Yò-ècɔ̀nɔ̀ nyí rí Zhã kɛ̃ mɔ́ 21 - Lyélé

Yezu lyí ń kwã-lyì bí Təbɛrəyaadɛ mwə̃́ y yó

¹ Rə̀myɛ́ kwã nɛ́, Yezu kə́ n bə̀ n lyí ń kwã-lyì bí. Sə rə̀myɛ́ yʼà wɔ́ Təbɛrəyaadɛ mwə̃́ y yó. Nyǐnə ń gə́ tó né n mə n lyí bi:

² è yʼà wɔ́ Shəmɔ Pyɛɛrɛ ǹdə́ Tɔma (bə̀ nʼê byẽ̀ mò bə̀ “Nə̀cílí”) ǹdə́ Natanayəə (ń shí Kana, Gəlile tənà y wa) ǹdə́ Zebede byâ bɛ́, ǹdə́ Yezu kwã-lyì dwã bə̀lyè. Bə̀ gakó yʼà zhǐ ǹdə́ dwã.

³ Shəmɔ Pyɛɛrɛ zɛ̃̀ n wɔ̀ bɛ: “À la vò a gwɛ̃̀.” Bə wɔ̀ mɔ̀: “Nə́myɛ mʼâ tó mó nə́ vò.” Bə zhǐr bə vò bə zù bǔ-bwəl lé wə, bə gwɛ̃̀ gwɛ̃̀, sə bə̀ yə̀ kaka zal cəcɛ̃ y èmyɛ́ wẽ́ yé.

⁴ Cɛ y gə́ tú è nʼê lɛ́ yó né, Yezu bə̀ ń zhǐ bù-cǔ w yó, sə ń kwã-lyì bí yʼà yə̀l bə̀ wɔ́ ńmyɛ̌ yé.

⁵ N zɛ̃̀ n bwə̀rh bè n wɔ̀: “À bə̀sɔ́ná, á yə̀ mɔ́mɔ̌rh zal nà?” Bə wɔ̀ mɔ̀: “Ɔ̃́ʼɔ̃.”

⁶ N zɛ̃̀ n wɔ̀ bɛ: “Dulnə gùndwǐ rí bǔ-bwəl lé jə̀jĩ́ sõ, á bʼâ zə kɔna.” Bə zɛ̃̀ bə dul le, bə zə mɔ́mɔ̌rh nánzhəzhɔ̌, bə̀ kʼê wàr rɛ̀ sə bə vwɛ̃ yé.

⁷ Yezu kwã-lò mó mɔ̀bɔ́ ń yà ń só mó zɛ̃̀ n wɔ̀ Pyɛɛrɛ nɛ: “Nyǐ wɔ́ Cinu.” E jà Shəmɔ Pyɛɛrɛ yà ń lwə̂r ń kàmə̀-zwǐ y n cĩ́ tɛ̃´. Sə ń gə́ nyɛ̀ɛ̀ bə̀ wɔ́ Cinu, n kwè y n zù, n kwè ń cã̌-tɔ̀nɔ̀ w n lyẽ ń cã̌ nɛ́, n zɛ̃̀ n fwɛ̃´ mwə̃́ y wə.

⁸ Yezu kwã-lyì bí dwã bɛ́ yʼà bə nyɛ ǹdə́ bù-cǔ w yé. Bə̀ yʼà mə̂ dwã ǹdə́ mɛ́tər zɔ̌m. Bə zɛ̃̀ bə zhì bǔ-bwəl lé wẽ́ bə vwɛ̃ gùndwǐ rí, rə̀ yʼà sú ǹdə́ mɔ́mɔ̌sɛ́ mɔ́, bə mʼe bə̀ bù-cǔ w nyí ni.

⁹ Bə̀ gə́ du bù-cǔ w yó, bə pwírí myǐn bə̀ jéé tɛ̃´ ǹdə́ émɔ̌rh mə̀ wẽ́. Bə nə búúri myɛ mə̀ sarh nɛ.

¹⁰ Yezu zɛ̃̀ n wɔ̀ bɛ: “Vǔrnə émɔ̌sɛ́ á zɔ mɔ́ á mʼá bà.”

¹¹ Shəmɔ Pyɛɛrɛ zɛ̃̀ n ká n zù bǔ-bwəl lé wə, n lwə̂r gùndwǐ rí bǔ-bwəl lé ne, n vwɛ̃ dɛ n mə n du bù-cǔ w yó, rə̀ yʼà sú ǹdə́ mɔ́mɔ̌rh nánfwààlɛ̀, zɔ̌m ǹdə́ shí-ènu ǹdə́ sə̀tɔ̀. Sə ǹdə́ émɔ̌sɛ́ yʼà já dɛ̃´dɛ̃´ ga, gùndwǐ rí yə̀ kâr yé.

¹² Yezu wɔ̀ bɛ: “Bànà á dɔ̃̀ émɔ̌sɛ́ ǹdə́ búrú wə́.” Sə bə̀ gə́ yʼà yě bə̀ wɔ́ Cinu mú ce, mə̀dù ga yə̀ ŋwɛ̀nɛ́ n bwə̀rh mò bə̀ ǹmyɛ́ wɔ́ mɔ̌ yé.

¹³ Yezu zɛ̃̀ n yí n kwè búrú w n mə n tə̀ bɛ́, n zɛ̃̀ n kwè émɔ̌sɛ́ myɛ n mə n tə̀ bɛ.

¹⁴ Rə̀myɛ́ yàl Yezu twər rə̀tɔ̀ nyân dɛ́ ń byili ń cìn ń kwã-lyì bí ni ń bùrhù mú kwã nɛ́.

Yezu zhərh ǹdə́ Pyɛɛrɛ

¹⁵ Bə̀ gə́ tú bə dɔ̃̀ búrú w ǹdə́ mɔ́mɔ̌sɛ́ bə zhɛ̀, Yezu zɛ̃̀ n bwə̀rh Shəmɔ Pyɛɛrɛ n wɔ̀: “Zhã byǐ Shəmɔ, ǹ só ne du byɛ̀bɛ́ bə̀ ŋwɛ́nɛ́ nyɔ̀nɔ̀ mɔ́ gakó?” Pyɛɛrɛ wɔ̀ mɔ̀: “Ɔ̃̀ɔ̃̂, ǹ yě bʼà só mó.” Yezu wɔ̀ mɔ̀: “Kál à pyì-bwâlsɛ́.”

¹⁶ N zɛ̃̀ n kə́ n bwə̀rh mò n wɔ̀: “Zhã byǐ Shəmɔ, ǹ só ne?” Pyɛɛrɛ kə́ n wɔ̀ mɔ̀: “Ɔ̃̀ɔ̃̂, Cinu, ǹ yě bʼà só mó.” Yezu wɔ̀ mɔ̀: “Kál à pyììsí.”

¹⁷ N kə́ n bwə̀rh mò kə́dò n wɔ̀: “Zhã byǐ Shəmɔ, ǹ só ne?” Yezu gə́ bwə̀rh mò twər rə̀tɔ̀ ga bə̀ ń só mo mó ce ń wu zhìlì. N zɛ̃̀ n wɔ̀ Yezu ni: “Cinu, ǹ yě kɔn gakó. Ǹ yě bʼà só mó.” Yezu wɔ̀ mɔ̀: “Kál à pyììsí.

¹⁸ Zhə̀n zhə̀nà, à nʼâ wə̀l mó: ǹ gə́ yà ǹ gwẽ̌ wɔ́ bal-byǐ yi ní, ǹ yà ǹ nə́ ǹ lyẽ ǹ cã̌-tɔ̀nɔ̀ w ǹ cã̌ nɛ́ ǹ cìcì nì, ǹ nə́ ǹ zhə̀l ǹ gə́ só mə̀gã̌. Sə ǹ gə tú ǹ cɛ ǹ zhɛ̀, ǹ bʼâ zhẽ̌ ǹ jɛ̀sɛ́ dɛ̃̌, lò dõ lyẽ w ǹ cã̌ nɛ́, n zə mɔ́ n vò ǹ gə́ tá ǹ yâl mə̀gã̌.”

¹⁹ Yezu wò èta n mə n byili Pyɛɛrɛ gə́ la nɛ́ cú, sə Yi zùwə́ y mʼa tó ń cu mú dɛnnɛ e du. Ń gə́ wò èta ń zhɛ̀, n zɛ̃̀ n wɔ̀ Pyɛɛrɛ nɛ: “Tó ne”.

²⁰ Bə̀ gə́ zhǐr bə̀ la, Pyɛɛrɛ zɛ̃̀ n pyìrhí, n pwírí Yezu kwã-lò mó mɔ̀bɔ́ ń só mó ń wɔ bə̀ kwã nɛ́ ń bànà. E jà wɔ́ ńmyɛ̌ ń yà ń jě n shɛlɛ Yezu ni kùjú w jú mú yi ní, n bwə̀rh Yezu bə̀ wɔ́ mɔ̌ lò ń la mɔ myìnù mú.

²¹ Pyɛɛrɛ gə́ nɔ mɔ, n bwə̀rh Yezu n wɔ̀: “Cinu, sə mɔ̀bɔ́, etər kɔn la nɛ́ tó ńmyɛ̌ yilə?”

²² Yezu wɔ̀ mɔ̀: “À gə nʼâ yâl bə̀ ń yál nɛ́ kɔn mʼe yí à twírí y nánkwaá yá, ǹ twə́r ŋwɛ́nɛ́ gàà? Ǹmyɛ́ wírí ń tó ne.”

²³ Nyí rí rə̀myɛ́ jʼa yí Yezu kwã-lyì bí gakó bə̀ ńmyɛ̌ mɔ̀bɔ́ Yezu só mó tá ń la cú gaga yé. E jà Yezu yə̀ Pyɛɛrɛ nɛ wə̀l bə̀ ń kwã-lò mó ńmyɛ̌ tá ń la cú gaga yé. Wɔ́ wó n wòwə̀: “À gə nʼâ yâl bə̀ ń yál nɛ́ kɔn mʼe yí à twírí y nánkwaá yá, ǹ twə́r ŋwɛ́nɛ́ gàà?”

²⁴ Wɔ́ Yezu kwã-lò mó ńmyɛ̌ mɔ́ cìcì ń kɛ̃ ywẽ̀ né nyɛ̀bɛ́ gakó ń nə́ ń byili. Sə nə́ yě bə̀ dɛ̀bɛ́ ń nə́ ń byili mú wɔ́ zhə̀nà.

Zhã sɛ́bɛ́ rɛ́ yó-gurə́

²⁵ Yezu wɛ̀rhɛ́ ywẽ̀ dwã nánzhəzhɔ̌. Bə̀ gə yʼà la òdù òdù gakó kãɔ̃, à nʼâ bùl bə̀ nə̀ sábá nɛ́ yʼà wàr lũ w wẽ́ yé.