ລູກາ 16 - ພຣະຄຳພີລາວສະບັບສະໄໝໃໝ່ຄຳອຸປະມາເລື່ອງຜູ້ຈັດການທີ່ສະຫລາດ 1 ພຣະເຢຊູເຈົ້າໄດ້ກ່າວກັບພວກສາວົກວ່າ: “ຍັງມີເສດຖີຄົນໜຶ່ງທີ່ຜູ້ຈັດການຂອງເພິ່ນຖືກກ່າວຫາວ່າກຳລັງຜານຊັບສິນຂອງເພິ່ນ. 2 ດັ່ງນັ້ນ ເພິ່ນຈຶ່ງເອີ້ນຜູ້ຈັດການຄົນນັ້ນມາ ແລະ ຖາມວ່າ, ‘ເລື່ອງທີ່ເຮົາໄດ້ຍິນກ່ຽວກັບເຈົ້ານັ້ນເປັນຢ່າງໃດ? ຈົ່ງເອົາບັນຊີທີ່ເຈົ້າຈັດການຢູ່ນັ້ນມາ, ເພາະເຈົ້າບໍ່ສາມາດເປັນຜູ້ຈັດການຕໍ່ໄປໄດ້ອີກ’. 3 “ຜູ້ຈັດການຄົນນັ້ນຄິດໃນໃຈວ່າ, ‘ຈະເຮັດແນວໃດດີ? ນາຍກຳລັງຈະປົດເຮົາອອກຈາກວຽກ. ເຮົາກໍບໍ່ມີແຮງຈະຂຸດດິນ ແລະ ຈະໄປຂໍທານກໍອາຍ. 4 ເຮົາຮູ້ແລ້ວວ່າເຮົາຈະເຮັດຢ່າງໃດດີ ເພື່ອວ່າເມື່ອເຮົາອອກຈາກໜ້າທີ່ນີ້ແລ້ວຈະໄດ້ມີຄົນຕ້ອນຮັບເຮົາເຂົ້າໄປເຮືອນຂອງພວກເຂົາ’. 5 “ດັ່ງນັ້ນ ລາວຈຶ່ງເອີ້ນຜູ້ເປັນໜີ້ຂອງນາຍມາເທື່ອລະຄົນ. ລາວຖາມຄົນທຳອິດວ່າ, ‘ເຈົ້າເປັນໜີ້ນາຍຂອງເຮົາຢູ່ເທົ່າໃດ?’ 6 “ລາວຕອບວ່າ, ‘ເປັນໜີ້ນ້ຳມັນໝາກກອກສາມພັນລິດ’. “ຜູ້ຈັດການຄົນນັ້ນບອກລາວວ່າ, ‘ຈົ່ງນຳເອກະສານຂອງເຈົ້າມາ, ຮີບນັ່ງລົງແກ້ໃຫ້ເປັນໜຶ່ງພັນຫ້າຮ້ອຍ’. 7 “ຫລັງຈາກນັ້ນລາວກໍຖາມຄົນທີສອງວ່າ, ‘ແລະ ເຈົ້າເປັນໜີ້ຢູ່ເທົ່າໃດ?’ “ລາວຕອບວ່າ, ‘ເປັນໜີ້ເຂົ້າຫວີດສາມສິບໂຕນ’. “ຜູ້ຈັດການຄົນນັ້ນບອກລາວວ່າ, ‘ຈົ່ງນຳເອກະສານມາໄວໆ ແລະ ແກ້ໃຫ້ເປັນຊາວສີ່ໂຕນ’. 8 “ແລ້ວນາຍຈຶ່ງຍ້ອງຍໍຜູ້ຈັດການທີ່ບໍ່ສັດຊື່ຄົນນີ້ເພາະລາວໄດ້ເຮັດຢ່າງສະຫລາດ. ເພາະຄົນຝ່າຍໂລກນີ້ສະຫລາດຫລາຍກວ່າຄົນຝ່າຍຄວາມສະຫວ່າງໃນການເຮັດທຸລະກິດກັບຄົນປະເພດດຽວກັນ. 9 ເຮົາບອກພວກເຈົ້າວ່າ, ຈົ່ງໃຊ້ຊັບສົມບັດຝ່າຍໂລກເພື່ອສ້າງມິດສຳລັບພວກເຈົ້າເອງ ເພື່ອວ່າເມື່ອເວລາຊັບນັ້ນໝົດໄປແລ້ວເຈົ້າຈະໄດ້ຮັບການຕ້ອນຮັບເຂົ້າສູ່ບ່ອນຢູ່ອັນຖາວອນເປັນນິດ. 10 “ຜູ້ໃດກໍຕາມທີ່ໄວ້ໃຈໄດ້ໃນສິ່ງເລັກນ້ອຍ ກໍໄວ້ໃຈໄດ້ໃນສິ່ງໃຫຍ່ເໝືອນກັນ, ແລະ ຜູ້ໃດກໍຕາມທີ່ບໍ່ສັດຊື່ໃນສິ່ງເລັກນ້ອຍ ກໍຈະບໍ່ສັດຊື່ໃນສິ່ງໃຫຍ່ເໝືອນກັນ. 11 ດັ່ງນັ້ນ ຖ້າພວກເຈົ້າສັດຊື່ໃນເບິ່ງແຍງຊັບສົມບັດຝ່າຍໂລກບໍ່ໄດ້, ຜູ້ໃດຈະໄວ້ໃຈໃຫ້ພວກເຈົ້າເບິ່ງແຍງຊັບສົມບັດອັນແທ້ຈິງ? 12 ແລະ ຖ້າພວກເຈົ້າໄວ້ໃຈໃຫ້ເບິ່ງແຍງຊັບສິນຂອງຄົນອື່ນບໍ່ໄດ້, ຜູ້ໃດຈະມອບຊັບສິນໃຫ້ເປັນຂອງພວກເຈົ້າ? 13 “ບໍ່ມີຜູ້ໃດສາມາດຮັບໃຊ້ນາຍສອງຄົນໄດ້. ບໍ່ວ່າພວກເຈົ້າຈະກຽດຊັງນາຍຜູ້ນີ້ ແລະ ຮັກນາຍຜູ້ນັ້ນ ຫລື ພວກເຈົ້າຈະອຸທິດຕົນຕໍ່ນາຍຜູ້ນີ້ ແລະ ດູຖູກນາຍຜູ້ນັ້ນ. ພວກເຈົ້າບໍ່ສາມາດຮັບໃຊ້ທັງພຣະເຈົ້າ ແລະ ຮັບໃຊ້ເງິນໄດ້”. 14 ຝ່າຍພວກຟາຣີຊາຍຜູ້ທີ່ຮັກເງິນເມື່ອໄດ້ຍິນເລື່ອງທັງໝົດນີ້ແລ້ວກໍເຢາະເຢີ້ຍພຣະເຢຊູເຈົ້າ. 15 ພຣະອົງກ່າວກັບພວກເຂົາວ່າ, “ພວກເຈົ້າເປັນຄົນທີ່ເຮັດໃຫ້ຕົນເອງຊອບທຳໃນສາຍຕາຄົນອື່ນ, ແຕ່ພຣະເຈົ້າຮູ້ຈັກຈິດໃຈຂອງພວກເຈົ້າ. ສິ່ງທີ່ຄົນທັງຫລາຍຖືວ່າມີຄຸນຄ່າສູງກໍເປັນທີ່ໜ້າລັງກຽດຕໍ່ສາຍຕາຂອງພຣະເຈົ້າ. ຄຳສອນເພີ່ມເຕີມ 16 “ກົດບັນຍັດ ແລະ ຄຳສອນຂອງຜູ້ທຳນວາຍໄດ້ຮັບການປະກາດຕະຫລອດມາຈົນເຖິງສະໄໝຂອງໂຢຮັນ. ຕັ້ງແຕ່ເວລານັ້ນມາ ຂ່າວປະເສີດເລື່ອງອານາຈັກຂອງພຣະເຈົ້າກໍໄດ້ຖືກປະກາດໄປ ແລະ ທຸກຄົນກໍກຳລັງຍາດກັນເຂົ້າໄປໃນອານາຈັກນັ້ນ. 17 ຟ້າ ແລະ ດິນຈະສູນຫາຍໄປ ກໍຍັງງ່າຍກວ່າທີ່ຈຸດໜຶ່ງໃນກົດບັນຍັດຈະຕົກຫລົ່ນ. 18 “ຜູ້ໃດທີ່ຢ່າຮ້າງເມຍຂອງຕົນ ແລະ ໄປແຕ່ງງານກັບຍິງອື່ນ ຜູ້ນັ້ນກໍຫລິ້ນຊູ້ ແລະ ຊາຍໃດທີ່ແຕ່ງງານກັບຍິງທີ່ຖືກຢ່າຮ້າງ ຜູ້ນັ້ນກໍຫລິ້ນຊູ້. ເສດຖີ ແລະ ລາຊາໂຣ 19 “ຍັງມີເສດຖີຄົນໜຶ່ງທີ່ນຸ່ງຊຸດສີມ່ວງ ແລະ ຜ້າຝ້າຍລິນິນເນື້ອລະອຽດດີ ແລະ ໃຊ້ຊີວິດຢ່າງສຸກສະບາຍທຸກມື້. 20 ມີຂໍທານຄົນໜຶ່ງຊື່ລາຊາໂຣ ມີບາດແຜເຕັມໂຕນອນຢູ່ທີ່ປະຕູເຮືອນຂອງເສດຖີ 21 ແລະ ລໍຖ້າກິນອາຫານທີ່ຕົກຈາກໂຕະຂອງເສດຖີ. ແມ່ນແຕ່ໝາກໍຍັງມາເລຍບາດແຜຂອງລາວ. 22 “ຢູ່ຕໍ່ມາ ຂໍທານນັ້ນກໍໄດ້ຕາຍ ແລະ ບັນດາເທວະດາໄດ້ຮັບລາວໄປໄວ້ຢູ່ທາງຂ້າງຂອງອັບຣາຮາມ. ຝ່າຍເສດຖີຄົນນັ້ນກໍຕາຍໄປເໝືອນກັນ ແລະ ຖືກຝັງໄວ້. 23 ເມື່ອຢູ່ໃນນະລົກກໍທຸກທໍລະມານຫລາຍ, ເສດຖີນັ້ນຈຶ່ງເງີຍໜ້າຂຶ້ນເຫັນອັບຣາຮາມຢູ່ແຕ່ໄກ ມີລາຊາໂຣຢູ່ທາງຂ້າງຂອງເພິ່ນ. 24 ດັ່ງນັ້ນ ລາວຈຶ່ງຮ້ອງບອກວ່າ, ‘ອັບຣາຮາມ ບິດາເອີຍ, ສົງສານຂ້ານ້ອຍດ້ວຍ ແລະ ໃຊ້ລາຊາໂຣເອົາປາຍນິ້ວມືຈຸ່ມນ້ຳມາແຕະໃສ່ລີ້ນຂອງຂ້ານ້ອຍໃຫ້ເຢັນລົງ ເພາະຂ້ານ້ອຍທຸກທໍລະມານຫລາຍຢູ່ໃນແປວໄຟນີ້’. 25 “ແຕ່ອັບຣາຮາມຕອບວ່າ, ‘ລູກເອີຍ, ຈົ່ງຈື່ໄວ້ວ່າໃນຕະຫລອດຊີວິດຂອງເຈົ້າ ເຈົ້າໄດ້ຮັບແຕ່ສິ່ງດີ ຂະນະທີ່ລາຊາໂຣໄດ້ຮັບແຕ່ສິ່ງບໍ່ດີ, ແຕ່ດຽວນີ້ລາວໄດ້ຮັບການເລົ້າໂລມໃຈຢູ່ທີ່ນີ້ແລ້ວ ສ່ວນເຈົ້າກໍຢູ່ໃນຄວາມທຸກທໍລະມານ. 26 ນອກຈາກທັງໝົດນີ້ແລ້ວ ລະຫວ່າງພວກເຮົາ ແລະ ພວກເຈົ້າກໍມີເຫວໃຫຍ່ຂວາງກັ້ນຢູ່, ເພື່ອວ່າຜູ້ໃດທີ່ຢາກຈະຂ້າມຈາກທີ່ນີ້ໄປຫາພວກເຈົ້າກໍບໍ່ໄດ້ ຫລື ຜູ້ໃດຈະຂ້າມຈາກບ່ອນນັ້ນມາຫາພວກເຮົາກໍບໍ່ໄດ້’. 27 “ລາວຈຶ່ງຕອບວ່າ, ‘ບິດາເອີຍ, ຖ້າຢ່າງນັ້ນ ຂ້ານ້ອຍຂໍຮ້ອງທ່ານໃຫ້ໃຊ້ລາຊາໂຣໄປຫາຄອບຄົວຂອງຂ້ານ້ອຍດ້ວຍ, 28 ເພາະຂ້ານ້ອຍມີອ້າຍນ້ອງຫ້າຄົນ, ໃຫ້ລາຊາໂຣເຕືອນພວກເຂົາ ເພື່ອວ່າພວກເຂົາຈະບໍ່ມາໃນບ່ອນທີ່ທຸກທໍລະມານນີ້ເໝືອນກັນ’. 29 “ອັບຣາຮາມຕອບວ່າ, ‘ພວກເຂົາມີໂມເຊ ແລະ ບັນດາຜູ້ທຳນວາຍຢູ່ແລ້ວ ຈົ່ງໃຫ້ພວກເຂົາຟັງຄົນເຫລົ່ານັ້ນ’. 30 “ເສດຖີຄົນນັ້ນຈຶ່ງກ່າວວ່າ, ‘ບໍ່ແມ່ນດອກ ອັບຣາຮາມ ບິດາເອີຍ, ແຕ່ຖ້າມີຜູ້ໜຶ່ງເປັນຄືນຈາກຕາຍແລ້ວໄປຫາພວກເຂົາ, ພວກເຂົາກໍຄົງຈະຖິ້ມໃຈເກົ່າເອົາໃຈໃໝ່’. 31 “ແຕ່ອັບຣາຮາມກ່າວກັບລາວວ່າ, ‘ຖ້າພວກເຂົາບໍ່ຟັງໂມເຊ ແລະ ບັນດາຜູ້ທຳນວາຍແລ້ວ, ເຖິງຈະມີຄົນຄືນມາຈາກຕາຍພວກເຂົາກໍຈະບໍ່ຍອມເຊື່ອ’”. |
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
Biblica, Inc.