Lwiki 4 - Lyélé

Shətana swèlè Yezu

¹ Yezu zɛ̃̀ n zhǐr Zhɔrdɛ̃ bwǐ y yó ń ká ń bànà. Ń sú ǹdə́ Eshirhə náàcɛ̀nɛ́. Eshirhə y zə mɔ e vò gɔ-elũ èpòlò w wə.

² Shətana swèlè mò gàà dwã shə́-èna. Dwã nɛ́ nə̀myɛ́ wẽ́, ń yə̀ kaka jí yé. Sə nə̀ gə́ lyɛ̃ kwã nɛ́, nɔrh zɔ mɔ.

³ Shətana y zɛ̃̀ e wɔ̀ mɔ̀: “Ǹ gə wɔ́ Yi Byǐ, sə́ pə nyí nə́kulu w kɔ̀bɔ́ nɛ o jǐrh búrú.”

⁴ Yezu wɔ̀ yà: “Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: ‘È də̀ búrú dúdú ò wɔ̌ ò bʼa ce numbyíní zə myə̂l yé.’ ”

⁵ Shətana y zɛ̃̀ e zə mɔ e vò e jì pyɔ̀ kɔ̀bɔ́ ò nyɛ̌ dɛ̃̌ dɛ̃̌ yó, e byili mu lũ w tənèsé púlə́púlə́ twər rə̀dù sá,

⁶ e zɛ̃̀ e wɔ̀ mɔ̀: “À mʼa pɔ̃́ tənèsé shɛ̀bɛ́ ǹdə́ sə̀ nə̀cɛ̀ndɛ́ gakó ń cìní, bə̀ wɔ́ àmyɛ́ nɛ bə̀ pɔ rɛ, àmyɛ zɛ̃̀ à nʼâ pɛ mɔ̀bɔ́ à nʼâ yâl mɔ́ nɛ.

⁷ Ǹ gə wùlì à yé né, à mʼa pɔ̃́ rə̀ gakó.”

⁸ Yezu wɔ̀ yà: “Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: ‘Wɔ́ Cinu ǹ Yi yé né ǹ mə̂ sə́ wùlì ní, ń cèrhé ń dúdú sá.’ ”

⁹ Shətana y kʼe zə mɔ e zhǐr e vò Zhərəzalɛm, e ce n zhì Yi jì y yə́-pɛ̀lɛ́ wa, e zɛ̃̀ e wɔ̀ mɔ̀: “Ǹ gə wɔ́ Yi Byǐ, sə́ zhì gàà ń zɛ̃̀ ń fwɛ̃´ tɛ̃´,

¹⁰ bə̀ bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: ‘Yi mʼa pə nyí rə̀ màlɛ́kabá nɛ bə nyǐ ǹ yò.

¹¹ Bə̀ mʼa kwɛ̃´ mɔ́ ǹdə́ bə̀ jɛ̀rh, mùnì ǹ nà bə̀kʼa mà nə́kulu ni yé.’ ”

¹² Yezu wɔ̀ yà: “Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: ‘Bə̀ká zhẽ̀ Cinu ǹ Yi yé.’ ”

¹³ Shətana y gə́ tú e bɛ̃ bɛ̃ mɔ ǹdə́ sòlò dwí gakó e ga, e zhǐr e yẽ̌ mo è mʼê dɛ̃̀ dɛ̃ dõ.

Yezu ju ń tum dí kùr Gəlile né

¹⁴ Rə̀myɛ́ kwã nɛ́, Yezu ká n bə̀ Gəlile tənà y wa. Eshirhə náàcɛ̀nɛ́ jàn dɛ́ yʼà ŋwɛ́nɛ́ ǹdə́ mɔ. Ń yil du tənà y èmyɛ́ púlə́púlə́ wə.

¹⁵ Ń yà ń nə́ ń cèrhè kàrmɔ̀ bə̀ dwã-gùúlí jìsí wẽ́, sə lyì bí gakó yʼà nʼê cèrhé mo.

¹⁶ Dɛ̃ rə̀dù, n zɛ̃̀ n vò Nazarɛtɛ, bə̀ gə́ kɔ̀n mɔ̀ mə̀gã̌. Shìrhə́ y dɛ̃ rɛ́ gə́ yúwə́, n zɛ̃̀ n vò dwã-gùlú jì y wə, ǹdə ń gə́ yà ń myɛ̀rhɛ̀ ń nə́ ń wɛ̀rhɛ́ nɛ́ twéé twéé mó, n zɛ̃̀ n zhì dɛ̃̌ ń la Yi zɔ̀mɛ̀ rɛ́ sɛ́bɛ́ rɛ́ kàrmɔ̀.

¹⁷ Bə kwè Yi nyì-zwennə Ezəyi sɛ́bɛ́ rɛ́ bə pɔ̃. Ń gə́ púr sɛ́bɛ́ rɛ́, n tu jàà èdù yó bə̀ kɛ̃ bə wɔ̀:

¹⁸ “Cinu Eshirhə y ŋwɛ́nɛ́ ǹdə́ nɛ. Ń cír ne, n pɛ̃ ŋwɔ̀nɔ́ bʼà bwə̂l yò-ècɔ̀nɔ̀ nyí rí a byili nə̀mwà nɛ̀. Ń twĩ̀ nì bʼà bwə̂l a byili lyì byɛ̀bɛ́ bə̀ ŋwɛ́nɛ́ byə̀nə́-jù w mú ni bə̀ bə̀ mʼa vùr bè, sʼa byili lyìlyə̂r ne bə̀ bə̀ yírhə́ né mʼa púr, sʼa ce byɛ̀bɛ́ lyì bí nʼê nwɛ̀nɛ̀ mɔ́ nə cìn-cìnú,

¹⁹ sʼa bwə̀l myɛ bə̀ byin dí tɛ̀bɛ́ Cinu la lyì nɔ̀nɔ̀ dǔr mó bwəlse.”

²⁰ N ká n pyípyílí sɛ́bɛ́ rɛ́, n pə dwã-gùlú jì y tùntùnnə̀ mó ne, n zɛ̃̀ n ká n jòm tɛ̃´. Lyì bí byɛ̀bɛ́ gakó bə̀ yʼà ŋwɛ́nɛ́ dwã-gùlú jì y wẽ́ mó yʼà nʼê nyǐ mu shɛ́shɛ́.

²¹ N zɛ̃̀ n wɔ̀ bɛ: “Sɛ́bɛ́ rɛ́ zɔ̀mà nɛ́ nyɛ̀bɛ́ á cili èlâsɛ̃´ mɔ́ pyìrh zà.”

²² Bə̀ gakó yʼà nʼê cèrhé mo. Sə ń zɔ̀mà nɛ́ gə́ yʼà wɔ́ yò-ècɔ̀nɔ̀ zɔ̀mà mɔ́ ce, nə̀ yʼà nʼê jàr bɛ̀. Bə zɛ̃̀ bə̀ nʼê wə̀lə̀: “È də̀ Zhozefu byǐ mú ǹdə́ mɔ̀bɔ́ nà?”

²³ N zɛ̃̀ n wɔ̀ bɛ: “À yě bʼâ mʼâ ji səswalá y kɛ̀bɛ́ á pɛ̃ á wɔ̀: ‘Nə̀bwànà shilnə, shili ǹ cìnə̀.’ Sə á mʼâ wɔ̀ nɛ̀ myɛ: ‘Kɔn dɛ̀bɛ́ gakó nə́ nyɛ̀ɛ̀ bə̀ ǹ wɛ̀rhɛ́ Kapɛrnaɔm nɛ́ mɔ́, zɛ̃̀ ń wɛ̀rhɛ́ rɛ ǹ da-dǒ w nyɔ̀nɔ̀.’ ”

²⁴ N zɛ̃̀ n wɔ̀ bɛ n súlí: “Zhə̀nà, à nʼâ wə̀l ába: bə̀ tʼâ zwẽ Yi nyì-zwennə ń da-dǒ w cɛ̀nɛ̀ yé.

²⁵ A zɛ̃̀ à kʼâ nʼâ wə̀l ába: Yi nyì-zwennə Elyi yi ní, dwà y gə́ wɛ̀rhɛ́ byinə nə̀tɔ̀ ǹdə́ fwã́ ǹdə́ è yə̀ nywɛ̀ mɔ́, ejə̀nə̀ yʼà já Esərayɛl nɛ́.

²⁶ Sə ǹdə́ rə̀myɛ́ ga, Yi yə̀ Elyi twĩ̀ bə̀myɛ́ mə̀dù ga sõ yé. Wɔ́ ejə̃̀-kɛ̃ mə̀dù ń yà ń ŋwɛ́nɛ́ Sarɛpata nɛ́ Sədɔ̃ tənà y wa, wɔ́ ńmyɛ̌ sõ rə̀ twĩ̀ mù ní.

²⁷ Yi nyì-zwennə Elize yi ní myɛ, nɔr cìnə́ yʼà já Esərayɛl nɛ́. E jà mə̀dù ga yə̀ wárh yé. Wɔ́ Siri lyì bal Naama dúdú ń wárh.”

²⁸ Lyì bí byɛ̀bɛ́ gakó bə̀ yʼà ŋwɛ́nɛ́ dwã-gùlú jì y wẽ́ mó gə́ nyɛ̀ɛ̀ rə̀myɛ́, bə̀ lyimə zɛ̃̀,

²⁹ bə zɛ̃̀ bə zə mɔ bə mʼe shə́r cɔ w wa, bə yí pyɔ̀ w kɔ̀bɔ́ bə̀ yʼà lù bə̀ cɔ w ò yó mó yə́-kwal lɛ́ yó. Bə̀ yʼà nʼê yâl bə cìrh mò bə ji pyɔ̀ w gɔ́rɔ́ w wa,

³⁰ sə ń tó bə̀ cəcəl wə, n lyɛ̃ ń la.

Yezu wárh bal mə̀dù nə̀cílí námməlwɛ̀lɛ́ yʼà zhe

³¹ Yezu zɛ̃̀ n zhǐr Nazarɛtɛ nɛ n vò cɔ òdù ò yíl Kapɛrnaɔm. Òmyɛ ŋwɛ́nɛ́ Gəlile tənà y wa. Shìrhə́ dɛ̃ rɛ́ gə́ yúwə́, n zɛ̃̀ ń nə́ ń cèrhè kàrmɔ̀ lyì bí ni.

³² Ń gə́ yà ń nə́ ń zɔ̀m ǹdə́ ń sə̀pwà ŋwɔ̀nɔ́ mɔ́ ce, ń kàrmɔ́ yʼà jàr bɛ̀ dɛ̃´dɛ̃´.

³³ Sə bal mə̀dù yà ń ŋwɛ́nɛ́ dwã-gùlú jì y wə, nə̀cílí námməlwɛ̀lɛ́ yʼà zhe mo. N zɛ̃̀ ń nə́ ń bya ń zhe:

³⁴ “Èê, bə̀kɔ́n ǹ tú pyâ nə́ sõ Nazarɛtɛ lyì bal Yezu? E zɛ̃̀ wɔ́ nə́ yò zhìlù yil ǹ túwə́? À yě ǹ gə́ wɔ́ lò ná-dwí yilə: Yi lò ǹdə́ mɔ́. Wɔ́ rə̀myɛ́ rə̀ twĩ̀ mú ń bà.”

³⁵ Yezu zɛ̃̀ n bú nə̀cílí y n wɔ̀: “Gu ǹ nyí, sə́ du bal mɔ́ wẽ́.” E zɛ̃̀ e ji bal mɔ́ tɛ̃´ lyì bí yé né, e du ń wẽ́. È yə̀ mɔ lwɛlɛ wɛ̀rhɛ́ yé.

³⁶ Lyì bí gakó wun zɛ̃̀, bə zɛ̃̀ bə̀ nʼê bwə̀rh dwã bə̀ zhe: “Zɔ̀mɛ̀ rɛ́ tɛ̀bɛ́ èta mɔ́ kùr wɔ́ byè? Ń wɔ̌ ń nə́ ń pɛ nyí nə̀cílsi námməlwâlsɛ nɛ ǹdə́ jàn, sə shɛ̀nɛ́ sə du lyì bí wẽ́.”

³⁷ Rə̀myɛ́ yó, Yezu yil lé du tənà y èmyɛ́ gakó wẽ́.

Yezu wárh nə̀bwànà nánzhəzhɔ̌

³⁸ Yezu zɛ̃̀ n shə́r dwã-gùlú jì y wẽ́, n vò Shəmɔ sõ kɛ̀lɛ́ wa, sə Shəmɔ cə̃́-kɛ̃ mɔ́ yala yʼà shɛ̃̀ dɛ̃´dɛ̃´. Kɛ̀lɛ́ y lyì bí zɛ̃̀ bə lwə̀l Yezu ni bə̀ ń dǔr ń nɔ̀nɔ̀.

³⁹ N zɛ̃̀ n lwəl ń yó, n bú yə-byìrhə̀ né, nə shə́r kɛ̃ mɔ́ yala nɛ́ wẽ́. N já n zɛ̃̀ ń nə́ ń tɛnɛ bɛ.

⁴⁰ Də̀dɛ̀nɛ́ y yi gə́ tú e yí, lyì nánzhəzhɔ̌ zə nə̀bwànà dwí gakó bə mʼe bə̀ Yezu sõ. N zɛ̃̀ n cĩ́ ń jɛ̃̀ bə̀myɛ́ mə̀dù mə̀dù gakó yó, n wárh bɛ.

⁴¹ Nə̀cílsi námməlwâlsɛ yʼà nʼê shə́r lyì nánzhəzhɔ̌ wẽ́, sə̀ nʼê bya sə̀ zhe: “Ǹmyɛ́ wɔ́ Yi Byǐ.” Sə sə̀ gə́ yʼà yě bə̀ wɔ́ ńmyɛ̌ ń wɔ́ Kristə mó ce, ń yà ń nə́ ń ji si búlə́, ń bə shɛ̀ bə̀ sə̀ zɔ̌m yé.

Yezu bwə̀l yò-ècɔ̀nɔ̀ nyí rí Zhide tənà y wa

⁴² Cɛ y gə́ tú e lá, Yezu du cɔ w wa, n vò èpòlò wə̀, lò gə́ tɛ̀nɛ́ mə̀gã̌. Lyì-zhâ bɛ́ zɛ̃̀ bə̀ nʼê pyà mɔ̀. Bə̀ gə́ tú bə nə mɔ, bə zɛ̃̀ bə̀ nʼê yâl bə cə̀r mò bə̀ ń bə̀ká n zhǐr n yẽ̌ be yé.

⁴³ N zɛ̃̀ n wɔ̀ bɛ: “Kɔn wɔ́ nyɔ́ɔ́ ǹdə́ nɛ bʼà bwə̂l Yi pyɛ̀lɛ̀ rɛ́ yò-ècɔ̀nɔ̀ nyí rí a byili cɛmɛ nɛ́ dwã bɛ́ lyì bí myɛ nɛ, bə̀ wɔ́ rə̀myɛ́ yil Yi twĩ̀ nì.”

⁴⁴ N zɛ̃̀ ń nə́ ń bwə̀l lè Zhide tənà y dwã-gùúlí jìsí wə.