Lwiki 19 - Lyélé

Yezu zhə̀l Zəshe sõ kɛ̀lɛ́ wa

¹ Yezu yà ń tó Zheriko ń nə́ ń lyɛ̃.

² Bal mə̀dù yà ń ŋwɛ́nɛ́ cɔ w wa, ń yil Zəshe, ń yà ń wɔ́ myə̂l-kwândɛ́ zwennə bé yó-cə́bal, n jà ń yà ń wɔ́ nə̀cɛ̀m-bal.

³ N zɛ̃̀ ń nə́ ń pyà ń gə́ mà n tó né n nə Yezu, n lwar ń párá. Sə ń gə́ ń yà ń nyɛ̌ nánkùkùlí, lyì bí myɛ jʼà yʼà já mɔ́ ce, ń yà ń wàr ń la mɔ nɔ yé.

⁴ N zɛ̃̀ n dùr n tó yé n vò n jì cǒ òdù yó, Yezu gə́ la mə̀gã̌ tó n lyɛ̃ mɔ́, mùnì ga n ŋwɛ̀nɛ́ n nə mɔ.

⁵ Yezu gə́ tú n yí gàà, n kwẽ̌ n nyǐ dɛ̃̌ cǒ w yó, n wɔ̀ Zəshe ne: “Ce jàn nɛ́ ń só tɛ̃´ làlà, bə̀ zà wɔ́ ǹmyɛ́ sõ kɛ̀lɛ́ w à la nɛ́ zul.”

⁶ Zəshe só tɛ̃´ ǹdə́ yə̀wâl, n dùr n vò n zwẽ mo ń sõ ǹdə́ wu-nyɔ̃̀.

⁷ Byɛ̀bɛ́ gakó bə̀ nɔ mɔ ń zhə̀l Zəshe sõ mó zɛ̃̀ bə̀ nʼê ŋwúŋwùní bə̀ zhe: “Ń zhə̀l n zul lò mɔ̀bɔ́ ń tá ń zwẽ Yi nyə́ né sõ kɛ̀lɛ́ wa.”

⁸ Zəshe zɛ̃̀ n zhì dɛ̃̌, n wɔ̀ Cinu ni: “Yó-cə́bal, nyǐ à mʼa bɔ̀n à kɔn dɛ́ dɛ̀bɛ́ à zhe mó kə̀kàlà a pə nə̀mwà nɛ̀. Sə à gə myìnì lò a zwẽ ń wársɛ, à mʼa kʼa càrh mɔ̀ sɛ̀ twər rə̀na.”

⁹ Yezu zɛ̃̀ n zɔ̀m ń yò n wɔ̀: “Kɛ̀lɛ́ y kɛ̀bɛ́ lyì bí nɔ Yi vwârh mɔ́ zà, bə̀ mɔ̀bɔ́ myɛ wɔ́ Abəraham byǐ.

¹⁰ Numbyíní Byǐ tú byɛ̀bɛ́ bə̀ jé mó pyâ sə n zwẽ bɛ.”

Pyɔ̌ mɔ́ ǹdə́ ń kɛ̀lɛ́ y tùntùnnə̀ bé səswalá

¹¹ Lyì bí yʼà nʼê cili Yezu zɔ̀mà nɛ́. Sə ń gə́ tú n bwəlse Zhərəzalɛm n zhɛ̀, bə zɛ̃̀ bə̀ nʼê bùl bə̀ Yi pyɛ̀lɛ̀ rɛ́ mʼa bə̀ èlâsɛ̃´-lâsɛ̃´. Rə̀myɛ́ ce, n zɛ̃̀ n ji səswalá n pə bɛ n wɔ̀:

¹² “Bal mə̀dù ń dwí rí yʼà wɔ́ pyə̀-dwí, n zɛ̃̀ ń la cɔ kɔ̀bɔ́ ò nyɛ, mùnì ga bə pɔ̃ pyɛ̀lɛ̀ gàà sə n ká n kwɛ̃̀ n bə̀ jè.

¹³ Ń gə́ tú ń la shə́r yó, n byẽ̀ ń kɛ̀lɛ́ y tùntùnnə̀ shíyə́, n pə dwã zɔ̌m tum wársɛ lò gakó ne, n wɔ̀ bɛ: ‘Zwẽnə á mʼá dɔ̌l, á mʼá dɛ̃̀ à kwã̀ɔ̃̀ mɔ́.’

¹⁴ “Sə ń cɔ w cìcì lyì bí yʼà bə mə só yé. Bə zɛ̃̀ bə twĩ̀ lyì cɔ w kɔ̀bɔ́ ń la mɔ́ wa, bə̀ bə̀ zhəl bə wɔ̀ cɔ w lyì bí ni, bə̀ bə̀myɛ́ tʼâ yâl bə̀ ń yál bə̀ pyɔ̌ yé.

¹⁵ “Sə ń gə́ yú cɔ w wẽ́, bə pɔ̃ pyɛ̀lɛ̀ rɛ́ bə zhɛ̀, n zɛ̃̀ n ká n kwɛ̃̀ n bə̀ jè. N zɛ̃̀ n ce bə byẽ̀ kɛ̀lɛ́ y tùntùnnə̀ bé byɛ̀bɛ́ ń yà ń pɔ bɛ wársɛ́ mɔ́, mùnì n lwar kɔn dɛ̀bɛ́ bə̀ dɔ̌l bə nə ǹdə́ sɛ mɔ́.

¹⁶ “Ń tùntùnnə̀ mó mɔ̀bɔ́ ń tó yé n yí mú wɔ̀ mɔ̀: ‘À yó-cə́bal, à zə wársɛ́ shɛ̀bɛ́ ǹ yà ǹ pɔ nɛ mɔ́, a nə wársɛ dwã sə̀ du si twər shíyə́.’

¹⁷ Pyɔ̌ mɔ́ zɛ̃̀ n wɔ̀ mɔ̀: ‘Ǹ wɔ́ tùntùnnə̀ nántwə̂, bə̀ ǹ yàl wu-põ cə́bal kɔn námpɔ́lɛ́ yilə. À mʼa pɔ̃́ cɛmɛ shí ń cìní.’

¹⁸ “Ń kɛ̀lɛ́ tùntùnnə̀ bə̀lyè nyân mɔ́ bə̀ n wɔ̀ mɔ̀: ‘À yó-cə́bal, à zə wársɛ́ shɛ̀bɛ́ ǹ yà ǹ pɔ nɛ mɔ́, a nə wársɛ dwã sə̀ du si twər rə̀nu.’

¹⁹ Pyɔ̌ mɔ́ zɛ̃̀ n wɔ̀ mɔ̀: ‘À mʼa pə cɛmɛ nə̀nu ǹmyɛ nɛ ń cìní.’

²⁰ “Mɔ̀bɔ́ ń tà-kwã n yí mú wɔ̀: ‘À yó-cə́bal, nyǐ wársɛ́ ǹ yà ǹ pɔ nɛ mɔ́. À yʼà co se kàmə̀-jɛ̃̀ wà, a lyẽ a cĩ́ dɛ̃̌.

²¹ Ǹ gə́ zum dɛ̃´dɛ̃´ mɔ́ ce, ywẽ zɔ nɛ, bʼà yě bə̀ ǹ ya ń kwè kɔn dɛ̀bɛ́ ǹ yə̀ cĩ́, ń jə̀r ǹ gə́ yə̀ má dwì.’

²² “Pyɔ̌ mɔ́ zɛ̃̀ n wɔ̀ mɔ̀: ‘Ǹ də̀ tùntùnnə̀ nántwə̂ yé. Wɔ́ ǹ cìcì nyì-zɔ̀mà nɛ́ à la mʼa kə́ ǹ bùrsí. Ǹ yě bʼà zum dɛ̃´dɛ̃´, à yʼa kwè kɔn dɛ̀bɛ́ à yə̀ cĩ́, a jə̀r à gə́ yə̀ má dwì.

²³ È nə wɔ́ byè yilə, ǹ yə̀ à wársɛ́ pɛ bə cĩ́ sə̀ gə́ mʼa pù mə̀gã̌? Èta, à yʼà mʼa kʼa kwɛ̃̀ a bʼa zwẽ se ǹdə́ sə̀ twírí yə́.’

²⁴ N zɛ̃̀ n wɔ̀ byɛ̀bɛ́ bə̀ yʼà zhǐ gàà mɔ́ nɛ: ‘Zwẽnə wársɛ́ námpɔ́lɛ́ y à yʼà pɔ mɔ mɔ́ cìcì á pə mɔ̀bɔ́ ń zhe dɛ̃´dɛ̃´ mɔ́ nɛ.’

²⁵ “Bə zɛ̃̀ bə wɔ̀ mɔ̀: ‘Yó-cə́bal, sə ń gə́ yà ń jɛ̀rɛ̀ ń zhe shí mú.’

²⁶ “Yó-cə́bal mɔ́ zɛ̃̀ n wɔ̀ bɛ: ‘À nʼâ wə̀l ába: mɔ̀bɔ́ ǹ zhe, bə̀ yʼa pɔ̃́ ń mə́ súlí; sə mɔ̀bɔ́ ǹ bə zhe, bə̀ mʼa zwẽ tɛ̀bɛ́ námpɔ́lɛ́ y ǹ zhe mó myɛ cìcì.’

²⁷ N zɛ̃̀ n súlí n wɔ̀ bɛ: ‘Zana byɛ̀bɛ́ gakó bə̀ yʼà tʼâ yâl bʼà yál bə̀ pyɔ̌ mɔ́, á bʼâ gu à yírh wə.’ ”

Bə̀ cèrhé Yezu Zhərəzalɛm sɔ́má y yó

²⁸ Yezu gə́ byili rə̀myɛ́ n zhɛ̀, n zhǐr n tó bə̀ yé bə̀ mʼê la Zhərəzalɛm.

²⁹ N bə̀ n bwəlse Bɛtəfazhɛ ǹdə́ Betəni. Cɛmɛ nɛ́ nə̀myɛ́ ŋwɛ́nɛ́ pyɔ̀ w bə̀ nʼê byẽ̀ bə̀ Olyivyə́r pyɔ̀ mɔ́ səta. N zɛ̃̀ n twĩ̀ ń kwã-lyì bí bə̀lyè, n wɔ̀ bɛ:

³⁰ “Zhəlnə cɔ w ò ŋwɛ́nɛ́ á yé né mó wə. Á gə tú á nʼá zwì ò wẽ́, á mʼâ nə bə̀nə-bwɛ̀lɛ́ è lyẽ tɛ̃´, lò gwẽ̌ yə̀ kùr è yó cĩ́ gaga yé. Lwə̂rnə y á mʼá bà.

³¹ Lò gə bwə̀rh ába bə̀ wɔ́ byè yil á nʼá lwə̂r yə, sʼá wɔ̀: ‘Cinu zhe è tum.’ ”

³² Bə zhǐr bə vò bə yí bə nə kɔn gakó ǹdə ń gə́ byili bi ní.

³³ Bə̀ gə́ yʼà nʼê lwə̂r bə̀nə-bwɛ̀lɛ́ y yi ní, è cìnə́ bwə̀rh bè bə wɔ̀: “Byè yil á nʼá lwə̂r bə̀nə-bwɛ̀lɛ́ yá?”

³⁴ Bə wɔ̀: “Cinu zhe è tum.”

³⁵ Bə lwə̂r yə, bə zə y bə mʼe bə̀ Yezu sono, bə lyɛ̀lɛ̀ bə̀ gàndɛ́ è yó, bə zɛ̃̀ bə ce n jòm.

³⁶ N zhǐr ń la ǹdə́ lyì bí nʼê lyɛ̀lɛ̀ bə̀ gàndɛ́ tɛ̃´ sɔ́má y yó.

³⁷ Ń gə́ tú ń nə́ ń swé Olyivyəəré pyɔ̀ w n bə̀ ń nə́ ń bwəlse Zhərəzalɛm, ń kwã-lyì bí nánjə̀jóló w gakó jʼa zɛ̃̀ bə̀ nʼê fùù ǹdə́ wu-nyɔ̃̀ nánfɔ̀lɔ̀, bə̀ nʼê kârh bə̀ mʼê cèrhé Yi màmyaarhɛ́ tɛ̀bɛ́ gakó bə̀ yʼà nɔ mɔ́ yilə.

³⁸ Bə̀ yʼà nʼê wə̀lə̀: “Cinu mà n cĩ́ bwəl pyɔ̌ mɔ́ mɔ̀bɔ́ ń bàn ń yil lé yil mó yó! Sə yə̀-zùlə́ yə̀ Arəzana wa! Sə Yi nə còrhó dɛ̃̌ Arəzana wa!”

³⁹ Farɛzhɛ̃ɛ̃bá jàlà byɛ̀bɛ́ bə̀ yʼà ŋwɛ́nɛ́ lyì-zhâ bɛ́ wẽ́ mó wɔ̀ Yezu ni: “Yó-cə́bal, bú ǹ kwã-lyì bí bə yẽ̌ bə̀ sɔ̀ɔ̀rɛ́ nɛ.”

⁴⁰ N zɛ̃̀ n wɔ̀ bɛ: “À nʼâ wə̀l ába: bə̀ gə yẽ̌ bə̀ sɔ̀ɔ̀rɛ́ nɛ, wɔ́ nə́kulə né nə̀ mʼa bya.”

Yezu kúrh Zhərəzalɛm lyì bí ni

⁴¹ Yezu gə́ tú n bwəlse Zhərəzalɛm, n nə cɔ w kâlsɛ́, n zɛ̃̀ ń nə́ ń kúrh ò lyì bí ni ń zhe:

⁴² “Á yə̀ kɔn dɛ̀bɛ́ rə̀ mʼa pə ába yə̀-zùlə́ mó lwar zà yé, á jʼâ kʼá wàr á la rɛ lwar èlâsɛ̃´ yé.

⁴³ Nyǐnə dɛ̃ ŋwɛ́nɛ́ rə̀ bànà, á zwə̀ bé mʼa kə́kɛ́lɛ́ á cɔ w púlə́púlə́, bə pyi á nyí ni.

⁴⁴ Bə̀ mʼa wǔr á jìsí gakó, bə pyárh ába bə gu. Bə̀ tʼâ la jì èdù ga nɛ yõ̌ e zhì dɛ̃̌ yé, bʼâ yə̀ dɛ̃ rɛ́ tɛ̀bɛ́ Yi tú rə gwɛ̃ ába mɔ́ lwar yé.”

Yezu jì wò-yə̀rnə̀ bé Yi jì y kɔ̀nɔ́ w wa

⁴⁵ Yezu zɛ̃̀ n zù Yi jì y kɔ̀nɔ́ w wa, n ji kùr ń nə́ ń jì lyì bí byɛ̀bɛ́ bə̀ yʼà nʼê yè wẽ̀ dé mó gakó n ce pwẽ̀ nè, n wɔ̀ bɛ:

⁴⁶ “Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: ‘À jì y bʼa yə̀ Yi-co jì.’ ” N zɛ̃̀ n súlí n wɔ̀ bɛ: “Ámyɛ̌ zɛ̃̀ á zə èmyɛ́ mɔ́ e jǐrh ŋwɔ̀là jàà.”

⁴⁷ Ń yà ń nə́ ń cèrhè bè kàrmɔ̀ Yi jì y kɔ̀nɔ́ w wẽ́ twéé gakó, sə vwĩ̀-zwə́lnə bé yé né cìnə́ bé ǹdə́ Muyiisi nyə́ né byilnə bé ǹdə́ cɔ w yó-cìnə́ bé yʼà nʼê pyà bə̀ gə́ mʼa tó né bə gu mu.

⁴⁸ Sə bə̀ yʼà yə̀l bə̀ gə́ mʼa wɛ̀rhɛ́ nɛ́ bə zə mɔ yé, bə̀ cɔ w lyì bí gakó yʼà nʼê cili ń zɔ̀mà nɛ́ náàcɛ̀nɛ́.