ພຣະນິມິດ 20 - ພຣະຄຳພີລາວສະບັບສະໄໝໃໝ່ໜຶ່ງພັນປີ 1 ແລ້ວຂ້າພະເຈົ້າໄດ້ເຫັນເທວະດາຕົນໜຶ່ງລົງມາຈາກສະຫວັນ, ຖືກະແຈຂອງເຫວເລິກ ແລະ ໂສ້ເສັ້ນໃຫຍ່ໃນມືຂອງເພິ່ນ. 2 ເທວະດານັ້ນໄດ້ຈັບພະຍານາກທີ່ເປັນງູດຶກດຳບັນ, ຜູ້ທີ່ເປັນມານຮ້າຍ ຫລື ມານຊາຕານ ແລະ ຜູກມັດມັນໄວ້ໜຶ່ງພັນປີ. 3 ເພິ່ນໄດ້ໂຍນມັນລົງໃນເຫວເລິກ, ໃສ່ກະແຈ ແລະ ປະທັບຕາໃສ່ມັນໄວ້ ເພື່ອບໍ່ໃຫ້ມັນອອກມາຫລອກລວງບັນດາປະຊາຊາດທັງຫລາຍອີກຈົນກວ່າຈະຄົບໜຶ່ງພັນປີ. ຫລັງຈາກນັ້ນ, ມັນຈະຕ້ອງຖືກປ່ອຍອອກມາຊົ່ວໄລຍະສັ້ນໆ. 4 ຂ້າພະເຈົ້າໄດ້ເຫັນບັນລັງຕ່າງໆ ຜູ້ທີ່ນັ່ງຢູ່ເທິງບັນລັງນັ້ນຄືບັນດາຜູ້ໄດ້ຮັບສິດອຳນາດໃຫ້ພິພາກສາ. ແລະ ຂ້າພະເຈົ້າໄດ້ເຫັນຈິດວິນຍານຂອງບັນດາຄົນທັງຫລາຍທີ່ຖືກຕັດຫົວເພາະເປັນພະຍານເລື່ອງພຣະເຢຊູເຈົ້າ ແລະ ເພາະພຣະທຳຂອງພຣະເຈົ້າ. ພວກເຂົາບໍ່ໄດ້ຂາບໄຫວ້ສັດຮ້າຍ ຫລື ຮູບຈຳລອງຂອງມັນ ແລະ ບໍ່ໄດ້ຮັບເຄື່ອງໝາຍຂອງມັນໄວ້ທີ່ໜ້າຜາກ ຫລື ທີ່ມື. ພວກເຂົາໄດ້ກັບຄືນມາມີຊີວິດ ແລະ ຄອບຄອງຮ່ວມກັບພຣະຄຣິດເຈົ້າໜຶ່ງພັນປີ. 5 (ສ່ວນຄົນຕາຍອື່ນໆທີ່ເຫລືອຢູ່ນັ້ນ ບໍ່ໄດ້ກັບຄືນມາມີຊີວິດຈົນກວ່າຈະຄົບໜຶ່ງພັນປີ). ນີ້ແມ່ນການເປັນຄືນມາຈາກຕາຍຄັ້ງທີໜຶ່ງ. 6 ບັນດາຜູ້ຮ່ວມໃນການເປັນຄືນມາຈາກຕາຍຄັ້ງທີໜຶ່ງນີ້ກໍເປັນສຸກ ແລະ ບໍລິສຸດ. ຄວາມຕາຍຄັ້ງທີສອງຈະບໍ່ມີອຳນາດເໜືອພວກເຂົາ, ແຕ່ພວກເຂົາຈະເປັນປະໂລຫິດຂອງພຣະເຈົ້າ ແລະ ຂອງພຣະຄຣິດເຈົ້າ ແລະ ຈະປົກຄອງຮ່ວມກັບພຣະອົງເປັນເວລາໜຶ່ງພັນປີ. ການພິພາກສາມານຊາຕານ 7 ເມື່ອໜຶ່ງພັນປີຜ່ານພົ້ນໄປແລ້ວ, ມານຊາຕານຈະຖືກປ່ອຍອອກມາຈາກບ່ອນຄຸກຂອງມັນ 8 ແລະ ມັນຈະອອກໄປຫລອກລວງບັນດາປະຊາຊາດທັງຫລາຍທົ່ວສີ່ມຸມຂອງໂລກທີ່ເອີ້ນວ່າໂກກ ແລະ ມາໂກກ. ເພື່ອຮວບຮວມພວກເຂົາມາເຮັດການສູ້ຮົບ. ພວກເຂົາມີຈຳນວນຫລວງຫລາຍເໝືອນດັ່ງເມັດຊາຍຢູ່ຕາມຝັ່ງທະເລ. 9 ພວກເຂົາຍົກທັບຂ້າມຄວາມກວ້າງຂອງໂລກ ແລະ ມາອ້ອມຄ້າຍຂອງບັນດາຄົນຂອງພຣະເຈົ້າ ຄືນະຄອນທີ່ພຣະອົງຮັກນັ້ນ. ແຕ່ໄຟຈາກສະຫວັນໄດ້ລົງມາ ແລະ ເຜົາຜານພວກເຂົາ. 10 ແລະ ມານຮ້າຍທີ່ຫລອກລວງພວກເຂົາກໍຖືກຖິ້ມລົງໃນບຶງໄຟທີ່ມີມາດໄໝ້ຢູ່, ບ່ອນທີ່ສັດຮ້າຍ ແລະ ຜູ້ທຳນວາຍປອມໄດ້ຖືກຖິ້ມລົງໄປກ່ອນແລ້ວ. ພວກມັນຈະທົນທຸກທໍລະມານທັງກາງເວັນ ແລະ ກາງຄືນຕະຫລອດໄປເປັນນິດ. ການພິພາກສາຄົນຕາຍ 11 ແລ້ວຂ້າພະເຈົ້າກໍໄດ້ເຫັນບັນລັງໃຫຍ່ສີຂາວ ແລະ ພຣະອົງຜູ້ທີ່ນັ່ງຢູ່ເທິງບັນລັງນັ້ນ. ເມື່ອພຣະອົງປາກົດ ແຜ່ນດິນໂລກ ແລະ ທ້ອງຟ້າກໍໜີໄປ, ແລະ ບໍ່ມີບ່ອນສຳລັບພວກເຂົາ. 12 ແລະ ຂ້າພະເຈົ້າໄດ້ເຫັນບັນດາທີ່ຄົນຕາຍແລ້ວ ທັງຜູ້ໃຫຍ່ ແລະ ຜູ້ນ້ອຍຢືນຢູ່ຕໍ່ໜ້າບັນລັງ ແລະ ໜັງສືຕ່າງໆກໍໄດ້ເປີດອອກ. ມີໜັງສືອີກເຫລັ້ມໜຶ່ງກໍໄດ້ເປີດອອກເໝືອນກັນ ເຊິ່ງເປັນໜັງສືແຫ່ງຊີວິດ. ຜູ້ທີ່ຕາຍແລ້ວກໍຖືກພິພາກສາຕາມການກະທຳທີ່ພວກເຂົາໄດ້ເຮັດຕາມທີ່ໄດ້ບັນທຶກໄວ້ໃນໜັງສືເຫລົ່ານັ້ນ. 13 ທະເລກໍສົ່ງຄົນທັງຫລາຍທີ່ຕາຍຢູ່ໃນທະເລຄືນມາ, ຄວາມຕາຍ ແລະ ແດນມໍລະນາກໍສົ່ງຄົນທັງຫລາຍທີ່ຕາຍຢູ່ໃນນັ້ນຄືນມາ ແລະ ແຕ່ລະຄົນໄດ້ຖືກພິພາກສາຕາມທີ່ພວກເຂົາໄດ້ເຮັດ. 14 ຫລັງຈາກນັ້ນ ຄວາມຕາຍ ແລະ ແດນມໍລະນາກໍຖືກຖິ້ມລົງໃນບຶງໄຟ. ບຶງໄຟນີ້ແຫລະຄືຄວາມຕາຍຄັ້ງທີສອງ. 15 ຜູ້ໃດທີ່ບໍ່ໄດ້ມີຊື່ຈົດໄວ້ໃນໜັງສືແຫ່ງຊີວິດ ຜູ້ນັ້ນຕ້ອງຖືກຖິ້ມລົງໃນບຶງໄຟ. |
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
Biblica, Inc.