Lwiki 16 - Lyélé

Jɛ̃̀-kɔn yìlnə̀ səswalá

¹ Yezu zɛ̃̀ n ji səswalá dõ n pə ń kwã-lyì bí ni n wɔ̀: “Nə̀cɛ̀m-bal mə̀dù ń yà ń kwè lò mə̀dù n cĩ́ ń jɛ̃̀-kɔn dɛ́ nyí ni ń nə́ ń yìlì. Lyì zɛ̃̀ bə bʼe byili mu bə̀ mɔ̀bɔ́ ń nə́ ń yìlì ń jɛ̃̀-kɔn dɛ́ nɛ mɔ́ nə́ ń ywàl lɛ̀.

² N zɛ̃̀ n byẽ̀ mò n wɔ̀ mɔ̀: ‘Etər ǹ nə́ ǹ wɛ̀rhɛ́ nɛ́? À nyɛ̀ɛ̀ bə̀ ǹ nə́ ǹ ywàl à jɛ̃̀-kɔn dɛ́. Byili ni kɔn gakó gə́ tó né, bə̀ kɔn zhí zà, ǹ kə́ ǹ tá ǹ la à jɛ̃̀-kɔn dɛ́ nɛ yìlù yé.’

³ “Jɛ̃̀-kɔn dɛ́ yìlnə̀ mó zɛ̃̀ n wɔ̀ ń wẽ́: ‘À yó-cə́bal mɔ́ nə́ ń vùr nè ń tum dí wə, e jʼà bə jàn zhe à la vwál yé, e jà lwə̀lə́ y myɛ cìzhìl zhe ne. Wɔ́ etər à mʼa wɛ̀rhɛ́ nɛ́ èlâsɛ̃´?

⁴ À yě à gə́ mʼa wɛ̀rhɛ́ nɛ́, mùnì ń gə vùr nè tum dí wə, sʼa nə lyì bə zwẽ ne bə̀ sõ.’

⁵ “N zɛ̃̀ n byẽ̀ byɛ̀bɛ́ bə̀ zhe ń yó-cə́bal mɔ́ jimə né mó mə̀dù mə̀dù, n bwə̀rh nã́yə́ə́ mó n wɔ̀: ‘Bə̀kɔ́n ǹ mə̂ sə́ càrh à yó-cə́bal mɔ́ nɛ?’

⁶ Mɔ̀bɔ́ ń zhe jim dí mú zɛ̃̀ n wɔ̀ mɔ̀: ‘Nwə̃̌ nə̀bwánsɛ zɔ̌m.’ Nə̀cɛ̀ndɛ́ yìlnə̀ mó zɛ̃̀ n wɔ̀ mɔ̀: ‘Zwẽ ǹ sɛ́bɛ́ rɛ́ ń jòm tɛ̃´ ń kɛ̃ làlà bə̀ wɔ́ nə̀bwánsɛ shí-ènu jim ǹ zhe.’

⁷ “N bwə̀rh ń dõ mó n wɔ̀: ‘Bə̀kɔ́n ǹmyɛ mə̂ sə́ càrh à yó-cə́bal mɔ́ nɛ?’ N wɔ̀ mɔ̀: ‘Jíjí ywə́ə́le zɔ̌m.’ Jɛ̃̀-kɔn dɛ́ yìlnə̀ mó zɛ̃̀ n wɔ̀ mɔ̀: ‘Zwẽ ǹ sɛ́bɛ́ rɛ́ ń kɛ̃ bə̀ wɔ́ ywə́ə́le shə́-lyɛlɛ jim ǹ zhe.’

⁸ “Yó-cə́bal mɔ́ cèrhé nə̀cɛ̀ndɛ́ yìlnə̀ mó ǹdə́ ń yǔyǔ mú ga, surhə né nyɛ̀bɛ́ ń wɛ̀rhɛ́ mɔ́ yilə. Nyǐnə lũ w kɔ̀bɔ́ lyì bí zhe surhə ǹdə́ dwã du byɛ̀bɛ́ bə̀ wɔ́ pwẽ̀ dé lyì bí mɔ́.”

⁹ Yezu zɛ̃̀ n súlí n wɔ̀: “Sə àmyɛ́ nʼâ wə̀l ába: lũ w kɔ̀bɔ́ sə̀byǐ mú nʼê dwĩ̀ lò. Sə ǹdə́ rə̀myɛ́ ga, zəna mɔ á pyà yò-ècɔ̀nɔ̀ ǹdə́ lyì bí, mùnì ga mə̀ gə tú mə̀ mwìrì ába yi ní, sə Yi zwẽ ába nyǔ mə̀ tʼâ la zhɔ̌ jàà wà.

¹⁰ Lò mɔ̀bɔ́ ń wɔ́ zhə̀n-cí kɔn námpɔ́lɛ́ yilə, rə̀-ná-cí mà n yə̀ zhə̀n-cí kɔn nánfɔ̀lɔ̀ myɛ yilə, sə lò mɔ̀bɔ́ ń də̀ zhə̀n-cí kɔn námpɔ́lɛ́ yilə, ń tá ń la zhə̀n-cí yál kɔ̀n nánfɔ̀lɔ̀ myɛ yil yé.

¹¹ Ámyɛ̌ gə yə̀ zhə̀n-cìnə́ yàl ǹdə́ lũ w kɔ̀bɔ́ sə̀byǐ mú, wɔ́ mɔ̌ ń mà n pə ába nə̀cɛ̀ndɛ́ zhə̀n zhə̀n ga mɔ́?

¹² Á gə yə̀ zhə̀n-cìnə́ yàl ǹdə́ á dõ kɔna, mɔ̌ ń mà n pə ába tɛ̀bɛ́ rə̀ wɔ́ á cìcì nyân dɛ́ mɔ́?

¹³ “Tùntùnnə̀ mə̀dù wàr ǹ mʼâ tó yó-cìnə́ bə̀lyè pùbùlə̀ nè yé. Ǹ mʼâ súl mə̀dù yə́, ń swéné ń dõ mó, ráá ǹ mʼâ jòm ǹdə́ mə̀dù yə́, ń fulsi ń dõ mó. Á wàr á mʼâ nʼá tó Yi ni, á jʼâ nʼá tó sə̀byâ myɛ nɛ yé.”

¹⁴ Farɛzhɛ̃ɛ̃bá yʼà nʼê cili Yezu zɔ̀mà nɛ́, sə bə̀ gə́ yʼà só wársɛ dɛ̃´dɛ̃´ mɔ́ ce, bə̀ yʼà nʼê mɔ̀n mɔ̀.

¹⁵ Yezu zɛ̃̀ n wɔ̀ bɛ: “Ámyɛ̌ wɔ́ lyì byɛ̀bɛ́ bə̀ nʼê zə bə̀ cìn bə̀ yàl wu-cángá cìnə́ numbyínsi yírhə́ wə. E jà Yi yě á wun ní, bə̀ kɔn dɛ̀bɛ́ rə̀ wɔ́ kɔ̀-twə̂ numbyínsi yírhə́ wə, rə̀ wɔ́ kɔ̀-bəyɔ̀lɔ̀ Yi yírh wə.”

Dɛ̃̌ ǹdə́ cɛ y lyɔ̃ wɔ́ nàná du Muyiisi nyə́ né rə̀dù myɛ cìcì tɛ̃´ tu

¹⁶ Yezu súlí n wɔ̀: “Muyiisi nyə́ né ǹdə́ Yi nyì-zwennə bé yàl nɛ́, kɔn mʼe yí Zhã-Bətiisi. Sə kɔn gə́ ju kùr rə̀myɛ́ yi ní ga, bə̀ nʼê bwə̀l Yi tənà y yò-ècɔ̀nɔ̀ nyí rí, sə lò gakó nə́ ń pyà n zù è wẽ́ ǹdə́ jàn.

¹⁷ “Dɛ̃̌ ǹdə́ cɛ lyɔ̃ wɔ́ nàná du Yi nyə́ né pwèrhè myɛ cìcì tɛ̃´ tu.”

¹⁸ Yezu súlí n wɔ̀: “Bal mɔ̀bɔ́ ǹ zhɔ̃̀ ǹ kɛ̃ ń vùr mò ń zɛ̃̀ ń jí kɛ̃ dõ, wɔ́ fwə̂l ǹ nə́ ǹ fwə̀lə́, sə bal mɔ̀bɔ́ ǹ jú kɛ̃ mɔ̀bɔ́ ń byal zhɔ̃̀wà, ǹmyɛ nə́ ǹ fwə̀lə́.”

Nə̀cɛ̀m-bal námməlwɛ̀lɛ́ ǹdə́ nə̀mɔ̀ Lazaarɛ səswalá

¹⁹ Yezu zɛ̃̀ n ji səswalá n pə bɛ n wɔ̀: “Nə̀cɛ̀m-bal mə̀dù ń yà ń ŋwɛ́nɛ́, ń nə́ ń zwì gàndɛ̀ tɛ̀bɛ́ rə̀ càn, rə̀ ye y jʼà cɛ̀, ń nə́ ń jí kɔn dɛ̀bɛ́ rə̀ nyɛ̀ twéé gakó.

²⁰ Sə nə̀mɔ̀ mə̀dù myɛ yà ń ŋwɛ́nɛ́ ń yíl Lazaarɛ, ń yala nɛ́ gakó yʼà wɔ́ nɔr dúdú, ń yà ń nə́ ń twí ń jòm nə̀cɛ̀m-bal mɔ́ bwə̀rə̀ y nyí ni.

²¹ Ń yà ń nə́ ń yâl kùjú w yəywaalɛ́ tɛ̀bɛ́ rə̀ yʼà nʼê lwé tɛ̃´ nə̀cɛ̀m-bal mɔ́ kùr w mó myɛ cìcì n jí, e jà kǔlsi myɛ yʼà nʼê jə̀l ń nɔɔrɛ́.

²² “Sə nə̀mɔ̀ mɔ́ gə́ tú n cì, màlɛ́kabá kwè mò bə vò bə cĩ́ Abəraham yala nɛ Arəzana wa. Nə̀cɛ̀m-bal mɔ́ myɛ bə̀ n cì. Bə ce mo,

²³ sə ńmyɛ̌ zhə̀l nɔ̀nɔ̀ jàà wà. N zɛ̃̀ n zhì gàà mɔ́ n kwẽ̌ ń la nyǔ, n pwírí Abəraham ń ŋwɛ́nɛ́ pyépyé. Lazaarɛ zhǐ ń yala nɛ.

²⁴ N zɛ̃̀ n búbwéé n wɔ̀: ‘À da Abəraham, dǔr à nɔ̀nɔ̀, sə́ twĩ̀ Lazaarɛ n mɔ́rh ń jə̀fɔ́lɛ́ nɛ̃̌ wa, n bə̀ n twərh à mə̀jòlò w yó o zhìlì. Nyǐ myǐn mú zù nì dɛ̃´dɛ̃´.’

²⁵ “Abəraham zɛ̃̀ n wɔ̀ mɔ̀: ‘À byǐ, lyǐrh bə̀ ǹ jú nyɛ̀n ǹdə́ ǹ ŋwɛ́nɛ́ cɛ yó, sə Lazaarɛ jú zúzúnú. Sə èlâsɛ̃´, wɔ́ ńmyɛ̌ wu ni Yi nʼê swẽ́, sə ǹmyɛ́ zhe nɔ̀nɔ̀.

²⁶ Kɔn súlí myɛ, gɔ́rɔ́ nánlyilyìmú ŋwɛ́nɛ́ nə́myɛ̌ ǹdʼámyɛ̌ cəcəl wə. Rə̀myɛ́ ce lò wàr ń zhì nyə̀má ń twí á sõ yé, lò kə́ ń wàr ń zhì á sõ ń twí nyə̀má yé.’

²⁷ “Nə̀cɛ̀m-bal mɔ́ zɛ̃̀ n wɔ̀: ‘À da, è gə wɔ́ èta, à nʼâ lwə̀l mó bə̀ ǹ twĩ̌ Lazaarɛ n vò cɛ yó à da sõ kɛ̀lɛ́ wa;

²⁸ nyǐ à zhe da-byâ bə̀nu, n byili bi, mùnì ga bə̀myɛ bə̀kʼa bə̀ nɔ̀nɔ̀ w kɔ̀bɔ́ wẽ́ yé.’

²⁹ “Abəraham zɛ̃̀ n wɔ̀: ‘Muyiisi ǹdə́ Yi nyì-zwennə bé ŋwɛ́nɛ́ ǹdə́ bɛ. Bə̀ gə nʼê yâl, sə bə cili bə̀myɛ́ zɔ̀mà nɛ́.’

³⁰ “Nə̀cɛ̀m-bal mɔ́ zɛ̃̀ n wɔ̀: ‘È də̀ èta yé à da Abəraham. Lò gə shí cùùrì wẽ́ n zhə̀l bə̀ sõ, fòró bə zwẽ nyí bə pyìrhí bə̀ wun ní.’

³¹ “Abəraham zɛ̃̀ n wɔ̀ mɔ̀: ‘Bə̀ gə yə̀ Muyiisi ǹdə́ Yi nyì-zwennə bé zɔ̀mà nɛ́ zwẽ, bá lò gə shí cùùrì wẽ́ ń zhə̀l bə̀ sõ myɛ, bə̀ tʼâ la ń zɔ̀mà nɛ́ zõ yé.’ ”