ຕີໂຕ 2 - ພຣະຄຳພີລາວສະບັບສະໄໝໃໝ່ເຮັດຄວາມດີເພື່ອເຫັນແກ່ຂ່າວປະເສີດ 1 ເຖິງຢ່າງໃດກໍຕາມ ເຈົ້າຈະຕ້ອງສອນສິ່ງທີ່ສອດຄ່ອງກັບຄຳສອນອັນມີຫລັກ. 2 ຈົ່ງສອນພວກຜູ້ຊາຍອາວຸໂສໃຫ້ເປັນຜູ້ຮູ້ຈັກຄວບຄຸມອາລົມ, ເປັນຄົນໜ້ານັບຖື, ເປັນຄົນຮູ້ຈັກຄວບຄຸມຕົນເອງ, ເຂັ້ມແຂງໃນຄວາມເຊື່ອ, ໃນຄວາມຮັກ ແລະ ໃນຄວາມອົດທົນ. 3 ໃນທຳນອງດຽວກັນ ຈົ່ງສອນພວກແມ່ຍິງອາວຸໂສໃຫ້ດຳເນີນຊີວິດດ້ວຍຄວາມຢຳເກງ, ບໍ່ເປັນຄົນໃສ່ຮ້າຍປ້າຍສີ ຫລື ເປັນຄົນຕິດເຫລົ້າ, ແຕ່ໃຫ້ສອນສິ່ງທີ່ດີ. 4 ແລ້ວພວກເຂົາຈະສາມາດແອບສອນບັນດາຍິງໜຸ່ມໃຫ້ຮັກຜົວ ແລະ ລູກຂອງຕົນ, 5 ໃຫ້ເປັນຜູ້ຄວບຄຸມຕົນເອງໄດ້ ແລະ ເປັນຜູ້ບໍລິສຸດ, ໃຫ້ເປັນຄົນເອົາໃຈໃສ່ເບິ່ງແຍງເຮືອນ, ມີເມດຕາ ແລະ ຍອມເຊື່ອຟັງຜົວຂອງຕົນ, ເພື່ອຈະບໍ່ມີຜູ້ໃດກ່າວຮ້າຍພຣະທຳຂອງພຣະເຈົ້າໄດ້. 6 ໃນທຳນອງດຽວກັນ, ຈົ່ງໜູນໃຈບັນດາຊາຍໜຸ່ມໃຫ້ຮູ້ຈັກຄວບຄຸມຕົນເອງ. 7 ເຈົ້າຈົ່ງປະພຶດຕົນໃຫ້ເປັນແບບຢ່າງໃນທຸກສິ່ງໂດຍການເຮັດສິ່ງທີ່ດີ. ໃນການສອນຂອງເຈົ້າຈົ່ງສະແດງເຖິງຄວາມສັດຊື່, ຄວາມເອົາຈິງເອົາຈັງ 8 ແລະ ໃຊ້ຖ້ອຍຄຳອັນມີຫລັກທີ່ບໍ່ມີຜູ້ໃດຕຳໜິໄດ້ ເພື່ອວ່າຜູ້ທີ່ຄັດຄ້ານເຈົ້ານັ້ນຈະໄດ້ຮັບຄວາມອັບອາຍ ເພາະພວກເຂົາບໍ່ມີອັນໃດທີ່ຈະເວົ້າບໍ່ດີກ່ຽວກັບພວກເຮົາໄດ້. 9 ຈົ່ງສັ່ງສອນພວກຂ້າທາດໃຫ້ຟັງຄວາມນາຍຂອງຕົນໃນທຸກສິ່ງ, ພະຍາຍາມເຮັດໃຫ້ນາຍພໍໃຈ, ບໍ່ໃຫ້ຖຽງຄວາມນາຍ, 10 ແລະ ບໍ່ໃຫ້ລັກເອົາສິ່ງໃດຂອງນາຍ ແຕ່ສະແດງໃຫ້ເຫັນວ່າພວກເຂົາເປັນຄົນທີ່ໄວ້ໃຈໄດ້ຢ່າງຄົບຖ້ວນ ເພື່ອວ່າພວກເຂົາຈະເຮັດໃຫ້ຄຳສອນເລື່ອງພຣະເຈົ້າອົງພຣະຜູ້ຊ່ວຍໃຫ້ພົ້ນຂອງພວກເຮົານັ້ນງົດງາມໃນທຸກໆທາງ. 11 ເພາະພຣະຄຸນຂອງພຣະເຈົ້າທີ່ໄດ້ປາກົດນັ້ນໄດ້ໃຫ້ຄວາມພົ້ນແກ່ທຸກຄົນ 12 ພຣະຄຸນນີ້ສອນພວກເຮົາກ່າວປະຕິເສດຕໍ່ຄວາມອະທຳ ແລະ ຕັນຫາຝ່າຍໂລກ ແລະ ສອນພວກເຮົາໃຫ້ດຳເນີນຊີວິດໃນຍຸກນີ້ເໝືອນຄົນທີ່ຮູ້ຈັກຄວບຄຸມຕົນເອງ, ເປັນຄົນຍຸຕິທຳ ແລະ ຢູ່ໃນທາງຂອງພຣະເຈົ້າ. 13 ໃນຂະນະທີ່ພວກເຮົາກຳລັງຄອຍຖ້າຄວາມຫວັງອັນເຕັມໄປດ້ວຍພອນ ຄືການມາປາກົດຂອງສະຫງ່າລາສີຂອງພຣະເຈົ້າອົງຍິ່ງໃຫຍ່ ແລະ ພຣະເຢຊູຄຣິດເຈົ້າອົງພຣະຜູ້ຊ່ວຍໃຫ້ພົ້ນຂອງພວກເຮົາ, 14 ຜູ້ໄດ້ສະຫລະພຣະອົງເອງເພື່ອພວກເຮົາທັງຫລາຍ ເພື່ອໄຖ່ພວກເຮົາໃຫ້ພົ້ນຈາກຄວາມຊົ່ວຮ້າຍທັງໝົດ ແລະ ເພື່ອຊຳລະພວກເຮົາໃຫ້ບໍລິສຸດໄວ້ສຳລັບພຣະອົງ ເພື່ອເປັນຄົນຂອງພຣະອົງພຽງຜູ້ດຽວ ແລະ ເປັນຜູ້ກະຕືລືລົ້ນທີ່ຈະເຮັດສິ່ງດີ. 15 ເຫດສະນັ້ນ ເຈົ້າຄວນສອນເລື່ອງເຫລົ່ານີ້. ຈົ່ງໜູນໃຈ ແລະ ຕັກເຕືອນດ້ວຍສິດອຳນາດທັງໝົດ. ຢ່າໃຫ້ຜູ້ໃດດູຖູກເຈົ້າໄດ້. |
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
Biblica, Inc.