Yò-ècɔ̀nɔ̀ nyí rí Zhã kɛ̃ mɔ́ 10 - Lyélé

Yezu wɔ́ vwã̌-ènɔ̀n nántwə̂

¹ Rə̀myɛ́ yó, Yezu wòwə̀: “Zhə̀n zhə̀nà, à nʼâ wə̀l ába: lò mɔ̀bɔ́ ń nə́ ń tó pyì-jil lé jàà dõ w ń zwì, ń tá ń tó rə̀ nyí rí, rə̀-ná-cí wɔ́ ŋwɔ̀l-bal, n jà ń wɔ́ vwârhna.

² Sə lò mɔ̀bɔ́ ń nə́ ń tó pyì-jil lé nyí rí ń mə́ ń zwì mú, wɔ́ ńmyɛ̌ ń wɔ́ pyììsí nə̀nɔ̀n mɔ́.

³ Mɔ̀bɔ́ ń nə́ ń yìlì pyì-jil lé ne mó nə́ ń pul pyì-jil lé ń pɛ mɔ ń zwì. Pyììsí nʼê cili ń cəl lé. Ń nə́ ń byẽ̀ sè èdù gakó ǹdə́ è yil. Sə̀ nʼê tó mo sə̀ dwi.

⁴ Ń gə zɔ sɛ ń duwə, ń nə́ ń yàl sə̀ yé né, sə zɛ̃̀ sə tó ń kùrə̀, bə̀ sə̀ yě ń cəl lé párá.

⁵ Sə̀ tʼâ tó lò dõ kùr yé. Sə̀ nʼê dùr sə̀ zhə̀l kwã nɛ́ sə yẽ̌ mo, sə̀ gə́ yə̀l ń cəl lé pár mɔ́ yilə.”

⁶ Yezu ju səswalá y èmyɛ́ n pə bɛ, sə bə̀ yə̀ lwar kɔn dɛ́ tɛ̀bɛ́ ń yà ń nə́ ń yâl n byili mú yé.

⁷ N kə́ n wɔ̀ bɛ: “Zhə̀n zhə̀nà, à nʼâ wə̀l ába: àmyɛ́ à wɔ́ pyì-jil lé nyí rí.

⁸ Byɛ̀bɛ́ bə̀ jɛ̀rɛ̀ nɛ̀ bə bə̀ mɔ́ gakó wɔ́ ŋwɔ̀là, bə̀ jʼà wɔ́ vwârhna, sə pyììsí yə̀ bə̀ cələ né cili yé.

⁹ Àmyɛ́ à wɔ́ pyì-jil lé nyí rí. Mɔ̀bɔ́ ń tó nyí rí rə̀myɛ́ n zù, rə̀-ná-cí mà n nə ń cìnə̀. Ń mà ń nə́ ń zwì, n jà ń nə́ ń dwi ń nɛ kùjú ń jí.

¹⁰ Ŋwɔ̀l-bal wɔ́ ŋwɔ̀lɛ̀ ǹdə́ gu ǹdə́ cɔ̌ dúdú yil ń nə́ ń twí, sə àmyɛ́ túwə́, mùnì numbyínə́ bé zə nyǔ mə bɔrh.

¹¹ “À wɔ́ vwã̌-ènɔ̀n nántwə̂. Vwã̌-ènɔ̀n nántwə̂ nə́ ń pɛ ń myə̂l ń pyììsí yilə.

¹² Sə lò mɔ̀bɔ́ ń də̀ vwã̌-ènɔ̀n, wɔ́ kwé bə̀ kwè mò bə̀ nʼê kwɛ̃̌. Pyììsí gə́ də̀ ńmyɛ̌ nyə̂rh mɔ́ ce, ń gə nɔ gɔ-kùlí è bànà, n dùr n yẽ̌ se, gɔ-kùlí y zù sə̀ wẽ́, e zə sə̀ jàlà, shɛ̀bɛ́ sə̀ dàl mɔ́ làà dwã nɛ.

¹³ Wɔ́ pyììsí gə́ də̀ ńmyɛ̌ nyə̂rh mɔ́ yil ń nə́ ń dùr ń yẽ̌ se, ń tá ń gá sɛ yé.

¹⁴ “Àmyɛ́ wɔ́ vwã̌-ènɔ̀n nántwə̂. À yě à pyììsí párá, à pyììsí myɛ yě à párá,

¹⁵ ǹdə à Da gə́ yě à párá, àmyɛ jʼà yě à Da pár nɛ́. À nʼâ pɛ à myə̂l lé à pyììsí yilə.

¹⁶ À zhe pyììsì dwã, sə̀ gwẽ̌ tɛ̀nɛ́ jil lé tɛ̀bɛ́ wẽ́ yé. Sə wɔ́ nyɔ́ɔ́ ǹdə́ nɛ bʼà zə sə̀myɛ a bà a ce né, sə cili à cəl lé; pyì-jil lé yə̀ rə̀dù sá, sə vwã̌-ènɔ̀n mɔ́ myɛ yə̀ mə̀dù sá.

¹⁷ “À Da só ne, à gə́ nʼâ pɛ à myə̂l lé mùnì ga a kʼa nə rɛ́ mɔ́ yilə.

¹⁸ È də̀ lò ń la à myə̂l lé vǔr yé. Wɔ́ àmyɛ́ cìcì à la rɛ pɔ. À wɔ̌ à pɛ rɛ, e jʼà wɔ̌ à kʼâ zwẽ de. Wɔ́ nyí rí rə̀myɛ́ à Da pɔ nɛ.”

¹⁹ Zhwifubá gə́ nyɛ̀ɛ̀ zɔ̀mà nɛ́ nə̀myɛ́ mɔ́, nyə̀-pâr kʼe zɛ̃̀ bə̀ cəcəl wə, bə pɔr dwã nɛ.

²⁰ Bə̀ nánzhəzhɔ̌ yʼà nʼê wə̀lə̀: “Nə̀cílí námməlwɛ̀lɛ́ zhe mo. Ń wɔ́ nyə̀nyà. Byè yil á nʼá cili ń zɔ̀mà nɛ́ myɛ̌?”

²¹ Bə̀ dwã zɛ̃̀ bə̀ zhe: “Zɔ̀mà nɛ́ nyɛ̀bɛ́ də̀ lò mɔ̀bɔ́ nə̀cílí námməlwɛ̀lɛ́ zhe mo zɔ̀mà yé. Nə̀cílí námməlwɛ̀lɛ́ wɔ̌ lyìlyə̂r yírhə́ è la púr?”

Zhwifubá yə̀ shɛ̀nɛ́ bə zwẽ nyí bə̀ Yezu wɔ́ Yi Byǐ yé

²² Bə̀ yʼà nʼê jí Zhərəzalɛm Yi jì y bwəl lé cṹ mú yò lyǐrh címsi, e jà è yʼà wɔ́ wàr yi.

²³ Sə rə̀myɛ́ yi ní, ǹdə́ Yezu yà ń nə́ ń jíl Saləmɔ zɔ́nɔ́ w wa, Yi jì y kɔ̀nɔ́ w wẽ́.

²⁴ Zhwifubá bə̀ bə kə́kɛ́lɛ́ mɔ, bə wɔ̀ mɔ̀: “Ǹ la yẽ̌ nə́ba nə́ rʼé ce tə́tɔ̀ná kɔn mʼe yí dǒ? È gə wɔ́ ǹmyɛ́ ǹ wɔ́ Kristə mó, sə́ byili nə́ba pamparɛ̃ɛ̃.”

²⁵ Yezu wɔ̀ bɛ: “À jɛ̀rɛ̀ a byili ri ába, sə á tʼá zwẽ nyí yé. Tumə né nyɛ̀bɛ́ gakó à nʼâ twĩ̀ à Da yil lé yil mó nʼê byili bə̀ tɛ̀bɛ́ à nʼâ byili mú wɔ́ zhə̀nà.

²⁶ Sə á gə́ də̀ àmyɛ́ pyììsí mú ce á tʼá zwẽ nyí yé.

²⁷ À pyììsí nʼê cili à cəl lé. À yě sə̀ párá, sə̀ nʼê tó ne,

²⁸ sə à nʼâ pɛ sɛ nyǔ mɔ̀bɔ́ mə̀ tʼâ la zhɔ̌. Sə̀ tʼâ la cú gaga yé, sə lò myɛ wàr sɛ̀ ń la vwârh à jɔ̃̀ w yé.

²⁹ Wɔ́ à Da ń pɔ sɛ nɛ, e jà à Da du kɔn gakó. Rə̀myɛ́ ce, lò wàr sɛ ń la vwârh à Da jɔ̃̀ w yé.

³⁰ Àmyɛ́ ǹdə́ à Da ga wɔ́ rə̀dù.”

³¹ Rə̀myɛ́ yó, Zhwifubá kʼe pwà nə́kulə bə̀ la mʼe dul Yezu.

³² N zɛ̃̀ n wɔ̀ bɛ: “À twĩ̀ tùm-ècɛ̀nà nánzhəzhɔ̌ á yírh wə, ǹdə́ à Da jàn. È nə zɛ̃̀ wɔ́ dɛ̌ yil á nʼá yâl á dul ne ǹdə́ nə́kulə á gu?”

³³ Bə wɔ̀ mɔ̀: “È də̀ tùm-ècɛ̀nà nɛ́ rə̀dù ga yil nə́ rʼé yâl nə́ dul mó nə́ gu yé. Wɔ́ ǹ gə́ nə́ ǹ tùrh Yi mú è ce, bə̀ ǹmyɛ́ ǹ wɔ́ numbyíní, ń jà ǹ nə́ ǹ zə ǹ cìn ǹ myɛrhɛ Yi.”

³⁴ Yezu wɔ̀ bɛ: “Bə̀ kɛ̃ á nyə́ né sɛ́bɛ́ rɛ́ wẽ́ bə̀ Yi wòwə̀: ‘Ámyɛ̌ mə̀dù gakó wɔ́ yi.’

³⁵ E jà nyə́ né sɛ́bɛ́ rɛ́ də̀ yõ̌ kɔn yé. Sɛ́bɛ́ rɛ́ rə̀myɛ́ gə nʼê byẽ̀ byɛ̀bɛ́ bə̀ cili Yi zɔ̀mɛ̀ rɛ́ mɔ́ mə̀dù mə̀dù gakó bə̀ yi,

³⁶ á nə wɔ̌ á wə̀l bʼà nʼâ tùrh Yi, à gə́ wò bʼà wɔ́ Yi Byǐ mú yilə, e jà wɔ́ Yi rə̀ cír ne rə twĩ̀ lũ w wə?

³⁷ “À gə tʼâ twĩ̀ tumə né à Da pɔ nɛ nyí bʼà twĩ̌ mú, sʼá bə̀kʼá zwẽ à zɔ̀mà nɛ́ yé.

³⁸ Sə à gə nʼâ twĩ̀ tumə né nə̀myɛ́, bá á gə tʼá zwẽ à zɔ̀mà nɛ́ myɛ, sʼá zwẽ nyí tumə né nə̀myɛ́ mɔ́ yilə, sʼá lwar náàcɛ̀nɛ́ bʼà Da ŋwɛ́nɛ́ à wẽ́, àmyɛ jʼà ŋwɛ́nɛ́ à Da wẽ́.”

³⁹ Zhwifubá kʼe zɛ̃̀ bə̀ nʼê pyà ń zal, sə ń lú bə̀ jɔ̃̀ wà.

⁴⁰ Rə̀myɛ́ kwã nɛ́, n kə́ n zhǐr n vò Zhɔrdɛ̃ bwǐ y èpákɛ̀, Zhã gə́ yà ń nə́ ń pɛ nɛ̃̌-shɔ lyì bí ni mə̀gã̌ mɔ́, n mɛ̃ gàà.

⁴¹ Lyì nánzhəzhɔ̌ yʼà nʼê twí ń sono, bə̀ nʼê wə̀lə̀: “Zhã yə̀ màmyɔ òdù ga wɛ̀rhɛ́ yé, sə kɔn dɛ̀bɛ́ gakó ń zɔ̀m bal mɔ́ mɔ̀bɔ́ shò-kwã nɛ́ mɔ́ wɔ́ zhə̀nà.”

⁴² Sə lyì nánzhəzhɔ̌ zù mù gàà.