Məco 11 - Lyélé

¹ Yezu gə́ tú n pə nyə́ né nə̀myɛ́ ń kwã-lyì bí shí ǹdə́ bə̀lyè y ne n zhɛ̀, n zhǐr gàà, n vò ń nə́ ń cèrhè kàrmɔ̀ lyì bí ni, ń mə́ ń bwə̀l yò-ècɔ̀nɔ̀ nyí rí bə̀ cɛmɛ nɛ́ wẽ́.

Zhã-Bətiisi twĩ̀ ń kwã-lyì bí jàlà Yezu sono

² Zhã zhì byə̀nə́-jù w n nyɛ̀ɛ̀ Kristə tumə né yò, n zɛ̃̀ n twĩ̀ ń kwã-lyì bí jàlà bə vò bə bwə̀rh mò bə wɔ̀:

³ “Wɔ́ ǹmyɛ́ ǹ wɔ́ mɔ̀bɔ́ bə̀ wò bə̀ ń bàn mɔ́, ráá nə́ dɛ̃̌ gwẽ̌?”

⁴ Yezu wɔ̀ bɛ: “Zhəlnə á cĩ́ kɔn dɛ̀bɛ́ á zhã̌ nyɛ̀ɛ̀, á yírhə́ jʼa nə mɔ́ Zhã nɛ.

⁵ Lyìlyə̂r yírhə́ nʼê púrə́; gwànsɛ̀ nʼê zɛ̃̀ sə̀ zhə̀lə̀; nɔr cìnə́ nʼê wárh bə̀ jǐrh wárhgáá; sə̀bwààrhɛ̀ zhã̌ nʼê nyɛ̀ɛ̀; cùùrì nʼê bwìrhì; bə̀ nʼê bwə̀l yò-ècɔ̀nɔ̀ nyí rí bə̀ byili nə̀mwà nɛ̀.

⁶ Wu-nyɔ̃̀ cí wɔ́ lò mɔ̀bɔ́ ń wu tʼâ la gɔ àmyɛ́ shò-kwã nɛ́.”

⁷ Zhã kwã-lyì bí gə́ kʼa kwɛ̃̀, Yezu zɛ̃̀ ń nə́ ń zɔ̀m ń yò ǹdə́ lyì-zhâ bɛ́ ń zhe: “Byè á zhə̀l á nə gɔ-elũ èpòlò w wə? Vwal-gɔ zho nʼô fúfǔ?

⁸ Sə è nə wɔ́ byè á zhə̀l á na? Lò ń zù kàmə̀-zǔrh shɛ̀bɛ́ sə̀ càn? E jà byɛ̀bɛ́ bə̀ nʼê zwì kàmə̀-zǔrh shɛ̀bɛ́ sə̀ càn mɔ́, wɔ́ pyâ kâlsɛ wẽ́ bə̀ ŋwɛ́nɛ́.

⁹ Sə è nə wɔ́ byè á zhə̀l á na? Yi nyì-zwennə? À nʼâ wə̀l ába: ń wɔ́ Yi nyì-zwennə, sə ń nə jà ń du Yi nyì-zwennə myɛ cìcì.

¹⁰ Wɔ́ ńmyɛ̌ yò w bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Yi wòwə̀: ‘Nyǐ à nʼâ twĩ̀ à tùntúm ń la yə̀ ǹ yé né, n kwɛrhɛ ǹ sɔ́má yá.’ ”

¹¹ Yezu súlí n wɔ̀: “Zhə̀nà, à nʼâ wə̀l ába: kɛ̃ yə̀ byǐ lùl ń du Zhã-Bətiisi yé. E jà lò mɔ̀bɔ́ ń wɔ́ lyì bí gakó námpɔ́lɛ́ Arəzana tənà y wẽ́ mó du mu.

¹² Kɔn gə́ ju kùr Zhã-Bətiisi nɛ̃̌-shɔ w pɔ yi ní e mʼe yí zà, Arəzana tənà y jǐrh jàn kɔna; jàn cìnə́ nʼê pyà sə bə zù è wẽ́ ǹdə́ jàn.

¹³ Yi nyì-zwennə bé gakó ǹdə́ Muyiisi nyə́ né zɔ̀m Arəzana tənà y yò, kɔn mʼe yí Zhã-Bətiisi.

¹⁴ Á gə nʼá yàlá, sʼá lwar bə̀ wɔ́ ńmyɛ̌ ń wɔ́ Elyi mú bə̀ yʼà wò bə̀ ń mà n ká n bə̀ mɔ́.

¹⁵ Lò ǹ la cilu, sə́ cili.”

¹⁶ Yezu súlí n wɔ̀: “À mʼa zə lũ w kɔ̀bɔ́ lyì bí a mɛrhɛ ǹdə bə̀kɔ́n ta? Bə̀ wɔ́ ǹdə bə̀sɔ́ná byɛ̀bɛ́ bə̀ jě dwã-gùlú èpóró wẽ́ ta, bə̀ nʼê byẽ̀ dwã bə̀ mʼê wə̀lə̀:

¹⁷ ‘Nə́ wúl wúrh, á yə̀ sɛ yé. Nə́ nún wu-zhìlù núrh, sʼá yə̀ kúrh yé.’ ”

¹⁸ Yezu kə́ n wɔ̀: “Zhã túwə́, ń yà ń tá ń jí kùjú yé, ń tá ń nywɛ̀ sɛ̃´ yé. Bə zɛ̃̀ bə̀ zhe bə̀ wɔ́ nə̀cílí námməlwɛ̀lɛ́ è ŋwɛ́nɛ́ ǹdə́ mɔ.

¹⁹ Numbyíní Byǐ bà, ń nə́ ń jí, ń nə́ ń nywɛ̀. Bə zɛ̃̀ bə̀ zhe bə̀ ń wɔ́ sùl-wòrò, n jà ń wɔ́ sə̀-nyɔ̀rɔ́, bə̀ wɔ́ myə̂l-kwândɛ́ zwennə bé ǹdə́ lyì byɛ̀bɛ́ bə̀ nʼê wɛ̀rhɛ́ yààyàà bə̀ tʼâ zwẽ Yi nyə́ né bə̀ wɔ́ ń dɔwabá.” Yezu zɛ̃̀ n zhízhílí n wɔ̀: “Lò mɔ̀bɔ́ ń zhe Yi surhə né, wɔ́ ń tùntwə̃̀ə̃̀ né dɛnnɛ bə̀ yʼa tó né bə lwar bə̀ ń zhe surhə.”

Zwini mʼa zə cɛmɛ nɛ́ nyɛ̀bɛ́ nə̀ lyì bí tʼâ zwẽ Yezu zɔ̀mà nɛ́ mɔ́

²⁰ Yezu zɛ̃̀ ń nə́ ń ji búlə́ cɛmɛ nɛ́ nyɛ̀bɛ́ ń wɛ̀rhɛ́ màmyaarhɛ́ nánzhəzhɔ̌ w nə̀ wẽ́, nə̀ lyì bí jʼà yə̀ bə̀ wun pyìrhí mú ni, ń zhe:

²¹ “Zwini mʼa zə ába Kɔrazɛ̃ lyì, zwini mʼa zə ába Betəsəyiidi lyì, bə̀ màmyaarhɛ́ tɛ̀bɛ́ rə̀ wɛ̀rhɛ́ á sono mó gə yʼà wɛ̀rhɛ́ Tiiri ǹdə́ Sədɔ̃ nɛ́, cɛmɛ nɛ́ nə̀myɛ́ lyì bí gə pyìrhí bə̀ wun shãã shãã ga, bə zù ywə́ə́le ǹdə kàmə̀-zǔrh ta bə mʼe tu tɔ̀mɔ̀.

²² À nʼâ wə̀l ába: bùrsí kɔ́ dɛ̃ rɛ́ yùwə̀, á mʼâ nə còrhò-tum dwini Tiiri ǹdə́ Sədɔ̃ lyì bí nyân dɛ́.

²³ “Sə ámyɛ̌ Kapɛrnaɔm lyì, á nʼá bùl bʼâ yil mʼa du rə yí Arəzana wa? Gaga! Bə̀ mʼa só ába tɛ̃´ á vò nɔ̀nɔ̀ jàà wà. Màmyaarhɛ́ tɛ̀bɛ́ rə̀ wɛ̀rhɛ́ á sõ mó gə yʼà wɛ̀rhɛ́ Sɔdɔm nɛ́, ò lyì bí gə gwẽ̌ ŋwɛ́nɛ́ èlâsɛ̃´.

²⁴ À nʼâ wə̀l ába: bùrsí kɔ́ dɛ̃ rɛ́ yùwə̀, á mʼâ nə còrhò-tum mə dwini Sɔdɔm lyì bí nyân dɛ́.”

Yezu còrhò mó zõ bə zum yé

²⁵ Rə̀myɛ́ yi ní, Yezu zɛ̃̀ n wɔ̀: “À Da, ǹmyɛ́ mɔ̀bɔ́ ǹ cǐ dɛ̃̌ ǹdə́ cɛ, à nʼâ cèrhé mó, ǹ gə́ shèè rə̀myɛ́ lármɔ cìnə́ ǹdə́ surhə cìnə́ yé né, ń zɛ̃̀ ń byili ri bə̀sɔ́ná nɛ mɔ́ yilə.

²⁶ Zhə̀nà, à Da, rə̀myɛ́ yàl ǹmyɛ́ pùbùlə̀.”

²⁷ N zɛ̃̀ n wɔ̀ lyì bí ni: “À Da co kɔn gakó à jɔ̃̀ wà. Lò lò yə̀l Byǐ mú párá, è gə də̀ Da mɔ́ dúdú. Lò lò yə̀l Da mɔ́ myɛ párá, è gə də̀ Byǐ mú dúdú, ǹdə́ lò mɔ̀bɔ́ Byǐ mú nə́ ń yâl n byili mu Da mɔ́ párá.

²⁸ “Ámyɛ̌ byɛ̀bɛ́ á zhĩ zhĩĩ rí á lyɛ̀ɛ̀ mɔ́, bànà à sono. À mʼa pə ába shìrhə́.

²⁹ Shɛ̀nɛ́na á zwẽ zhĩĩ rí tɛ̀bɛ́ àmyɛ́ la ába pɔ mɔ́, sʼá zwẽ kɔn dɛ̀bɛ́ à la ába byilu mú, mùnì ga á nə shìrhə́, bʼà wɔ́ wu-bɔ̀nɔ̀ ǹdə́ cìn-lwəl cə́bal.

³⁰ Nyǐnə zhĩĩ rí tɛ̀bɛ́ à la ába pɔ mɔ́ nyɛ̌ fúlə́ə́. Rə̀ bə dùm yé.”