Lwiki 7 - Lyélé

Yezu wárh shə̀dɛ́ɛ́sɛ yó-cə́bal kɛ̀lɛ́ tùntùnnə̀

¹ Yezu gə́ tú n byili zɔ̀mà nɛ́ nə̀myɛ́ gakó lyì bí ni n zhɛ̀, n zhǐr n vò Kapɛrnaɔm, n zù cɔ w wu w wẽ́.

² Shə̀dɛ́ɛ́sɛ zɔ̌m yó-cə́bal mə̀dù yà ń ŋwɛ́nɛ́ gàà. Ń kɛ̀lɛ́ y tùntùnnə̀ mə̀dù ń yà ń só dɛ̃´dɛ̃´ yà ń bə jɛ̀, ń nə́ ń yâl n cì.

³ Yó-cə́bal mɔ́ gə́ nyɛ̀ɛ̀ bə̀ nʼê zɔ̀m Yezu yò, ń twĩ̀ Zhwifubá náncɛrh ń sono bə̀ bə̀ lwə̂l mo, bə̀ ń bə̀ n wárh ń tùntùnnə̀ mó.

⁴ Bə yí Yezu sõ, bə lwə̀l mò ǹdə́ yə̀wâl bə̀ mʼê zhe: “Bal mɔ́ mɔ̀bɔ́ wɔ́ lyì-twə̂. Kɔn mə̂ bə̀ n sɛ̃ mɔ.

⁵ Ń só nə́ dwí rí. Ńmyɛ̌ ń ce bə lù nə́ dwã-gùlú jì y bə pə nə́ba.”

⁶ Yezu zhǐr n tó be ń la. Ń yà ń kə́ ń bə nyɛ ǹdə́ kɛ̀lɛ́ y yé, shə̀dɛ́ɛ́sɛ́ yó-cə́bal mɔ́ twĩ̀ ń dɔwabá jàlà bə vò bə wɔ̀ mɔ̀: “Yó-cə́bal, bə̀ká lyɛ̀ɛ̀ ǹ cìn yé. À yə̀ yírh swí sə́ zù à sõ kɛ̀lɛ́ w yé.

⁷ Wɔ́ rə̀myɛ́ yil à yə̀ bùl bʼà mə̂ sʼa bwəlse ǹ nyí ni yé. Ǹmyɛ́ wírí ń púr ǹ nyí, à tùntùnnə̀ mó mà n wárh.

⁸ Nyǐ à zhe yó-cìnə́ bə̀ cǐ ni. Àmyɛ zɛ̃̀ à cǐ shə̀dɛ́ɛ́sɛ à nʼâ pɛ sɛ nyə́. À gə wò mə̀dù nì bə̀ ń zhəl nyɔ̀nɔ̀, n vò. À gə wò ń dõ ne bə̀ ń bə̀ nyə̀má, n bà. À gə wò à tùntùnnə̀ nè bə̀ ń wɛ̀rhɛ́ èta, n wɛ̀rhɛ́.”

⁹ Yezu gə́ nyɛ̀ɛ̀ rə̀myɛ́, rə̀ jàr mɔ̀, n zɛ̃̀ n pyìrhí n wɔ̀ lyì-zhâ bɛ́ bə̀ yʼà tó mo mó ne: “À nʼâ wə̀l ába: bá Esərayɛl lyì bí wẽ́, à gwẽ̌ yə̀ lò nɛ ń zhí ni èta dono yé.”

¹⁰ Byɛ̀bɛ́ bə̀ twĩ̀ mú gə́ kʼa kwɛ̃̀ bə yí kɛ̀lɛ́ wa, bə pwírí tùntùnnə̀ mó wárh, ń zhe bəsàzùlí.

Yezu bwìrhì ejə̃̀-kɛ̃ mə̀dù byǐ

¹¹ Rə̀myɛ́ kwã nɛ́, Yezu zɛ̃̀ n vò cɔ òdù bə̀ nʼê byẽ̀ bə̀ Nəyin. Ń kwã-lyì bí ǹdə́ lyì-zhâ nánjə̀jóló yʼà tó mo.

¹² Bə̀ gə́ tú bə̀ nʼê bwəlse cɔ wá, bə nə cùù lyì zhĩ bə̀ la vò bə ce. Mɔ̀bɔ́ ń cù mú yà ń wɔ́ byì-dùwə̀ ń ná nɛ. Ná mɔ́ jà ń yà ń wɔ́ ejə̃̀-kɛ̃. Cɔ w lyì bí nánzhəzhɔ̌ yʼà tó ná mɔ́ nɛ.

¹³ Cinu gə́ nɔ kɛ̃ mɔ́, ń nɔ̀nɔ̀ zɔ mɔ, n wɔ̀ mɔ̀: “Bə̀ká kúrh yé.”

¹⁴ N bwəlse n dwə̀rh kùlkṍ wə́. Byɛ̀bɛ́ bə̀ yʼà zhĩ w mú swə́rh bə zhì. N zɛ̃̀ ń wɔ̀: “Byǐ, à nʼâ wə̀l mó, zɛ̃̀ dɛ̃̌.”

¹⁵ N zɛ̃̀ n jòm ń kùr yó, ń nə́ ń zɔ̀mà. Yezu zə ń jɛ̃̀ nɛ̀ n pə ń ná nɛ.

¹⁶ Ywẽ zə bə̀ gakó. Bə zɛ̃̀ bə̀ nʼê cèrhé Yi, sə bə̀ yʼà zhe: “Yi nyì-zwennə nánfɔ̀lɔ̀ tú nə́ sõ.” Jàlà myɛ yʼà zhe: “Yi tú rə gwɛ̃ rə̀ dwí rí ni.”

¹⁷ Yò w òmyɛ́ du o yí Zhide tənà y púlə́púlə́, ǹdə́ cɛmɛ nɛ́ nyɛ̀bɛ́ gakó nə̀ ŋwɛ́nɛ́ Zhide yala nɛ mɔ́ wa.

Zhã-Bətiisi twĩ̀ ń kwã-lyì bə̀lyè Yezu sono

¹⁸ Zhã kwã-lyì bí tú bə cĩ́ mu rə̀myɛ́ gakó. N zɛ̃̀ n vùr lyì bə̀lyè bə̀ wẽ́,

¹⁹ n twĩ̀ bì Cinu sõ bə̀ bə̀ bwə̂rh mo bə̀ wɔ́ ńmyɛ̌ ń wɔ́ mɔ̀bɔ́ bə̀ wò bə̀ ń bàn mɔ́, ráá bə̀ dɛ̃̌ gwẽ̌?

²⁰ Bə̀ gə́ yú Yezu yala nɛ́, bə wɔ̀ mɔ̀: “Zhã-Bətiisi twĩ̀ nə́ba ǹ sono, bə̀ nə́ bwə̂rh mó, ǹdə́ è gə wɔ́ ǹmyɛ́ ǹ wɔ́ mɔ̀bɔ́ bə̀ wò bə̀ ń bàn mɔ́, ráá nə́ dɛ̃̌ gwẽ̌?”

²¹ Rə̀myɛ́ yi ní cìcì, Yezu wárh lyì nánzhəzhɔ̌ bə̀ címsi ǹdə́ bə̀ yala yin wẽ́, n wárh byɛ̀bɛ́ nə̀cílsi námməlwâlsɛ yʼà zhe, n púr lyìlyə̂r nánzhəzhɔ̌ yírhə́.

²² N zɛ̃̀ n wɔ̀ bɛ: “Zhəlnə á cĩ́ kɔn dɛ̀bɛ́ gakó á yírhə́ nɔwa, á zhã̌ jʼa nyɛ̀ɛ̀ mɔ́ Zhã nɛ. Lyìlyə̂r yírhə́ nʼê púrə́; gwànsɛ̀ nʼê zɛ̃̀ sə̀ zhə̀lə̀; nɔr cìnə́ nʼê wárh bə̀ jǐrh wárhgáá; sə̀bwààrhɛ̀ zhã̌ nʼê nyɛ̀ɛ̀; cùùrì nʼê bwìrhì; bə̀ nʼê bwə̀l yò-ècɔ̀nɔ̀ nyí rí bə̀ byili nə̀mwà nɛ̀.

²³ Wu-nyɔ̃̀ cí wɔ́ lò mɔ̀bɔ́ ń wu tʼâ la gɔ àmyɛ́ shò-kwã nɛ́.”

²⁴ Byɛ̀bɛ́ Zhã twĩ̀ mú gə́ kʼa kwɛ̃̀, Yezu zɛ̃̀ ń nə́ ń zɔ̀m ń yò ǹdə́ lyì-zhâ bɛ́ ń zhe: “Byè á zhə̀l á nə gɔ-elũ èpòlò w wə? Vwal-gɔ zho nʼô fúfǔ?

²⁵ Sə è nə wɔ́ byè á zhə̀l á na? Lò ń zù kàmə̀-zǔrh shɛ̀bɛ́ sə̀ càn? E jà byɛ̀bɛ́ bə̀ nʼê zwì kàmə̀-zǔrh shɛ̀bɛ́ sə̀ càn, bə̀ nʼê jí nyɛ̀n mɔ́, wɔ́ pyâ kâlsɛ wẽ́ bə̀ ŋwɛ́nɛ́.

²⁶ Sə è nə wɔ́ byè á zhə̀l á na? Yi nyì-zwennə? À nʼâ wə̀l ába: ń wɔ́ Yi nyì-zwennə, sə ń nə jà ń du Yi nyì-zwennə myɛ cìcì.

²⁷ Wɔ́ ńmyɛ̌ yò bə̀ yʼà kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Yi wòwə̀: ‘Nyǐ à nʼâ twĩ̀ à tùntúm ń la yə̀ ǹ yé né, n kwɛrhɛ ǹ sɔ́má yá.’ ”

²⁸ Yezu súlí n wɔ̀: “À nʼâ wə̀l ába: kɛ̃ yə̀ byǐ lùl ń du Zhã yé. E jà lò mɔ̀bɔ́ ń wɔ́ lyì bí gakó námpɔ́lɛ́ Yi tənà y wẽ́ mó du mu.”

²⁹ Lyì bí gakó ǹdə́ myə̂l-kwândɛ́ zwennə bé yʼà nʼê cili ń zɔ̀mà nɛ́, sə bə̀ lwar bə̀ Yi wɔ́ cángá. Bə zɛ̃̀ bə zwẽ nɛ̃̌-shɔ Zhã sono.

³⁰ Farɛzhɛ̃ɛ̃bá ǹdə́ Muyiisi nyə́ né byilnə bé gə́ yə̀ shɛ̀nɛ́ bə zwẽ nɛ̃̌-shɔ mɔ́, nʼê byili bə̀ bə̀ cẽ dɛ̀bɛ́ Yi yʼà nʼê yâl rə wɛ̀rhɛ́ bə̀ yil mó.

³¹ Yezu súlí n wɔ̀: “À mʼa zə lũ w kɔ̀bɔ́ lyì bí a mɛrhɛ ǹdə bə̀kɔ́n ta? Bə̀ nyɛ̌ ǹdə byè ta?

³² Bə̀ nyɛ̌ ǹdə bə̀sɔ́ná byɛ̀bɛ́ bə̀ jě dwã-gùlú èpóró wẽ́ ta, bə̀ nʼê byẽ̀ dwã bə̀ nʼê wə̀lə̀: ‘Nə́ wúl wúrh, á yə̀ sɛ yé. Nə́ nún wu-zhìlù núrh, sʼá yə̀ kúrh yé.’ ”

³³ Yezu súlí n wɔ̀: “Zhã-Bətiisi túwə́, ń yà ń tá ń jí kùjú yé, ń tá ń nywɛ̀ sɛ̃´ yé. Á zɛ̃̀ á zhe bə̀ wɔ́ nə̀cílí námməlwɛ̀lɛ́ è ŋwɛ́nɛ́ ǹdə́ mɔ.

³⁴ Numbyíní Byǐ bà, ń nə́ ń jí, ń nə́ ń nywɛ̀. Á zɛ̃̀ á zhe bə̀ ń wɔ́ sùl-wòrò, n jà ń wɔ́ sə̀-nyɔ̀rɔ́, bə̀ wɔ́ myə̂l-kwândɛ́ zwennə ǹdə́ lyì bí byɛ̀bɛ́ bə̀ nʼê wɛ̀rhɛ́ yààyàà bə̀ tʼâ zwẽ Yi nyə́ né mó bə̀ wɔ́ ń dɔwabá.”

³⁵ Yezu zɛ̃̀ n zhízhílí n wɔ̀: “Lò mɔ̀bɔ́ ń zhe Yi surhə né, wɔ́ ń tùntwə̃̀ə̃̀ né dɛnnɛ bə̀ yʼa tó né bə lwar.”

Yezu pɔ sǔbri kɛ̃ mə̀dù nì Shəmɔ sõ

³⁶ Farɛzhɛ̃ɛ̃ mə̀dù yà ń byẽ̀ Yezu bə̀ ń bə̀ n jí kùjú ń sõ. Yezu zhǐr n vò. Bə zɛ̃̀ bə̀ jě tɛ̃´ bə̀ nʼê jí kùjú wə́.

³⁷ Sə kɛ̃ mə̀dù yà ń wɔ cɔ w wa, ń wɔ́ yə̀-bəlɔ̀lɔ́ cə́kɛ̃. Ń gə́ lwar bə̀ Yezu yà ń nə́ ń jí kùjú Farɛzhɛ̃ɛ̃ mɔ́ sõ, n zɛ̃̀ n zə kwâl-byǐ kɛ̀bɛ́ è càn, è sú ǹdə́ nwə̃̌ è lwẽ́ nã́nyə̀nyɛ̀lɛ́,

³⁸ n tó kwã nɛ́ ń zhǐ Yezu nèsé yó ń mə́ ń kúrhə́, n zɛ̃̀ n zə ń ywésé n mə n pɔ́pɔ̌ ń yə́-nàná nɛ́ nə̀ yʼà nʼê lwé Yezu nèsé yó mó, ń mə́ ń kwə̀ə̀lè ń nèsé, ń mə́ ń lwé nwə̃̌ y sə̀ yó.

³⁹ Farɛzhɛ̃ɛ̃ mɔ́ mɔ̀bɔ́ ń byẽ̀ Yezu mú gə́ nɔ rə̀myɛ́, n zɛ̃̀ n bù ń wẽ́ n wɔ̀: “Bal mɔ̀bɔ́ gə yà ń wɔ́ Yi nyì-zwennə zhə̀nà, ń yà ń mà n lwar kɛ̃ mɔ́ mɔ̀bɔ́ ń nə́ ń dwə̀rh mò mó gə́ wɔ́ nɛ́, bə̀ ń wɔ́ yə̀-bəlɔ̀lɔ́ cə́kɛ̃.”

⁴⁰ Yezu zɛ̃̀ n wɔ̀ Farɛzhɛ̃ɛ̃ mɔ́ nɛ: “Shəmɔ, à zhe zɔ̀mɛ̀ à la mɔ́ wál.” Shəmɔ wɔ̀ mɔ̀: “Zɔ̌m yó-cə́bal.”

⁴¹ Yezu zɛ̃̀ n wɔ̀: “Lyì bə̀lyè bə̀ yʼà zhe lò mə̀dù jim. Mə̀dù y wɔ́ dwã zwã̌-ànu tum wársɛ, ń dõ mó wɔ́ dwã shí-ènu tum wársɛ.

⁴² Sə bə̀myɛ́ mə̀dù ga gə́ yà ń wàr jim dí ń la cârh mɔ́ ce, mɔ̀bɔ́ bə̀ zhe ń jim dí mú já n yẽ̌ bə̀ ga nɛ.” Yezu zɛ̃̀ n bwə̀rh mò n wɔ̀: “Wɔ́ mɔ̌ ń mà n swéné mo, bə̀myɛ́ jimə cìnə́ bə̀lyè y wẽ́, du ń dõ?”

⁴³ Shəmɔ wɔ̀ mɔ̀: “À nʼâ bùl bə̀ wɔ́ mɔ̀bɔ́ ń jim dí yʼà já dɛ̃´dɛ̃´ mɔ́.” Yezu zɛ̃̀ n wɔ̀ mɔ̀: “Ǹ zhe bwìrì.”

⁴⁴ N pyìrhí n zə ń yé n zâ kɛ̃ mɔ́, n wɔ̀ Shəmɔ nɛ: “Ǹ nə kɛ̃ mɔ́ mɔ̀bɔ́? À zù ǹ sõ, ǹ yə̀ nɛ̀ nɛ̃̌ pɛ a mʼa sã̀ à nèsé yé, sə ńmyɛ̌ sàm sɛ̀ ǹdə́ ń yə́-nàná nɛ́, n zɛ̃̀ n pɔ́pɔ̌ sɛ ǹdə́ ń ywésé.

⁴⁵ À gə́ zù ǹ sõ jù wə̀, ǹ yə̀ nɛ̀ kwə̀ə̀lè yé, sə à gə́ zù ga, ńmyɛ̌ já ń nə́ ń kwə̀ə̀lè à nèsé.

⁴⁶ Ǹ yə̀ nwə̃̌ à yó w twərh yé, sə ńmyɛ̌ ló nwə̃̌ kɛ̀bɛ́ è lwẽ́ nã́nyə̀nyɛ̀lɛ́ à nèsé yó.

⁴⁷ Wɔ́ rə̀myɛ́ rə̀ ce à nʼâ wə̀l mó: ń nɔ ń yə̀-bəlwàálɛ́ nánzhəzhɔ̌ sǔbri. Wɔ́ rə̀myɛ́ yil ń wɛ̀rhɛ́ sónó nánfɔ̀lɔ̀ tum. Sə lò mɔ̀bɔ́ ń nɔ sǔbri kɔn námpɔ́lɛ́ yilə, ń sónó bə já yé.”

⁴⁸ N zɛ̃̀ n wɔ̀ kɛ̃ mɔ́ nɛ: “Ǹ nɔ ǹ yə̀-bəlwàálɛ́ sǔbri.”

⁴⁹ Byɛ̀bɛ́ bə̀ yʼà nʼê tó mo bə̀ jí kùjú w mú zɛ̃̀ bə̀ nʼê wə̀lə̀: “Wɔ́ mɔ̌ lò ǹdə́ mɔ̀bɔ́ èta mɔ́, ń nə́ ń pɛ yə̀-bəlwàálɛ sǔbri myɛ?”

⁵⁰ Yezu zɛ̃̀ n wɔ̀ kɛ̃ mɔ́ nɛ: “Ǹ gə́ zhí ni mú ce ǹ nɔ vwârh. Zhəl ǹdə́ yə̀-zùlə́.”