3 Zhã 1 - Lyélé

¹ À dɔwa nántwə̂ Gəyuusi, à só mó zhə̀n zhə̀nà, wɔ́ àmyɛ́ gùlú w yé né cə́bal mɔ́ à nʼâ kɛ̃ sɛ́bɛ́ rɛ́ tɛ̀bɛ́ à la mɔ́ pɔ.

² Dɔwa nántwə̂, à nʼâ lwə̀l Yi ni bə̀ rə̀ ce kɔn gakó yə̀ náàcɛ̀nɛ́ ǹ sõ, sə rə pə ǹ yala nɛ́ bəsàzùlí ǹdə ǹ tùntwə̃̀ə̃̀ né gə́ càn Yi yírh w né.

³ Lyì tú bə wɔ̀ nɛ̀ bə̀ ǹ zhǐ zhə̀n dɛ́ sɔ́má y yó kẽkẽ, ǹ nə́ ǹ wɛ̀rhɛ́ ǹdə rə̀ gə́ nʼê byili ní. Rə̀myɛ́ ce, à wu nyɛ̀ dɛ̃´dɛ̃´.

⁴ À gə nyɛ̀ɛ̀ bʼà byâ bɛ́ ŋwɛ́nɛ́ zhə̀n sɔ́má yó, rə̀myɛ́ nʼê pɛ nɛ wu-nyɔ̃̀ dɛ̃´dɛ̃´ du.

⁵ Dɔwa nántwə̂, ǹ nə́ ǹ nyǐ Kristə-lyì bí yò ǹdə Kristə-lò gə́ mə̂ sə n wɛ̀rhɛ́ nɛ́, ǹdə́ bə̀ wɔ́ zhələ ga.

⁶ Bə̀ byili ǹ sónó w yò Kristə-lyì gùlú w yé né. Sɛ̃ bɛ ǹdə Yi gə́ nʼê yâl nɛ́ bə bʼe kwè bə̀ sɔ́má yá,

⁷ bə̀ wɔ́ Kristə yil lé yil bə̀ ŋwɛ́nɛ́ sɔ́má y yó. Sə bə̀ yə̀ shɛ̀nɛ́ bə zwẽ lyì byɛ̀bɛ́ bə̀ yə̀l Yi rí tɛ̀bɛ́ rə̀ wɔ́ zhə̀n mɔ́ pár jɛ̃̀-kɔn yé.

⁸ Nə́myɛ̌ mə̂ sə nə́ sɛ̃ lyì bí bə̀myɛ́ mɔ́ dwí rí ni nə́ twĩ̀ zhə̀n dɛ́ byilu yilə.

⁹ À kɛ̃ zɔ̀mà màngɛlɛ́ a pə Kristə-lyì gùlú w lyì bí ni, sə Jətərəfu nə́ ń yâl n yə̀ á gùlú w yé né cə́bal mɔ́. Ń tá ń yâl n shɛ̀nɛ́ n zwẽ kɔn dɛ́ dɛ̀bɛ́ à byili mú yé.

¹⁰ Rə̀myɛ́ ce, à gə túwə́, à bʼa zɔ̀m kɔn dɛ̀bɛ́ gakó ń nə́ ń wɛ̀rhɛ́ mɔ́ yò. Ń nə́ ń tó dɛ̃̌ ń zhìlì nə́ yilə. Rə̀myɛ́ yə̀ ń yírh swí yé. Ń bə shɛ̀ Kristə-lyì bí dwã bɛ́ zhəəle zõ, n jà ń bə shɛ̀ bə̀ lò dõ myɛ zwẽ bə̀ zhəəle yé, n jà ń nə́ ń jì bì gùlú w myɛ wẽ́.

¹¹ Dɔwa nántwə̂, bə̀ká kwè lwɛlɛ sɔ́má yé. Kwě cɛ̀nɛ̀ sɔ́má, bə̀ lò mɔ̀bɔ́ ń nə́ ń wɛ̀rhɛ́ cɛ̀nɛ̀, rə̀-ná-cí wɔ́ Yi lò, sə lò mɔ̀bɔ́ ń nə́ ń wɛ̀rhɛ́ lwɛlɛ, rə̀-ná-cí yə̀l Yi pár yé.

¹² Lyì bí gakó nʼê zɔ̀m Dəmətərəyuusi yil náàcɛ̀nɛ́, bə̀ ń nə́ ń wɛ̀rhɛ́ ǹdə zhə̀n dɛ́ gə́ nʼê byili ní. Nə́myɛ cìcì mú nʼé zɔ̀m ń yil náàcɛ̀nɛ́. E jà ǹ yě bə̀ kɔn dɛ́ dɛ̀bɛ́ nə́ rʼé byili mú wɔ́ zhə̀nà.

¹³ Ywẽ̀ nánzhəzhɔ̌ gwẽ̌ ŋwɛ́nɛ́ à la mɔ́ byilu, sə à tʼâ yâl a kɛ̃ nɛ sɛ́bɛ́ wẽ́ a pɔ̃́ yé.

¹⁴ À cìcì nʼâ yâl a bə̀ á sõ làlà, nə́ jòm tɛ̃´ nə́ zɔ̀m.

¹⁵ Yi mʼa pɔ̃́ yə̀-zùlə́! Ǹ dɔwabá gakó nʼê ce mó. Ce nə́myɛ dɔwabá byɛ̀bɛ́ bə̀ ŋwɛ́nɛ́ á sõ mó mə̀dù mə̀dù gakó ń pə nə́ba.