɛ̃̌ dɛ̃̌ yó bə̀ dúdú.

² N lyə́r bə̀ yírhə́ né wə. Ń yé y zɛ̃̀ è nʼê jə́jɛ̀mɛ́ ǹdə nə̀nyɔ́nɔ́ ta. Ń gàndɛ́ jǐrh námpwẽ̀ pwɛ̃´pwɛ̃´.

³ Bə pwírí Muyiisi ǹdə́ Elyi bə̀ zhǐ bə̀ nʼê zɔ̀m ǹdə́ mɔ.

⁴ Pyɛɛrɛ zɛ̃̀ n wɔ̀ mɔ̀: “Cinu, kɔn mə̂ bə̀ nə́ mɛ̃ nyɔ̀nɔ̀. Kɔn gə wɔ́ ǹ pùbùlə̀, à mʼa pú kwə̀ə́rhe rə̀tɔ̀, ń jí òdù, Muyiisi jí òdù, Elyi jí òdù.”

⁵ Ébɔ̃ ò nʼô jə́jɛ̀mɛ́ shí dɛ̃̌ o bʼo pyi bi ǹdə́ Pyɛɛrɛ gwẽ̌ nə́ ń zɔ̀mà. Cəl rə̀dù zɛ̃̀ rə zɔ̀m ébɔ̃ w wẽ́ rə wɔ̀: “Mɔ̀bɔ́ wɔ́ à ywə́lə́ byǐ. À só mo dɛ̃´dɛ̃´. Cilinə ń zɔ̀mà nɛ́.”

⁶ Yezu kwã-lyì bí gə́ nyɛ̀ɛ̀ cəl lé, ywẽ nánfɔ̀lɔ̀ zə bɛ, bə zɛ̃̀ bə zə bə̀ yə́rh bə pú tɛ̃´.

⁷ Yezu zɛ̃̀ n yí bə̀ nyí ni, n dwə̀rh bè, n wɔ̀: “Zɛ̃̀nà dɛ̃̌. Á bə̀kʼá dùr ywẽ yé.”

⁸ Bə̀ gə́ kwẽ̌ bə̀ yésé dɛ̃̌, bə̀ yə̀ lò dõ nɛ, è gə də̀ Yezu dúdú.

⁹ Bə̀ gə́ tú bə̀ kʼâ nʼê swé pyɔ̀ w yi ní, Yezu pə bɛ nyí n wɔ̀: “Á bə̀kʼá shɛ̀nɛ́ á byili kɔn dɛ́ dɛ̀bɛ́ á yírhə́ nɔ mɔ́ lò lò ne yé, kɔn bʼe yí dɛ̃ rɛ́ tɛ̀bɛ́ Numbyíní Byǐ mà n bwìrhì n zɛ̃̀ n du cùùrì wẽ́ mó.”

¹⁰ Ń kwã-lyì bí zɛ̃̀ bə bwə̀rh mò bə wɔ̀: “È nə wɔ́ byè yil Muyiisi nyə́ né byilnə bé nʼê wə̀l bə̀ Elyi mà n tó yé n bà?”

¹¹ N wɔ̀ bɛ: “Zhə̀nà, Elyi mà n bə̀ n kwɛrhɛ kɔn gakó n cĩ́ rə̀ jàà wà.

¹² Sə à nʼâ wə̀l ába: Elyi túwə́, sə lyì bí yə̀ ń pár lwar yé. Bə̀ wɛ̀rhɛ́ mɔ ǹdə bə̀ gə́ nʼê yâl nɛ́. Wɔ́ èta bə̀ mʼa nwɛ̀nɛ̀ Numbyíní Byǐ myɛ nɛ́.”

¹³ Rə̀myɛ́ yó, ń kwã-lyì bí lwar bə̀ wɔ́ Zhã-Bətiisi yò ń nə́ ń zɔ̀m ǹdə́ bɛ.

Yezu wárh bə̀sɔ́bwɛ̀lɛ́ èdù kùnkùmbolo yʼà zhe

¹⁴ Yezu ǹdə́ ń kwã-lyì bí gə́ tú bə yí lyì-zhâ bɛ́ sono, bal mə̀dù yí ń nyí ni, n jòm ń nə̀dwə́nə́ yó n wùlì ń yé né,

¹⁵ n wɔ̀: “Yó-cə́bal, kùnkùmbolo zhe à byǐ, ò nʼô nwɛ̀nɛ̀ mɔ̀ dɛ̃´dɛ̃´. Dǔr ń nɔ̀nɔ̀. Nyǐ twər nánzhəzhɔ̌, ò yʼa kwè mò o ji myǐn wə, ráá nɛ̃̌ wa.

¹⁶ À zə mɔ a vò ǹ kwã-lyì bí sono, sə bə̀ yə̀ ŋwɛ̀nɛ́ bə wárh mɔ yé.”

¹⁷ Yezu wɔ̀ mɔ̀: “Ámyɛ̌ lũ w kɔ̀bɔ́ lyì bí yə̀ Yi ni zhí yé. Á wɔ́ lwɛlɛ cìnə́. À gwẽ̌ bʼa yə̀ nɛ́ ǹdʼába kɔn mʼe yí dǒ? À gwẽ̌ bʼa pyɛ́nɛ́ a yə̀ nɛ́ ǹdʼába kɔn mʼe yí dǒ? Zəna bə̀sɔ́bwɛ̀lɛ́ y á bə̀ nyɔ̀nɔ̀.”

¹⁸ N zɛ̃̀ n bú nə̀cílí yə́, e du bə̀sɔ́bwɛ̀lɛ́ y wẽ́. Bə̀sɔ́bwɛ̀lɛ́ y jʼa wárh rə̀myɛ́ yó cìcì.

¹⁹ Ń kwã-lyì bí dúdú zɛ̃̀ bə yí ń nyí ni, bə bwə̀rh mò bə wɔ̀: “Byè yil nə́myɛ̌ yə̀ nə̀cílí y kɛ̀bɛ́ ŋwɛ̀nɛ́ nə́ jì?”

²⁰ N wɔ̀ bɛ: “Wɔ́ á gə́ yə̀ Yi ni zhí ǹdʼá wun gakó mó è ce. Zhə̀nà, à nʼâ wə̀l ába: á Yi-ni-zhú mú gə yʼà yú ǹdə cǒ byǐ námpɔ́lɛ́ ta, á yʼâ mʼâ wɔ̀ pyɔ̀ w kɔ̀bɔ́ nɛ bʼò zhǐr o vò o zhì nyə̀má, sə ò yʼà mʼa shɛ̀nɛ́ á nyí ni. Kɔn tʼâ la nɛ́ yál á wàr á la wɔ̀rhɔ́ yé. [

²¹ Wɔ́ Yi lwə̂l ǹdə́ nyì-lyõṍ dúdú rə̀ wɔ̌ rə̀ jì nə̀cílí y kɛ̀bɛ́ dwí rí.]”

Yezu kə́ n zɔ̀m ń cu mú ǹdə́ ń bùrhù mú yò

²² Dɛ̃ rə̀dù, Yezu ǹdə́ ń kwã-lyì bí gakó yʼà zhǐ dwã yó Gəlile tənà y wa. N zɛ̃̀ n wɔ̀ bɛ: “Bə̀ mʼa zə Numbyíní Byǐ bə pə numbyínsi ni,

²³ bə gu mu, sə dwã nə̀tɔ̀ yùwə̀, ń mà n ká n bwìrhì.” Rə̀myɛ́ yó, ń kwã-lyì bí wun zhìlì dɛ̃´dɛ̃´.

Yezu zɔ̀m Yi jì y lɔrɔ́ w yò

²⁴ Yezu ǹdə́ ń kwã-lyì bí gə́ tú bə yí Kapɛrnaɔm, byɛ̀bɛ́ bə̀ nʼê zwẽ Yi jì y lɔrɔ́ w mɔ́ yí Pyɛɛrɛ nyí ni bə bwə̀rh mò bə wɔ̀: “Á yó-cə́bal mɔ́ tá ń pɛ Yi jì y lɔrɔ́ w nà?”

²⁵ Pyɛɛrɛ wɔ̀ bɛ: “Ń nə́ ń pɛ.” Pyɛɛrɛ gə́ tú n zù kɛ̀lɛ́ wa, Yezu zɛ̃̀ n jɛ̀rɛ̀ n bwə̀rh mò n wɔ̀: “Shəmɔ, byè ǹ nə́ ǹ bùlə̀? Lũ w pyâ bɛ́ wɔ́ byɛ̌ lyì sõ bə̀ nʼê zwẽ lɔrɔ́ w nɛ́? Wɔ́ bə̀ cìcì byâ bɛ́ sono, ráá wɔ́ lyì bí dwã bɛ́ sono?”

²⁶ Pyɛɛrɛ wɔ̀ mɔ̀: “Lyì bí dwã bɛ́ sõ bə̀ nʼê zwẽ w né.” Yezu zɛ̃̀ n wɔ̀ mɔ̀: “Èta, bə̀ byâ bɛ́ twə́r tɛ̀nɛ́ gàà yé.

²⁷ Ǹdə́ rə̀myɛ́ ga, zhəl mwə̃́ y yó, ń ji zɛlɛ́. Émwâ y kɛ̀bɛ́ ǹ la jɛ̀rɛ̀ ń zə mɔ́, sə́ kâl è nyí rí, ǹ bʼâ nə wɛ́rɛ́ è nyú wə, è yú àmyɛ́ ǹdə́ ǹmyɛ́ ga lɔrɔ́ wa, ń vùr ń bə̂ pə bɛ, mùnì nə́ bə̀kʼá zhìlì bə̀ wun ni yé.”